မဲၢ်လးဒဲက၀ီၤပူၤ လၢကဟဲဟီၣ်ခိၣ်ဒီဘ့ၣ်ဘၣ်ကီဘၣ်ခဲမုၢ်နံၤအဂီၢ်တၢ်တီခိၣ်ရိၣ်မဲမၤ၀ဲတၢ်တ့ပြၢတၢ်ဂီၤတခါ

လါယူၤ ၁၁ သီႇ ၂၀၂၄ နံၣ်ႇ ခ့ၣ်အဲးစံၣ်

ကီၢ်ကၠီၣ်တဲၣ်-ကီၢ်ပယီၤကီၢ်ဆၢ မဲၢ်လးဘၣ်ကီဘၣ်ခဲဒဲက၀ီၤအပူၤ တလါအံၤလါယူၤလၢကလီၤဘၣ်၀ဲ ဟီၣ်ခိၣ်ဒီဘ့ၣ်ဘၣ်ကီဘၣ်ခဲမုၢ်နံၤအဖီခိၣ်အံၤန့ၣ် ၦၤကၠိဖိသူၣ်ဘီၣ်သးစၢ်ဃုာ်ဒီးၦၤအိၣ်ဒဲက၀ီၤပူၤတဖၣ်အဂီၢ် ဒဲက၀ီၤၦၤဘၣ်မူဘၣ်ဒါတီခိၣ်ရိၣ်မဲဒုးအိၣ်ထီၣ်မၤ၀ဲတၢ်တ့ပြၢတၢ်ဂီၤတၢ်ရဲၣ်တၢ်ကျဲၤတခါအဂ့ၢ်န့ၣ် သ့ၣ်ညါဘၣ်န့ၣ်လီၤႉ

မဲၢ်လးဘၣ်ကီဘၣ်ခဲဒဲက၀ီၤအပူၤ လၢကဟဲတလါအံၤလါယူၤ ၂၀ သီအနံၤန့ၣ် တၢ်ကမၤ၀ဲဒၣ်(World Refugee Day) လၢက၀ီၤဒိၣ်(Zone-c)ဖုကိပျီအံၤဒီး လၢမုၢ်နံၤလီၤဘၣ်ဘျီ၀ဲအံၤအဖီခိၣ် ဒဲက၀ီၤၦၤဘၣ်မူဘၣ်ဒါတီခိၣ်ရိၣ်မဲ ဒုးအိၣ်ထီၣ်၀ဲ တၢ်တ့ပြၢတၢ်ဂီၤတခါလၢ ၦၤဒဲက၀ီၤဖိတဖၣ်အဂီၢ်အဂ့ၢ်န့ၣ် မဲၢ်လးဒဲက၀ီၤခိၣ် စီၤသးကၢ စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤႉ

အ၀ဲစံး၀ဲလၢ“တနံၣ်ညါအံၤခီန့ၣ်ၦၤမၤပြၢက့ၤ၀ဲလၢတၢ်တ့ပြၢတၢ်ဂီၤမီၤနီၤႉၦၤဟ့ၣ်ဃုာ်၀ဲဒီးတၢ်ဂ့ၢ်ခိၣ်တီႇတနံၣ်ဒီး တနံၣ်န့ၣ်တၢ်ဂ့ၢ်ခိၣ်တီတဒ်သိးလိာ်သးဘၣ်ႉတၢ်ဂ့ၢ်ခိၣ်တီခီန့ၣ်(UNHCR)ထုးထီၣ်န့ၢ်ၦၤႉမ့မ့ၢ်တၢ်မၤဖျါထီၣ်က့ၤအမိၢ်လံၤမိၢ်ၦၢ်ခီန့ၣ်အိၣ်ဒၣ်ပဒဲက၀ီၤကမံးတံာ်ဒီးၦၤဒဲက၀ီၤဖိတဖၣ်မၤ၀ဲလီၤႉဒီးၦၤလၢအဲၣ်ဒိးမၤတၢ်ဟူးတၢ်ဂဲၤ(activity) ဖဲနံၤ၀ဲန့ၣ် အ၀ဲသ့ၣ်လဲၤမၤ၀ဲတၢ်ဟူးတၢ်ဂဲၤသ့လီၤ”အဂ့ၢ်န့ၣ် စံး၀ဲန့ၣ်လီၤႉ

တၢ်ပြၢဘျီ၀ဲအံၤတၢ်နီၤဖးလီၤ၀ဲဒၣ်(၃)ပတီၢ်လၢကမ့ၢ်၀ဲ ဖိသၣ်(၁၅)နံၣ်ဆူဖီလာ်တပတီၢ်ႇ ဖိသၣ်(၁၅-၁၈)နံၣ် တပတီၢ်ႇ သးစၢ်(၁၈)နံၣ်ဆူဖီခိၣ်သ့ၣ်တဖၣ်ဒီး ဒ်န့ၣ်အသိး တၢ်ဂီၤလၢတၢ်ကဘၣ်တ့အီၤတဖၣ်န့ၣ်အခီပညီ ကဘၣ်ဘၣ်ထွဲလိာ် အသးဒီးတၢ်ပြၢခိၣ်တီလၢ(UNHCR)ထုးထီၣ်၀ဲလၢအမ့ၢ် “ဟီၣ်ခိၣ်တဘ့ၣ်လၢတူၢ်လိာ်မုာ်ၦၤဘၣ်ကီဘၣ်ခဲဖိ”အဂ့ၢ်န့ၣ် သ့ၣ်ညါဘၣ်န့ၣ်လီၤႉ

လၢန့ၣ်အမဲာ်ညါတၢ်ဂီၤလၢတၢ်တ့အီၤသ့ၣ်တဖၣ်တၢ်ကဘၣ်ဆှၢထီၣ်အီၤဆဲးခံကတၢၢ်ဖဲခဲမုၢ်ဆ့ၣ်လါယူၤ ၁၂ သီဒီး မ့မ့ၢ်လၢၦၤကၠိဖိန့ၣ်ဆှၢထီၣ်အီၤဆူကၠိသရၣ်/မုၣ်အအိၣ်သ့၀ဲဒီး မ့တမ့ၢ်ၦၤကၠိဖိဘၣ်ခီန့ၣ်ဆှၢထီၣ်အီၤဆူက၀ီၤဒ့ခိၣ် (မ့တမ့ၢ်) VRC ရူႇ UNHCR ရူ သ့၀ဲဒၣ်အဂ့ၢ်န့ၣ် ဒဲက၀ီၤၦၤဘၣ်မူဘၣ်ဒါစံး၀ဲန့ၣ်လီၤႉ

တကတီၢ်ဃီတၢ်ဂီၤလၢတၢ်တ့အီၤသ့ၣ်တဖၣ်အံၤ(UNHCR)ၦၤဘၣ်မူဘၣ်ဒါကဃုထၢထီၣ်ဒုးသ့ၣ်ညါဟ့ၣ်လီၤက့ၤ၀ဲ ခိၣ်ဖးဖဲလါယူၤ ၂၀ သီလၢအလီၤဘၣ်၀ဲဟီၣ်ဒီဘ့ၣ်ဘၣ်ကီဘၣ်ခဲမုၢ်နံၤတၢ်ရဲၣ်တၢ်ကျဲၤပူၤအံၤဒီးတကးဒံးဘၣ် တၢ်ဂီၤသ့ၣ်တဖၣ်အံၤတၢ်ကပာ်ဖျါဒုးနဲၣ်ဃုာ်၀ဲလၢမုၢ်နံၤတၢ်ရဲၣ်တၢ်ကျဲၤအပူၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ

မဲၢ်လးဘၣ်ကီဘၣ်ခဲဒဲက၀ီၤအံၤကိးမုၢ်နံၣ်ဒဲးမ့တုၤဃီၤလၢဘၣ်ကီဘၣ်ခဲမုၢ်နံၤအံၤလံန့ၣ် ညီနုၢ်ဒဲက၀ီၤၦၤဘၣ်မူဘၣ်ဒါ တီခိၣ်ရိၣ်မဲဒုးအိၣ်ထီၣ်မၤ၀ဲတၢ်ပြၢကိးမုၢ်နံၤဒဲးဒီးအပူၤကွံာ်ဖဲမဟိတနံၣ်န့ၣ်တၢ်မၤ၀ဲတၢ်ပြၢဘၣ်ဃးတၢ်ဂဲၤဒိပူ အဂ့ၢ်န့ၣ် ဒဲက၀ီၤၦၤဘၣ်မူဘၣ်ဒါစံး၀ဲအသိး သ့ၣ်ညါဘၣ်န့ၣ်လီၤႉ

တကီၢ်ခါခဲအံၤဒ်တၢ်မၤနီၣ်စရီပူၤအိၣ်၀ဲအသိးန့ၣ် မဲၢ်လးဘၣ်ကီဘၣ်ခဲဒဲက၀ီၤအပူၤ ဟံၣ်ခိၣ်အိၣ်၀ဲအဖျၢၣ် (၆၀၀၀)ဃၣ်ဃၣ်ဒီး ၦၤနီၣ်ဂံၢ်ခဲလၢာ်ပာ်ဖှိၣ်အိၣ်၀ဲအဂၤ(၃၀၀၀၀)ဃၣ်ဃၣ်အဂ့ၢ်န့ၣ် ဒဲက၀ီၤၦၤဘၣ်မူဘၣ်ဒါ စံး၀ဲန့ၣ်လီၤႉ