လါအ့ဖြ့ၣ် ၉ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)တၢ်ပၢဟီၣ်က၀ီၤအပူၤ လါမးရှးတလါအတီၢ်ပူၤ သုးကီၣ်ကးအံၤ ဟးခးလီၤတပျုၥ်တပျီၥ်ကျိဖးဒိၣ်,မ့ၣ်ပိၢ်(၃၉)ဘျီအဃိ လီၢ်က၀ီၤကမျၢၢ်သံဘၣ်ဒိဘၣ်ထံး၀ဲ(၉)ဂၤအဂ့ၢ်န့ၣ် သ့ၣ်ညါဘၣ်လၢ ကီၢ်ရ့ၣ်တၢ်မၤနီၣ်စရီပူၤအသိးန့ၣ်လီၤ.
ဒူသထူၣ်ကီၢ်ရ့ၣ်ပူၤစးထီၣ်လါမးရှး ၁ သီ တုၤ ၃၁ သီ လၢတလါအတီၢ်ပူၤ ပယီၤသုးအံၤတၢ်ဒုးကဲထီၣ်အိၣ်ဂ့ၤအိၣ်တဂ့ၤ သူ၀ဲဒြိ, ကျိဖးဒိၣ်ဒီးကဘီယူၤဟးခးလီၤတၢ်ဆူလီၢ်က၀ီၤကမျၢၢ်ဒူသ၀ီ,တၢ်ဖံးအီၣ်မၤအီၣ်လီၢ်အဃိ ကမျၢၢ်သံ(၁)ဂၤဒီး ဘၣ်ဒိ(၈)ဂၤ ကဲထီၣ်၀ဲဒ်အံၤန့ၣ်လီၤ.
ဒ်ကီၢ်ရ့ၣ်တၢ်မၤနီၣ်စရီပူၤအိၣ်၀ဲအသိးန့ၣ် တလါအတီၢ်ပူၤပယီၤသုးအံၤဟးတ့ၢ်လီၤ၀ဲဒီးဒြိမ့ၣ်ပိၢ်(၆)ဘျီ,ခးလီၤကျိဖးဒိၣ်(၃၀)ဘျီ, ကဘီယူၤလဲၤခးလီၤတၢ်(၃)ဘျီအဃိ ကမျၢၢ်သံဘၣ်ဒိဘၣ်ထံးအမဲၥ်ညါ ဟံၣ်တၢ်သူၣ်ထီၣ်(၃)ဖျၢၣ်ဒီး သီခါဖၠၣ်တၢ်သူၣ်ထီၣ်ဟးဂီၤ (၁) ဖျၢၣ်န့ၣ်လီၤ.
ဒ်န့ၣ်အသိးဒီတလါအတီၢ်ပူၤသုးပၥ်ဖှိၣ်ကရူၢ်လဲၤခးပယီၤသုး,လဲၤတ့ၢ်လီၤ၀ဲဒီးဒြိကဲထီၣ်အိၣ်၀ဲ(၁၈)ဘျီ,ခိးထုးမ့ၣ်ပိၢ်(၁)ဘျီ,တၢ်ဒုးစဲးပြဲးကဲထီၣ်၀ဲ(၂)ဘျီ,တၢ်ဘၣ်သဂၢၢ်ခးလိၥ်သးကဲထီၣ်(၂)ဘျီ ပၥ်ဖှိၣ်ခဲလၢၥ်(၂၃)ဘျီအဃိ ပယီၤသုးတကပၤသံ(၆)ဂၤ, ဘၣ်ဒိ(၁၁)ဂၤ အမဲၥ်ညါအသုးသိလ့ၣ်ဟးဂီၤ(၄)ခိၣ်အဂ့ၢ်န့ၣ် ကီၢ်ရ့ၣ်တၢ်မၤနီၣ်အပူၤပၥ်ဖျါ၀ဲန့ၣ်လီၤ.
တကတီၢ်ဃီတၢ်ဒုးလၢတလါအတီၢ်ပူၤအံၤမ့မ့ၢ်လၢတၢ်ပၢၢ်ဆၢသုးပၥ်ဖှိၣ်တကပၤန့ၣ် ဘၣ်ဟ့ၣ်လီၤကွံၥ်အသးသမူ(၁)ဂၤဒီး ဘၣ်ဒိ(၄)ဂၤအသိး ခံခီခံကပၤတၢ်ဒုးအပူၤ(KNLA)မၤန့ၢ်၀ဲ (9 mm)တခိၣ်, အဆၣ်ဒၢ(၂)ခါ, အချံ(၁၀၀)ဖျၢၣ်, (MA4)ကျိတခိၣ်, အဆၣ်ဒၢ(၄)ခါ, အချံ(၁၁၂)ဖျၢၣ် စ့ၢ်ကီးန့ၣ်လီၤ.
တကးဒံးဘၣ်ပယီၤသုးအံၤဟးခးလီၤနါစိၤတၢ်ကဲထီၣ်တလီၢ်လီၢ်အဃိ လီၢ်က၀ီၤကမျၢၢ်သ့ၣ်တဖၣ်ဘၣ်အိၣ်လၢတၢ်ပျံၤ တၢ်ဖုး, လဲၤက့ၤဖံး မၤတၢ်လၢအတအိၣ်ဒီးတၢ်ဘံၣ်တၢ်ဘၢဘၣ်အဃိ သဂၢၢ်ဘၣ်၀ဲအိၣ်ဆိးအီၣ်အီတၢ်ဃံးတၢ်စ့ၤတၢ်ဂ့ၢ်ကီအဂ့ၢ်န့ၣ် ဒူသထူၣ်ကီၢ်ရ့ၣ် ပှၤဘၣ်မူဘၣ်ဒါစံး၀ဲန့ၣ်လီၤ.
ဒ်န့ၣ်အသိးပယီၤသုးအံၤဆီဒၣ်စှၤလါအတီၢ်ပူၤ ကၠဲးထိၣ်ကီၢ်ဆၣ်ပူၤ ပယီၤသုးအံၤသူ၀ဲဒြိ,ခးလီၤတၢ်ဒီးကျိဖးဒိၣ် ကဲထီၣ်၀ဲတလီၢ်လီၢ်ဒီး ပယီၤသုးအံၤလၢအဟဲမၤပှဲၤအါထီၣ်အသုးဂံၢ်လၢဟီၣ်က၀ီၤတၢ်မဲၥ်ညါသုးကလၢၤပူၤအဂီၢ်စ့ၢ်ကီး ဟဲထီၣ်၀ဲလၢခီၣ်တန့ၢ်လၢၤဘၣ် တုၤလၢခဲအံၤ အဂ့ၢ်န့ၣ် (သုးက့ ၁) သုးက့ခိၣ် သုးခိၣ်ကျၢၢ်ဖိ စီၤစိမၠ့ၣ်ထွ့ စံး၀ဲန့ၣ်လီၤ.
“သုးကျိၤတဟဲထီၣ်လၢၤဘၣ်န့ၣ်န့ၢ်ဖးယံၤလံ.လၢကၠဲးထိၣ်တကပၤန့ၣ်အ၀ဲသ့ၣ်ဟးခးလီၤတၢ်ဒီးဒြိ,ခးလီၤကျိဖးဒိၣ်အါတစဲး. လၢကဟဲထီၣ်လၢတၢ်ကိးပူၤဒုတနၢ်ဟူဒံးဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဒူသထူၣ်ကီၢ်ရ့ၣ်ပူၤအပူၤကွံၥ်လါဖ့ၤဘြူၤအါရံၤတလါအတီၢ်ပူၤစ့ၢ်ကီး ခီဖျိပယီၤသုးအံၤခးလီၤ၀ဲဒြိ,ကျိဖးဒိၣ်ဒီးကဘီယူၤစ့ၢ်ကီး လဲၤခးလီၤတၢ်တစှၤန့ၢ်(၄၅)ဘျီအဃိ ကမျၢၢ်သံဘၣ်ဒိဘၣ်ထံးပၥ်ဖှိၣ်အိၣ်၀ဲ(၁၈)ဂၤဒီးဟံၣ်,ကၠိ,သီခါဖၠၣ်,သရိၥ်တၢ်သူၣ်ထီၣ်, ဃုၥ်ဒီးတၢ်ထူၣ်တၢ်ဘိတဖၣ်ဟးဂီၤ၀ဲဒၣ်အါမးန့ၣ်လီၤ.
