လါအီးကထိဘၢၣ် ၄ သီ, ၂၀၂၄ နံၣ်, ခ့ၣ်အဲးစံၣ်
ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ် မိၣ်ပလ့ၤသ၀ီပူၤ ပယီၤသုးလၢအကဟဲထီၣ်ဘှီ၀ဲသုးလီပျံၤအကျိၤလၢ အဟးဂီၤတဖၣ်အံၤ ခီဖျိတၢ်ပၢၢ်ဆၢသုးပၥ်ဖှိၣ်ကရူၢ်ခိးထုး၀ဲဒီးမ့ၣ်ပိၢ်အဃိ သံဘၣ်ဒိဘၣ်ထံး၀ဲဒၣ်(၆)ဂၤအဂ့ၢ်န့ၣ် သ့ၣ်ညါဘၣ်လၢဂံၢ်ခီၣ်ထံး ပှၤဟ့ၣ်တၢ်ကစီၣ်ဖိအအိၣ်န့ၣ်လီၤ.
လၢကၠဲးထိၣ်ကီၢ်ဆၣ် မိၣ်ပလ့ၤသ၀ီ တီယၣ်သီခါဖၠၣ်မဲၥ်ညါန့ၣ် ပယီၤသုးအံၤခီဖျိလီၤပျံၤကျိၤလၢအ၀ဲသ့ၣ်သူ၀ဲလၢသုးအဂီၢ်အံၤ ဟးဂီၤအဃိ ဖဲမဟါလါအီးကထိဘၢၣ် ၃ သီ ဂီၤခီ ၁၀ နၣ်ရံၣ်ဃၣ်ဃၣ်အဆၢကတီၢ်န့ၣ် ပှၤနီၣ်ဂံၢ်အဂၤ(၂၀)ဃၣ်ဃၣ် လၢကဟဲဘှီဂ့ၤထီၣ်က့ၤတၢ်အဂီၢ်ဟဲလၢကျဲအခါ တၢ်ပၢၢ်ဆၢၢ်သုးပၥ်ဖှိၣ်ကရူၢ် ခိးထုး၀ဲဒီးမ့ၣ်ပိၢ်အဃိ ဖဲန့ၣ်ပယီၤသုးသံ၀ဲ(၄)ဂၤ, ဘၣ်ဒိ(၂)ဂၤ အဂ့ၢ်န့ၣ် လီၢ်က၀ီၤပှၤဟ့ၣ်တၢ်ကစီၣ် ဖိစံး၀ဲန့ၣ်လီၤ.
ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဂၤစံး၀ဲလၢ“တၢ်ကဲထီၣ်သးအဂ့ၢ်ခီန့ၣ်ဖဲမိၣ်ပလ့ၤ တီယၣ်သီခါဖၠၣ်အကပၤ. ပယီၤသုးအံၤ ခီဖျိသုးလီပျံၤအကျိၤလၢအ၀ဲသ့ၣ်သူ၀ဲအံၤဟးဂီၤအဃိဟဲထီၣ်ဘှီဂ့ၤထီၣ်၀ဲဒ်န့ၣ်.အ၀ဲသ့ၣ်ဟဲထီၣ်ဒီးကါ,ဟဲဒီးအပှၤဂံၢ်ဘါ ဖဲအ၀ဲသ့ၣ်စံၣ်လီၤဟဲ၀ၣ်နုၥ်လီၤလၢအခီၣ်ခါန့ၣ်ပထုးအ၀ဲသ့ၣ်ဒီးမ့ၣ်ပိၢ်မီၤ.အသံ(၄)ဂၤ,ဘၣ်ဒိ(၂)ဂၤ. ဘၣ်ဒိခံဂၤန့ၣ်နါက့ဖးနးညါ ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲမဟါန့ၣ်လီၤ.
ဖဲတၢ်ခိးထုးပယီၤသုးဒီးမ့ၣ်ပိၢ်ကဲထီၣ်အခါန့ၣ်ပယီၤသုးအံၤဘၣ်ယိၣ်လၢတၢ်ပၢၢ်ဆၢကရူၢ်ကခးကဒီးအ၀ဲသ့ၣ်အဃိ အ၀ဲသ့ၣ်စံၣ်နုၥ်လီၤအိၣ်လၢပှၤသ၀ီဖိဟံၣ်ဖီလၥ်၀ံၤကိးဖှိၣ်၀ဲဒၣ်ပှၤသ၀ီဖိ,ပှၤဖိဒံဖိသၣ်လၢအ၀ဲသ့ၣ်ကပၤဟံ၀ဲတၢ်ဒီသဒၢလၢပှၤကမျၢၢ်အအိၣ်န့ၣ်ကတံၥ်တၥ်လၢတနၣ်ရံၣ်ဘျဲၣ်၀ံၤမးပျၢ်လီၤက့ၤ၀ဲပှၤသ၀ီဖိအဂ့ၢ်န့ၣ် လီၢ်က၀ီၤကမျၢၢ်စံး၀ဲအသိးသ့ၣ်ညါဘၣ်န့ၣ်လီၤ.
လၢန့ၣ်အမဲၥ်ညါတနံၤဃီဖဲမဟါမုၢ်ထူၣ် ၁၁း၃၀ ဃၣ်ဃၣ်အဆၢကတီၢ်စ့ၢ်ကီး လၢမိၣ်ပလ့ၤသ၀ီဃၢၤ ပယီၤသုးကွၤယံၤ (ကွာရီဂိတ်) တၢ်သမံသမိးတြဲၤလီၢ်န့ၣ် တၢ်ပၢၢ်ဆၢသုးပၥ်ဖှိၣ်လဲၤတ့ၢ်လီၤ၀ဲဒီးဒြိမ့ၣ်ပိၢ်အဃိ ဖဲန့ၣ်သုးကီၣ်ကးအပှၤဘၣ်ဒိ၀ဲ (၆)ဂၤအဂ့ၢ်န့ၣ် ဂံၢ်ခီၣ်ထံးပှၤဟ့ၣ်တၢ်ကစီၣ်ဖိ စံး၀ဲန့ၣ်လီၤ.
“ဖဲမဟါမုၢ်ဆါခီ ၁၁ နၣ်ရံၣ်လီၢ်ခံန့ၣ် ဖဲကွၤယံၤ(ကွာရီဂိတ်)တြဲၤန့ၣ် သုးပၥ်ဖှိၣ်ကရူၢ်လဲၤတ့ၢ်လီၤအ၀ဲသ့ၣ်ဒီးဒြိစ့ၢ်မီၤနီၤ. ဖဲန့ၣ်ပှၤတဲလၢပယီၤသုးဧါ,ပၢၤကီၢ်သုးဧါန့ၣ်အဘၣ်ဒိဘၣ်ထံးခဲလၢၥ်(၆)ဂၤ.အသံခီဒုတနၢ်ဟူဘၣ်နၢ်ဟူလၢအဘၣ်ဒိလီၤ” အဂ့ၢ်န့ၣ် စံး၀ဲန့ၣ်လီၤ.
ဒ်န့ၣ်အသိးကၠဲးထိၣ်ကီၢ်ဆၣ်ပူၤ ဖဲအပူၤကွံၥ်လါစဲးပထ့ဘၢၣ် ၃၀ သီအနံၤစ့ၢ်ကီး ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) သုးပၥ်ဖှိၣ် လဲၤခးသုးကီၣ်ကးအမျိၥ်သုး(၃၁၀)သုးရ့ၣ်ဒီး(ခမရ-၂၀၇)သုးရ့ၣ် သ့ၣ်တဖၣ်အံၤလၢြဒိအဃိ ပယီၤသုးတကပၤ ဘၣ်ဒိဘၣ်ထံးတစှၤန့ၢ်အဂၤ(၁၀)အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤပှၤဘၣ်မူဘၣ်ဒါအအိၣ်န့ၣ်လီၤ.
