လါနိၣ်ဝ့ဘၢၣ် ၁၄သီ, ၂၀၂၄နံၣ်, ခ့ၣ်အဲးစံၣ်,
ခ့ၣ်အဲၣ်ယူၣ်,ကညီဒီကလုၥ်စၢဖှိၣ်ကရၢ,သုးက့(၆)ဒူပျၥ်ယၥ်ကီၢ်ရ့ၣ်,ဝီၢ်ရ့ၣ်ကီၢ်ဆၣ်နိၣ်ခၠိနဲၣ်ဒုးယၤသုးကလၢၤအပူၤပယီၤသုးလၢတၢ်ပၢၢ်ဆၢသုးပၥ်ဖှိၣ်ကရူၢ်ကဝီၤတံၢ်ဃၥ်ဝဲတဖၣ်အံၤ,တၢ်ပၢၢ်ဆၢသုးပၥ်ဖှိၣ်ကရူၢ်မၢဝဲတူၢ်ဃၣ်ကွံၥ်အသးဒီးပၥ်လီၤကွံၥ်စုကဝဲၤအိၣ်ဝဲဘၣ်ဆၣ်,တပၥ်လီၤစုကဝဲၤဒီးတူၢ်ဃၣ်ကွံၥ်ဝဲအသးဒံးဘၣ်အဂ့ၢ်,သ့ၣ်ညါဘၣ်လၢဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဖၣ်အအိၣ်န့ၣ်လီၤ.
နိၣ်ခၠိနဲၣ်ပယီၤဒုးယၤသုးကလၢၤအံၤတၢ်ပၢၢ်ဆၢသုးပၥ်ဖှိၣ်ထီၣ်ကဝီၤကးတံၥ်ဝဲယံၥ်ထီၣ်ဒီလါလံဒီးဒ်သိးသုးကီၣ်ကးတဖၣ်အံၤကပၥ်လီၤကွံၥ်စုကဝဲၤဒီးတူၢ်ဃၣ်ကွံၥ်အသးအဂီၢ်တၢ်ပၢၢ်ဆၢသုးပၥ်ဖှိၣ်တကပၤဟ့ၣ်ပလီၢ်တဲစိဃီၤဝဲအိၣ်ဝဲဘၣ်ဆၣ်,သုးကီၣ်ကးအံၤစံးဝဲလၢလ့ၤတက့ၤတတူၢ်ဃၣ်သးဒီးပၥ်လီၤကွံၥ်စုကဝဲၤဘၣ်အဂ့ၢ်,ဝီၢ်ရ့ၣ်လီၢ်ကဝီၤဖိလၢအဘူးဒီးတၢ်ပၢၢ်ဆၢသုးပၥ်ဖှိၣ်ကရူၢ်တဂၤစံးဝဲဒ်အံၤန့ၣ်လီၤ.
အဝဲစံးဝဲလၢ“အခဲအံၤတကပၤဒီးတကပၤတဲသကိးတၢ်နၢ်ဟူလိၥ်သးလံ,အဃိန့ၣ်တၢ်ပၢၢ်ဆၢသုးပၥ်ဖှိၣ်တကပၤတဲစိသုးကီၣ်ကးအပှၤတဖၣ်လၢကပၤလီၤစုကဝဲၤ,ကတူၢ်ဃၣ်ကွံၥ်သးအိၣ်ဝဲန့ၣ်လီၤ.သုးကီၣ်ကးတကပၤဒုအခိၣ်ပျံၤမးတဲကဒါက့ၤဝဲတၢ်ပၢၢ်ဆၢသုးကရူၢ်လၢပၥ်လီၤစုကဝဲၤတကဲဘၣ်.ဃ့ဘူၣ်တၢ်ပၢၢ်ဆၢသုးပၥ်ဖှိၣ်ကရူၢ်,ပှၤလၢဃ့ဘူၣ်တၢ်တဖၣ်န့ၣ်ဒုအိၣ်လၢတၢ်လီၢ်ဘၣ်,လၢတၢ်ကိပူၤလီၤ.ဘၣ်ဆၣ်နါက့အသုးကလၢၤအပူၤန့ၣ်တယံၥ်တမီၢ်,အိၣ်အိၣ်တယံၥ်တမီၢ်အပှၤဟးထီၣ်ကွံၥ်လၢသုးကလၢၤပူၤအိၣ်ဝဲန့ၣ်လီၤ.အပှၤလၢဟးထီၣ်တဘျီတဂၤ,ဘၣ်တဘျီဘျီတဘျီခံဂၤသ့ၣ်တဖၣ်န့ၣ်တခီတၢ်ပၢၢ်ဆၢသုးပၥ်ဖှိၣ်ဖီၣ်ချူးက့ၤအိၣ်ဝဲလီၤ.”အဂ့ၢ်စံးဝဲဒၣ်န့ၣ်လီၤ.
လၢန့ၣ်အမဲၥ်ညါ,သုးကီၣ်ကးအပှၤလၢတအဲၣ်ဒိးတူၢ်ဃၣ်သးဒီးဂ့ၢ်လိၥ်ဝဲလၢတပၥ်လီၤစုကဝဲၤဘၣ်တဖၣ်အံၤ,တၢ်ပၢၢ်ဆၢသုးပၥ်ဖှိၣ်တကပၤထီၣ်ခးအဝဲသ့ၣ်ကိးနံၤဒဲးဃၣ်ဃၣ်အိၣ်ဝဲအမဲၥ်ညါ,ကးတံၥ်ကွံၥ်ဝဲတၢ်စိၥ်ဆှၢတၢ်အီၣ်တၢ်အီအကျဲအိၣ်ဝဲအဃိ,သုးကီၣ်ကးအံၤသူဝဲတၢ်ဆှၢထီၣ်တၢ်အီၣ်ဒီးတၢ်ပီးတၢ်လီလၢကဘီယူၤတကပၤအိၣ်ဝဲတပယူၥ်ဃီအဂ့ၢ်,ပှၤလၢအဘူးဒီးတၢ်ပၢၢ်ဆၢသုးပၥ်ဖှိၣ်ကရူၢ်တဂၤလီၢ်လီၢ်အံၤစံးအါထီၣ်ဝဲဒၣ်န့ၣ်လီၤ.
နိၣ်ခၠိနဲၣ်ပယီၤဒုးယၤသုးကလၢၤအံၤ,တနံၣ်အံၤလါမးရှးအတီၢ်ပူၤတၢ်ဒုးက့ၤဆူၣ်ထီၣ်ကဒါက့ၤဝဲဒီးတၢ်ပၢၢ်ဆၢသုးပၥ်ဖှိၣ်ကရူၢ်တကပၤကဝီၤကးတံၥ်ဃၥ်ဝဲအဖီခိၣ်,သုးကီၣ်အံၤဒ်သိးအဒုးယၤသုးကလၢၤတဖျၢၣ်အံၤအသုတလီၤကွံၥ်တဂ့ၤအဂီၢ်,မၤဝဲကလံၤကျါတၢ်ဒုးတပယူၥ်ဃီအိၣ်ဝဲအသိး,အပှၤလၢအိၣ်(ဝဲကလံၣ်)အမျီၤသုးကလၢၤအပူၤတဖၣ်စ့ၢ်ကီးခးလီၤစၢၤဝဲကျိဖးဒိၣ်အိၣ်ဝဲခဲအံၤခဲအံၤအဂ့ၢ်,ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဖၣ်စံးဝဲန့ၣ်လီၤ.
တကတီၢ်ဃီ,ခီဖျိတၢ်ပၢၢ်ဆၢသုးပၥ်ဖှိၣ်မၤဝဲတၢ်ဒုးစဲးပြဲးဒီးအိၣ်ခိးခးစ့ၢ်ကီးဝဲအဃိ,အပူၤကွံၥ်လါနိၣ်ဝ့ဘၢၣ်(၄)သီအနံၤအပူၤတၢ်ဒုးဆူၣ်ဝဲလၢစ့နိၣ်ခၠိနဲၣ်ဒုးယၤသုးကလၢၤအမဲၥ်ညါ,(စံနပ့ၤ)ပတီၢ်ထူၣ်သဝီဃုၥ်ဒီး(ယပၣ်တီၤ)တၢ်လီၢ်တဖၣ်အပူၤဒီးသုးကီၣ်ကးအနိၣ်ခၠိၣ်နဲၣ်(စ့ၣ်ကူၤ)လၢအိၣ်(ယပၣ်တီၤ)တၢ်လီၢ်ပူၤတဖၣ်အံၤလီၤပၠံလီၤပၠါဒီးဂုၤက့ၤဝဲအခံအိၣ်ဝဲဖဲအပူၤကွံၥ်လါနိၣ်ဝ့ဘၢၣ်(၁၂-၁၃)သီအနံၤအပူၤအိၣ်ဝဲအဂ့ၢ်,ဂံၢ်ခီၣ်ထံးပှၤဟ့ၣ်တၢ်ကစီၢ်ဖိတဖၣ်စံးစ့ၢ်ကီးဝဲဒၣ်န့ၣ်လီၤ.
ဒ်န့ၣ်အသိး,နိၣ်ခၠိနဲၣ်ပယီၤဒုးယၤသုးကလၢၤအံၤအိၣ်ဝဲဖဲဃိၣ်သၢဖျၢၣ်,သရိၥ်ဝါကျဲမုၢ်အဖီခိၣ်ဒီးခံခီခံကပၤတၢ်ခးလိၥ်သးကဲထီၣ်ယံၥ်ဝဲအဖီခိၣ်,ဟီၣ်ကဝီၤအပူၤဒူသဝီ(၅)ဖျၢၣ်ကမျၢၢ်တဖၣ်ဘၣ်ဃ့ၢ်အိၣ်ကဒုဝဲအသးဒီး,နိၣ်ခၠိနဲၣ်,ဖါပြး,ချၢၣ်တကူၣ်တၢၣ်,နိၣ်တကီကျဲတၢ်လီၢ်တဖၣ်အပူၤ,ကမျၢၢ်တၢ်ဟးထီၣ်က့ၤလီၤကီထီၣ်ဝဲအဂ့ၢ်,လီၢ်ကဝီၤဖိတဖၣ်စံးဝဲန့ၣ်လီၤ.
