လါယနူၤအါရံၤ ၃၁ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဘျံးဒ၀ဲၢ်ကီၢ်ရ့ၣ်(သုးက့ ၄) တနီသရံၣ်၀့ၢ်-မီတီၤကျဲ ကီၢ်ဆၢတၢ်ကူၣ်လဲၤမၤကၤကျဲအံၤ ခီဖျိပယီၤသုးဟူးဂဲၤအါထီၣ်အဃိ ဂ့ၢ်ဂီၢ်အူတၢ်ဂ့ၢ်မ့တအိၣ်ဘၣ်န့ၣ် လ့ၤတက့ၤကမျၢၢ်ထံဖိကီၢ်ဖိတဘၣ်ဟးထီၣ်က့ၤလီၤဘၣ် အဂ့ၢ်န့ၣ် (Black Cobra Column) သုးကျိၤ ထုးထီၣ်ဒုးသ့ၣ်ညါဟ့ၣ်ပလီၢ်၀ဲ ဖဲမဟါလါယနူၤအါရံၤ ၃၀ သီအနံၤန့ၣ်လီၤ.
ဒ်လံၥ်တၢ်ထုးထီၣ်ဒုးသ့ၣ်ညါပူၤပၥ်ဖျါ၀ဲအသိးန့ၣ် ပယီၤသုးကလၢၤလၢအိၣ်ဆီလီၤသးဖဲတနီသရံၣ်ကီၢ်ဆၣ် ကညီဒီကလုၥ် တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ်(၁၁)ဟီၣ်က၀ီၤပူၤအံၤတဖၣ် လၢကဆီကတလဲသုးအဂီၢ်မ့ၢ်ဂ့ၤ, ကဟ့ၣ်လီၤ၀ဲဖီၣ်၀ဲမီတီၤ၀့ၢ်ပူၤ (ဘၠူၣ်ဆီထံ)အကျိအဂီၢ်ဒီး ကဒိၣ်စိက့ၤတနီသရံၣ်-မီတီၤကျဲမုၢ်အံၤအဂီၢ် သုးကီၣ်ကးမၤ၀ဲဒုးယၤတၢ်ဟူးတၢ်ဂဲၤအဂ့ၢ်န့ၣ် သ့ၣ်ညါဘၣ် န့ၣ်လီၤ.
တကတီၢ်ဃီဒ်န့ၣ်အသိးဖဲအပူၤကွံၥ်လါဒံၣ်စ့ဘၢၣ်(၁၈)သီအနံၤန့ၣ်စ့ၢ်ကီး ပယီၤသုးကျိၤဟဲထီၣ်၀ဲလၢ(KNLA)ဟီၣ်က၀ီၤပူၤအဃိ တၢ်ဒုးကဲထီၣ်၀ဲဒိၣ်ဒိၣ်မုၢ်မုၢ်ဒီး တကီၢ်ခါခဲအံၤခီဖျိပယီၤသုးမၤအါထီၣ်ကဒီးအသုးဂံၢ်ဘါအဃိ ကမျၢၢ်ထံဖိကီၢ်ဖိသ့ၣ်တဖၣ် ကအိၣ်လၢတၢ်ပလီၢ်ပဒီဒီးကရဲၣ်သဲကတီၤဆိဃၥ်သးလၢတၢ်ဒုးအဂီၢ်အဂ့ၢ်န့ၣ် လံၥ်တၢ်ပၥ်ဖျါအပူၤစံး၀ဲန့ၣ်လီၤ.
ဒ်န့ၣ်အသိးတကီၢ်ခါခဲအံၤပယီၤသုးကလၢၤတၢ်လီၢ်လၢအိၣ်ဆီလီၤသးဖဲ(ခ့ၣ်အဲၣ်ယူၣ်)တနီသရံၣ်ကီၢ်ဆၣ် သုးရ့ၣ်(၁၁) ဟီၣ်က၀ီၤပူၤတဖၣ် ဟီၣ်က၀ီၤတၢ်ပၢၢ်ဆၢကရူၢ်တကပၤ ကစးထီၣ်မၤ၀ဲဒုးယၤတၢ်ရဲၣ်တၢ်ကျဲၤအဖီခိၣ် တၢ်ဒုးကဲထီၣ်သ့ကိးဆၢ ကတီၢ်ဒဲးအဂ့ၢ်န့ၣ် Black Cobra Column စံး၀ဲန့ၣ်လီၤ.
လၢတၢ်န့ၣ်အဃိဟီၣ်က၀ီၤဖဲန့ၣ်အပူၤတၢ်အိၣ်သးအံၤအိၣ်လၢကဆဲးဆူၣ်ထီၣ်၀ဲအဖီခိၣ် ကမျၢၢ်ထံဖိကီၢ်ဖိတဖၣ်လၢ ကအိၣ်ကတီၤဃၥ်သးလၢတၢ်ဘံၣ်တၢ်ဘၢအလီၢ်,ကရဲၣ်သဲကတီၤပၥ်ဖှိၣ်ဃၥ်တၢ်အီၣ်တၢ်အီ,ကသံၣ်ကသီဒီး ကအိၣ်လၢတၢ်ပလီၢ်ပဒီပူၤအသိး တဘၣ်ပၥ်ဖှိၣ်ထီၣ်သးအိၣ်တပူၤဃီဒီးသုးကီၣ်ကးအပှၤတဖၣ်ဘၣ်အဂ့ၢ်န့ၣ် ဟ့ၣ်ပလီၢ်ဒုးသ့ၣ်ညါ ၀ဲကမျၢၢ်ထံဖိကီၢ်ဖိတဖၣ်န့ၣ်လီၤ.
ဘၣ်ဃးပယီၤသုးဟူးဂဲၤအါထီၣ်အဖီခိၣ်အံၤန့ၣ် ကီၢ်ဆၣ်ပှၤဘၣ်မူဘၣ်ဒါ ပဒိၣ်စီၤထံ၀ါစံး၀ဲလၢ“ဒုၣ်ဒါတၢ်အိၣ်သးခဲအံၤ လၢတနီသရံၣ်ကီၢ်ဆၣ်ပူၤန့ၣ်ဒုၣ်ဒါဟူးဂဲၤ၀ဲဒၣ်တၢ်လီၢ်ခံတီၤ.လၢတကဲးဟီၣ်က၀ီၤတၢ်လီၢ်တတီၤ.မိတီၤကျဲမုၢ် က့ၣ်ဟီၣ်က၀ီၤ သံခိသ၀ီပူၤတတီၤ.ဒီးပမ့ဘၣ်တဲန့ၣ်တသီခံသီတဘျီန့ၣ်တၢ်ဒုးကဲထီၣ်မၢ်မၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤ.
တကးဒံးဘၣ်လၢ(Black Cobra Column)လံၥ်တၢ်ပၥ်ဖျါဟ့ၣ်ပလီၢ်အပူၤန့ၣ်စ့ၢ်ကီးကရူၢ်ကရၢ,၀ဲၤကျိၤပှၤမၤတၢ်ဖိ,ခီပနံၣ်, တၢ်ဖံးတၢ်မၤကစၢ် ဃုၥ်ဒီးပှၤလၢအဟ့ၣ်ဂံၢ်ဟ့ၣ်ဘါ ဆီၣ်ထွဲမၤစၢၤသုးကီၣ်ကးအံၤတဖၣ်တၢ်ကပၥ်အ၀ဲသ့ၣ်လၢဒုၣ်ဒါဒီး တၢ်ကဟံ၀ဲအရ့တုၤ လီၤတီၤလီၤအဂ့ၢ်န့ၣ် စံး၀ဲန့ၣ်လီၤ.
