လါမ့ၤ ၂၈ သီ, ၂၀၂၅ နံၣ်, ခ့ၣ်အဲးစံၣ်
ဖဲတနံၤအံၤလါမ့ၤ ၂၈ သီ ဂီၤခီအဆၢကတီၢ်န့ၣ် ပယီၤသုးလၢကဟဲထီၣ်မၤစၢၤသ့ၣ်ဘီဘိသုးကလၢၤတဖၣ် တၢ်ခိးခးအီၤလၢ ကျဲအဃိသံအါအါဂီၢ်ဂီၢ်အမဲၥ်ညါဖီၣ်သမူန့ၢ်၀ဲအဂၤ(၁၀)ဘျဲၣ်အဂ့ၢ်န့ၣ် ဂံၢ်ခီၣ်ထံးပှၤဟ့ၣ်တၢ်ကစီၣ်ဖိ စံး၀ဲအသိး သ့ၣ်ညါဘၣ် န့ၣ်လီၤ.
လၢကဟဲထီၣ်မၤစၢၤသ့ၣ်ဘီဘိသုးကလၢၤအဂီၢ် ဂီၤလ့ၤပယီၤသုးလၢအကဟဲထီၣ်မၤစၢၤတၢ်တဖၣ်အံၤဒီး (KNLA)သုးပၥ်ဖှိၣ် အဘၢၣ်စၢၤ ဖဲတဂီၤအံၤဒီတဂီၤန့ၣ်လၢဆိၣ်စံမၠဲၣ်(DKBA)နံၣ်ထီၣ်သီပျီကပၤန့ၣ် တၢ်ဒုးကဲထီၣ်၀ဲဒိၣ်ဒိၣ်မုၢ်မုၢ်ဒီး တၢ်ဒုးဘျီ၀ဲ အံၤ အပူၤပယီၤသုးသံအါမးအမဲၥ်ညါတၢ်ဖီၣ်န့ၢ်၀ဲပယီၤသုးအဂၤ(၁၀)ဘျဲၣ်ဒီးမၤန့ၣ်၀ဲကျိချံပှၥ်သၣ်အါမး အဂ့ၢ်န့ၣ် ဂံၢ်ခီၣ်ထံးပှၤဟ့ၣ် တၢ်ကစီၣ်ဖိတဂၤ စံး၀ဲဒ်အံၤန့ၣ်လီၤ.
“ပှၤဖီၣ်န့ၢ်ပယီၤသုးန့ၣ်ကအိၣ်(၁၅)ဂၤဒ်န့ၣ်လီၤ.လီလီစဲၤဖဲမုကၢးန့ၣ်ပှၤက့ၤစိၥ်အဂၤ(၁၀)လံ.ဖဲမုကၢးနၢ်ဟူဒီးလၢပှၤဖီၣ်န့ၢ်ကဒီး (၅)ဂၤ. အဘၣ်ဒိဘၣ်ထံးတအိၣ်ဘၣ်အသံလၢၥ်,သံအါအါဂီၢ်ဂီၢ်လီၤ.ပမၤန့ၢ်တၢ်ဖိတၢ်လံၤကျိချံပှၥ်သၣ်ဒီဒူၣ်”အဂ့ၢ်န့ၣ် စံးဘၣ် ခ့ၣ်အဲးစံၣ်- ကညီတၢ်ကစီၣ်န့ၣ်လီၤ.
တကးဒံးဘၣ်တၢ်ဒုးကဲထီၣ်ဘျီ၀ဲအံၤအပူၤန့ၣ် ပယီၤသုးစံၣ်ဖျိးထီၣ်အိၣ်ဘၣ်ဆၣ်အနီၣ်ဂံၢ်နီၣ်ဒွးခီန့ၣ် တသ့ၣ်ညါလီၤတံၢ် ဒံးဘၣ်ဒီးဒ်န့ၣ်အသိး ဖဲမဟါဒီးတနံၤအံၤတၢ်ဒုးကဲထီၣ်အကတီၢ်သ့ၣ်ဘီဘိသုးကလၢၤဒီးဂီၤလ့ၤသုးကလၢၤ ခးလီၤ၀ဲကျိဖးဒိၣ် ဆူတၢ်ဒုးကဲထီၣ်အလီၢ်တပယူၥ်ဃီအဂ့ၢ်န့ၣ် သ့ၣ်ညါဘၣ်န့ၣ်လီၤ.
ပယီၤသုးတဖၣ်အံၤလၢကဟဲထီၣ်မၤစၢၤသ့ၣ်ဘီဘိသုးကလၢၤလၢတၢ်ပၢၢ်ဆၢသုးကထီၣ်ခး၀ဲအံၤအဂီၢ် ဖဲမဟါ လါမ့ၤ ၂၇ သီ အနံၤန့ၣ် သုးဂံၢ်ဘါအဂၤ(၁၀၀)ဃၣ်ဃၣ်ဟဲနုၥ်လီၤ၀ဲလၢ(DKBA)ဟီၣ်က၀ီၤ ဆိၣ်စံမၠဲၣ်တၢ်လီၢ်၀ံၤတၢ်ဒုးကဲထီၣ်ဒံး၀ဲဒီး ဖဲတနံၤအံၤဘၣ်တၢ်မၤဆှဲ၀ဲခဲလၢၥ်လံန့ၣ်လီၤ.
ဒ်န့ၣ်အသိးခီဖျိလၢခံခီခံကပၤတၢ်ဖ့ၣ်စၢအံၤအဃိတၢ်ဆိၣ်စံမၠဲၣ်ကမျၢၢ်,လ့ဂီၤ,သ့ၣ်ဘီဘိ,၀ၣ်မံၤထၣ်,ဘျၢၣ်ဒိၣ်သ၀ီဖိသ့ၣ်တဖၣ်ဃ့ၢ်ထီၣ်၀ဲလၢ တၢ်ဘံၣ်တၢ်ဘၢအလီၢ်ဒီးတနီၤန့ၣ်ဘၣ်ဃ့ၢ်ထီၣ်၀ဲလၢယိၤကီၢ်တကပၤန့ၣ်လီၤ.တကတီၢ်ဃီတနံၤအံၤတၢ်ဒုးကဲထီၣ်၀ံၤ ပယီၤသုးကဘီယူၤဟဲတ့ၢ်လီၤ၀ဲမ့ၣ်ပိၢ်လၢတၢ်ဒုးကဲထီၣ်အခိၣ်အဃၢၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
