ကၠဲးထိၣ်ကီၢ်ဆၣ် တၢ်ဘၣ်သဂၢၢ်ခးလိာ်သးကဲထီၣ်ႇကျိဖးဒိၣ်အဃိ ကမျၢၢ်သံ ၆ ဂၤႇ သ၀ီ ၆ ဖျၢၣ်ဘၣ်ဃ့ၢ်ထီၣ်

လါယူၤလံ ၂၄ သီႇ ၂၀၂၄ နံၣ်ႇ ခ့ၣ်အဲးစံၣ်

ခ့ၣ်အဲၣ်ယူၣ် ဒူသထူၣ်ကီၢ်ရ့ၣ် ကၠဲးထိၣ်ကီၢ်ဆၣ်အပူၤ ဖဲမဟါလါယူၤလံ ၂၃ သီအနံၤ လၢကၠီၣ်တါလ့ သ၀ီဃၢၤန့ၣ် တၢ်ဘၣ်သဂၢၢ်ခးလိာ်သးကဲထီၣ်၀ဲလၢပယီၤသုးဒီးတၢ်ပၢၢ်ဆၢသုးပာ်ဖှိၣ်ကရူၢ်အဘၢၣ်စၢၤ ဖဲန့ၣ်ခီဖျိသုးကီၣ်ကးအံၤ ခးလီၤကဒါကျိဖးဒိၣ်ဆူသ၀ီပူၤအဃိ ကမျၢၢ်သံ(၆)ဂၤႇ ဘၣ်ဒိ(၈)ဂၤ ဒီး ဒူသ၀ီ(၆)ဖျၢၣ်ဘၣ်ဃ့ၢ် ထီၣ်၀ဲ အဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါစံး၀ဲန့ၣ်လီၤႉ

ဖဲမဟါလါယူၤလံ ၂၃ သီ ဂီၤခီ ၁၀ နၣ်ရံၣ် ဒီး ၁၁ နၣ်ရံၣ်ဘျဲၣ်အဆၢကတီၢ်န့ၣ် လၢဖွ့ဖူကၢ်ကရူၢ် ကၠီၣ်တါလ့သ၀ီဃၢၤန့ၣ် တၢ်ဒုးကဲထီၣ်၀ဲဒၣ်လၢဟီၣ်က၀ီၤတၢ်ပၢၢ်ဆၢသုးပာ်ဖှိၣ်ကရူၢ်ဒီးပယီၤသုးအဘၢၣ်စၢၤခံဘျီဒီး ဖဲန့ၣ်၀ံၤခီဖျိသုးကီၣ်ကး(၆၀၂)ပညိၣ်ခးလီၤကျိဖးဒိၣ်အဖျၢၣ်(၁၀)ဘျဲၣ်ဆူဒူသ၀ီပူၤအဃိ ၦၤကမျၢၢ်သံ ဘၣ်ဒိဘၣ်ထံးဘၣ်ဟဲကဲ ထီၣ်သးဒ်အံၤလီၤအဂ့ၢ်န့ၣ် လီၢ်က၀ီၤကမျၢၢ်လၢအိၣ်ဖဲန့ၣ်တဂၤစံး၀ဲန့ၣ်လီၤႉ

အ၀ဲစံး၀ဲလၢ“တၢ်ဒုးကဲထီၣ်အခီၣ်ထံးတဘျီန့ၣ်အတိနိၣ်ဒီးပဂၢၤသးသုးမီၤႉခးလိာ်သး၀ံၤအ၀ဲသ့ၣ်ဂုၤလီၢ်ခံ ထီၣ်လၢ တၢ်မဲာ်ညါတစဲးဖိဘျီတိနိၣ်ဒီးပၦၤခးထးဖဲန့ၣ်တဘျီအဃိ တၢ်ခးလိာ်သးကဲထီၣ်၀ဲခံဘျီမီၤနီၤႉ တၢ်ဒုးကဲထီၣ်၀ံၤဘျီ အ၀ဲသ့ၣ်ခးလီၤကျိဖးဒိၣ်ႉလၢဖွ့ဖူကၢ်ခီန့ၣ်ကျိဖးဒိၣ်လီၤတဲာ်အဃိၦၤသ၀ီဖိသံ(၆)ဂၤ,ဘၣ်ဒိ(၈)ဂၤ မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

လၢန့ၣ်အမဲာ်ညါဖဲမဟါတၢ်ဒုးကဲထီၣ်သး၀ံၤပယီၤသုးသ့ၣ်တဖၣ်အံၤနုာ်လီၤဒွဲၣ်အူအီၣ်၀ဲ(ကၠီၣ်တါလ့)သ၀ီပူၤဟံၣ် ၂ ဖျၢၣ် တကးဒံးဘၣ် ခီဖျိကျိဖးဒိၣ်အံၤအဃိၦၤကမျၢၢ်အဟံၣ်အဃီဃုာ်ဒီးသီခါဖၠၣ်တၢ်သူၣ်ထီၣ်စ့ၢ်ကီးဟးဂီၤ၀ဲဒၣ် အသိးဖွ့ဖူကၢ် ကရူၢ် ဒူသ၀ီတစှၤန့ၢ်(၆)ဖျၢၣ်ဘၣ်ဃ့ၢ်ထီၣ်၀ဲဒၣ်အဂ့ၢ်န့ၣ် သ့ၣ်ညါဘၣ်လၢဂံၢ်ခီၣ်ထံးၦၤဟ့ၣ်တၢ်ကစီၣ်ဖိ အအိၣ်န့ၣ်လီၤႉ

ဒ်လီၢ်က၀ီၤၦၤဘၣ်မူဘၣ်ဒါစံး၀ဲအသိးန့ၣ်ကျိဖးဒိၣ်အဃိဒူသ၀ီလၢအဃ့ၢ်ထီၣ်သ့ၣ်တဖၣ်န့ၣ်မ့ၢ်၀ဲ ကၠီၣ်တါလ့သ၀ီႇ ဖွ့ဖူကၢ်ႇထံပူၤ၀ါႇကဆီပူၤႇပနွဲၢ်လူၢ်ႇနိၣ်ဖးဒိၣ်သ၀ီဖိသ့ၣ်တဖၣ်ဒီး ဘၣ်ဆၣ်တကီၢ်ခါခဲအံၤမ့မ့ၢ်လၢနိၣ်ဖးဒိၣ်ဒီး ဖွ့ဖူကၢ်သ၀ီဖိကမျၢၢ်တဖၣ်ခီန့ၣ်ဟဲက့ၤအိၣ်လၢသ၀ီပူၤလံအဂ့ၢ်န့ၣ် သ့ၣ်ညါဘၣ်န့ၣ်လီၤႉ

မဟါတၢ်ဒုးကဲထီၣ်လၢခံဘျီအတီၢ်ပူၤအံၤတၢတဘျီန့ၣ်ပယီၤသုးတကပၤသံ(၃)ဂၤႇဘၣ်ဒိ(၂)ဂၤဒီးလၢခံ၀ီတ၀ီန့ၣ် ခီဖျိတၢ်လဲၤမၤဆှဲတၢ်လီၢ်အဖၢမုၢ်အဃိဒုၣ်ဒါသံဘၣ်ဒိဘၣ်ထံးအနီၣ်ဂံၢ်ခီန့ၣ်မၤလီၤတံၢ်တသ့ဒံးဘၣ်အဂ့ၢ်န့ၣ် လီၢ်က၀ီၤၦၤဘၣ်မူ ဘၣ်ဒါစံး၀ဲန့ၣ်လီၤႉ

ဒ်န့ၣ်အသိးကၠဲးထိၣ်ကီၢ်ဆၣ်ပူၤ ဖဲအပူၤကွံာ်လါယူၤလံ ၂၂ သီအနံၤ တၢ်ပၢၢ်ဆၢသုးကရူၢ်လဲၤခး၀ဲသုးကီၣ်ကး (သ့ၣ်စယး) ပၢၤကီၢ်၀ဲၤလီၢ်ဒီးဖဲန့ၣ်ခီဖျိအမျိာ်သုး(၃၁၀) ခးလီၤစၢၤကျိဖးဒိၣ်တစှၤန့ၢ်(၁၀)ဖျၢၣ်ဆူ ဒူသ၀ီပူၤ အဃိ(ယွၤလ့သ၀ီ)ကမျၢၢ်သံ ၁ ဂၤႇ ဘၣ်ဒိ ၂ ဂၤကဲထီၣ်သးဒံးအဂ့ၢ်န့ၣ် သ့ၣ်ညါဘၣ်န့ၣ်လီၤႉ