လါအ့ဖြ့ၣ် ၁၀ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဘျံးဒ၀ဲၢ်ကီၢ်ရ့ၣ်(သုးက့ ၄)တနီသရံၣ်ကီၢ်ဆၣ်အပူၤ ဖဲမဟါအနံၤတၢ်ဒုးကဲထီၣ် လၢခံခီခံကပၤအဘၢၣ်စၢၤအဃိ ပယီၤသုးအကဘီယူၤလဲၤတ့ၢ်လီၤကဒီး၀ဲမ့ၣ်ပိၢ်အဂ့ၢ်န့ၣ် ကီၢ်ရ့ၣ်ပှၤဘၣ်မူဘၣ်ဒါစံး၀ဲန့ၣ်လီၤ.
ဖဲမဟါလါအ့ဖြ့ၣ် ၉ သီ ဂီၤခီ ၈း၂၅ မံးနံးအဆၢကတီၢ် လၢသံခိသ၀ီဃၢၤသီဖၠၣ်န့ၣ် တၢ်ဒုးကဲထီၣ်ကဒီး၀ဲလၢကညီဒီကလုၥ်တၢ်ထူၣ် ဖျဲးသုးမုၢ်ဒိၣ်(KNLA) သုးရ့ၣ်(၁၁)ဒီး ပယီၤသုးအဘၢၣ်စၢၤန့ၣ်လီၤ.တၢ်ဒုးကဲထီၣ်၀ံၤဖဲဟါခီ ၁ နၣ်ရံၣ်အဆၢကတီၢ်န့ၣ် ပယီၤသုး ဟဲထီၣ်ခးကဒီး၀ဲ(သုးရ့ၣ်)အပှၤအံၤတဘျီဖဲသံခိသ၀ီဆၢခိၣ် (မဲခေါင်းခြံ)အဂ့ၢ်န့ၣ် ဘျံးဒ၀ဲၢ်ကီၢ်ရ့ၣ် နဲၣ်ရွဲၣ် ပဒိၣ်စီၤအဲၣ်နၤ စံး၀ဲန့ၣ် လီၤ.
တကတီၢ်ဃီတၢ်ဒုးကဲထီၣ်၀ံၤတနံၤဃီဖဲဟါခီ ၃း၂၅ မံးနံးအဆၢကတီၢ်န့ၣ် ပယီၤသုးကဘီယူၤ(၂)ဘ့ၣ်ဟဲတ့ၢ်လီၤ၀ဲ မ့ၣ်ပိၢ် (၆)ဖျၢၣ်လၢတၢ်ဒုးကဲထီၣ်အလီၢ်န့ၣ်ဒီးခးလီၤဃုၥ်စ့ၢ်ကီး၀ဲကျိဖိ(.၅)အိၣ်၀ဲအသိး ကဘီယူၤလၢအဂၤတဘ့ၣ်န့ၣ် လဲၤခးလီၤ၀ဲ တၢ်လၢတၢ်လီၢ်အဂၤတတီၤန့ၣ်လီၤ.
ဘၣ်ဃးတၢ်ဒုးကဲထီၣ်ဒီးကဘီယူၤဟဲခးလီၤကဒီးတၢ်ဂ့ၢ်အံၤန့ၣ် ဘျံးဒ၀ဲၢ်ကီၢ်ရ့ၣ် နဲၣ်ရွဲၣ် ပဒိၣ်စီၤအဲၣ်နၤ စံး၀ဲလၢ“တနံၤအံၤ လါအ့ဖြ့ၣ် ၉ သီ ဂီၤခီ ၈ နၣ်ရံၣ်ဘျဲၣ်န့ၣ်တၢ်ဒုးကဲထီၣ်လၢ(သုးရ့ၣ် ၁၁) ဖဲသံခိသီခါဖၠၣ်ဃၢၤန့ၣ်တဘျီ. ၀ံၤဒီးလၢဟါခီ ၂ နၣ်ရံၣ်န့ၣ် ပယီၤသုးဟဲထီၣ်ခးကဒီး၀ဲပပှၤသုးဖိဖဲအဆီလီၤသးဖဲသံခိသ၀ီဃၢၤန့ၣ်တဘျီ. ၀ံၤလီၢ်ခံ ကဘၣ်ဖဲဟါခီ ၃ နၣ်ရံၣ်ဘျဲၣ်အခါန့ၣ် ပယီၤသုးကဘီယူၤန့ၣ်ဟဲခံဘ့ၣ်. အတဘ့ၣ်န့ၣ်ကွံၥ်လီၤ၀ဲမ့ၣ်ပိၢ်(၆)ဖျၢၣ်ဒီးခးလီၤ၀ဲ(.၅)တဖၣ်.အဂၤတဘ့ၣ်န့ၣ်ကွံၥ်လီၤ၀ဲမ့ၣ်ပိၢ် လၢတၢ်လီၢ်အဂၤတတီၤ.ပမ့ကွၢ်ကဒါက့ၤပယီၤသုးဘိးဘၣ်သ့ၣ်ညါ၀ဲလၢကပတုၥ်တၢ်ခးဘၣ်ဆၣ်တၢ်အိၣ်သးတံၢ်နီၢ်လၢပျီပူၤခီန့ၣ်ကတဲၤကတီၤအသုးဂံၢ်ဘါ,ထီၣ်ဒုးပပှၤဒီးတ့ၢ်လီၤကဘီယူၤအိၣ်၀ဲထီဘိလီၤ”အဂ့ၢ်န့ၣ် စံးဘ့ၣ်ခ့ၣ်အဲးစံၣ်-ကညီတၢ်ကစီၣ်ဖဲမဟါန့ၣ် လီၤ.
လၢန့ၣ်အမဲၥ်ညါတၢ်လီၢ်လၢသုးကီၣ်ကးမၤ၀ဲကလံၤကျါဒုးယၤတၢ်ဟူးတၢ်ဂဲၤခဲအံၤန့ၣ်အိၣ်၀ဲဒၣ်လၢမိဒီၢ်ကျဲကီၢ်ဆၢ ကျဲအံၤတၢ်သူ ၀ဲလၢ တၢ်ကူၣ်လဲၤမၤကၤဂီၢ်အဃိ သုးကီၣ်ကးလၢကဒိၣ်စိက့ၤဟီၣ်က၀ီၤအံၤအဂီၢ် စးထီၣ်လၢလါဒံၣ်စ့ဘၢၣ်န့ၣ်ဟဲထီၣ်မၤ၀ဲဒုးယၤ တၢ်ဟူးတၢ်ဂဲၤတုၤလၢခဲအံၤ အဂ့ၢ်န့ၣ် ပဒိၣ်စီၤအဲၣ်နၤ စံးအါထီၣ်၀ဲန့ၣ်လီၤ.
“မ့မ့ၢ်လၢတနီသရံၣ်ကီၢ်ဆၣ် သုးရ့ၣ်(၁၁)ဟီၣ်က၀ီၤဒု လၢအပူၤကွံၥ်လါဒံၣ်စ့ဘၢၣ်အခါလံၤလံၤန့ၣ်ပယီၤသုးအံၤမၤ၀ဲဒၣ်တၢ်ထီၣ် ဒုးဖဲ(မိဒီၢ်)ကျဲန့ၣ်.အတၢ်ပညိၣ်န့ၣ်မ့ၢ်ဒ်သိးကထီၣ်မၤန့ၢ်က့ၤအသုးတၢ်ဒိၣ်စိလၢ(မိဒီၢ်)ကီၢ်ဆၢအဂီၢ်လီၤ.ဘၣ်မနုၤအဃိလဲၣ်မိဒီၢ် ကီၢ်ဆၢန့ၣ်မ့ၢ်၀ဲဒၣ်တၢ်ကူၣ်လဲၤမၤကၤအကျဲတဘိလၢဟဲခီဖျိ၀ဲဒၣ်ကီၢ်ကၠီၣ်တဲၣ်ဆူဘျံး၀့ၢ်မီၤနီၤ.အဃိ(KNLA)ဒီးတၢ်ပၢၢ်ဆၢကရူၢ်ကရၢလၢအိၣ်ဆီသးဖဲန့ၣ်တဖၣ် အတၢ်ပညိၣ်အိၣ်လၢကဒုးဖျိးကွံၥ်၀ဲမီၤနီၤ”အဂ့ၢ်န့ၣ် စံး၀ဲန့ၣ်လီၤ.
ဒ်န့ၣ်အသိး(သုးရ့ၣ် ၁၁)ဟီၣ်က၀ီၤတၢ်လီၢ်လၢတၢ်ဒုးကဲထီၣ်ဖဲမဟါအနံၤအံၤအပူၤကွံၥ်လါအ့ဖြ့ၣ် ၃ သီ, ၄ သီ ဒီး ၇ သီအနံၤ န့ၣ်စ့ၢ်ကီး ပယီၤသုးအံၤဟဲထီၣ်ခး၀ဲ(KNLA) သုးရ့ၣ်(၁၁)အိၣ်ဒီး လဲၤခး၀ဲ၀ံၤသူ၀ဲဒြိ,ကျိဖးဒိၣ်,ကဘီယူၤလဲၤတ့ၢ်လီၤ၀ဲမ့ၣ်ပိၢ် ကဲထီၣ်တ့ၢ်အသးဒံး န့ၣ်လီၤ.
တကးဒံးဘၣ်ဖဲမဟါတၢ်ကဲထီၣ်သးအခါန့ၣ်စ့ၢ်ကီး ကဘီယူၤအမဲၥ်ညါပယီၤသုးခးလီၤစ့ၢ်ကီး၀ဲ(၁၂၀ မမ)ကျိဖးဒိၣ် စးထီၣ်လၢ ဂီၤခီတုၤဃီၤ၀ဲလၢမုၢ်ဃ့ၢ်လီၤတစုအဂ့ၢ်န့ၣ် သ့ၣ်ညါဘၣ်န့ၣ်လီၤ.
သုးကီၣ်ကးအံၤဖဲလါအ့ဖြ့ၣ် ၂ သီအနံၤန့ၣ် လၢတၢ်ကတိစၢၤမၤစၢၤဟီၣ်ခိၣ်ဟူးပှၤဘၣ်ကီဘၣ်ခဲဖိတဖၣ်အဂီၢ်န့ၣ် ဘိးဘၣ်ရၤလီၤ ၀ဲလၢကပတုၥ်ဆိဃၥ်တၢ်ဒုးလၢအသီ(၂၀)အတီၢ်ပူၤဘၣ်ဆၣ် မ့မ့ၢ်တခီအတၢ်ဟးခးလီၤတၢ်ဒီးကဘီယူၤအံၤတပတုၥ်အသးဘၣ် ဟးတ့ၢ်လီၤ၀ဲမ့ၣ်ပိၢ်လၢကလုၥ်ဒူၣ်တၢ်ပၢၢ်ဆၢကရူၢ်ကရၢလၢအထီဒါအ၀ဲသ့ၣ်တဖၣ်အဟီၣ်က၀ီၤပူၤန့ၣ်လီၤ.
ဒ်န့ၣ်အသိး ခ့ၣ်အဲၣ်ယူၣ်တၢ်ပၢဟီၣ်က၀ီၤလၢအမ့ၢ် ဘျံးဒ၀ဲၢ်,တီအူ,ချၢၣ်လွံၢ်ထူၣ်ဒီးမုၢ်တြီၢ်ကီၢ်ရ့ၣ်သ့ၣ်တဖၣ်အံၤအပူၤစ့ၢ်ကီး ခးလီၤ၀ဲကျိဖးဒိၣ်,ကဘီယူၤစ့ၢ်ကီးလဲၤခးလီၤတၢ်ကဲထီၣ်၀ဲတလီၢ်လီၢ်န့ၣ်လီၤ.
ခီဖျိလၢကျိဖးဒိၣ်ဒီးကဘီယူၤအံၤအဃိ ကီၢ်ရ့ၣ်(၄)အံၤအပူၤ ကမျၢၢ်သံဘၣ်ဒိဘၣ်ထံးတစှၤန့ၢ်(၁၀)ဂၤဒီးဖဲန့ၣ်အကျါ ပၣ်ဃုၥ်၀ဲဖိဒံဖိသၣ်သ့ၣ်တဖၣ်အသိး ဟံၣ်,သီခါဖၠၣ်တၢ်သူၣ်ထီၣ်ဟးဂီၤကဲထီၣ်အိၣ်ဒၣ်အဂ့ၢ်န့ၣ် ခ့ၣ်အဲၣ်ယူၣ် အတၢ်ပၥ်ဖျါ တၢ်မၤနီၣ် အပူၤအသိးသ့ၣ်ညါဘၣ်န့ၣ်လီၤ.
