(KNLA)သုးပာ်ဖှိၣ်ထီၣ်မၤန့ၢ်ကဒီး၀ဲမၠၣ်၀တံၣ် နီၣ်ဂံၢ်(၂)တိၤလၢပယီၤသုးလဲၤစံၣ်အိၣ်၀ဲအံၤ

လါအ့ဖြ့ၣ် ၂၀ သီႇ ၂၀၂၄ နံၣ်ႇ ခ့ၣ်အဲးစံၣ်

ပယီၤသုးခီၣ်သုးရ့ၣ်(ခလရ-၂၇၅)လၢအလဲၤစံၣ်အိၣ်ဖဲကီၢ်ကၠီၣ်တဲၣ်-ကီၢ်ပယီၤကီၢ်ဆၢ မၠၣ်၀တံၣ် နီၣ်ဂံၢ်(၂)တိၤ သ့ၣ်တဖၣ်အံၤ ဖဲတနံၤအံၤလါအ့ဖြ့ၣ် ၂၀ သီ ဂီၤခီအဆၢကတီၢ်န့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA) သုးပာ်ဖှိၣ် ထီၣ်မၤန့ၢ်၀ဲလံအဂ့ၢ်န့ၣ် ဂံၢ်ခီၣ်ထံးၦၤဟ့ၣ်တၢ်ကစီၣ်ဖိ စံး၀ဲန့ၣ်လီၤႉ

အ၀ဲစံး၀ဲလၢ“ယသံကွၢ်တၢ်ပၢၢ်ဆၢသုးကရူၢ်သုးဖိတဖၣ်န့ၣ်အတဲယၤလၢအ၀ဲသ့ၣ်ထီၣ်နီၣ်ဂံၢ်(၂)တိၤန့ၢ်လံႉ မ့မ့ၢ်လၢခးဒြိဒုသီတနၤကျၢၤလီၤႉတၢ်မၢၤဖဲဂီၤခီ ၄ နၣ်ရံၣ်ဘျဲၣ်န့ၣ်အစးထီၣ်သီၣ်အါထီၣ်က့ၤတစဲးႉ တၢ်မၢၤဒ်ပကဲ ၦၤကမျၢၢ်အသိးန့ၣ်ပဘၣ်ကိၢ်က့ၤလၢကဘီယူၤကဟဲက့ၤခးလီၤကဒါတၢ်ႉ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤႉ

ဖဲမဟါလါအ့ဖြ့ၣ် ၁၉ သီ ဟါခီအဆၢကတီၢ်န့ၣ် (KNLA)သုးပာ်ဖှိၣ်က၀ီၤဃာ်၀ဲဒၣ်မၠၣ်၀တံၣ် နီၣ်ဂံၢ်(၂)တိၤ တ့ၢ်လီၤ၀ဲဒၣ် ဒြိမ့ၣ်ပိၢ်ဒီး ဒ်န့ၣ်အသိးကျိဖးဒိၣ်,ဒြိသီၣ်၀ဲဒၣ်တုၤလၢတဂီၤညါအံၤသီၣ်ဟူတုၤဃီၤ၀ဲဒၣ်လၢယိၤကီၢ်တကပၤညါ အဂ့ၢ်န့ၣ် သ့ၣ်ညါဘၣ်န့ၣ်လီၤႉ

ပယီၤသုးလၢအလဲၤစံၣ်အိၣ်ဖဲမၠၣ်၀တံၣ် နီၣ်ဂံၢ်(၂)တိၤသ့ၣ်တဖၣ်အံၤ ခီဖျိအ၀ဲသ့ၣ်တဟ့ၣ်အဃၣ်တပာ်လီၤစုက၀ဲၤ ဘၣ်အိၣ်ခိး၀ဲဒၣ်(စစ်ကူ)အဃိ စးထီၣ်ဖဲမဟါန့ၣ်(KNLA)သုးပာ်ဖှိၣ်ဘၣ်နုာ်လီၤခးအ၀ဲသ့ၣ်ဒ်အံၤလီၤအဂ့ၢ်န့ၣ် ပျီပူၤၦၤဟ့ၣ်တၢ်ကစီၣ်ဖိတဖၣ် စံး၀ဲန့ၣ်လီၤႉ

တကီၢ်ခါခဲအံၤခီဖျိတၢ်ဒုးကဲထီၣ်လၢမၠၣ်၀တံၣ် နီၣ်ဂံၢ်(၂)တိၤအဃိ ၦၤကမျၢၢ်လၢအိၣ်၀့ၢ်ပူၤတဖၣ်တနီၤန့ၣ် လဲၤစံၣ်ထီၣ်လၢယိၤကီၢ်တကပၤအိၣ်၀ဲအဂ့ၢ်န့ၣ် မၠၣ်၀တံၣ်ကမျၢၢ်တဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ

“ၦၤစံၣ်ထီၣ်ဒီဒူၣ်လၢနီၣ်ဂံၢ်(၁)တိၤတကပၤန့ၣ်ႉၦၤသုးဖိမၢအသုးလီၢ်ဘၣ်ယိၣ်၀ဲလၢကဘီယူၤကဟဲခးလီၤတၢ်မီၤနီၤႉ ၦၤလၢအဒံၣ်အဖိအိၣ်ပာ်လၢယိၤကီၢ်တကပၤန့ၣ်တစံၣ်ဘၣ်အ၀ဲသ့ၣ်န့ၣ်ႉတၢ်မၢၤတဂီၤညါအံၤၦၤလဲၤစံၣ်လၢတိၤခိၣ်ထိး တကပၤန့ၣ်အါလၢၦၤသူၣ်က့သးၦၢ်ၦၤဖိဒံဖိသၣ်လီၤႉဒ်ၦၤသုးဖိတဂၤတဲ၀ဲဒၣ်အသိးန့ၣ်ပယီၤသုးအံၤခးၦၤတနၢၤလၢၤဘၣ်ႉအိၣ်ဒၣ်အ၀ဲသ့ၣ်န့ၣ်ကဟဲက့ၤမၤတၢ်ဒီးကဘီယူၤအိၣ်ဒၣ်တၢ်တထံၣ်န့ၣ်လီၤႉမ့မ့ၢ်ၦၤမၠၣ်၀တံၣ်ကမျၢၢ်ဒုခဲအံၤၦၤမံၦၤအိၣ်ဒီးတၢ်ကိၢ်တၢ်ဂီၤကိးဂၤဒဲးလီၤႉနဘၣ်အိၣ်လၢတၢ်သူၣ်ကိၢ်သးဂီၤလဲလဲဘျီနသးဖှီၣ်လၢၤ”အဂ့ၢ်န့ၣ် စံး၀ဲန့ၣ်လီၤႉ

တကီၢ်ခါခဲအံၤလၢမၠၣ်၀တံၣ်၀့ၢ်ပူၤန့ၣ် တၢ်ပၢၢ်ဆၢဖီၣ်စုက၀ဲၤကရူၢ်ကရၢသုးပာ်ဖှိၣ်နုာ်လီၤအိၣ်ခိးတၢ်ဟံးန့ၢ် တၢ်ဘံၣ်တၢ်ဘၢ၀း၀းတရံးဒီးလၢန့ၣ်အမဲာ်ညါတၢ်အိၣ်သးမ့ဆဲးလဲၤသးဒ်အံၤန့ၣ်ခါဆူညါတၢ်ဒုးကဆဲးဆူၣ်ထီၣ်၀ဲဒၣ် သ့ အဂ့ၢ်န့ၣ် မၠၣ်၀တံၣ်ကမျၢၢ်တဖၣ် စံး၀ဲန့ၣ်လီၤႉ

ပယီၤသုး(ခလရ-၂၇၅)သုးရ့ၣ်အၦၤလၢအလဲၤစံၣ်အိၣ်ဖဲမၠၣ်၀တံၣ် နီၣ်ဂံၢ်(၂)တိၤလၢတၢ်လဲၤခးအီၤသ့ၣ်တဖၣ်အံၤန့ၣ် ဖဲအပူၤကွံာ်လါအ့ဖြ့ၣ် ၁၁ သီ အနံၤန့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်ထီၣ်န့ၢ်၀ဲ အ၀ဲသ့ၣ်တၢ် လီၢ်ဒီး ဖဲန့ၣ်ပယီၤသုးတဖၣ်အံၤလဲၤစံၣ်အိၣ်ဆိက့ၤ၀ဲဒၣ်လၢနီၣ်ဂံၢ်(၂)တိၤအံၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ