လါအီးကထိဘၢၣ် ၂၁ သီ, ၂၀၂၄ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ တီအူကီၢ်ရ့ၣ်(သုးက့ ၂) ဒီၣ်ဖးခိၣ်ကီၢ်ဆၣ်ပူၤ ခီဖျိပယီၤသုးခးလီၤကျိဖးဒိၣ်လၢ သၣ်တီၣ်ကၠံ၀့ၢ်က၀ီၤဒ့ပူၤအဃိ ကမျၢၢ်ဘၣ်ဒိ(၂)ဂၤဒီး ဟံၣ်တၢ်သူၣ်ထီၣ်ဟးဂီၤ၀ဲ(၆)ဖျၢၣ်အဂ့ၢ်န့ၣ် ခ့ၣ်အဲၣ်ယူၣ် လီၢ်ခၢၣ်သး ထုးထီၣ်ပၥ်ဖျါ၀ဲဖဲတနံၤအံၤလါအီးကထိဘၢၣ် ၂၁ သီအနံၤန့ၣ်လီၤ.
ဖဲလါအီးကထိဘၢၣ် ၁၅ သီ ဟါခီ ၄း၂၀ ဃၣ်ဃၣ်အဆၢကတီၢ်န့ၣ် ပယီၤသုးလၢအိၣ်ဘယ့ၣ်နီၤ(ဘုရင့်နောင်)သုးကလၢၤတဖၣ် ခးလီၤ၀ဲကျိ (၁၂၀ မမ)ကျိဖးဒိၣ် ၁၂ ဖျၢၣ် လီၤတဲၥ်ပိၢ်ဖးထီၣ်လၢ သၣ်တီၣ်ကၠံ၀့ၢ် က၀ီၤဒ့ပူၤ(၆)ဖျၢၣ်, ၀့ၢ်ချၢ(၆)ဖျၢၣ်အဃိ သရၣ်မုၣ် နီၢ်စီစီ ဒီး စီၤအီၤနဲၤထူ(၁၃)နံၣ်အံၤဘၣ်ဒိ၀ဲဒီး ဒ်န့ၣ်အသိး က၀ီၤဒ့(၂),က၀ီၤဒ့(၃)ပူၤ ဟံၣ်တၢ်သူၣ်ထီၣ်ဟးဂီၤ၀ဲဒၣ်ခဲလၢၥ် (၆)ဖျၢၣ် ကဲထီၣ်အသးဒ်အံၤလီၤအဂ့ၢ်န့ၣ် ခ့ၣ်အဲၣ်ယူၣ်လံၥ်တၢ်ပၥ်ဖျါအပူၤစံး၀ဲန့ၣ်လီၤ.
တကးဒံးဘၣ်လၢန့ၣ်အမဲၥ်ညါခီဖျိလၢပယီၤသုးခးလီၤကျိဖးဒိၣ်အံၤအဃိ ၀့ၢ်ပူၤကမျၢၢ်တဖၣ်ဘၣ်အိၣ်လၢတၢ်ပျံၤတၢ်ဖုးပူၤဒီး ဘၣ်ယိၣ်စ့ၢ်ကီး၀ဲလၢပယီၤသုးကဘီယူၤကဟဲခးလီၤတၢ်အဂ့ၢ်န့ၣ် လံၥ်တၢ်ပၥ်ဖျါအပူၤစံး၀ဲန့ၣ်လီၤ.
လၢန့ၣ်အမဲၥ်ညါဖဲအပူၤကွံၥ်လါယူၤလံ ၁၁ သီအနံၤစ့ၢ်ကီး ဒီၣ်ဖးခိၣ်ကီၢ်ဆၣ် ကၠိတီကိ(ကျွန်းတောကုန်း)သ၀ီပူၤ ပယီၤသုး ခးလီၤကျိဖးဒိၣ်အဃိ ကမျၢၢ်သံတဂၤဒီး ဘၣ်ဒိ(၃)ဂၤအကျါပၣ်ဃုၥ်ကညီကူၣ်သ့ဆဲးလၤ၀ဲၤကျိၤ(KECD)တီၤဖုၣ်ကၠိ ကၠိဖိပိၥ်ခွါ(၁)ဂၤ ဒံးအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်န့ၣ်အသိးဖဲမဟါလါအီးကထိဘၢၣ် ၂၀ သီ ဟါခီ ၈ နၣ်ရံၣ်ဃၣ်ဃၣ်အဆၢကတီၢ်စ့ၢ်ကီး တၢ်လဲၤခး၀ဲတီအူ၀့ၢ် သုးကီၣ်ကး အသုးကဘီယူၤသုးကလၢၤတၢ်လီၢ်လၢ(၁၀၇ မမ)မျိၥ်သၣ်အဃိ သုးကီၣ်ကးတကပၤသံဘၣ်ဒိဘၣ်ထံးတစှၤန့ၢ်(၁၀)ဂၤအဂ့ၢ်န့ၣ် Brave Warriors for Myanmar-BWM ထုးထီၣ်ပၥ်ဖျါ၀ဲအသိး သ့ၣ်ညါဘၣ်န့ၣ်လီၤ.
