လါအ့ဖြ့ၣ် ၂၄, ၂၀၂၅နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ,ဒူပျၥ်ယၥ်ကီၢ်ရ့ၣ် ကီးတရံးဒီးကြုၢ်တုကီၢ်ဆၣ် ဟီၣ်ကဝီၤ တၢ်ဒုးတၢ်ယၤအဃိ ကြၢ်တုကီၢ်ဆၣ်ပူၤ ကီးဝၣ်လဲၤသဝီဖိလၢ ဘၣ်ဃ့ၢ်အိၣ်ကဒုလၢသဝီအဂၤသ့ၣ်တဖၣ်အကျါတဂၤ ခီဖျိကလံၤတၢ်ဆါအဃိသံဝဲဖဲဃ့ၢ်တၢ်ဒုးအဆၢကတီၢ်အဂ့ၢ် သ့ၣ်ညါဘၣ်လၢလီၢ်ကဝီၤကမျၢၢ်အိၣ်န့ၣ်လီၤ.
ကီးဝၣ်လဲၤသဝီ ကမျၢၢ်သ့ၣ်တဖၣ်အံၤစးထီၣ်ဟဲဃ့ၢ်အိၣ်ကဒုဝဲဖဲ လါအ့ဖြ့ၣ်(၁၇)သီအနံၤဒီးအကျါတဂၤန့ၣ် ခီဖျိတူၢ်ဘၣ်ပၥ်ဝဲကလံၤတၢ်ဆါဒီးအသးနံၣ်ပှၢ်အဃိဖဲ လါအ့ဖြ့ၣ်(၂၂)သီအနံၤန့ၣ် သံဝဲဒၣ်အဂ့ၢ်ကြုၢ်တုကီၢ်ဆၣ်လီၢ်ကဝီၤကမျၢၢ်တဂၤစံးဝဲဒ်အံၤန့ၣ်လီၤ.
အဝဲစံးဝဲလၢ“ဖုသးပှၢ်ဝဲန့ၣ်အသးနံၣ်အိၣ်(၈၁)နံၣ်လံန့ၣ်လီၤ.အဝဲမ့ၢ်ပှၤတဂၤလၢတူၢ်ဘၣ်ပၥ်ဝဲကလံၤဘၣ်တၢ်ဆါန့ၣ်လီၤ.ဖဲတၢ်ဒုးကဲထီၣ်ဒီးပှၤဃ့ၢ်ထီၣ်အခါန့ၣ်အဖိမါတအဲၣ်ဒိးဃ့ၢ်ဘၣ်.ဘၣ်ဆၣ်အဝဲတဲလၢအသံဖဲအသဝီတဘူၣ်ဘၣ်အဃိန့ၣ်အဖိအမါဃ့ၢ်စၢၤအီၤဒီးဖဲလါအ့ဖြ့ၣ်(၁၇)သီအနံၤန့ၣ်အဝဲသ့ၣ်ဟဲတုၤဖဲအံၤဒီးဖဲ(၂၂)သီအနံၤန့ၣ်အဝဲလဲၤထီၣ်တၢ်ဟးလီၢ်ဝံၤဟဲက့ၤအခါအလီၤဃံၢ်ဝံၤ,သးပ့ၤနီၣ်သးဒီးသံဝဲတဘျီဃီဖဲန့ၣ် န့ၣ်လီၤ.အခဲအံၤတၢ်မၤဂ့ၤမၤဘၣ်အီၤဝံလံအဂ့ၢ်”အဂ့ၢ်စံးဝဲဒၣ်န့ၣ်လီၤ.
လၢန့ၣ်အမဲၥ်ညါ ကြုၢ်တုဒီးကီးတရံး တၢ်ဒုးတၢ်ယၤအဃိ တကီၢ်ခါခဲအံၤန့ၣ်လီၢ်ကဝီၤကမျၢၢ်လၢဘၣ်ဟဲအိၣ်ကဒုဖဲ အဝဲသ့ၣ်သဝီန့ၣ်အိၣ်လၢ(၃၀၀)ဘျဲၣ်လံဒီးဟဲအါထီၣ်ဒံးဝဲအိၣ်အဖၢမုၢ်အဂ့ၢ်,ဒီးပှၤသ့ၣ်တဖၣ်အံၤအကျါ,ပှၤလၢအတူၢ်ဘၣ်တၢ်ဆါထီရီၤဒ်အမ့ၢ် ဆံၣ်ဆၢတၢ်ဆါသ့ၣ်တဖၣ်န့ၣ်လိၣ်ဘၣ်ဝဲဒၣ်ကသံၣ်ကသီအဂ့ၢ် ကြုၢ်တုလီၢ်ကဝီၤကမျၢၢ်တဂၤဃီဝဲန့ၣ်တဲအါထီၣ်ဝဲဒၣ်စ့ၢ်ကီးန့ၣ်လီၤ.
တကတီၢ်ဃီ ကြုၢ်တုဝ့ၢ်ဟီၣ်ကဝီၤအံၤခီဖျိတၢ်ဒုးတၢ်ယၤကဲထီၣ်ဒီးသုးကီၣ်ကးခးလီၤကျိးဖးဒိၣ်,ဟဲခးလီၤတၢ်,တ့ၢ်လီၤမ့ၣ်ပိၢ်ဒီးကဘီယူၤအဃိ ကမျၢၢ်ဘၣ်သံတစှၤန့ၢ်အဂၤ(၂၀)အသိး,သဝီကရူၢ်(၉)ဖျၢၣ်,ပှၤနီၣ်ဂံၢ်(၃၀၀၀၀)ဘျဲၣ်ဘၣ်ဃ့ၢ်ပဒ့ၣ်သးအဂ့ၢ် သ့ၣ်ညါဘၣ်လၢကြုၢ်တုကီၢ်ဆၣ်အပှၤဘၣ်မူဘၣ်ဒါအအိၣ်န့ၣ်လီၤ.
တကီၢ်ခါခဲအံၤန့ၣ်ကြုၢ်တုဒီးကီးတရံး အဘၢၣ်စၢၤအ့ရှၢၣ်ကျဲမုၢ်ဒီတဘိ တၢ်ဒုးတၢ်ယၤကဲထီၣ်ဝဲဒၣ်လၢ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် (KNLA)သုးပၥ်ဖှိၣ်ဒီးသုးကီၣ်ကးအဘၢၣ်စၢၤအဖၢမုၢ်အိၣ်ဝဲအသိး သုးကီၣ်ကးသူဝဲဒၣ်ကျိဖးဒိၣ်,ကဘီယူၤအဃိ လီၢ်ကဝီၤကမျၢၢ်(၅၀၀၀၀)ဘျဲၣ်လိၣ်ဝဲဒၣ်ဂ့ၢ်ဂီၢ်အူပှၤဂ့ၢ်ဝီတၢ်ဆီၣ်ထွဲမၤစၢၤအဂ့ၢ် ဂံၢ်ခီၣ်ထံးတၢ်ကရၢကရိလၢအမၤစၢၤပှၤလီၢ်အိၣ်ကမှံဖိအပှၤဘၣ်မူဘၣ်ဒါစံးဝဲဒၣ်အသိး သ့ၣ်ညါဘၣ်န့ၣ်လီၤ.
