လါအီးကထိဘၢၣ် ၈ သီ, ၂၀၂၄ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဟီၣ်က၀ီၤ ကီၢ်ဆၣ်(၃)ဘ့ၣ် လါစဲးပထ့ဘၢၣ်တလါအတီၢ်ပူၤ တၢ်ဒုးကဲထီၣ်ခဲလၢၥ်(၂၀)ဘျီဒီး ပယီၤသုးတကပၤသံ(၃၃)ဂၤ,ဘၣ်ဒိ(၄၆)ဂၤအဂ့ၢ်န့ၣ် ကီၢ်ရ့ၣ်တၢ်မၤနီၣ်စရီပူၤအသိး သ့ၣ်ညါဘၣ် န့ၣ်လီၤ.
ဒူသထူၣ်ကီၢ်ရ့ၣ် ဘံလ့ကီၢ်ဆၣ်,ကၠဲးထိၣ်ကီၢ်ဆၣ်,သထူၣ်ကီၢ်ဆၣ် ကီၢ်ဆၣ်(၃)ဘ့ၣ်အံၤအပူၤ စးထီၣ်လါစဲးပထ့ဘၢၣ် ၁ သီတုၤ ၃၀ သီ လၢတလါအတီၢ်ပူၤ ဟီၣ်က၀ီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ်ဒီးပယီၤသုးကဘၢၣ်စၢၤ ဒုးယၤတၢ်ဖ့ၣ်စၢကဲထီၣ်၀ဲ(၂၀)ဘျီဒီး ဒုၣ်ဒါတကပၤသံဘၣ်ဒိဘၣ်ထံးကဲထီၣ်သးအါဒ်အံၤလီၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်ဒူသထူၣ်ကီၢ်ရ့ၣ်တၢ်မၤနီၣ်စရီပူၤအိၣ်၀ဲအသိးန့ၣ် (KNLA)သုးပၥ်ဖှိၣ်ခိးခးစဲးပြဲး၀ဲဒၣ်ပယီၤသုး(၁၂)ဘျီ, လဲၤခး၀ဲဒီးဒြိ(၅)ဘျီ, ခိးထုး၀ဲဒီးမ့ၣ်ပိၢ်(၃)ဘျီအဃိ ပယီၤသုးတကပၤသံဘၣ်ဒိဘၣ်ထံးအမဲၥ်ညါ ဒုၣ်ဒါအသိလ့ၣ်စ့ၢ်ကီးဟးဂီၤ၀ဲဒၣ်(၃)ခိၣ် အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်န့ၣ်အသိးခံခီခံကပၤတၢ်ဒုးကဲထီၣ်လၢတလါအတီၢ်ပူၤအံၤ မ့မ့ၢ်လၢကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ် တကပၤန့ၣ် သံ၀ဲဒၣ်(၁)ဂၤဒီးဘၣ်ဒိ(၅)ဂၤအဂ့ၢ်န့ၣ် တၢ်မၤနီၣ်စရီပူၤအသိးသ့ၣ်ညါဘၣ်န့ၣ်လီၤ.
လၢန့ၣ်အမဲၥ်ညါတလါအတီၢ်ပူၤ သုးကီၣ်ကးအမျိၥ်သုး(၃၁၄),(၃၁၀),(၄၀၂), ခီၣ်ချ့သုးရ့ၣ် (ခမရ-၂၀၇), (ခမရ-၅၉၈),(ခမရ-၉), ခီၣ်သုးရ့ၣ်(ခလရ-၈) သ့ၣ်တဖၣ်အံၤခးလီၤကျိဖးဒိၣ်ဆူလီၢ်က၀ီၤဒူသ၀ီ တၢ်ဖံးအီၣ်မၤအီၣ်လီၢ်(၂၀)ဘျီ အဃိ ကမျၢၢ်ဘၣ်ဒိ(၁၁)ဂၤ, ဟံၣ်တၢ်သူၣ်ထီၣ်ဟးဂီၤ(၅)ဖျၢၣ်တကးဒံးဘၣ်ဆၣ်ဖိကီၢ်ဖိ,တၢ်မုၢ်တၢ်ဘိစ့ၢ်ကီးသံဘၣ်ဒိဘၣ်ထံးဟးဂီၤ၀ဲဒၣ်အိၣ် အဂ့ၢ်န့ၣ် သ့ၣ်ညါဘၣ်န့ၣ်လီၤ.
တကီၢ်ခါခဲအံၤလီၤဆီဒၣ်တၢ်ကီၢ်ဆၣ်သၢဘ့ၣ်အံၤအပူၤ ခီဖျိဒုၣ်ဒါတကပၤမၤအါထီၣ်တၢ်ဟူးတၢ်ဂဲၤအဃိ တၢ်ပၢၢ်ဆၢသုးပၥ်ဖှိၣ်ကရူၢ်တကပၤ လဲၤခးစဲးပြဲးလဲၤတ့ၢ်လီၤ၀ဲဒီးဒြိအိၣ်၀ဲတလီၢ်လီၢ်အဂ့ၢ်န့ၣ် ဒူသထူၣ်ကီၢ်ရ့ၣ် နဲၣ်ရွဲၣ် ပှၤကတိၤတၢ်ပၢ ပဒိၣ်စီၤအ့နဲၤ စံး၀ဲန့ၣ်လီၤ.
အ၀ဲစံး၀ဲလၢ“ဒ်သိးကၠဲးထိၣ်ကီၢ်ဆၣ်န့ၣ်တၢ်ဟူးတၢ်ဂဲၤအါအဃိတၢ်ဒုးန့ၣ်ကဲထီၣ်သးအါလီၤ.မ့၀ံၤလၢသထူၣ်ကီၢ်ဆၣ်နါက့ဒ်န့ၣ်လီၤ. ပယီၤသုးအိၣ်ဆိးလီၢ်ကျဲတၢ်လီၢ်တဖၣ်န့ၣ်ပှၤလဲၤခးစဲးပြဲးအီၤမီၤနီၤ.လၢဘံလ့ကီၢ်ဆၣ် တၤပီသုးကလၢၤ,လ့က့ၣ်သုးကလၢၤနါက့ ဟီၣ်က၀ီၤတၢ်ပၢၢ်ဆၢကရူၢ်လဲၤခးစဲပြဲးအီၤအိၣ်စ့ၢ်လီၤ.မ့မ့ၢ်လၢမိၤစကိၤကီၢ်ဆၣ်ဒီးဖၣ်အၣ်ကီၢ်ဆၣ်ခီန့ၣ်ခီဖျိဒုၣ်ဒါအတၢ်ဟူးတၢ်ဂဲၤ တအိၣ်ဘၣ်အဃိတၢ်ဒုးတအိၣ်ဖျါအသးအါအါဒ်သိးကီၢ်ဆၣ်လၢအဂၤဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဒ်န့ၣ်အသိးအပူၤကွံၥ်လါအီကူၥ်တလါအတီၢ်ပူၤစ့ၢ်ကီး သထူၣ်ကီၢ်ဆၣ်ဒီးကၠဲးထိၣ်ကီၢ်ဆၣ် ၂ ဘ့ၣ်အံၤအပူၤ ဒုးယၤတၢ်ဖ့ၣ်စၢ ကဲထီၣ်(၁၄)ဘျီဒီး ဖဲန့ၣ်ပယီၤသုးတကပၤသံ(၂၀)ဂၤ,ဘၣ်ဒိ(၇)ဂၤ အဂ့ၢ်န့ၣ် ကီၢ်ရ့ၣ်တၢ်မၤနီၣ်စရီပူၤအသိးသ့ၣ်ညါဘၣ်န့ၣ်လီၤ.