လါယူၤ ၂၁သီႇ ၂၀၂၄နံၣ်ႇ ခ့ၣ်အဲးစံၣ်ႇ
ကညီကီၢ်စဲၣ်-လူၢ်ပျဲၢ်ကီၢ်ဆၣ်ႇမဲၢ်သ၀ီကျဲတုၤလၢဖၣ်အၣ်၀့ၢ်ကျဲအံၤႇဒ်သိးတၢ်ကသူအီၤလၢတၢ်စိာ်ခီဆှၢ၀ဲကီၢ်ကၠီၣ်တဲၣ်-ကီၢ်ပယီၤကီၢ်ဆၢပနံာ်တၢ်ဖိတၢ်လံၤအဂီၢ်ႇသုးခိးကီၢ်ဆၢ(BGF)တၢၣ်ပီၣ်တဲသကိး၀ဲတၢ်ဒီးကီၢ်ကၠီၣ်တဲၣ်ၦၤဘၣ်မူဘၣ်ဒါတဖၣ်အမဲာ်ညါတဲၣ်ပီၣ်ရဲၣ်ကျဲၤသကိး၀ဲဒီးခ့ၣ်အဲၣ်ယူၣ်-သုးက့(၇)ဖၣ်အၣ်ကီၢ်ရ့ၣ်ၦၤဘၣ်မူဘၣ်ဒါတဖၣ်အဂ့ၢ်ႇသ့ၣ်ညါဘၣ်လၢခ့ၣ်အဲၣ်ယူၣ်အအိၣ်န့ၣ်လီၤႉ
ရၤမတံတီနီၢ်ကစၢၢ်ၦၢ်ပူၤကျဲလီၢ်လံၤတၢ်လီၢ်သ့ၣ်တဖၣ်အပူၤႇတၢ်စူၤခါမူခိၣ်ကလံၤသီၣ်ဂီၤတဘၣ်ဘျီးဘၣ်ဒါဘၣ်ဒီးတၢ်ဒုးတၢ်ယၤအိၣ်၀ဲအဃိႇကျဲတၢ်ဟးထီၣ်က့ၤလီၤကီခဲထီၣ်၀ဲဒီးကီၢ်ဆၢပနံာ်တၢ်ကၤတၢ်ဖိတၢ်လံၤအတၢ်လဲၤတရံးသးဘၣ်တံာ်တာ်၀ဲအဖီခိၣ်ကမျၢၢ်လီၢ်က၀ီၤဖိတဖၣ်သဂၢၢ်ဘၣ်၀ဲတၢ်အိၣ်ဆိးႇအီၣ်အီတၢ်ကီတၢ်ခဲအဃိလၢတၢ်ကသူ၀ဲထံကီၢ်ခံဘ့ၣ်ကီၢ်ဆၢအဘၢၣ်စၢၤမဲၢ်သ၀ီကျဲအံၤအဂီၢ်တၢ်မၤတၢ်တၢၣ်ပီၣ်ရဲၣ်ကျဲၤသကိး၀ဲတၢ်အဂ့ၢ်ႇၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ
သုးခိၣ်ကီၢ်ဆၢ(BGF)ဂုၢ်ကျဲးစၢး၀ဲလၢကဒုးအိၣ်ထီၣ်ကျဲတဘိအံၤန့ၣ်မ့ၢ်ဒ်သိးကမျၢၢ်ထံဖိကီၢ်ဖိတဖၣ်သုသဂၢၢ်ဘၣ်တၢ်ၦ့ၤတၢ်ကလံၤထီၣ်အဂီၢ်လၢၤတဂ့ၤအဃိကျဲအံၤမ့ၢ်အိၣ်ထီၣ်သၦၢ်ကတၢၢ်န့ၣ်လၢကမျၢၢ်တၢ်ဘၣ်ဘျူးဘၣ်ဖှိၣ်အဂီၢ်ကဘၣ်တူၢ်လိာ်အၢၣ်လီၤလၢအကြၢး၀ဲဘၣ်၀ဲလီၤအဂ့ၢ်ႇခ့ၣ်အဲၣ်ယူၣ်သုးက့(၇)ကီၢ်ရ့ၣ်ခိၣ်ပဒိၣ်အီၤမီၤအ့စံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“ဒ်သိးကျဲကဖျိထီၣ်တဘိအဂီၢ်ခီန့ၣ်(BGF)တကပၤန့ၣ်ဃု၀ဲကျဲလၢ-တနံၤဂီၢ်တနံၤဂီၢ်တၢ်ဖိတၢ်လံၤလၢၦၤသူၦၤအီၣ်အီၤလၢကိးမုၢ်နံၤဒဲးတဖၣ်ကလီၤ၀ဲလၢမဲၢ်သ၀ီတကပၤလီၤႉဒီးအ၀ဲသ့ၣ်တဲ၀ဲလၢကဒုးအိၣ်ထီၣ်ကျဲလီၤႉအဃိန့ၣ်ကျဲတဘိန့ၣ်မ့ၢ်အိၣ်ထီၣ်ခီဒုန့ၣ်တဲ၀ဲလၢကဟဲတဲကဒီးတၢ်ဒီးၦၤလီၤႉဒီးပ၀ဲနါက့ပကွၢ်လၢထံဖိကီၢ်ဖိတဖၣ်သုတဘၣ်သဂၢၢ်တၢ်လုၢ်ဒိၣ်ၦ့ၤဒိၣ်တၢ်ကီတၢ်ခဲတဖၣ်ဘၣ်အဂီၢ်လီၤႉအဃိန့ၣ်မ့မ့ၢ်လၢတၢ်ဘၣ်ဘျူးလၢထံဖိကီၢ်ဖိအဂီၢ်အကျိၤအကျဲမ့ၢ်အိၣ်ခီန့ၣ်ပကဘၣ်တူၢလိာ်လီၤႉအ၀ဲအံၤမ့ၢ်ပကွၢ်တၢ်လၢကမျၢၢ်အဂီၢ်လီၤ”အဂ့ၢ်စံး၀ဲန့ၣ်လီၤႉ
လၢန့ၣ်အမဲာ်ညါႇလၢတၢ်ကအိးထီၣ်ကျဲလၢထံကီၢ်ခံဘ့ၣ်အဘၢၣ်စၢၤအံၤန့ၣ်တကီၢ်ခါခဲအံၤမ့ၢ်ဒၣ်ထဲတၢ်ဂုၢ်ကျဲးစၢးအပတီၢ်ဒံးလီၤဒီး( BGF)တကပၤတဒိးန့ၢ်ဘၣ်၀ဲကၠီၣ်တဲၣ်ကီၢ်အတၢ်ဟ့ၣ်တၢ်ပျဲလၢအဖိးမံသဲစးဒံးဘၣ်အဂ့ၢ်စံး၀ဲန့ၣ်လီၤႉ
တကတီၢ်ဃီႇမဲၢ်သ၀ီကျဲမ့အိၣ်ထီၣ်ဘၣ်ဆၣ်တၢ်လ့ၢ်ထီၣ်လ့ၢ်လိၤကန့ၢ်၀ဲဒၣ်ထဲသိလ့ၣ်တီၣ်တၢ်ဖိတၢ်လံၤလၢအစှၤဒီးသိလ့ၣ်တီၣ်ၦၤကူၦၤကညီတဖၣ်လီၤဒီးမ့မ့ၢ်သိလ့ၣ်ဖးဒိၣ်မီထိၣ်လၢအတီဆှၢတၢ်လၢကီၢ်ပူၤဆူရၤမတံတဖၣ်တခီတမ့ၢ်လ့ၢ်ထီၣ်လ့ၢ်လိၤသ့၀ဲဘၣ်အဃိတၢ်လီၤဆီတအိၣ်၀ဲလၢၦၤနီလၢသိလ့ၣ်ဖးဒိၣ်ကစၢ်တဖၣ်အဂီၢ်ဘၣ်အဂ့ၢ်ရၤမတံ-ဖၣ်အၣ်ၦၤနီသိလ့ၣ်ဖိလၢတအဲၣ်ဒိးပာ်ဖျါအမံၤတဂၤပဲာ်ဖးနီၤဖးစံး၀ဲန့ၣ်လီၤႉ
ခီဖျိတၢ်ဒုးတၢ်ယၤအဃိရၤမတံ-ကီးတရံးအ့ရှၢၣ်ကျဲမုၢ်ဖးဒိၣ်အံၤတက့ၤအိးထီၣ်အသးဒံးဘၣ်တုၤ၀ဲလၢခဲအံၤဒီးကျဲလၢတၢ်ဆီတလဲသူအီၤတဘိသနါက့ဟးဂီၤ၀ဲအဃိမီထိၣ်သိလ့ၣ်ဖးဒိၣ်တဖၣ်တီဆှၢတၢ်ကတီၢ်ဘၣ်အိၣ်ကတာ်၀ဲယံာ်ယံာ်အသိးသိလ့ၣ်လီၤတကျၢၢ်တၢ်ဂ့ၢ်ကီသ့ၣ်တဖၣ်ကဲထီၣ်အသးအိၣ်၀ဲအဃိကမျၢၢ်ထံဖိကီၢ်ဖိတဖၣ်သဂၢၢ်ဘၣ်၀ဲကီၢ်ပူၤပနံာ်တၢ်ဖိတၢ်လံၤအၦ့ၤဒိၣ်ထီၣ်၀ဲအတၢ်ဂ့ၢ်ကီန့ၣ်လီၤႉ
ဒ်န့ၣ်အသိးႇတကီၢ်ခါခဲအံၤလၢကဒုးအိၣ်ထီၣ်တၢ်တီဆှၢပနံာ်တၢ်ဖိတၢ်လံၤတဖၣ်အဂီၢ်မဲၢ်သ၀ီကျဲအံၤႇအိၣ်၀ဲလၢခ့ၣ်အဲၣ်ယူၣ်-သုးက့(၇)တၢ်ပၢဟီၣ်က၀ီၤအပူၤန့ၣ်လီၤႉဒီးကျဲအံၤဒီတဘိအပူၤ(BGF)တၢ်အိၣ်ခိးတြဲၤသ့ၣ်တဖၣ်အိၣ်၀ဲအမဲာ်ညါႇသုးကီၣ်ကးတၢ်အိၣ်ခိးတြဲၤအိၣ်၀ဲ(၂)တီၤစ့ၢ်ကီးအဂ့ၢ်ႇသ့ၣ်ညါဘၣ်န့ၣ်လီၤႉ
