လါမးရှး ၃ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ချၢၣ်လံၢ်ထူၣ်ကီၢ်ရ့ၣ်(သုးက့ ၃)လၢၢ်ဒိၣ်ကီၢ်ဆၣ်အပူၤ ခီဖျိပယီၤသုးကဘီယူၤလဲၤ ခးလီၤတၢ်အဃိ ဘၣ်သံ၀ဲကမျၢၢ်ပှၤလီၢ်အိၣ်ကမှံပိၥ်မုၣ်(၁)ဂၤဒီးဘၣ်ဒိ(၂)ဂၤအဂ့ၢ်န့ၣ် ခ့ၣ်အဲၣ်ယူၣ်လီၢ်ခၢၣ်သး ထုးထီၣ်ပၥ်ဖျါ၀ဲ ဖဲတနံၤအံၤန့ၣ်လီၤ.
ပယီၤသုးကဘီယူၤလၢအိၣ်ဆီလီၤသးလၢတီအူကီၢ်ရ့ၣ်(သုးက့ ၂) ကဘီယူၤသန့အံၤ ဖဲလါမးရှး ၁ သီ ဟါခီ ၆း၀၀ နၣ်ရံၣ် အဆၢကတီၢ်န့ၣ် လဲၤခးလီၤ၀ဲတၢ်လၢ (သုးက့ ၃)လၢၢ်ဒိၣ်ကီၢ်ဆၣ် ဟီၣ်ခိၣ်ဂီၤသ၀ီပူၤအဃိ ကမျၢၢ်ပှၤလီၢ်အိၣ်ကဒုလၢအဟဲစံၣ်အိၣ် ဖဲန့ၣ်တဂၤလၢအမ့ၢ် နီၢ်ပတီၣ်၀ၤ(၂၅)နံၣ်အံၤသံ၀ဲဒီး စီၤသါလွ့ၤထိ(၂၇)နံၣ်အံၤဘၣ်ဒိဘၣ်ထံးကဲထီၣ်သးဒ် အံၤလီၤအဂ့ၢ်န့ၣ် ခ့ၣ်အဲၣ်ယူၣ် စံး၀ဲန့ၣ်လီၤ.
ဒ်န့ၣ်အသိးဖဲလါဖ့ၤဘြူၤအါရံၤ ၂၈ သီ ဟါခီ ၄း၀၀ နၣ်ရံၣ်အဆၢကတီၢ်န့ၣ်စ့ၢ်ကီး လၢလၢၢ်ဒိၣ်ကီၢ်ဆၣ်အပူၤ ပယီၤသုးခီၣ်သုးရ့ၣ် (ခလရ-၂၆၄)ခးလီၤ၀ဲ(၈၁ မမ)ကျိဖးဒိၣ်(၄)ဖျၢၣ် လီၤတဲၥ်ပိၢ်ဖးထီၣ်၀ဲလၢယ့ၤလဲၤကၠိ(ရေလည်ကျွန်း)သ၀ီဒီးအဲၤဒိ(အိုင်ဒိုး)ထံကျိ ကပၤအဃိ ဘၣ်ဒိ၀ဲကမျၢၢ်ပိၥ်ခွါ(၅၀)နံၣ်တဂၤဒီး ကျီၢ်သံ(၁)ဒု,ဘၣ်ဒိ(၁)ဒု,ဟံၣ်(၁)ဖျၢၣ်,ဒဲ(၁)ဖျၢၣ်,တၢ်လိမုၢ်(၁)ဘ့ၣ်ဟးဂီၤ၀ဲ အဂ့ၢ်န့ၣ် ခ့ၣ်အဲၣ်ယူၣ် လံၥ်တၢ်ပၥ်ဖျါအပူၤပၥ်ဖျါ၀ဲန့ၣ်လီၤ.
လၢန့ၣ်အမဲၥ်ညါဖဲအပူၤကွံၥ်လါဖ့ၤဘြူၤအါရံၤ ၂၆ သီအနံၤ ပယီၤသုးလဲၤတ့ၢ်လီၤ၀ဲဒြိတဖျၢၣ်လၢ ဖၠၤတလ့(ဖျံတလင်း)သ၀ီပူၤအဃိ ကၠိတၢ်သူၣ်ထီၣ်(၂)ဖျၢၣ် ဃုၥ်ဒီး တၢ်သူၣ်ထီၣ်လၢအဂၤဟးဂီၤ၀ဲဒၣ်န့ၣ်လီၤ. ဒ်န့ၣ်အသိးမုၢ်ဆ့ၣ်ထီၣ် ၂၇ သီ ဟါခီ ၄း၀၀ ဘျဲၣ် အဆၢကတီၢ်စ့ၢ်ကီး လဲၤတ့ၢ်လီၤဒြိမ့ၣ်ပိၢ်အဃိ ကမျၢၢ်အဟံၣ်ဟးဂီၤကဒီး၀ဲ(၁)ဖျၢၣ်အဂ့ၢ်န့ၣ် ခ့ၣ်အဲၣ်ယူၣ် ထုးထီၣ်ပၥ်ဖျါ တ့ၢ်ဃၥ်၀ဲ အိၣ်န့ၣ်လီၤ.
ချၢၢ်လွံၣ်ထူၣ်ကီၢ်ရ့ၣ်ဟီၣ်က၀ီၤအပူၤ တၢ်ဒုးကဲထီၣ်အိၣ်ဂ့ၤတအိၣ်ဂ့ၤသုးကီၣ်ကးအံၤခးလီၤ၀ဲကျိဖးဒိၣ်, သူစ့ၢ်ကီး၀ဲကဘီယူၤ ဟးခးလီၤတၢ်တလီၢ်လီၢ် အဃိ ကမျၢၢ်ထံဖိကီၢ်ဖိတဖၣ်ဘၣ်ဘၣ်အိၣ်လၢတၢ်ပျံၤတၢ်ဖုး, ဘၣ်လဲၤထီၣ်က့ၤလီၤလၢတၢ်ဘၣ်ယိၣ် ဘၣ်ဘှီ အပူၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
