လါယနူၤအါရံၤ ၃၁ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅) ဒွဲၣ်လိကီၢ်ဆၣ် ကတၢၢ်တံၥ်သုးကလၢၤအံၤ ဖဲအပူၤကွံၥ်နွံ တၢ်ထီၣ်မၤန့ၢ်သုးကလၢၤအံၤအခါ တၢ်ပၢၢ်ဆၢသုးကရူၢ်မၤန့ၢ်၀ဲကျိ(၂၃)ခိၣ်ဒီးကျိချံပှၥ်သၣ်လၢအဂၤတနီၤအိၣ်၀ဲအဂ့ၢ်န့ၣ် သ့ၣ်ညါဘၣ်လၢ(သုးက့ ၅)ပှၤဘၣ်မူဘၣ်ဒါအအိၣ်န့ၣ်လီၤ.
ကတၢၢ်တံၥ်ပယီၤသုးကလၢၤလၢအိၣ်ဆီလီၤသးဖဲကမၤမိၢ်-ဖၣ်ပူၣ်ကျဲမုၢ်အံၤ ခီဖျိ ဟီၣ်က၀ီၤကညီဒီကလုၥ်တၢ်ထူၣ်ဖျဲးသုးမုၢ် ဒိၣ်(KNLA)သုးပၥ်ဖှိၣ်ထီၣ်ခး၀ဲအဃိ ဖဲအပူၤကွံၥ်လါယနူၤအါရံၤ ၂၃ သီအနံၤန့ၣ် ပယီၤသုးလၢအိၣ်သုးကလၢၤပူၤတဖၣ် ဟးထီၣ်ကွံၥ်၀ဲအဖီခိၣ် ဖဲတၢ်ထီၣ်မၤဆှဲလဲတၢ်လီၢ်အခါတၢ်မၤန့ၢ်ဃုၥ်၀ဲကျိချံပှၥ်သၣ်ကဲထီၣ်ဒ်အံၤလီၤအဂ့ၢ်န့ၣ် (သုးက့ ၅) ပှၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံးန့ၣ်လီၤ.
အ၀ဲစံး၀ဲလၢ“ပှၤထီၣ်ကတၢၢ်တံၥ်သုးကလၢၤအခါန့ၣ်ပှၤန့ၢ်၀ဲဒၣ်ကျိခဲလၢၥ်န့ၣ်(၂၃)ခိၣ်,အချံအသၣ်တနီၤ,ဒီး မ့ၣ်ပိၢ်တနီၤ. မ့၀ံၤဃုၥ်ဒီးအ(ကၠၤမၤ)တခါ.ကၠၢၤနရ့ထၢၣ်(၂)ဖျၢၣ်,စဲးကတိၤတၢ်ဖးဒိၣ်(၁)ဖျၢၣ်.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီ တၢ်ကစီၣ် ဖဲမဟါလါယနူၤအါရံၤ ၃၀ သီအနံၤန့ၣ်လီၤ.
တကတီၢ်ဃီဖဲတၢ်ထီၣ်သုးကလၢၤအံၤအခါန့ၣ် မ့မ့ၢ်ပယီၤသုးတကပၤန့ၣ်မ့ၢ်အဘၣ်ဒိဘၣ်ထံးအိၣ်ဧါန့ၣ် မၤလီၤတံၢ်တန့ၢ် ဒံးဘၣ်ဒီး ပယီၤသုးသ့ၣ်တဖၣ်အံၤက့ၤပၥ်ဖှိၣ်ထီၣ်သးလၢသုးခိးကီၢ်ဆၢ(BGF) ၁၀၁၃ သုးကလၢၤလီၢ်လံၤတၢ်လီၢ်ဘၣ်ဆၣ် သုးကလၢၤအံၤ (BGF)အပှၤတအိၣ်၀ဲဘၣ်အဂ့ၢ်န့ၣ် စီၤကျၢၤဒိၣ် စံးအါထီၣ်၀ဲန့ၣ်လီၤ.
လၢန့ၣ်အမဲၥ်ညါဖဲပယီၤသုးက့ၤပၥ်ဖှိၣ်ထီၣ်သးလၢ(BGF)သုးကလၢၤတၢ်လီၢ်လံၤအခါန့ၣ်စ့ၢ်ကီး ကဘီယူၤဟဲခးလီၤတၢ်အိၣ်၀ဲ အသိး ဟဲတ့ၢ်လီၤန့ၢ်အပှၤတၢ်အီၣ်တၢ်အီစ့ၢ်ကီးအိၣ်၀ဲအဂ့ၢ်န့ၣ် သ့ၣ်ညါဘၣ်လၢ(သုးက့ ၅)ပှၤဘၣ်မူဘၣ်ဒါအအိၣ်န့ၣ်လီၤ.
ကတၢၢ်တံၥ်သုးကလၢၤအံၤစးထီၣ်ဖဲအပူၤကွံၥ်လါဒံၣ်စ့ဘၢၣ်အခါန့ၣ် (KNLA)သုးပၥ်ဖှိၣ်ကရူၢ်စးထီၣ်က၀ီၤခး၀ဲအဖီခိၣ် ဒ်သိးသုးကလၢၤအံၤသုတလီၤတဂ့ၤအဂီၢ်စ့ၢ်ကီး သုးကီၣ်ကးအံၤသူ၀ဲကဘီယူၤလဲၤခးလီၤတၢ်လၢသုးကလၢၤအခိၣ်အဃၢၤ တလီၢ်လီၢ်အဃိ ဒူသ၀ီလၢအိၣ်ဘူးဖဲန့ၣ်တဖၣ်ဃ့ၢ်ထီၣ်၀ဲဒၣ်အါးဒီးတနီၤန့ၣ်လဲၤဃ့ၢ်ထီၣ်၀ဲဆူ(သုးက့ ၅)ဟီၣ်က၀ီၤပူၤတုၤလၢခဲအံၤ အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်န့ၣ်အသိး ဖဲအပူၤကွံၥ်လါဒံၣ်စ့ဘၢၣ် ၁၁ သီအနံၤန့ၣ်စ့ၢ်ကီး (တီၤသိလိ)ပယီၤသုးကလၢၤလၢအိၣ်ဒွဲၣ်လိကီၢ်ဆၣ်ပူၤအံၤစ့ၢ်ကီး (သုးက့ ၅)သုးပၥ်ဖှိၣ်ထီၣ်မၤန့ၢ်၀ဲဒီးအခါဖဲန့ၣ်တၢ်မၤန့ၢ်ဃုၥ်စ့ၢ်ကီး၀ဲကျိဖးဒိၣ်,ကျိဖိ,ကျိချံပှၥ်သၣ်တၢ်ဖိတၢ်လံၤသ့ၣ်တဖၣ် အါအါဂီၢ်ဂီၢ်ဒံးန့ၣ်လီၤ.