လါအ့ဖြ့ၣ် ၂၄သီ, ၂၀၂၅နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ,ဘျံးဒဝဲၢ်ကီၢ်ရ့ၣ်,သုးက့(၄),ထံမိၢ်ပှၢ်ဟီၣ်ကဝီၤလီၤဆီအပူၤ စးထီၣ်လၢ လါအ့ဖြ့ၣ် ၁၂သီအနံၤတုၤအသီ(၂၀)အနံၤန့ၣ် ခီဖျိသုးကီၣ်ကးအကလံၤကျါတၢ်ဒုးအဃိ သဝီ(၆)ဖျၢၣ်အပူၤကမျၢၢ်သ့ၣ်တဖၣ်ဘၣ်ဃ့ၢ်ပဒ့ၣ်သးအဂ့ၢ် သ့ၣ်ညါဘၣ်လၢ ဘျံးဒဝဲၢ်ကီၢ်ရ့ၣ် ကီၢ်ပူၤကညီပှၤလီၢ်အိၣ်ကမှံဖိကမံးတံၥ်အပှၤဘၣ်မူဘၣ်ဒါအအိၣ်န့ၣ်လီၤ.
ကမျၢၢ်ဖိသ့ၣ်တဖၣ်အံၤခီဖျိတၢ်သုးသဒၢစိအဝဲသ့ၣ်အလီၢ်အကျဲအဃိ ပှၤကညီတၢ်ဘၣ်ဒိဘၣ်ထံးတအိၣ်ဘၣ်,ဘၣ်ဆၣ် ဒူသဝီပူၤဟံၣ်ဃီဒီးတၢ်ဘူၣ်တၢ်ဘါလီၢ်တနီၤတၢ်ဘၣ်ဒိဘၣ်ထံးအိၣ်ဝဲဒၣ်အဂ့ၢ် ဘျံးဒဝဲၢ်ကီၢ်ရ့ၣ် ကီၢ်ပူၤကညီပှၤလီၢ်အိၣ်ကမှံဖိကမံးတံၥ်အပှၤပၢၤလီၢ်ဆ့ၣ်နီၤ သရၣ်ဘိၣ်ဘိၣ်ခ့ၣ်မီၣ် စံးဘၣ်ဝဲခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤ.
အဝဲစံးဝဲဒၣ်လၢ“စးထီၣ်လၢ လါအ့ဖြ့ၣ် (၁၂)သီ တုၤအသီ(၂၀)အနံၤန့ၣ် ပယီၤသုးကဘီယူၤဟဲခးလီၤတၢ်ကိးနံၤဒဲးလီၤ. ဘၣ်ဆၣ်ကမျၢၢ်သ့ၣ်တဖၣ်န့ၣ်ခီဖျိတၢ်သုးသဒၢကွံၥ်အလီၢ်လၢအမဲၥ်ညါတနွံလံအဃိန့ၣ် ကမျၢၢ်တၢ်ဘၣ်ဒိဘၣ်ထံးတအိၣ်ဘၣ်.မ့မ့ၢ်လၢထံထၣ်ဒီးအမျၢ်သဝီန့ၣ်တၢ်ဘၣ်ဒိဘၣ်ထံးအိၣ်လၢတၢ်သူၣ်ထီၣ်ဒ်အမ့ၢ် သီခါဖၠၣ်,တၢ်ဘါယွၤသရိၥ်ဒီးဟံၣ်ဃီသ့ၣ်တဖၣ်န့ၣ်အိၣ်ဝဲဒၣ်န့ၣ်လီၤ.မ့မ့ၢ်ပှၤကညီတၢ်ဘၣ်ဒိဘၣ်ထံးတအိၣ်ဘၣ်.”အဂ့ၢ်စံးဝဲဒၣ်န့ၣ်လီၤ.
တကတီၢ်ဃီ သဝီ(၆)ဖျၢၣ်လၢကမျၢၢ်ဘၣ်ဃ့ၢ်ပဒ့ၣ်သးသ့ၣ်တဖၣ်န့ၣ်မ့ၢ်ဝဲ အမိၤ,ထံထၣ်,ကၣ်တြၥ်ခံ,ထံခံ,အမျၢ်,အမျၢ်ထၣ်ဒီးနီၢ်တမှံၤသဝီစ့ၢ်ကီးဘၣ်အိၣ်လၢတၢ်ပလီၢ်သူၣ်ပလီၢ်သးအပူၤအဂ့ၢ်ဒီးအခဲအံၤတၢ်ထီၣ်မၤန့ၢ်ထံထၣ်ပယီၤသုးကလၢၤဘၣ်ဆၣ် ခီဖျိထံခံပယီၤသုးကလၢၤအိၣ်ဒံးအဖီခိၣ် ကဘီယူၤတၢ်လီၤဘၣ်ယိၣ်အိၣ်ဒံးအဃိ ကမျၢၢ်ဖိသ့ၣ်တဖၣ်အံၤက့ၤအိၣ်က့ၤဆိးလၢဒူသဝီတဘူၣ်ဒံးဘၣ်အဂ့ၢ် သ့ၣ်ညါဘၣ်ဒ်ကီၢ်ရ့ၣ်အပှၤဘၣ်မူၣ်ဘၣ်ဒါစံးဝဲဒၣ်အသိးန့ၣ်လီၤ.
ဒ်န့ၣ်အသိး ကမျၢၢ်သ့ၣ်တဖၣ်အံၤ ခီဖျိတၢ်သုးသဒၢအလီၢ်ဒီးအဝဲသ့ၣ်ပူၤဖျဲးဒီးတၢ်လီၤဘၣ်ယိၣ်ဘၣ်ဆၣ် ခီဖျိဘၣ်သုးလီၢ်သုးကျဲဒ်အံၤအဖီခိၣ်စိၥ်ဃုၥ်ဝဲတၢ်အီၣ်တၢ်အီတန့ၢ်ကူကူလၢလၢဘၣ်အဃိတၢ်ကီတၢ်ခဲအိၣ်ဝဲဒၣ်လၢအဝဲသ့ၣ်ဂီၢ်အဂ့ၢ် ကီၢ်ရ့ၣ်အပှၤဘၣ်မူဘၣ်ဒါစံးဝဲဒၣ်စ့ၢ်ကီးန့ၣ်လီၤ.
တကီၢ်ခါခဲအံၤန့ၣ် ဘျံးဒဝဲၢ်ကီၢ်ရ့ၣ် ဟီၣ်ကဝီၤ မိတီၤကီၢ်ဆၢဆူ တနီသရံး ကျဲမုၢ်ဒီတဘိန့ၣ်သုးကီၣ်ကးတဖၣ်ဒ်သိးဒိၣ်စိဝဲကန့ၢ်အဂီၢ်စးထီၣ်မၤဝဲတၢ်ထီၣ်ဒုး လၢအပူၤကွံၥ် ၂၀၂၄နံၣ် လါဒံၣ်စဲဘၢၣ်အခါလံၤလံၤဒီးတၢ်ဒုးကဲဝဲတုၤခဲအံၤအဖၢမုၢ်အသိး လၢ ကၠီၣ်မဲတီၤဒီး ဝ့ၢ်မတါတကပၤစ့ၢ်ကီးတၢ်ခးလိၥ်သးကဲထီၣ်ဝဲဒၣ်အဖၢမုၢ်အဂ့ၢ် သ့ၣ်ညါဘၣ်န့ၣ်လီၤ.
ခီဖျိတၢ်ဒုးတၢ်ယၤကဲထီၣ်ဒီး ပယီၤသုးကီၣ်ကး သူဝဲ ကလံၤကျါတၢ်ဒုး,ခးလီၤကျိဖးဒိၣ်လၢကမျၢၢ်တၢ်အိၣ်တၢ်ဆိးလီၢ်တပယူၥ်ဃီအဃိ ဘျံးဒဝဲၢ်ကီၢ်ရ့ၣ်ပူၤ ကမျၢၢ်လၢဘၣ်ဃ့ၢ်ပဒ့ၣ်သးခီဖျိ သုးကီၣ်ကးအကဘီယူၤဒီးကျိဖးဒိၣ်အဃိန့ၣ်အိၣ်ဝဲ (၁၃၀၂၅၂)ဂၤအဂ့ၢ် သ့ၣ်ညါဘၣ်ဒ် ၂၀၂၄နံၣ်လါအီးကထိဘၢၣ်တုၤ ၂၀၂၅နံၣ်လါမးရှး အတီၢ်ပူၤ ကီၢ်ပူၤကညီပှၤလီၢ်အိၣ်ကမှံဖိကမံးတံၥ် အတၢ်မၤနီၣ်အိၣ်ဝဲဒၣ်အသိးန့ၣ်လီၤ.