လါအ့ဖြ့ၣ် ၁၀သီ, ၂၀၂၅နံၣ်, ခ့ၣ်အဲးစံၣ်
ဖဲတနံၤအံၤလါအ့ဖြ့ၣ် ၁၀သီ,ကၠီၣ်တဲၣ်နီၣ်ထိၣ်ဟါခီ(၇)နၣ်ရံၣ်အဆၢကတီၢ်န့ၣ်ကီၢ်ကၠီၣ်တဲၣ်,ခၠံရဲကီၢ်ဆၣ်,မဲၣ်ဖါလိၣ်ဖၠၣ်စိမိၤကၠိကမၤဝဲတၢ်သးဝံၣ်မၤမုၥ်က့ၤကီၢ်ပယီၤ တၢ်ရဲၣ်တၢ်ကျဲၤတခါလၢ ကစီၣ်ထွဲဝဲကီၢ်ပယီၤခၢၣ်သး မါတလ့ဒီးစကဲ ကီၢ်ခီဒိၣ်ဟီၣ်ကဝီၤပူၤ ထံဖိကီၢ်ဖိ ကမျၢၢ်လၢတူၢ်ဘၣ်ဟီၣ်ခိၣ်ဟူးတၢ်တတၢၤတနါသ့ၣ်တဖၣ်အဂ့ၢ်သ့ၣ်ညါဘၣ်န့ၣ်လီၤ.
လၢတၢ်ကမၤမုၥ်က့ၤဟီၣ်ခိၣ်ဟူးအဃိပှၤလၢဟံၣ်ဖိဃီဖိလီၤမၢ်တဖၣ်အသးမ့ၢ်ဂ့ၤ,တၢ်ဃုစၢၤစ့ပၥ်ကီၤအဂီၢ်မ့ၢ်ဂ့ၤဒီး ဒ်သိးပှၤဂုၥ်ပှၤဂၤကထံၣ်လၢတၢ်လိၣ်ဘၣ်အိၣ်ဒံးဝဲလၢတၢ်က့ၤသူၣ်ထီၣ်ဘှီထီၣ်တကပၤကသ့အဂီၢ်ဒုးအိၣ်ထီၣ်ဝဲတၢ်ရဲၣ်တၢ်ကျဲၤဝဲအံၤလီၤအဂ့ၢ် မဲၣ်ဖါလိၣ်ဖၠၣ်စိမိၤကၠိ သရၣ်ဒိၣ်စိ ခၠံၣ်စူးဝံၣ်ခၠါ စံးဘၣ်ဝဲဒၣ် ခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤ.
အဝဲစံးဝဲလၢ“ပကဟ့ၣ်ဂံၢ်ဟ့ၣ်ဘါ ပဒီပုၢ်ဒီဝဲၢ်လၢအတူၢ်ဘၣ်ဟီၣ်ခိၣ်ဟူးတၢ်လီၤပှီၢ်သ့ၣ်တဖၣ်ဒီးပဘၣ်ဟံးစုကွၢ်မဲၥ်က့ၤ ပှၤတနီၤနီၤလၢအဟံၣ်ဖိဃီဖိဘၣ်စူးကွံၥ်သးတဖၣ်အဂီၢ်န့ၣ်လီၤ.ခံခါတခါန့ၣ် ပကထၢဒီးဟ့ၣ်သကိးတၢ်မၤဘူၣ်လၢကမၤစၢၤတၢ်လၢအဝဲသ့ၣ်ကဘၣ်စူးကါဝဲအဂီၢ်တၢ်လၢအလိၣ်သ့ၣ်တဖၣ်ဒီးအဂၤတခါန့ၣ် ပအဲၣ်ဒိးဒုးသ့ၣ်ညါပှၤလၢ ကီၢ်ပူၤ,ကီၢ်ဆၢ,ကီၢ်ချၢသ့ၣ်တဖၣ်လၢဟီၣ်ခိၣ်ဟူးဝံၤလံ ဘၣ်ဆၣ် ပတၢ်အိၣ်မူအတၢ်ကီတၢ်ခဲန့ၣ်ဟူးတကတၢၢ်ဒံးဘၣ်.ပကဘၣ်အိၣ်ဒံးဒီးတၢ်ဟူးတၢ်ဂဲၤလၢ တၢ်ကသူၣ်ထီၣ်က့ၤဘှီထီၣ်က့ၤအဃိန့ၣ်လိၣ်ဘၣ်အိၣ်ဒံးဝဲဒၣ်န့ၣ်လီၤ.”အဂ့ၢ်စံးဝဲဒၣ်န့ၣ်လီၤ.
တကတီၢ်ဃီ တၢ်မၤဘူၣ်လၢဒိးန့ၢ်ဘၣ်ဝဲသ့ၣ်တဖၣ်န့ၣ် တမ့ၢ်ကဆှၢခီဖျိဝဲလၢသုးကီၣ်ကးအအိၣ်တဆီဘၣ်ဒီး မ့မ့ၢ်တခီကဆှၢခီဖျိဝဲလၢ ကမျၢၢ်ဆူကမျၢၢ်အအိၣ်ကဒဲကဒဲလီၤအဂ့ၢ် သရၣ်ဒိၣ်စိ ခၠံၣ်စူးဝံၣ်ခၠါတဲအါထီၣ်စ့ၢ်ကီးဝဲဒၣ်န့ၣ်လီၤ.
မဲၣ်ဖါလိၣ်ဖၠၣ်စိမိၤကၠိတၢ်သးဝံၣ်မၤမုၥ်က့ၤကီၢ်ပယီၤတၢ်ရဲၣ်တၢ်ကျဲၤဘျီဝဲအံၤန့ၣ် ပှၤသးဝံၣ်တၢ်ဖိလၢကီၢ်ကၠီၣ်တဲၣ်ကပၣ်ဝဲဒၣ်(၃)ဂၤ,ပှၤသးဝံၣ်တၢ်လၢကီၢ်ပူၤ(၂)ဂၤ,လၢ အ့ၣ်ဒံယါ,ဘ့ကလါဒ့ၣ်ရှ်,ဖံလံးပံးဒီးခၣ်ဘိဒံယါ(၁)ဂၤစုၥ်စုၥ်,ဒီးလၢ USA (၃)ဂၤဒီး တၢ်တယးဝဲလၢတၢ်ကမၤအီၤလၢ(၂)နၣ်ရံၣ်တၢ်ပူၤအဂ့ၢ်သ့ၣ်ညါဘၣ်စ့ၢ်ကီးန့ၣ်လီၤ.
မဲၣ်ဖါလိၣ်ဖၠၣ်စိမိၤကၠိအံၤမ့ၢ်ဝဲကီၢ်ကၠီၣ်တဲၣ်ပူၤဖၠၣ်စိမိၤကၠိတဖျၢၣ်လၢပှၤကီၢ်ပယီၤဟဲထီၣ်ကၠိအါကတၢၢ်အကျါတဖျၢၣ်ဒီးပှၤကၠိဖိသ့ၣ်တဖၣ်န့ၣ်ဟဲန့ၢ်ဝဲဒၣ်လၢကညီကီၢ်စဲၣ်,စကဲ,မါတလ့ဒီးယိၤဒိၣ်ကီၢ်စဲၣ်သ့ၣ်တဖၣ်အဂ့ၢ် သ့ၣ်ညါဘၣ်လၢကၠိအပှၤဘၣ်မူဘၣ်ဒါအအိၣ်န့ၣ်လီၤ.