လါအီကူး ၃ သီ, ၂၀၂၆ နံၣ်, ခ့ၣ်အဲးစံၣ်
ကီၢ်ကၠီၣ်တဲၣ် မဲၢ်လးဘၣ်ကီဘၣ်ခဲဒဲကဝီၤ Zone-c C4 ကဝီၤဒ့အပူၤ ဖဲမဟါလါအီးကူး ၂ သီ မုၢ်ထူၣ် ၁၂း၀၀ နၣ်ရံၣ်ဃၣ်ဃၣ် အဆၢကတီၢ်န့ၣ် ကၠီၣ်တဲၣ်ပှၤဘၣ်မူဘၣ်ဒါဒီးဒဲကဝီၤဘံၣ်ဘၢဖီၣ်န့ၢ်ဝဲ WY ကသံၣ်မူၤဘှီး(၁၄၇)ဖျၢၣ်လၢ ပိၥ်မုၣ်သးစၢ်အနံၣ် (၂၀) တဂၤ အအိၣ် အဂ့ၢ်န့ၣ် သ့ၣ်ညါဘၣ်လၢဒဲကဝီၤပှၤဘၣ်မူဘၣ်ဒါအအိၣ်န့ၣ်လီၤ.
သးစၢ်မုၣ်လၢတၢ်ဖီၣ်န့ၢ်ဝဲ ကသံၣ်မူၤဘှီးလၢအအိၣ်တဂၤအံၤအမံၤမ့ၢ်ဝဲ(Sa Je Dar)အသးနံၣ် အိၣ်ဝဲ ဒံးဝဲဒၣ်ထဲ(၂၀)နံၣ်ဒံးလီၤဒီး အဝဲန့ၣ်စိၥ်ဆါဝဲကသံၣ်မူၤဘှီးအံၤတကးဒံးဘၣ်သူဃုၥ်စ့ၢ်ကီးဝဲအဂ့ၢ်န့ၣ် ဒဲကဝီၤပှၤဘၣ်မူဘၣ်ဒါ စံးဝဲအသိး သ့ၣ်ညါဘၣ် န့ၣ်လီၤ.
ဒ်န့ၣ်အသိး သးစၢ်မုၣ်တဂၤအံၤအမဲၥ်ညါ အဝၤလၢအသးနံၣ်ကအိၣ်ဝဲ(၂၀)ဘျဲၣ်အံၤစ့ၢ်ကီး ခီဖျိပှၤဒိးန့ၢ်တၢ်ကစီၣ်လၢ အဝဲသ့ၣ် ခံဂၤအံၤသူဒီးမၤဆါဝဲကသံၣ်မူၤဘှီးအဃိ ဖဲတၢ်နုၥ်လီၤဖီၣ်ဝဲအခါမ့မ့ၢ်အဝၤခီန့ၣ်စံၣ်ဖျိးထီၣ်တၢ်လူၤဖီၣ်ဝဲတန့ၢ်ဒံးဘၣ် ဘၣ်ဆၣ် မ့မ့ၢ်အမါအံၤ ဒ်ကၠီၣ်တဲၣ်တၢ်သိၣ်တၢ်သီအိၣ်အသိးပှၤဘၣ်မူဘၣ်ဒါဖီၣ်က့ၤကိးအီၤလံအဂ့ၢ်န့ၣ် အဂ့ၢ်န့ၣ် မဲၢ်လးဒဲကဝီၤခိၣ် စီၤဆါဒ့ စံးဝဲန့ၣ်လီၤ.
အဝဲစံးဝဲလၢ“ခဲအံၤဒ်ကၠီၣ်တဲၣ်တၢ်သိၣ်တၢ်သီတၢ်ဘျၢအိၣ်အသိးဒု ကၠီၣ်တဲၣ်ပၢၤကီၢ်က့ၤကိးအီၤလံ. မ့မ့ၢ်လၢအဝၤခီန့ၣ်စံၣ်ဖျိး ပှၤလူၤဖီၣ်အီၤတချုးဒံးဘၣ်. အဘျးစဲန့ၣ်အိၣ်ခံဂၤ အကဲဝဲဒၣ်အဒီမါဝၤလီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤ.
မဲၢ်လးဒဲကဝီၤအပူၤ စးထီၣ်ဖဲတနံၣ်အံၤ(၂၀၂၆)ထီၣ်တုၤလၢတလါအံၤလါအီကူးထီၣ် ၂ သီအံၤန့ၣ် တၢ်ဖီၣ်န့ၢ်ဝဲပှၤစိၥ်ဆါ, သူဝဲ ကသံၣ်မူၤဘှီးဒီးခဲအံၤတဘျီ န့ၣ်အိၣ်လံဝဲ(၂)ဘျီလံဒီး ဒ်န့ၣ်အသိးအပူၤကွံၥ်တၢ်ဖီၣ်န့ၢ်ဝဲအဆိကတၢၢ်တဘျီ အခါန့ၣ်စ့ၢ်ကီး ကၠီၣ်တဲၣ်ပှၤဘၣ်မူဘၣ်ဒါဖီၣ်က့ၤကိးဟံထီၣ်ဖီၣ်ထီၣ်ဝဲအရ့စ့ၢ်ကီးအဂ့ၢ်န့ၣ် ဒဲကဝီၤပှၤဘၣ်မူဘၣ်ဒါစံးဝဲအသိး သ့ၣ်ညါဘၣ်န့ၣ်လီၤ.
တကးဒံးဘၣ်လၢန့ၣ်အမဲၥ်ညါလီၢ်ခံအံၤ ပံၤဝါ လၢအပူၤကွံၥ်တၢ်တထံၣ်အရၤလီၤသးလၢဒဲကဝီၤအပူၤဘၣ်အံၤ စးထီၣ်ဖဲ(၂၀၂၆) အံၤ တၢ်ထံၣ်လၢအရၤလီၤသးဟဲအိၣ်ထီၣ်ဝဲဒီး သးစၢ်(၁၈)နံၣ်တုၤပှၤနီၢ်ဒိၣ်(၄၆)နံၣ်အဘၢၣ်စၢၤ ပှၤသ့ၣ်တဖၣ်အံၤသူဝဲ တကးဒံးဘၣ် လၢတၢ်သူကသံၣ်မူၤဘှီးအပူၤ ပၢၢ်တုၤလၢပိၥ်မုၣ်ပိၥ်မၢၤသးစၢ်လၢအသးနံၣ်တပှဲၤဒံးဘၣ် တဖၣ်သူဟဲအထီၣ် ဝဲအဂ့ၢ်န့ၣ် ဒဲကဝီၤခိၣ် စီၤဆါဒ့ စံးစ့ၢ်ကီးဝဲ န့ၣ်လီၤ.
အဝဲစံးဝဲလၢ“ဖဲ ၂၀၂၆ ထီၣ်အံၤန့ၣ် ပဒဲကဝီၤပူၤအံၤတၢ်မူၤဘှီးဟဲအါထီၣ်လၢပံၤဝါတခါ. မ့ၢ်အဟဲကျဲဖဲလဲၣ်ခီန့ၣ်ခဲအံၤပဃုသ့ၣ် ညါအဖၢမုၢ်လီၤ. ဘၣ်မနုၤလဲၣ်အပူၤကွံၥ် ၂၀၂၄ ၂၀၂၅ ခါန့ၣ်ပတထံၣ်ဘၣ်, ပထံၣ်ထဲပံၤသူလီၤ. ခံအံၤပထံၣ်လၢပံၤဝါန့ၣ် လီၤကမၢကမၣ်ဒိၣ်မးလီၤ”အဂ့ၢ်န့ၣ် စံးဝဲန့ၣ်လီၤ.
အပူၤကွံၥ်နံၣ်တဖၣ်အခါ မဲၢ်လးဒဲကဝီၤအပူၤ တၢ်သူဝဲ WY ကသံၣ်မူၤဘှီး, ပံၤသူ, ထြၢၤမဒီဒီးကသံၣ်ကူးလၢ တၢ်ဃါဃုၥ်ဝဲ ဒီး ခိၤခၤခိၤလၤ ,ပဲၣ်စံၣ်အထံ သ့ၣ်တဖၣ်အံၤ အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဘၣ်ကီဘၣ်ခဲဒဲကဝီၤ(၉)ဘ့ၣ်အကျါမဲၢ်လးဒဲကဝီၤလၢပှၤနီၣ်ဂံၢ်အိၣ်အါကတၢၢ်အံၤ တၢ်ဖီၣ်န့ၢ်ဝဲပှၤစိၥ်ဆါကသံၣ်မူၤဘှီးဒီး ပှၤသူကသံၣ်မူၤဘှီးအိၣ်ဝဲတလီၢ်လီၢ်အသိး ကသံၣ်မူၤဘှီးသ့ၣ်တဖၣ်အံၤမ့ၢ်အအိၣ်ဟဲနုၥ်လီၤကျဲဖဲလဲၣ်န့ၣ်တုၤလၢခဲအံၤ ထံၣ်ဘၣ်လၢတၢ်တဲဖျါထီၣ်ဝဲလၢအဖိးသဲစးတအိၣ်ဒံးဘၣ်န့ၣ်လီၤ.
ဒ်န့ၣ်အသိး မဲၢ်လးဒဲကဝီၤဟးထီၣ် ထံလီၤသံးကၠီၣ်တဲၣ်တၢ်သမံသမိးတြဲၤလၢတၢ်ဖီၣ်န့ၢ်ဝဲကသံၣ်မူၤဘှီးတလီၢ်လီၢ်အံၤန့ၣ် အဘူးကတၢၢ်ဖဲလါယူၤလံ ၁၂ သီ အနံၤန့ၣ်စ့ၢ်ကီး တၢ်ဖီၣ်န့ၢ်ဝဲ စီၤ Star Htoo ကညီပှၤသးဝံၣ်တၢ်ဖိလၢအအိၣ်ဟဲက့ၤလၢ ကီၢ်အမဲရကၤ ထံကီၢ်အံၤဃုၥ်ဒီးပံၤဝါ ကဲထီၣ်ဒံးဝဲ ဒၣ်န့ၣ်လီၤ.
