ကၠဲးထိၣ်ကီၢ်ဆၣ်ပူၤ လၢကမၤဆှဲလဲတၢ်ခူၣ်ထူပူၤလီၢ်အဂီၢ်ပယီၤသုးဟူးဂဲၤအါထီၣ်လၢကရူၢ်(၃)ဘ့ၣ်အပူၤ

လါယူၤ ၂၆ သီႇ ၂၀၂၄ နံၣ်ႇ ခ့ၣ်အဲးစံၣ်

ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ်အပူၤ ပယီၤသုးအံၤ လၢကမၤဆှဲလဲကွံာ်တၢ်ခူၣ်ဟီၣ်လာ်တၢ်ထူးတၢ်တီၤထူပူၤတၢ်လီၢ်ခဲလၢာ်အဂီၢ် စးထီၣ်ဖဲတခါအံၤလါယူၤထီၣ်န့ၣ် အ၀ဲသ့ၣ်နုာ်လီၤ ဟူးဂဲၤအါထီၣ်၀ဲဒၣ်လၢကရူၢ်(၃)ဘ့ၣ်အပူၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ပယီၤသုးအံၤလၢကနုာ်လီၤမၤဆှဲလဲ၀ဲဒၣ်တၢ်ခူၣ်ဟီၣ်လာ်တၢ်ထူးတၢ်တီၤထူပူၤအံၤအဂီၢ် စးထီၣ်ဖဲတလါအံၤ လါယူၤထီၣ် ၅ သီအနံၤန့ၣ် နုာ်လီၤဟူးဂဲၤ၀ဲဒၣ်လၢကၠဲးထိၣ်ကီၢ်ဆၣ် ဖွ့ဖူကၢ်ႇခရၢၢ်ကရူၢ်ဒီး၀ီၢ်ကျီၢ်ကရူၢ်ပူၤ ဟဲအါထီၣ်၀ဲဒီး ဟူးဂဲၤ၀ဲဒၣ်တုၤလၢခဲအံၤတစုအဂ့ၢ်န့ၣ် ဒူသထူၣ်ကီၢ်ရ့ၣ် ၦၤဘၣ်မူဘၣ်ဒါစံး၀ဲအသိးသ့ၣ်ညါဘၣ် န့ၣ်လီၤႉ

ဘၣ်ဃးဒီးပယီၤသုးနုာ်လီၤဟူးဂဲၤဟဲအါထီၣ်လၢကၠဲးထိၣ်ကီၢ်ဆၣ်ပူၤတၢ်ဂ့ၢ်အဖီခိၣ်အံၤန့ၣ် ဒူသထူၣ်ကီၢ်ရ့ၣ် ၦၤကတိၤတၢ်ပၢ ပဒိၣ်စီၤအ့နဲၤ စံး၀ဲလၢ“ကၠဲးထိၣ်ကီၢ်ဆၣ်ပူၤန့ၣ်စးထီၣ်ဖဲလါယူၤ ၅ သီန့ၣ် ပယီၤသုးဟဲနုာ်လီၤ ဟူးဂဲၤ၀ဲဒၣ် လၢကရူၢ်(၃)ဘ့ၣ်ပူၤအံၤမၤသးတၢ်ဟူးတၢ်ဂဲၤအါထီၣ်တစဲးမီၤႉအ၀ဲသ့ၣ်နုာ်လီၤအံၤအတၢ်ပညိၣ်အိၣ်ဒ်လဲၣ် ဒုပတသ့ၣ်ညါ ခဲလၢာ်ဘၣ်ႉတၢ်မၢၤလၢတၢ်အိၣ်သးအဖီခိၣ်ခီဒုအ၀ဲသ့ၣ်ဟဲနုာ်လီၤသမံသမိး၀ဲဒၣ်တၢ်ခူၣ်ထူလီၢ်ႇမၤအါထီၣ်၀ဲအသုးကျိၤဒီးနုာ်လီၤဟူးဂဲၤ၀ဲဒၣ်လီၤႉဘၣ်ဃးတၢ်ဂ့ၢ်အံၤသ့ၣ်ညါဘၣ်လၢ(ရတခ)တဖၣ်နဲၣ်လီၤတၢ်ကလုၢ်မၢနုာ်လီၤဟူးဂဲၤ၀ဲဖဲကရူၢ်သ့ၣ်တဖၣ်အံၤအပူၤမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ

လၢန့ၣ်အမဲာ်ညါပယီၤသုးတဖၣ်အံၤဖဲအ၀ဲသ့ၣ်နုာ်လီၤဟူးဂဲၤလၢကရူၢ်(၃)ဘ့ၣ်အံၤအပူၤအခါန့ၣ် ခးလီၤကျိဖးဒိၣ် တကးဒံးဘၣ်ကိးမၢ၀ဲလီၢ်က၀ီၤၦၤကမျၢၢ်လၢကဒုးနဲၣ်အ၀ဲသ့ၣ်ကျဲအိၣ်၀ဲအဃိကမျၢၢ်တဖၣ်ပျံၤတၢ်ဖုးတၢ်ဃ့ၢ်ထီၣ် ဟးပလဲာ်သးအိၣ်၀ဲအါမးအဂ့ၢ်န့ၣ် ပဒိၣ်စီၤအ့နဲၤ စံးအါထီၣ်၀ဲန့ၣ်လီၤႉ

ဒ်ကီၢ်ရ့ၣ်ၦၤဘၣ်မူဘၣ်ဒါစံး၀ဲအသိးန့ၣ် ကၠဲးထိၣ်ကီၢ်ဆၣ်အပူၤ တၢ်ခူၣ်ဟီၣ်လာ်တၢ်ထူးတၢ်တီၤထူပူၤတၢ်လီၢ်အိၣ်၀ဲ ၃ တီၤ လၢအိၣ်ဖဲအ့ၤကဘိၤကရူၢ်ႇပလိာ်ခံကရူၢ်ႇ၀ီၢ်ကျီၢ်ကရူၢ်သ့ၣ်တဖၣ်အံၤအပူၤဒီး မ့မ့ၢ်ထူပူၤလၢအိၣ်အ့ၤကဘိၤႇ ၀ီၢ်ကျီၢ်ကရူၢ် အံၤခီန့ၣ်အပူၤကွံာ်လါယူၤ ၅ႇ၈ သီအနံၤန့ၣ် ပယီၤသုးနုာ်လီၤမၤဆှဲလဲသမံသမိးဖီၣ်က့ၤကိး၀ဲၦၤမၤထူဖိ တဖၣ်အိၣ်၀ဲဒီး ဘၣ်ဆၣ်မ့မ့ၢ်ထူပူၤလၢအိၣ်ပလိာ်ခံကရူၢ်အံၤခီန့ၣ်တၢ်နုာ်လီၤသမံသမိးမၤဆှဲလဲ၀ဲတ၀ံၤဒံးဘၣ် အဂ့ၢ်န့ၣ် လီၢ်က၀ီၤၦၤဘၣ် မူဘၣ်ဒါစံး၀ဲအသိးသ့ၣ်ညါဘၣ်န့ၣ်လီၤႉ

လၢတၢ်န့ၣ်အဃိတကီၢ်ခါခဲအံၤတၢ်ခူၣ်ထူလီၢ်တခါလၢအအိၣ်တ့ၢ်ဖဲပလိာ်ခံကရူၢ်ပူၤအံၤ ပယီၤသုးအတၢ်ရဲၣ်တၢ်ကျဲၤ အိၣ်လၢကဆဲးနုာ်လီၤမၤဆှဲလဲ၀ဲအဃိခးလီၤစိ၀ဲကျိဖးဒိၣ်ဆူပလိာ်ခံဒီးတကွံပူၤကရူၢ်(၂)ဘ့ၣ်အံၤအပူၤ အဂ့ၢ်န့ၣ် ပဒိၣ်စီၤအ့နဲၤ စံးအါထီၣ်၀ဲဒ်အံၤန့ၣ်လီၤႉ

“ပမ့ဘၣ်ကွၢ်ဒ်သိးပလိာ်ခံကရူၢ်ပူၤန့ၣ်တၢ်မၤထူလီၢ်အိၣ်တခါစ့ၢ်ႉပယီၤသုးနုာ်လီၤတတုၤဒံးဘၣ်ကွံာ်စိ၀ဲလၢကျိဖးဒိၣ်အ၀ဲသ့ၣ်ပညိၣ်၀ဲလၢကဟဲ၀ဲလၢအတုၤလီၤႉဘၣ်ဆၣ်ဟဲ၀ဲတတုၤဘၣ်ႉအဃိန့ၣ်အ၀ဲသ့ၣ်ကွံာ်စိ၀ဲလၢကျိဖးဒိၣ်ႇကွံာ်လီၤ၀ဲဒၣ်လၢပလိာ်ခံဒီးတကွံပူၤကရူၢ်မၢ်မၢ်လီၤႉမ့ၢ်အ၀ဲသ့ၣ်ပညိၣ်၀ဲလၢကနုာ်လီၤဆှဲလဲ၀ဲဒၣ်ခီဧါန့ၣ်ပတသ့ၣ်ညါလီၤတံၢ်စ့ၢ်ဘၣ်ႉ”အဂ့ၢ်န့ၣ် စံး၀ဲန့ၣ်လီၤႉ

တၢ်ခူၣ်ဟီၣ်လာ်တၢ်ထူးတၢ်တီၤထူပူၤတၢ်လီၢ် ၃ ခါလၢာ်လၢအိၣ်ကၠဲးထိၣ်ကီၢ်ဆၣ်ပူၤအံၤ အိၣ်၀ဲဒၣ်လၢခ့ၣ်အဲၣ်ယူၣ် တၢ်ပၢဆှၢဖီလာ်ဘၣ်ဆၣ် မ့မ့ၢ်အ့ၤကဘိၤႇ၀ီၢ်ကျီၢ်တၢ်လီၢ်ခီန့ၣ်အိၣ်၀ဲဒၣ်လၢခံခီခံကပၤတၢ်ပၢဟီၣ်က၀ီၤပူၤဒီး ဒ်န့ၣ်အသိး ဘၣ်ဃးတၢ်နုာ်လီၤမၤထူလၢကရူၢ်ခံဘ့ၣ်အံၤအပူၤန့ၣ် တၢ်ဒုးသ့ၣ်ညါခ့ၣ်အဲၣ်ယူၣ်ၦၤဘၣ်မူဘၣ်ဒါတအိၣ်၀ဲဘၣ်ဒီး ဘၣ်ဆၣ်မ့မ့ၢ်ထူပူၤလၢအိၣ်ပလိာ်ခံကရူၢ်အံၤခီန့ၣ်တၢ်ဒုးသ့ၣ်ညါ၀ဲကီၢ်ဆၣ်ၦၤဘၣ်မူဘၣ်ဒါအိၣ်၀ဲအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံး၀ဲန့ၣ်လီၤႉ

ဘၣ်ဆၣ်ဟီၣ်လာ်တၢ်ထူးတၢ်တီၤထူပူၤလၢအိၣ်ပလိာ်ခံသ၀ီပူၤလၢပယီၤသုးတၢ်ပညိၣ်အိၣ်လၢကနုာ်လီၤ၀ဲအံၤန့ၣ် စးထီၣ်ဖဲလါယူၤထီၣ် ၅ သီပယီၤသုးနုာ်လီၤမၤဆှဲလဲသမံသမိးထူပူၤဖဲအ့ၤကဘိၤဒီး၀ီၢ်ကျီၢ်၀ံၤလီၢ်ခံဘျီန့ၣ် တၢ်ဆိကတီၢ်ကွံာ်၀ဲတၢ်ခူၣ်ထူတၢ်ဖံးတၢ်မၤတုၤလၢခဲအံၤတစုအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဒ်န့ၣ်အသိးကၠဲးထိၣ်ကီၢ်ဆၣ်ပူၤအပူၤကွံာ်နံၣ်အခါဟီၣ်လာ်တၢ်ထူးတၢ်တီၤထူပူၤတၢ်လီၢ်သ့ၣ်တဖၣ်အံၤ သုးကီၣ်ကး နုာ်ဖီၣ်သမံသမိးက့ၤစိာ်ဟံၦၤသိလ့ၣ်ႇဖီၣ်က့ၤကိး၀ဲဒၣ်တၢ်မၤကစၢ်ဒီးၦၤမၤထူဖိတဖၣ်၀ံၤမၢတၢ်လဲၤရ့ထီၣ်၀ဲလၢစ့ဒီး ဘၣ်ဆၣ်အခါဖဲန့ၣ်ထူပူၤလၢအိၣ်ပလိာ်ခံအံၤတၢ်တစးထီၣ်မၤ၀ဲဒံးဘၣ်အဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံး၀ဲန့ၣ်လီၤႉ

တၢ်မၤကစၢ်ဒီးၦၤမၤထူဖိလၢအဟဲနုာ်လီၤမၤဟီၣ်လာ်တၢ်ထူးတၢ်တီၤဖဲဒူသထူၣ်ကီၢ်ရ့ၣ် ကၠဲးထိၣ်ကီၢ်ဆၣ်ပူၤအံၤ သ့ၣ်တဖၣ်န့ၣ် မ့ၢ်ၦၤအိၣ်ဟဲ၀ဲဒၣ်လၢ၀့ၢ်တကူၣ်ဒီးဆီထံးတကပၤအဂ့ၢ်န့ၣ် ကီၢ်ရ့ၣ်ၦၤဘၣ်မူဘၣ်ဒါစံး၀ဲအသိး သ့ၣ်ညါဘၣ်န့ၣ်လီၤႉ