လါအီကူာ် ၂၂ သီႇ ၂၀၂၄ နံၣ်ႇ ခ့ၣ်အဲးစံၣ်
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ် ကၠဲးထိၣ်ကီၢ်ဆၣ် ဖွ့ဖူကၢ်ကရူၢ်အပူၤ ပယီၤသုးသိလ့ၣ်လၢအဟဲထီၣ်(၂)ခိၣ် ခီဖျိ(KNLA) တၢ်ပၢၢ်ဆၢသုးပာ်ဖှိၣ်ကရူၢ် ခိးခးအ၀ဲသ့ၣ်လၢကျဲအဃိ သံ၀ဲဒၣ်(၂)ဂၤဒီးသိလ့ၣ်အူအီၣ်၀ဲဒၣ်တခိၣ် အဂ့ၢ်န့ၣ် လီၢ်က၀ီၤ ၦၤဘၣ်မူဘၣ်ဒါစံး၀ဲန့ၣ်လီၤႉ
ကၠဲးထိၣ်ကီၢ်ဆၣ် ဖွ့ဖူကၢ်ကရူၢ် အ့ၤကဘိၤသ၀ီဃၢၤ ဖဲလါအီကူာ် ၂၀ သီ မုၢ်ထူၣ် ၁၂ နၣ်ရံၣ်အဆၢကတီၢ် ပယီၤသုးသိလ့ၣ်(၂)ခိၣ်လၢအဟဲထီၣ်အံၤခီဖျိဟီၣ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ်(၃) သုးပာ်ဖှိၣ် ခိးခး၀ဲလၢကျဲအဃိသိလ့ၣ်အူအီၣ်ဒီးပယီၤသုးသံကဲထီၣ်သးဒ်အံၤလီၤအဂ့ၢ်န့ၣ် ခ့ၣ်အဲၣ်ယူၣ် ၦၤဘၣ်မူဘၣ်ဒါ စံး၀ဲန့ၣ်လီၤႉ
“တၢ်န့ၣ်အ၀ဲသ့ၣ်အိၣ်ဟဲလၢပကိတကပၤမီၤနီၤႉတၢ်ပၢၢ်ဆၢသုးကရူၢ်လဲၤခိးခး၀ဲသိလ့ၣ်ႉသိလ့ၣ်လၢတၢ်မဲာ်ညါ တခိၣ်န့ၣ် ဘၣ်လၢအခံဘျီနီစံၣ်ထီၣ်၀ဲႉလၢအ၀ဲခိၣ်ခီန့ၣ်အူအီၣ်မီၤနီၤႉအအူအီၣ်တခိၣ်န့ၣ်အခိၣ်ပံးခံပံးခဲလၢာ်လီၤႉမ့ၢ်အတီၣ်မနုၤလဲၣ်တသ့ၣ်ညါဘၣ်ႉခီဖျိမ့ၣ်အူအီၣ်အဃိၦၤနီသိလ့ၣ်ဖိတဂၤဒီးၦၤအိၣ်လၢအကပၤတဂၤန့ၣ်သံတ့ၢ်ဃုာ်ဖဲ သိလ့ၣ်ပူၤန့ၣ်လီၤႉ ၦၤသံခံဂၤန့ၣ်ပယီၤသုးလီၤႉ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤန့ၣ်လီၤႉ
တၢ်ခိးခးပယီၤသုးသိလ့ၣ်ကဲထီၣ်၀ံၤလီၢ်ခံတကီၢ်ခါခဲအံၤ ပယီၤသုးဟဲမၤအါထီၣ်အနီၣ်ဂံၢ်လၢဟီၣ်က၀ီၤအပူၤဖဲန့ၣ် အဂ့ၢ်တၢ်ပၢၢ်ဆၢသုးကရူၢ်တကပၤစံး၀ဲဒီးဒ်န့ၣ်အသိးဟီၣ်က၀ီၤ၀ဲန့ၣ်အပူၤကွံာ်စ့ၢ်ကီးဒုးယၤတၢ်ဖ့ၣ်စၢကဲထီၣ်၀ဲလၢ ခံခီခံကပၤအဘၢၣ်စၢၤအိၣ်၀ဲတလီၢ်လီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
ဒ်န့ၣ်အသိးဖဲအပူၤကွံာ်လါယူၤလံ ၂၃ သီအနံၤ လၢဖွ့ဖူကၢ်ကရူၢ် ကၠီၣ်တါလ့သ၀ီဃၢၤ တၢ်ဒုးကဲထီၣ်လၢပယီၤသုး ဒီးတၢ်ပၢၢ်ဆၢသုးပာ်ဖှိၣ်ကရူၢ်အဘၢၣ်စၢၤဒီး ဖဲန့ၣ်ခီဖျိပယီၤသုးပညိၣ်က့ၤခးလီၤကဒါကျိဖးဒိၣ်အဃိ ၦၤကမျၢၢ်သံ ၀ဲဒၣ် (၆)ဂၤႇဘၣ်ဒိ(၈)ဂၤတဒံးဘၣ်ဒူသ၀ီတစှၤန့ၢ်(၆)ဖျၢၣ်ဘၣ်ဃ့ၢ်ထီၣ်ဒံး၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ
