လါအီးကထိဘၢၣ် ၂၄ သီ, ၂၀၂၄ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ်(သုးက့ ၃) ကီၢ်ဆၣ်(၃)ဘ့ၣ်အပူၤ လီၢ်က၀ီၤကမျၢၢ်လၢအဘၣ်ကွၢ် ဆၢၣ်မဲၥ်တၢ်ဒုးတၢ်ယၤဒီးထံဒိၣ်ဃိၣ်ယွၤအံၤတဖၣ် (CIDKP)တီခိၣ်ရိၣ်မဲလဲၤဆီၣ်ထွဲမၤစၢၤ၀ဲစ့လၢအ၀ဲသ့ၣ်အဂီၢ်အဂ့ၢ်န့ၣ် ခ့ၣ်အဲၣ်ယူၣ်လီၢ်ခၢၣ်သး ထုးထီၣ်ပၥ်ဖျါ၀ဲဖဲမဟါလါအီးကထိဘၢၣ် ၂၃ သီအနံၤန့ၣ်လီၤ.
ဖဲလါအီးကထိဘၢၣ် ၁၁ သီအနံၤန့ၣ် လၢၢ်ဒိၣ်,ဆီထံးဒီးမူကီၢ်ဆၣ်ဟီၣ်က၀ီၤအပူၤ လီၢ်က၀ီၤကမျၢၢ်လၢအဘၣ်ကွၢ်ဆၢၣ်မဲၥ် တၢ်ဒုးတၢ်ယၤကျိဖးဒိၣ်ဒီးထံဒိၣ်ဃိၣ်ယွၤအဃိအံၤတဖၣ် ကီၢ်ပူၤကညီပှၤလီၢ်အိၣ်ကမှံကမံးတံၥ်(CIDKP)ဒီး ကီၢ်ရ့ၣ်ပှၤဘၣ်မူဘၣ်ဒါ တီခိၣ်ရိၣ်မဲလဲၤဆီၣ်ထွဲမၤစၢၤ၀ဲဒၣ် သ၀ီ(၂၉)ဖျၢၣ်, ဟံၣ်ခိၣ်(၃၀၉၃)ဖျၢၣ်လၢစ့ပယီၤအကလီၢ်(၇၆၀၀)ကၠးဃၣ်ဃၣ်အဂ့ၢ်န့ၣ် ခ့ၣ်အဲၣ်ယူၣ် လံၥ်တၢ်ပၥ်ဖျါအပူၤ ပၥ်ဖျါ၀ဲန့ၣ်လီၤ.
သုးဟံန့ၢ်တၢ်စိတၢ်ကမီၤ၀ံၤလီၢ်ခံ ကီၢ်ဆၣ်(၃)ဘ့ၣ်အံၤအပူၤ လီၢ်က၀ီၤဒူသ၀ီကမျၢၢ်သ့ၣ်တဖၣ်ဘၣ်ကွၢ်ဆၢၣ်မဲၥ်တၢ်ဒုးတၢ်ယၤ, ပယီၤသုးအတၢ်ခးလီၤကျိဖးဒိၣ်,ဒြိအမဲၥ်ညါတနံၣ်အံၤတၢ်စူၤခါအကတီၢ်ဘၣ်ကွၢ်ဆၢၣ်မဲၥ်စ့ၢ်ကီး၀ဲ ထံဒိၣ်ဃိၣ်ယွၤသ့ၣ်တဖၣ်အဃိ လၢကအိၣ်ကဆိးကအီၣ်ကအီအဂီၢ်ဘၣ်ကွၢ်ဆၢၣ်မဲၥ်၀ဲတၢ်ဃံးတၢ်စ့ၤတၢ်ကီတၢ်ခဲသ့ၣ်တဖၣ်အဂ့ၢ်န့ၣ် ခ့ၣ်အဲၣ်ယူၣ်စံး၀ဲန့ၣ်လီၤ.
ဖဲအပူၤကွံၥ်လါယူၤလံဒီးလါစဲးပထ့ဘၢၣ်ထီၣ်အခါန့ၣ် တၢ်စူၤထံဒိၣ်ဃိၣ်ယွၤထံထီၣ်လၢသ၀ီပူၤတကးဒံးဘၣ်ဘုစ့ၢ်ကီး ထံလုၢ်ဘၢ၀ဲအိၣ်အဃိ ချၢၣ်လွံၢ်ထူၣ်ကီၢ်ရ့ၣ်အပူၤ သ၀ီ(၁၈၆)ဘၣ်ကွၢ်ဆၢၣ်မဲၥ်၀ဲထံဒိၣ်ဃိၣ်ယွၤဒီးစံၥ်လီၢ်ဟးဂီၤ၀ဲ(၄၀၀၀) အ့ကၢၣ် ဃၣ်ဃၣ်အဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပၥ်ဖျါတ့ၢ်ဃၥ်၀ဲဖဲအပူၤကွံၥ်လါစဲးပထ့ဘၢၣ် ၂၈ သီအနံၤန့ၣ်လီၤ.
လၢန့ၣ်အမဲၥ်ညါသုးဟံန့ၢ်တၢ်စိတၢ်ကမီၤ၀ံၤလီၢ်ခံ ခ့ၣ်အဲၣ်ယူၣ် ကီၢ်ရ့ၣ်သုးက့(၇)ဘ့ၣ်အကျါ လီၤဆီဒၣ်တၢ်ချၢၣ်လွံၢ်ထူၣ်ကီၢ်ရ့ၣ် အပူၤခီဖျိပယီၤသုးအံၤသူ၀ဲကဘီယူၤခးလီၤကျိဖးဒိၣ်,ခးလီၤတၢ်ဒီးဒြိအဃိ လီၢ်က၀ီၤကမျၢၢ်,ဖိဒံဖိသၣ်သံဘၣ်ဒိဘၣ်ထံး ကဲထီၣ်သးအိၣ်၀ဲတလီၢ်လီၢ်အသိးဟံၣ်ဃီ,ကၠိ,တၢ်ဘူၣ်တၢ်ဘါ တၢ်သူၣ်ထီၣ်စ့ၢ်ကီးဟးဂီၤ၀ဲဒၣ်အါမးအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်န့ၣ်ခ့ၣ်အဲၣ်ယူၣ်ထုးထီၣ်ပၥ်ဖျါတ့ၢ်ဃၥ်၀ဲအသိးန့ၣ် (၂၀၂၁)လါဖ့ၤဘြူၤအါရံၤ ၁ သီတုၤ ၂၀၂၄ လါယူၤန့ၣ် ချၢၣ်လွံၢ်ထူၣ်ကီၢ်ရ့ၣ်ပူၤ ကမျၢၢ်ပှၤဃ့ၢ်မှံဟးဖျိးအနီၣ်ဂံၢ်အိၣ်ထီၣ်တုၤလၢ(၄၃၀,၀၀၀)ဘျဲၣ်လံဒီး ဒ်န့ၣ်အသိးကီၢ်ရ့ၣ်(၇)ဘ့ၣ်အကျါ ချၢၣ်လွံၢ်ထူၣ်ကီၢ်ရ့ၣ်အံၤ မ့ၢ်ကီၢ်ရ့ၣ်တဘ့ၣ်လၢကမျၢၢ်ပှၤဃ့ၢ်မှံဟးဖျိးအနီၣ်ဂံၢ်အါကတၢၢ်လၢကီၢ်ရ့ၣ်ခဲလၢၥ်အကျါန့ၣ်လီၤ.
