လါယနူၤအါရံၤ ၃၁ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဘံလ့ကီၢ်ဆၣ်အပူၤ ဖဲတနံၤအံၤလါယနူၤအါရံၤ ၃၁ သီ လၢအလီၤဘၣ်၀ဲကညီဒီကလုၥ်တၢ်ပၢၢ်ဆၢမုၢ်နံၤအံၤန့ၣ် ပယီၤသုးလဲၤတ့ၢ်လီၤ၀ဲ(Kamikaze)ဒြိလၢတၤအုးနံၤသ၀ီပူၤ သ၀ီခါဖၠၣ်(၅)ဘ့ၣ် အဂ့ၢ်န့ၣ် ကီၢ်ရ့ၣ်ပှၤဘၣ်မူဘၣ်ဒါစံး၀ဲန့ၣ်လီၤ.
ဖဲတနံၤအံၤဂီၤခီ ၇း၀၀ နၣ်ရံၣ်ဃၣ်ဃၣ်အဆၢကတီၢ်န့ၣ် တၢ်တယးကွၢ်၀ဲလၢကမၤမိၢ်သုးကလၢၤအံၤတဆီ ပယီၤသုးပျၢ်လီၤ ၀ဲဒြိ(၅)ဘ့ၣ် လဲၤတ့ၢ်လီၤ၀ဲလၢတၤအုးခံကရူၢ် တၤအုးနံၤသ၀ီပူၤအဃိ လီၤတဲၥ်ပိၢ်ဖးထီၣ်၀ဲလၢသီခါဖၠၣ်ကရၢၢ်ဃၢၤ (၁)ဘ့ၣ်ဒီး လၢသ၀ီချၢ(၄)ဘ့ၣ်အကျါ ပိၢ်ဖးထီၣ်၀ဲ(၂)ဘ့ၣ်,တပိၢ်ဖးထီၣ်ဘၣ်(၂)ဘ့ၣ်အဂ့ၢ်န့ၣ် ဒူသထူၣ်ကီၢ်ရ့ၣ် နဲၣ်ရွဲၣ် ပဒိၣ်စီၤအ့နဲၤ စံး၀ဲန့ၣ်လီၤ.
အ၀ဲစံး၀ဲလၢ “တဂီၤညါအံၤန့ၣ်ဒြိန့ၣ်အိၣ်ဟဲလၢကမၤမိၢ်တကပၤန့ၣ်.အဟဲဘျီလီၤတဲၥ်သီၣ်၀ဲဆူတၤအုးနံၤတကပၤန့ၣ်. ပသံကွၢ်န့ၣ်ပှၤတဲလၢအလီၤတဲၥ်ပိၢ်ဖးထီၣ်လၢတၤအုးနံၤသီခါဖၠၣ်ကရၢၢ်ပူၤတဘ့ၣ်.မ့၀ံၤလီၤတဲၥ်လၢတၤအုးနံၤသ၀ီဃၢၤန့ၣ်(၄)ဘ့ၣ်.အပိၢ်ဖး(၂)ဘ့ၣ်,လၢအတပိၢ်ဖးထီၣ်ဘၣ်န့ၣ်(၂)ဘ့ၣ်”အဂ့ၢ်န့ၣ် စံးဘၣ်ခ့ၣ်အဲစံၣ်-ကညီတၢ်ကစီၣ်ဖဲတဟါအံၤန့ၣ်လီၤ.
လၢန့ၣ်အမဲၥ်ညါခီဖျိပယီၤသုးဟဲတ့ၢ်လီၤဒြိမ့ၣ်ပိၢ်အံၤအဃိ သ၀ီဖိသ့ၣ်တဖၣ်ပျံၤတၢ်ဖုးတၢ်,ဘၣ်အိၣ်လၢတၢ်ဘၣ်ယိၣ်အပူၤအသိး တနံၤအံၤမ့ၢ်၀ဲကညီဒီကလုၥ်မၤထူရၤမုၢ်နံၤဘၣ်ဆၣ် တၢ်လီၢ်ဖဲန့ၣ်တၢ်မၤတၢ်ရဲၣ်တၢ်ကျဲၤတအိၣ်နီတမံၤဘၣ်ဒီးအ၀ဲသ့ၣ်အံၤမ့ၢ် အတၢ်ပညိၣ်အိၣ်ဒ်လဲၣ်တသ့ၣ်ညါဘၣ်အဂ့ၢ်န့ၣ် ပဒိၣ်စီၤအ့နဲၤ စံးအါထီၣ်၀ဲန့ၣ်လီၤ.
“တၢ်ကဲထီၣ်သးဖဲန့ၣ်ဘျီကမျၢၢ်တဖၣ်န့ၣ်အိၣ်ဒီးတၢ်ပျံၤတၢ်ဖုးတၢ်ဘၣ်ယိၣ်.တနီၤန့ၣ်ဃ့ၢ်ပလဲၥ်သးလၢတၢ်ခိၣ်တၢ်ဃၢၤ.တနီၤန့ၣ်အိၣ်ခိးကနၣ်တၢ်လၢတၢ်ပူၤခိၣ်ဒူန့ၣ်လီၤ.တနံၤအံၤတၢ်ပၢၢ်ဆၢမုၢ်နံၤဘၣ်ဆၣ်တၤအုးနံၤသ၀ီပူၤန့ၣ်တၢ်မၤလၤကပီၤတၢ်ပၢၢ်ဆၢမုၢ်နံၤတအိၣ်နီမံၤဘၣ်.မ့၀ံၤပှၤတၢ်ပၢၢ်ဆၢဖိကအိၣ်ဖှိၣ်စ့ၢ်ကီးတအိၣ်နီမံၤဘၣ်.အဃိန့ၣ်မ့ၢ်အတၢ်ပညိၣ်အိၣ်ဒ်လဲၣ်တသ့ၣ်ညါဘၣ်.အ၀ဲသ့ၣ်ပျၢ်လီၤဒြိဟဲကွံၥ်၀ဲဆူတၤအုးနံၤသ၀ီဘျီကမျၢၢ်တဖၣ်ဘၣ်အိၣ်၀ဲဒီးတၢ်ပျံၤတၢ်ဖုးတၢ်ဘၣ်ယိၣ်န့ၣ်လီၤ”အဂ့ၢ်န့ၣ် စံး၀ဲန့ၣ်လီၤ.
တၢ်လဲၤတ့ၢ်လီၤဒြိဘျီ၀ဲအံၤခီဖျိဒြိန့ၣ်လီၤတဲၥ်ပိၢ်ဖးထီၣ်၀ဲလၢသီခါဖၠၣ်ကရၢၢ်ဃၢၤဒီးသ၀ီဃၢၤအဃိ ပှၤကညီတၢ်ဘၣ်ဒိဘၣ်ထံး တအိၣ်၀ဲဘၣ်ဒီး ဘၣ်ဆၣ်သဲးထူၣ်ဘၣ်ဒိဘၣ်ထံးဟးဂီၤ၀ဲအိၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်န့ၣ်အသိးဖဲတနံၤအံၤဂီၤခီ ၇း၃၀ ဃၣ်ဃၣ်အဆၢကတီၢ်န့ၣ် လၢခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဖၣ်အၣ်ကီၢ်ရ့ၣ် (သုးက့ ၇) ဟီၣ်က၀ီၤအပူၤ တၢ်လဲၤတ့ၢ်လီၤ(ကၤမံၤကၤစံၤ)ဒြိမ့ၣ်ပိၢ် ၂ ဘ့ၣ်လၢကျိၣ်ယီၢ်လ့ပျီဃၢၤအဃိ ပှၤကမျၢၢ်ဘၣ်ဒိ(၁)ဂၤဒီး ဟံၣ်တဖျၢၣ်,သိလ့ၣ်(၁)ခိၣ်ဟးဂီၤ၀ဲဒၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဘံလ့ကီၢ်ဆၣ်ပူၤ ဖဲအပူၤကွံၥ်တလါယနူၤအါရံၤ ၁၆ သီ ဟါခီအဆၢကတီၢ်စ့ၢ်ကီး သုးကီၣ်ကး(Kamikaze)ဒြိခံဘ့ၣ် လဲၤတ့ၢ်လီၤမ့ၣ်ပိၢ် လီၤတဲၥ်ပိၢ်ဖးထီၣ်၀ဲလၢ ထံဆံၣ်ဘီတီၤခၢၣ်သးကၠိတၢ်သူၣ်ထီၣ်ဖီခိၣ်(၁)ဖျၢၣ်ဒီး လၢသ၀ီဃၢၤ(၁)ဖျၢၣ်အဃိ ကၠိတၢ်သူၣ်ထီၣ်အခိၣ်လီၤပှီၢ်ဟးဂီၤကဲထီၣ်တ့ၢ်အသးဒံးန့ၣ်လီၤ.
