လါနိၣ်ဝ့ဘၢၣ် ၂၁ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူပျၥ်ယၥ်ကီၢ်ရ့ၣ်(သုးက့ ၆)ကီးတရံးကီၢ်ဆၣ်အပူၤ ပယီၤသုးကျိၤလၢနုၥ်လီၤဟူးဂဲၤတဖၣ်ခီဖျိကညီဒီကလုၥ်တၢ်ထူၣ် ဖျဲးသုးမုၢ်ဒိၣ်(KNLA)သုးပၥ်ဖှိၣ်ခိးခးဝဲအဃိ သံဘၣ်ဒိဘၣ်ထံးအါမးအဂ့ၢ်န့ၣ် သ့ၣ်ညါဘၣ်လၢဂံၢ်ခီၣ်ထံးပှၤဟ့ၣ်တၢ်ကစီၣ်ဖိ အအိၣ် န့ၣ်လီၤ.
ဖဲလါနိၣ်ဝ့ဘၢၣ် ၁၉ သီအနံၤ ပယီၤသုးကျိၤ(၂)ကျိၤလၢအိၣ်ကီးတရံး-သ့ၣ်ဃးလီၤတီၢ်(သ့ၤကါညံၤနီၤ)ကျဲ ခီၣ်ချ့သုးရ့ၣ်(ခမရ-၃၅၅) သုးကလၢၤတၢ်လီၢ် အံၤတဖၣ် ဟဲလီၤဝဲဆူအ့ရှါကျဲမုၢ်ကစၢၢ်ခိၣ်ဝံၤနုၥ်လီၤဟူးဂဲၤဝဲလၢ(KNLA)သုးခိၣ်စီၤကၠီၤသဲၣ်တၢ်လီၢ် ဟီၣ်ကဝီၤ မီးမး, ယွၤသ့ၣ် သဝီ, လ့ကတံၥ်တၢ်လီၢ်တကပၤအဃိ စးထီၣ်လၢမဟါတုၤလၢတဂီၤအံၤတၢ်ဒုးကဲထီၣ်ဝဲဒီး ပယီၤသုး တကပၤဘၣ်ဒိဘၣ်ထံးအါ မးဘၣ်ဟဲကဲထီၣ်ဝဲဒ်အံၤန့ၣ်လီၤ.
ဘၣ်ဃးတၢ်ဂ့ၢ်အံၤ (KNLA)သုးခိၣ်လၢအသ့ၣ်ညါထွဲတၢ်အိၣ်သးအဂ့ၢ်အကျိၤတဂၤစံးဝဲလၢ “ပယီၤသုးကျိၤဟဲထီၣ်(၂)ကျိၤမၢၤ. အဟဲနုၥ်လီၤလၢသုးခိၣ်ကၠီၤသဲၣ်တၢ်လီၢ်န့ၣ်ပှၤလဲၤတိဖုးအီၤဘျီတၢ်ဒုးကဲထီၣ်.တနံၤညါအံၤပှၤပံးတံၢ်အခံပှၤကဝီၤခးအီၤဖဲလ့ကတံၥ်န့ၣ်.မဟါန့ၣ်တၢ်ဒုးစးထီၣ်ကဲထီၣ်လၢဂီၤခီ ၈ နၣ်ရံၣ် ခဲအံၤခးဒံးအဖၢမုၢ်လီၤ ပှၤစုၥ်အဝဲသ့ၣ်ဒီးဒြိ,ကျိဖးဒိၣ်.ပယီၤန့ၣ်အတၢ်ဘၣ်ဒိ ဘၣ် ထံး အိၣ်ဒီဒူၣ် လံယသံကွၢ်န့ၣ်.ကဟးထီၣ်စ့ၢ်ကီးဟးထီၣ်တဖျိလၢၤဘၣ်.”အဂ့ၢ်န့ၣ် စံးဝဲန့ၣ်လီၤ.
ဒ်လီၢ်ကဝီၤပှၤဘၣ်မူဘၣ်ဒါစံးဝဲအသိးန့ၣ် ပယီၤသုးကျိၤလၢအနုၥ်လီၤဟူးဂဲၤ(၂)ကျိၤအံၤ တကျိၤန့ၣ်သုးဂံၢ်ဘါကအိၣ်လၢ(၇၀) ခိၣ်ဃၢၤဒီး ဘၣ်ဆၣ်တကီၢ်ခါခဲအံၤမ့မ့ၢ်သုးကျိၤလၢအဂၤတဘိန့ၣ် နုၥ်လီၤဟူးဂဲၤတအိၣ်ဒံးအိၣ်ခိးကနၣ်ဒံးတၢ်အိၣ်သးဖဲအ့ရှါကျဲ မုၢ်ကစၢၢ်ခိၣ်ဒံးန့ၣ်လီၤ.
တကးဒံးဘၣ်ပယီၤသုးလၢအနုၥ်လီၤဟူးဂဲၤခဲအံၤသ့ၣ်တဖၣ် အတၢ်ပညိၣ်အိၣ်ဝဲလၢကမၤဆှဲလဲကွံၥ်ကီးတရံးဝ့ၢ်ဃၢၤ ကီၢ်မူခံ, ယီၢ်ကိၥ်ဟီၣ်ကဝီၤဃုၥ်ဒီး ဒူသဝီတၢ်လီၢ်လၢ(KNLA) သုးပၥ်ဖှိၣ်ဟူးဂဲၤအိၣ်ဆီလီၤသးအလီၢ်သ့ၣ်တဖၣ်အဂ့ၢ်န့ၣ် တၢ်ပၢၢ်ဆၢသုး ကရူၢ်ပှၤ ဘၣ်မူဘၣ်ဒါတဖၣ် စံးဝဲန့ၣ်လီၤ.
ဒ်န့ၣ်အသိးဖဲအပူၤကွံၥ်စှၤသီအခါန့ၣ်စ့ၢ်ကီး လၢယွၤသ့ၣ်,မီမၣ်သဝီတကပၤန့ၣ် တၢ်ဒုးကဲထီၣ်ဒံးဝဲလၢပယီၤသုး ဒီး ဟီၣ်ကဝီၤ (KNLA)သုးပၥ်ဖှိၣ်အဘၢၣ်စၢၤဒံးအသိး ပယီၤသုးတကပၤခးတပျုၥ်တပျီၥ်ကျိဖးဒိၣ်ဆူဒူသဝီပူၤအိၣ်ဝဲခဲအံၤခဲအံၤ အဂ့ၢ် န့ၣ် လီၢ်ကဝီၤပှၤဘၣ်မူဘၣ်ဒါစံးဝဲအသိး သ့ၣ်ညါဘၣ်န့ၣ်လီၤ.
ကီးတရံး-ကြုၢ်တုဟီၣ်ကဝီၤအပူၤ သုးမီၤစိရိၤအံၤလၢကဟဲတၢ်ဃုထၢအဂီၢ်ပျၢ်လီၤဝဲသုးကျိၤဟဲထီၣ်အိၣ်ဘၣ်ဆၣ် ဒိၣ်စိဝဲဟီၣ်န့ၢ်ဒံး ဒၣ်ထဲ ဝ့ၢ်ပူၤကဝီၤဒ့တဖၣ်ဒံးလီၤဒီး မ့မ့ၢ်ကျဲဆဲးလၢကလဲၤထီၣ်ဆူဟီၣ်ကဝီၤဒူသဝီတၢ်လီၢ်သ့ၣ်တဖၣ်ဒိၣ်စိဝဲတန့ၢ်ဒံးဘၣ်အသိး ကီးတရံး-မၠၣ်ဝတံၣ် အ့ရှါကျဲမုၢ်စ့ၢ်ကီးဒိၣ်စိဝဲတန့ၢ်ခဲလၢၥ်ဒံးဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
