မၠၣ်၀တံၣ် နီၣ်ဂံၢ်(၂)တိၤတၢ်ဒုးအပူၤ ခီဖျိကျိဖးဒိၣ်အဃိ ၀ါခးကမျၢၢ်သံတဂၤ

လါအ့ဖြ့ၣ် ၂၁ သီႇ ၂၀၂၄ နံၣ်ႇ ခ့ၣ်အဲးစံၣ်

လၢကညီကီၢ်စဲၣ် ကီးတရံးကီၢ်ဆၣ် မၠၣ်၀တံၣ် နီၣ်ဂံၢ်(၂)တိၤ ဖဲမဟါလါအ့ဖြ့ၣ် ၂၀ သီအနံၤ တၢ်ဒုးဆူၣ်ထီၣ်၀ဲလၢ ပယီၤသုးဒီးတၢ်ပၢၢ်ဆၢသုးပာ်ဖှိၣ်အဘၢၣ်စၢၤဒိၣ်ဒိၣ်မုၢ်မုၢ်ဒီး ခီဖျိကျိဖးဒိၣ်အဃိ (၀ါခး)ကမျၢၢ်သံ၀ဲဒၣ်တဂၤ အဂ့ၢ်န့ၣ် ၦၤဘၣ်မူဘၣ်ဒါစံး၀ဲန့ၣ်လီၤႉ

ဖဲမဟါလါအ့ဖြ့ၣ် ၂၀ သီ မုၢ်ထူၣ် ၁၂ နၣ်ရံၣ်ဘျဲၣ်အဆၢကတီၢ်န့ၣ် လၢမၠၣ်၀တံၣ် နီၣ်ဂံၢ်(၂)တိၤ တၢ်ဒုးကဲထီၣ်အခိၣ် အဃၢၤန့ၣ် ခီဖျိကျိဖးဒိၣ်လီၤတဲာ်ပိၢ်ဖးထီၣ်၀ဲဒၣ်လၢ(၀ါခး)သ၀ီလီၢ်လံၤပူၤ အဃိ ကျိဖးဒိၣ်အက့အခီဘၣ်၀ဲဒၣ် ကမျၢၢ်ပိာ်မုၣ်တဂၤအံၤအဟၢဖၢနးနးကျံၤကျံၤသံ၀ဲတဘျီဃီအဂ့ၢ်န့ၣ် လီၢ်က၀ီၤ ၦၤဘၣ်မူဘၣ်ဒါစံး၀ဲန့ၣ်လီၤႉ

အ၀ဲစံး၀ဲလၢ“ၦၤသံတဂၤန့ၣ်မ့ၢ်၀ဲ ဒီၤခ့ၤမၤခၠိၤ အသးနံၣ်အိၣ်၀ဲဒၣ်(၄၅)နံၣ်ႉ အတၢ်န့ၣ်ဘၣ်လၢအကက့ၤဟံအတၢ်ဖိ တၢ်လံၤလၢဟံၣ်ပူၤအခါမီၤနီၤႉတၢ်န့ၣ်ကစံၣ်ဘၣ်လၢအက့ၤဟံ(မၣ်ပိၤတ့ၤ)လၢဟံၣ်ပူၤဘျီန့ၣ်ကျိဖးဒိၣ်အချံန့ၣ် လီၤတဲာ်ဘူးလၢအဟံၣ်ဘျီဘၣ်၀ဲဒၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ

လၢန့ၣ်အမဲာ်ညါဖဲကျိဖးဒိၣ်လီၤတဲာ်ပိၢ်ဖးထီၣ်အဆၢကတီၢ်အခါန့ၣ်ၦၤကမျၢၢ်ဘၣ်ဒိဘၣ်ထံးစ့ၢ်ကီးအိၣ်၀ဲအသိး ကျိဖးဒိၣ်ချံလၢအလီၤတဲာ်အံၤမ့ၢ်ကဘီယူၤတ့ၢ်လီၤ၀ဲဧါ(မ့တမ့ၢ်)တၢ်ပၢၢ်ဆၢသုးကရူၢ်အကျိဖးဒိၣ်ချံဧါန့ၣ် တၢ်တသ့ၣ်ညါ၀ဲ လီၤတံၢ်ဘၣ်အဂ့ၢ်န့ၣ် ၦၤဘၣ်မူဘၣ်ဒါတဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ

ဖဲမဟါလါအဖြ့ၣ် ၂၀ သီ ဂီၤခီ လၢမၠၣ်၀တံၣ် နီၣ်ဂံၢ်(၂)တိၤတကပၤန့ၣ် တၢ်ဒုးဆူၣ်ထီၣ်၀ဲလၢခံခီခံကပၤ အဘၢၣ်စၢၤဒီး ဖဲန့ၣ်ပယီၤသုးအံၤသူ၀ဲကဘီယူၤဟဲခးလီၤ၀ဲတၢ်ဒီတနံၤကျၢၤတုၤလၢဟါခီတကးဒံးဘၣ် ဖဲတနံၤအံၤဂီၤခီအဆၢကတီၢ်စ့ၢ် ကီး ဟဲခးလီၤဒံး၀ဲတၢ်အဖၢမုၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဒ်န့ၣ်အသိးလၢခံသီအတီၢ်ပူၤအံၤခီဖျိတၢ်ဒုးကဲထီၣ်ကဘီယူၤစ့ၢ်ကီးဟဲခးလီၤတၢ်တပယူာ်ဃီအဃိ မၠၣ်၀တံၣ်၀့ၢ်ပူၤ ကမျၢၢ်အဟံၣ်အဃီတၢ်သူၣ်ထီၣ်တဖၣ်အူအီၣ်တကးဒံးဘၣ်ၦၤကမျၢၢ်စ့ၢ်ကီးသံဘၣ်ဒိဘၣ်ထံးအိၣ်၀ဲဒၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

စးထီၣ်လါအ့ဖြ့ၣ် ၁၉ သီတုၤလၢတနံၤအံၤလါအ့ဖြ့ၣ် ၂၁ သီ ဂီၤခီအဆၢကတီၢ်န့ၣ် လၢနီၣ်ဂံၢ်(၂)တိၤအခိၣ် အဃၢၤန့ၣ် ခီဖျိပယီၤသုးကဘီယူၤဟဲခးလီၤဒံးတၢ်တပယူာ်ဃီအဃိ မၠၣ်၀တံၣ်ကမျၢၢ်တဖၣ်လဲၤဃ့ၢ်ထီၣ်၀ဲဒၣ်ဆူ မဲၢ်ဆီးတကပၤ အိၣ်ဒံး၀ဲဒၣ်အဖၢမုၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

တကီၢ်ခါခဲအံၤခီဖျိမၠၣ်၀တံၣ်၀့ၢ်ပူၤတၢ်အိၣ်သးနးဒိၣ်ထီၣ်ကွ့ၢ်ကွ့ၢ်အဃိၦၤကမျၢၢ်လဲၤဃ့ၢ်ထီၣ်လၢမဲၢ်ဆီးတကပၤ အနီၣ်ဂံၢ်ကအိၣ်လၢအကထိလံဒီးၦၤလၢအလဲၤဃ့ၢ်ထီၣ်တဖၣ်အံၤတနီၤန့ၣ်ကၠီၣ်တဲၣ်ၦၤဘၣ်မူဘၣ်ဒါဆီလီၤသုးကျဲၤန့ၢ်၀ဲအလီၢ်အကျဲအိၣ်၀ဲအသိးတနီၤန့ၣ်လဲၤစံၣ်အိၣ်ဆိ၀ဲဒၣ်လၢအဘူးအတံၢ်အသမူသကိးအဟံၣ်စ့ၢ်ကီးအိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ