လါဖ့ၤဘြူၤအါရံၤ ၁၇ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ဒူသထူၣ်ကီၢ်ရ့ၣ်(သုးက့ ၁)ဘံလ့ကီၢ်ဆၣ် ကီၢ်ဟဲကရူၢ် ကီၢ်ဟဲသ၀ီအပူၤ ခီဖျိပယီၤသုးကဘီယူၤ လဲၤခးလီၤ တၢ်အဃိ ကမျၢၢ်ဘၣ်ဒိ(၅)ဂၤဒီးဟံၣ်ဟးဂီၤ(၉)ဖျၢၣ်အဂ့ၢ်န့ၣ် ခ့ၣ်အဲၣ်ယူၣ် လီၢ်ခၢၣ်သးထုးထီၣ်ပၥ်ဖျါ၀ဲဖဲမဟါ လါဖ့ၤဘြူၤ အါရံၤ ၁၆ သီအနံၤန့ၣ်လီၤ.
ဖဲဖ့ၤဘြူၤအါရံၤ ၁၅ သီ မုၢ်နၤခီ ၁၁း၃၀ မံးနံးအဆၢကတီၢ်န့ၣ် တၢ်ဒုးကဲထီၣ်တအိၣ်ပယီၤသုးအကဘီယူၤလဲၤတ့ၢ်လီၤ၀ဲ မ့ၣ်ပိၢ်(၂)ဖျၢၣ် လီၤတဲၥ်ပိၢ်ဖးထီၣ်၀ဲလၢကီၢ်ဟဲသ၀ီပူၤ,သ၀ီချၢအဃိ ကမျၢၢ်တၢ်ဘၣ်ဒိဘၣ်ထံးဒီးဟံၣ်တၢ်သူၣ်ထီၣ် ဘၣ်ဟးဂူၥ် ဟးဂီၤကဲထီၣ်၀ဲဒ်အံၤန့ၣ်လီၤ.
ခ့ၣ်အဲၣ်ယူၣ်တၢ်ပၥ်ဖျါပူၤပၥ်ဖျါ၀ဲအသိးန့ၣ် သ၀ီဖိလၢအဘၣ်ဒိ(၅)ဂၤအကျါ(၂)ဂၤန့ၣ်ဘၣ်တၢ်လဲၤဆှၢကူစါယါဘျါအီၤဆူ တၢ်ဆါဟံၣ်ဒီးဒ်န့ၣ်အသိးကဘီယူၤလဲၤခးလီၤတၢ်ဘျီ၀ဲအံၤကမျၢၢ်အတၢ်ဖိတၢ်လံၤစ့ၢ်ကီးမ့ၣ်ပိၢ်အက့အခီဘၣ်ဟးဂီၤ၀ဲဒၣ်အိၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
လၢန့ၣ်အမဲၥ်ညါတနံၤဃီတချုးလၢသုးကီၣ်ကးအကဘီယူၤလဲၤခးလီၤတၢ်လၢကီၢ်ဟဲသ၀ီပူၤဒံးဘၣ်အခါန့ၣ် လဲၤခးလီၤတၢ်ဒံးလၢဖၣ်အၣ်ကီၢ်ဆၣ် ၀ဲပၠၣ်ကရူၢ် ဒူသ၀ီပူၤဒံးအဂ့ၢ်န့ၣ် (သုးက့ ၁)သုးက့ခိၣ် သုးခိၣ်ကျၢၢ်ဖိ စီၤစိမၠ့ၣ်ထွ့ စံး၀ဲန့ၣ်လီၤ.
အ၀ဲစံး၀ဲလၢ“တၢ်တဟါန့ၣ်ကဘီယူၤလဲၤခးလီၤတၢ်ဘူးလၢကမၤမိၢ်တကပၤန့ၣ်.ခးလီၤ၀ဲလၢကၠါရၤခံသ၀ီ,မဲးကၠံၣ်ခီၣ် ထံး,ဖါပီၢ် တကပၤန့ၣ်. တၢ်တဟါန့ၣ်ခးလီၤ၀ဲ၀ံၤဘျီဟဲက့ၤခးလီၤကဒါ၀ဲလၢကီၢ်ဟဲသ၀ီပူၤ(၂)ဖျၢၣ်”အဂ့ၢ်န့ၣ် စံးဘၣ် ခ့ၣ်အဲးစံၣ်- ကညီတၢ်ကစီၣ်ဖဲတနံၤအံၤန့ၣ်လီၤ.
ဒ်န့ၣ်အသိးဖၣ်အၣ်ကီၢ်ဆၣ်အပူၤ စှၤသီအတီၢ်ပူၤအံၤ (သုးက့ ၅)ကမၤမိၢ်သုးကလၢၤ, သထူၣ်ကီၢ်ဆၣ်ပူၤ ပနွဲၢ်ကျါသုးကလၢၤ, ဒီး ဘူးဒးတၢ်ဘါတၢ်ဂုၤထီၣ်ပသီထီၣ်ကညီသုးမုၢ်ဒိၣ်(DKBA) သုးခိၣ်ဘိၤဘံၣ်အပှၤစ့ၢ်ကီး ခးလီၤ၀ဲကျိဖးဒိၣ် ကဲထီၣ်သးတလီၢ်လီၢ်အဂ့ၢ်န့ၣ် လီၢ်က၀ီၤကမျၢၢ်တဂၤ စံး၀ဲန့ၣ်လီၤ.
အ၀ဲစံး၀ဲလၢ“အပူၤကွံၥ်စှၤသီအခါန့ၣ်နါက့လၢတီၤကလ့သုးကလၢၤန့ၣ်ခးစိလီၤ.မ့၀ံၤလၢသီခါဃိၣ်ဖိ သုးခိၣ်ဘိၤဘံၣ် အပှၤ နါက့ခးစိဃီၤ.လၢကမၤမိၢ်သုးကလၢၤနါက့ခးစိလီၤတၢ်ခး၀း၀းလီၤ.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီ တၢ်ကစီၣ် န့ၣ်လီၤ.
ဒူသထူၣ်ကီၢ်ရ့ၣ်ဟီၣ်က၀ီၤအပူၤ စးထီၣ်ဖဲ(၂၀၂၅)လါယနူၤအါရံၤထီၣ်အံၤန့ၣ် သုးကီၣ်ကးအံၤခးလီၤကျိဖးဒိၣ်, သူ၀ဲဒၣ်ဒြိတကးဒံးဘၣ်သူ၀ဲဒၣ်ကဘီယူၤပညိၣ်ဟးလီၤခးလီၤတၢ်လၢတၢ်ဘူၣ်တၢ်ဘါလီၢ်,ကၠိတၢ်သူၣ်ထီၣ်,ကမျၢၢ်အိၣ်ဆိးလီၢ် ဟဲအါထီၣ်၀ဲဒၣ်ဖျိဖျိဖျါဖျါအဂ့ၢ်န့ၣ် သ့ၣ်ညါဘၣ်န့ၣ်လီၤ.
