ကၠဲးထိၣ်ကီၢ်ဆၣ် ပယီၤသုးလၢအဟဲထီၣ်တဖၣ်ဒီး(KNLA)ဘၢၣ်စၢၤတၢ်ဒုးကဲထီၣ် ပယီၤသုးသံ(၃)ဂၤ

လါယူၤလံ ၁၉ သီႇ ၂၀၂၄ နံၣ်ႇ ခ့ၣ်အဲးစံၣ်

ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ်အပူၤ ဖဲမဟါလါယူၤလံ ၁၈ သီ အနံၤ လၢဖွ့ဖူကၢ်ကရူၢ် ပနွဲၢ်လူၢ်သ၀ီဃၢၤ ပယီၤသုးကျိၤလၢအဟဲထီၣ်သ့ၣ်တဖၣ်အံၤဒီး(KNLA)အဘၢၣ်စၢၤ တၢ်ဒုးကဲထီၣ် အဃိ ပယီၤသုးတကပၤသံ၀ဲဒၣ်(၃)ဂၤဒီးဘၣ်ဒိဘၣ်ထံးအိၣ်၀ဲအဂ့ၢ်န့ၣ် သ့ၣ်ညါဘၣ်လၢဂံၢ်ခီၣ်ထံးတၢ်ကစီၣ် အအိၣ် န့ၣ်လီၤႉ

ကၠဲးထိၣ်ကီၢ်ဆၣ်ပူၤ ဖဲမဟါဂီၤခီ ၈း၀၀ နၣ်ရံၣ်ဃၣ်ဃၣ်အဆၢကတီၢ် ပယီၤသုးလၢအနီၣ်ဂံၢ်ကအိၣ်(၁၀၀)ဃၣ်ဃၣ် အံၤဖဲအကနုာ်လီၤဆူပနွဲၢ်လူၢ်သ၀ီပူၤအဆၢကတီၢ်ဟဲတုၤလၢသ၀ီချၢရီဘၢၣ်ကျီးအခါန့ၣ် တၢ်ဒုးကဲထီၣ်၀ဲဒီး ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးရ့ၣ် ၃ သုးပာ်ဖှိၣ်အဃိ ဒုၣ်ဒါတကပၤသံဘၣ်ဒိဘၣ်ထံးကဲထီၣ်၀ဲဒၣ် ဒ်အံၤလီၤအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံး၀ဲန့ၣ်လီၤႉ

ဒ်လီၢ်က၀ီၤကမျၢၢ်စံး၀ဲအသိးန့ၣ်ဒုၣ်ဒါသံ(၃)ဂၤအကျါပၣ်ဃုာ်သုးခိၣ်လၢအပတီၢ်အိၣ်တဂၤဒီး တၢ်ဃးခံခီခံကပၤ တၢ်ဒုးစဲးပြဲးကဲထီၣ်အဂ့ၢ်ႇဒုၣ်ဒါတၢ်သံတၢ်ဘၣ်ဒိဘၣ်ထံးတၢ်အိၣ်သးအဂ့ၢ်အကျိၤန့ၣ် ကၠဲးထိၣ်ကီၢ်ဆၣ် ၦၤဘၣ်မူဘၣ်ဒါ တဂၤ စံးဘၣ် ခ့ၣ်အဲးစံၣ်–ကညီတၢ်ကစီၣ်ဒ်အံၤန့ၣ်လီၤႉ

“တၢ်ဒုးကဲထီၣ်န့ၣ်ဖဲပနွဲၢ်လူၢ်ဃၢၤထံးရီဘၢၣ်ကျီးကပၤန့ၣ်လီၤႉတၢ်ဒုးန့ၣ်ကဲထီၣ်တစဲးဖိလီၤႉကရူၢ်ပာ်ဖျါထီၣ်ၦၤလၢ ဒုၣ်ဒါ သံ၀ဲဒၣ်(၃)ဂၤႉၦၤတဲလၢအ၀ဲခံဂၤန့ၣ်ခူၣ်လီၤ၀ဲဖဲန့ၣ်လီၤႉအ၀ဲတဂၤခီန့ၣ်ကဘၣ်ဖဲဟါခီ ၄း၀၀ နၣ်ရံၣ်န့ၣ် ဟဲနုာ်၀ဲဒၣ် လၢသ၀ီခိၣ်ထိးသီခါဖၠၣ်ဟဲက့ၤယိာ်၀ဲဒီးၦၤသံစိၣ်တစိၣ်မီၤနီၤႉၦၤသံစိၣ်တစိၣ်န့ၣ်ကဘၣ်မ့ၢ်သုးခိၣ်သုးနၢ် ဒ်န့ၣ်ဧါသၢၣ်ႉ ဖဲမဟါန့ၣ်အ၀ဲသ့ၣ်မံ၀ဲဖဲပနွဲၢ်လူၢ်သ၀ီပူၤန့ၣ်လီၤ”အဂ့ၢ်န့ၣ် စံး၀ဲန့ၣ်လီၤႉ

လၢန့ၣ်အမဲာ်ညါဖဲတနံၤအံၤဂီၤခီ ၆ နၣ်ရံၣ်ဃၣ်ဃၣ်အဆၢကတီၢ်န့ၣ် ပယီၤသုးလၢအနုာ်လီၤမံလၢသ၀ီပူၤသ့ၣ် တဖၣ်အံၤ အ၀ဲသ့ၣ်ဟးထီၣ်က့ၤလၢသ၀ီပူၤက့ၤလီၤယိာ်ဃုာ်၀ဲၦၤသံစိၣ်၀ဲန့ၣ်အဂ့ၢ်န့ၣ် ၦၤဘၣ်မူဘၣ်ဒါတဂၤဃီ၀ဲန့ၣ် စံးအါထီၣ်၀ဲ န့ၣ်လီၤႉ

ဒ်န့ၣ်အသိးမဟါခီဖျိတၢ်ဒုးကဲထီၣ်ဒီးပယီၤသုးကလၢၤလၢအိၣ်ဘူးဖဲန့ၣ်သ့ၣ်တဖၣ်ခးလီၤဆိကျိဖးဒိၣ်အဃိ ပနွဲၢ်လူၢ်သ၀ီဖိခဲလၢာ်ဘၣ်ဃ့ၢ်ထီၣ်၀ဲအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံး၀ဲန့ၣ်လီၤႉ

“ဖဲပနွဲၢ်လူၢ်သ၀ီဒုၦၤကမျၢၢ်အစံၣ်ထီၣ်ကိးဂၤဒဲးလီၤႉအ၀ဲသ့ၣ်သုးတဒၢကွံာ်သးလၢသ၀ီလၢအတဘူးဒီးဒုၣ်ဒါဘၣ်ႇ လၢသ၀ီဃၣ်ဃၢၤမီၤနီၤႉတနံၤညါအံၤဒုၦၤသ၀ီဖိက့ၤအိၣ်တနီၤလံဧါသၢၣ်ႉခဲအံၤပမၢၦၤဟးဃုသ့ၣ်ညါက့ၤၦၤဃ့ၢ်မှံဟးဖျိးတဖၣ်န့ၣ်အစရီမီၤနီၤႉ”အဂ့ၢ်န့ၣ် စံး၀ဲန့ၣ်လီၤႉ

ကၠဲးထိၣ်ကီၢ်ဆၣ်အပူၤ စးထီၣ်ဖဲအပူၤကွံာ်လါယူၤထီၣ်န့ၣ် ပယီၤသုးအံၤလၢကမၤဆှဲလဲကွံာ်တၢ်ခူၣ်ဟီၣ်လာ်တၢ်ထူး တၢ်တီၤလၢတၢ်လီၢ်(၃)တီၤအံၤအဂီၢ် အ၀ဲသ့ၣ်နုာ်လီၤဟူးဂဲၤအါထီၣ်၀ဲဒၣ်လၢဖွ့ဖူကၢ်ႇခရၢၢ်ဒီး၀ီၢ်ကျီၢ်ကရူၢ် ဒူသ၀ီ တဖၣ် အံၤအပူၤဒီး ဖဲန့ၣ်တၢ်ဒုးစဲးပြဲးကဲထီၣ်၀ဲလၢခံခီခံကပၤအဘၢၣ်စၢၤခဲအံၤခဲအံၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ