လါစဲးပထ့ဘၢၣ် ၃၀ သီ, ၂၀၂၄ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကီၢ်သူလ့ၤတၢ်ပၢဟီၣ်ကဝီၤကီၢ်ရ့ၣ်(၇)ဘ့ၣ်လၢၤဃၣ်ဃၣ်အပူၤခီဖျိလၢ(ယါကံ)ကလံၤမုၢ်အဃိကမျၢၢ်ပှၤသၢကလီၢ် ဘျဲၣ်ကွၢ်ဆၢၣ်မဲၥ်ဘၣ်ဝဲထံဒိၣ်နိယွၤတၢ်ကီတၢ်ခဲသ့ၣ်တဖၣ်ဒီးလၢတၢ်ကဆီၣ်ထွဲမၤစၢၤကမျၢၢ်ပှၤသၢကလီၢ်ဘျဲၣ်လၢတူၢ်ဘၣ်ထံဒိၣ်နိယွၤသ့ၣ်တဖၣ်လၢကတီၢ်ယံၥ်အဂီၢ်(CIDKP)အိၣ်ဒီးတၢ်ရဲၣ်တၢ်ကျဲၤအဂ့ၢ်ကီၢ်ပူၤကညီပှၤလီၢ်အိၣ်ကမှံဖိကမံးတံၥ်ခိၣ်နၢ်ပှၤဘၣ်မူဘၣ်ဒါစံးဝဲန့ၣ်လီၤ.
မ့ၢ်လၢထံဒိၣ်နိယွၤဒ်အံၤအဖီခိၣ်ကမျၢၢ်စံၥ်ပှဲၤသူၣ်ဖျးဘုဟု,တၢ်ပၥ်ကီၤဘုအလီၢ်,ထံပူၤထံဒၢ,ထံကမါသ့ၣ်တဖၣ်ဒီးကမျၢၢ်တၢ်သူၣ်ထီၣ်သ့ၣ်တဖၣ်ဘၣ်ဟးဂူၥ်ဟးဂီၤကွံၥ်ဒၣ်အသိးကမျၢၢ်ဘုၣ်ဆၣ်ဖိကီၢ်ဖိသ့ၣ်တဖၣ်ဘၣ်သံကွံၥ်ဝဲအါအါဂီၢ်ဂီၢ်န့ၣ်လီၤ. လၢတၢ်န့ၣ် အဃိတၢ်ဆီၣ်ထွဲမၤစၢၤတၢ်တိၥ်ကျဲအိၣ်ဝဲလၢကမျၢၢ်သ့ၣ်တဖၣ်အဂီၢ်အဂ့ၢ်ကီၢ်ပူၤကညီပှၤလီၢ်အိၣ်ကမှံဖိကမံးတံၥ်မူဒါခိၣ်(၂)သရၣ်စီၤခဲလ့ၣ်စံးဝဲဒ်အံၤန့ၣ်လီၤ.
“တၢ်ရဲၣ်တၢ်ကျဲၤန့ၣ်အိၣ်ဝဲလီၤ. လၢတၢ်ကက့ၤဆီၣ်ထွဲမၤစၢၤကမျၢၢ်တၢ်လုၢ်အီၣ်နီၢ်ခိၣ်သးသမူတၢ်ဖံးတၢ်မၤလၢအဟးဂီၤသ့ၣ်တဖၣ် န့ၣ်ပဆိကမိၣ်ဃၥ်ဝဲလၢအယံၥ်အထၢသ့ၣ်တဖၣ်န့ၣ်ပတၢ်တိၥ်ကျဲအိၣ်ဝဲမီၤနီၤ. ပစးထီၣ်မၤဖျါထီၣ်ဝဲအမိၢ်လံၥ်မိၢ်ပှၥ်စ့ၢ်ကီးလံန့ၣ် လီၤ. အဒိ/ကျိၣ်စ့လၢကမျၢၢ်သ့ၣ်တဖၣ်ကဘၣ်က့ၤမၤထီၣ်က့ၤဘုလီၢ်စံၥ်လီၢ်သ့ၣ်တဖၣ်, ဘုချံသ့ၣ်တဖၣ်, စဲးဖီကဟၣ်သိလၢက ထဲၣ်တၢ်အဂီၢ်ဒီးကက့ၤသူၣ်ထီၣ်ဟံၣ်ဃီအဂီၢ်န့ၣ်ကလိၣ်ဘၣ်ဝဲကျိၣ်စ့မီၤနီၤ. အဃိန့ၣ်လၢကတီၢ်ယံၥ်အဂီၢ်န့ၣ်ပတၢ်တိၥ်ကျဲအိၣ်ဝဲ လီၤ.” အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
လၢန့ၣ်အမဲၥ်ညါလၢတၢ်ကလဲၤနုၥ်လီၤဆီၣ်ထွဲမၤစၢၤဝဲဟီၣ်ကဝီၤလၢထံဒိၣ်နိယွၤအလီၢ်သ့ၣ်တဖၣ်ခီဖျိတၢ်လဲၤတၢ်က့ၤကီခဲဝဲအဃိတၢ်ဆီၣ်ထွဲတတုၤထီၣ်ထီၣ်ဘးအိၣ်ဝဲအသိးတၢ်ဆီၣ်ထွဲမၤစၢၤသ့ၣ်တဖၣ်အါဒၣ်တက့ၢ်ဟဲခီဖျိလၢတၢ်မၤဘူၣ်ကစၢ်အဆံးသ့ၣ်တဖၣ်အအိၣ်ဒီးတၢ်ဆီၣ်ထွဲမၤစၢၤလၢအဖးဒိၣ်ဒ်န့ၣ်သ့ၣ်တဖၣ်တဒိးန့ၢ်ဘၣ်ဝဲအါအါဒံးဘၣ်အဂ့ၢ်န့ၣ်သရၣ်စီၤခဲလ့ၣ်စံးအါထီၣ်ဝဲဒၣ်န့ၣ်လီၤ.
တကီၢ်ခါခဲအံၤန့ၣ်ပှၤဟီၣ်ခိၣ်ဖိတၢ်ဒိသူၣ်ဒိသးတၢ်ဆီၣ်ထွဲမၤစၢၤတၢ်လိၣ်ဘၣ်အဒိၣ်ကတၢၢ်န့ၣ်မ့ၢ်ဝဲကမျၢၢ်တၢ်အီၣ်တၢ်အီ,ထံအီၣ်ကဆှီ,နီၢ်ခိၣ်တၢ်ကဆှဲကဆှီသ့ၣ်တဖၣ်ဒီးဟံၣ်ဖိဃီဖိကအီၣ်ကအီၣ်ဘၣ်အဂီၢ်တၢ်လုၢ်အီၣ်နီၢ်ခိၣ်သးသမူတၢ်ဖံးတၢ်မၤ,ဆၣ်ဖိကီၢ်ဖိ,ကမျၢၢ်ကဖံးအီၣ်မၤအီၣ်စံၥ်ပှဲၤအဂီၢ်စဲးဖီကဟၣ်တၢ်ဖိတၢ်လံၤတၢ်လိၣ်သ့ၣ်တဖၣ်ဒီးထံပူၤ,ထံကျိဘိ,ထံစဲးသ့ၣ်တဖၣ်အဂ့ၢ်ခ့ၣ်အဲၣ်ယူၣ်လံၥ်တၢ်ပၥ်ဖျါပူၤပၥ်ဖျါဝဲဒၣ်န့ၣ်လီၤ.
ခ့ၣ်အဲၣ်ယူၣ်တၢ်ပၢဟီၣ်ကဝီၤကီၢ်ရ့ၣ်(၇)ဘ့ၣ်လၢၤအပူၤကီၢ်ဆၣ်အိၣ်ဝဲ(၂၇)ဘ့ၣ်အကျါကီၢ်ဆၣ်အဘ့ၣ်(၂၀)ဃၣ်ဃၣ်ကွၢ်ဆၢၣ်မဲၥ် ဘၣ်ဝဲထံဒိၣ်နိယွၤဝဲအံၤဒီးဒူသထူၣ်,ချၢၣ်လွံၢ်ထူၣ်ဒီးတီအူကီၢ်ရ့ၣ်သ့ၣ်တဖၣ်အံၤမ့ၢ်ကီၢ်ရ့ၣ်လၢတူၢ်ဘၣ်ဝဲထံဒိၣ်နိယွၤနးနးကျံးကျံးန့ၣ်လီၤ. ဒ်န့ၣ်အသိးကီၢ်ရ့ၣ်(၇)ဘ့ၣ်အပူၤဟံၣ်ခိၣ်(၇၃,၀၀၀)ဖျၢၣ်,ပှၤနီၣ်ဂံၢ်(၃၈၀,၇၇၉)ဂၤသ့ၣ်တဖၣ်တူၢ်ဘၣ်ဝဲထံဒိၣ်နိယွၤ အံၤအဂ့ၢ်ခ့ၣ်အဲၣ်ယူၣ်ထုးထီၣ်ပၥ်ဖျါဝဲဖဲလါစဲးပထ့ဘၢၣ်(၂၈)သီအနံၤန့ၣ်လီၤ.
ပသ့ၣ်ညါဘၣ်လၢခ့ၣ်အဲၣ်ယူၣ်ကီၢ်ရ့ၣ်(၇)ဘ့ၣ်လၢၤအပူၤပှၤလၢတူၢ်ဘၣ်ဝဲထံဒိၣ်နိယွၤအိၣ်ဝဲဟံၣ်ခိၣ်(၇၃,၀၀၀)ဖျၢၣ်ဒီးပှၤနီၣ်ဂံၢ် (၃၈၀,၇၇၉)ဂၤသ့ၣ် တဖၣ်န့ၣ်လီၤ.
၁. လၢ(ခ့ၣ်အဲၣ်ယူၣ်)တကပၤဆီၣ်ထွဲမၤစၢၤဝဲပှၤလၢတူၢ်ဘၣ်ထံဒိၣ်နိယွၤသ့ၣ်တဖၣ်န့ၣ်ထီၣ်ဘးထဲလဲၣ်လံလဲၣ်?(မျးကယၤ)
၂. (ခ့ၣ်အဲၣ်ယူၣ်)တကပၤဆီၣ်ထွဲမၤစၢၤမ့ၢ်တန့ၢ်(၁၀၀)မျးကယၤပှဲၤပှဲၤဘၣ်န့ၣ်လၢတၢ်ဂ့ၢ်မနုၤလဲၣ်. တၢ်ကီတၢ်ခဲ,တၢ်တၤတၢ်အိၣ် မနုၤသ့ၣ်တၣ်ဖလဲၣ်?
၃. တကီၢ်ခါတၢ်ဆီၣ်ထွဲမၤစၢၤလဲၤတတုၤထီၣ်ဘး အလီၢ်သ့ၣ်တဖၣ်န့ၣ်ခါဆူညါကမၤပှဲၤအါထီၣ်အိၣ်ဒံးစ့ၢ်ကီးဧါ?
