လါဒံၣ်စ့ဘၢၣ် ၃၁ သီ, ၂၀၂၄ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ် (သုးက့ ၁) ဘံလ့ကီၢ်ဆၣ်အပူၤ ယိၤကျါသ၀ီလၢအိၣ်တယံၤတဘူးဒီးဃီဖိပျဲၢ်,ထံၣ်ဆံၣ်ဘီသ၀ီလၢ အပူၤကွံၥ် ကဘီယူၤလဲၤခးလီၤတ့ၢ်တၢ်အံၤန့ၣ် ဖဲမဟါပယီၤသုးယူၤဟဲခးလီၤတၢ်လၢယိၤကျါသ၀ီဃၢၤ၀ံၤလီၢ်ခံ သ၀ီဖိလၢအိၣ်ဘူး ဖဲတၢ်ခိၣ်တၢ်ဃၢၤ ဖဲန့ၣ်တဖၣ် အိၣ်ဒီးတၢ်ဘၣ်ယိၣ်ဘၣ်ဘှီအဂ့ၢ်န့ၣ် သ့ၣ်ညါဘၣ်စံး၀ဲန့ၣ်လီၤ.
ဖဲမဟါလါဒံၣ်စ့ဘၢၣ် ၃၀ သီ ကညီကလုၥ်နံၣ်ထီၣ်သီမုၢ်နံၤအံၤန့ၣ် ပယီၤသုးကဘီယူၤဟဲခးလီၤကျိဖးဒိၣ်တစှၤန့ၢ်ခံဖျၢၣ် လီၤတဲၥ်ပိၢ်ဖးထီၣ်၀ဲလၢ ယိၤကျါသ၀ီဃၢၤဒီး တကီၢ်ခါခဲအံၤ ဒူသ၀ီလၢအိၣ်ဘူးဖဲတၢ်ခိၣ်တၢ်ဃၢၤ၀ဲန့ၣ်ကမျၢၢ်သ့ၣ်တဖၣ် အိၣ်ဒီးတၢ်ပျံၤတၢ်ဖုးတၢ်ဘၣ်ယိၣ်ဘၣ်ဘှီဒီးတနီၤန့ၣ်အိၣ်လၢဟံၣ်တဘူၣ်လဲၤစံၣ်မံက့ၤလၢတၢ်ပူၤဖျဲးအလီၢ်အိၣ်ထီၣ်၀ဲအဂ့ၢ်န့ၣ် ပှၤဘၣ်မူဘၣ်ဒါဒီးကမျၢၢ်လၢအိၣ်ဘူးဖဲန့ၣ် တဖၣ်စံး၀ဲအသိးသ့ၣ်ညါဘၣ်န့ၣ်လီၤ.
ဘၣ်ဃးတၢ်ဂ့ၢ်အံၤန့ၣ် (သုးက့ ၁)သုးက့ခိၣ် သုးခိၣ်ကျၢၢ်ဖိ စီၤစိမၠ့ၣ်ထွ့ စံး၀ဲလၢ “ပှၤစံၣ်မံကိးသ၀ီလီၤ.ပှၤလဲၤစံၣ်အိၣ်လၢထံခံ ထံကွၥ်,လၢစံၥ်ပျီပူၤ.ဖဲမနၤနါက့ကဘီယူၤဟဲထီၣ်ဒီတနၤကျၢၤလီၤ.ဟဲဆှၣ်တၢ်ဟဲဖဲခိၣ်ဒီအံၤဘူးဘူးဖိလီၤ.ခဲအံၤပှၤကမျၢၢ်ဘၣ်အိၣ်လၢတၢ်ပျံၤတၢ်ဖုးပူၤခဲလၢၥ်လီၤ”အဂ့ၢ်န့ၣ် စံးခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤန့ၣ်လီၤ.
ဒ်လီၢ်က၀ီၤကမျၢၢ်စံး၀ဲအသိးန့ၣ် ဖဲမဟါပယီၤသုးကဘီယူၤဟဲခးလီၤတၢ်လၢယိၤကျါသ၀ီဃၢၤဘျီ၀ဲအံၤန့ၣ် တနံၤဃီဘၣ်လၢ တၢ်မၤ၀ဲကညီဒီကလုၥ်နံၣ်ထီၣ်သီတၢ်ရဲၣ်တၢ်ကျဲၤဒီး ဘၣ်ဆၣ်ကျိဖးဒိၣ်အံၤခီဖျိလီၤတဲၥ်ပိၢ်ဖးထီၣ်၀ဲလၢသ၀ီဃၢၤအဃိ တၢ်သံတၢ်ဘၣ်ဒိဘၣ်ထံးတအိၣ်၀ဲဒၣ်ဘၣ်အဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါစံး၀ဲန့ၣ်လီၤ.
တကတီၢ်ဃီဖဲတနံၤအံၤလါဒံၣ်စ့ဘၢၣ် ၃၁ သီ ဂီၤခီအဆၢကတီၢ်စ့ၢ်ကီးန့ၣ် ပယီၤသုးကဘီယူၤဟဲဆှၣ်ဒံးတၢ်လၢလီၢ်က၀ီၤဖဲန့ၣ် အပူၤအဃိ လီၢ်က၀ီၤသ၀ီဖိအဟးပလဲၥ်သးတဖၣ်တနီၤန့ၣ်က့ၤလၢအဟံၣ်တဘူၣ်ဒံးဘၣ် အဂ့ၢ်န့ၣ် သ့ၣ်ညါဘၣ်န့ၣ်လီၤ.
ကမျၢၢ်လၢအိၣ်ဘူးဖဲယိၤကျါသ၀ီအံၤတဂၤ စံး၀ဲလၢ “မဟါလၢယိၤကျါဆၢခိၣ်န့ၣ်ကဘီယူၤဟဲခးလီၤတၢ်. မဟါတနံၤန့ၣ်ကဘီယူၤ ဟဲဆှၣ်တၢ်ဒီတနံၤကျၢၤလီၤ.၀ဲဒၣ်ပတအိၣ်လၢဟံၣ်လၢၤဘၣ်.လၢမဟါနံၣ်ထီၣ်သီ၀ံၤဘျီကဘီယူၤဟဲဆှၣ်တၢ်တပယူၥ်ဃီဘျီပအိၣ်လၢဟံၣ်တဘူၣ်လၢၤဘၣ်, ပဟဲစံၣ်အိၣ်က့ၤလၢဒဲ.ကဘီယူၤဟဲဆှၣ်တၢ်လၢတၢ်ဖီခိၣ်န့ၣ် နကွၢ်ထီၣ်ဖျါ” အဂ့ၢ်န့ၣ် စံး၀ဲန့ၣ်လီၤ.
ပယီၤသုးကဘီယူၤလဲၤခးလီၤတၢ်လၢယိၤကျါသ၀ီဘျီ၀ဲအံၤမ့ၢ်၀ဲကညီဒီကလုၥ်နံၣ်ထီသီမုၢ်နံၤတကးဒံးဘၣ် ဘၣ်လၢတၢ်မၤ၀ဲ နံၣ်ထီၣ်သီတၢ်ရဲၣ်တၢ်ကျဲၤအဃိ ဘၣ်ဃးပယီၤသုးကဘီယူၤကညိၣ်လဲၤခးလီၤတၢ်ဘျီ၀ဲအံၤန့ၣ် ထီဒါပဲၥ်အၢပဲၥ်သီ၀ဲ တဲၥ်တဲၥ်ဖျုဖျု အဂ့ၢ်န့ၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ လီၢ်ခၢၣ်သး၀ဲၤလီၢ်ခိၣ်သ့ၣ် ထုးထီၣ်ပၥ်ဖျါ၀ဲဖဲတနံၤအံၤန့ၣ်လီၤ.
ဘံလ့ကီၢ်ဆၣ်အပူၤ ဖဲအပူၤကွံၥ်တနံၣ်အံၤ(၂၀၂၄)လါမးရှး ၂၃ သီအနံၤ ဃီဖျိပျဲၢ်သ၀ီလၢအိၣ်တယံၤတဘူးဒီးယိၤကျါသ၀ီအံၤ ပယီၤသုးကဘီယူၤဟဲခးလီၤတၢ်အဃိ ကၠိတၢ်သူၣ်ထီၣ်လီၤပှီၢ်ဟးဂီၤ၀ဲ(၃)ဖျၢၣ်ဒီး ပှၤကမျၢၢ်ဟံၣ်တၢ်သူၣ်ထီၣ်စ့ၢ်ကီးဟးဂီၤ၀ဲဒၣ် ကဲထီၣ်တ့ၢ်အသးဒံးန့ၣ်လီၤ.
တကးဒံးဘၣ်လါမးရှးကဘီယူၤလဲၤခးလီၤတၢ်လၢဃီဖိပျဲၢ်သ၀ီပူၤ၀ံၤလီၢ်ခံလါအ့ဖြ့ၣ် ၂၈ သီအနံၤ ပယီၤသုးကဘီယူၤလဲၤခးလီၤ ကဒီးတၢ် လၢထံဆံၣ်ဘီသ၀ီလၢအိၣ်ဘူး၀ဲဃီဖိပျဲၢ်သ၀ီအံၤဒီး ဖဲန့ၣ်ထံဆံၣ်ဘီကၠိအခိၣ်ဒုးလီၤပှီၢ်ဟးဂီၤကဲထီၣ်ဒံး၀ဲန့ၣ်လီၤ.
