လါမ့ၤ ၁၄ သီ, ၂၀၂၅ နံၣ်, ခ့ၣ်အဲးစံၣ်
တညၣ်ကၠိဒုးယၤပယီၤသုးကလၢၤလၢအိၣ်ဆီလီၤသးဖဲကီၢ်ကၠီၣ်တဲၣ်-ကီၢ်ပယီၤကီၢ်ဆၢ ဖၣ်အၣ်ကီၢ်ရ့ၣ်(သုးက့ ၇) တၢ်ကြဲၢ်ကီၢ်ဆၣ် အပူၤအံၤ ဖဲမဟါလါမ့ၤ ၁၃ သီ ဟါခီအဆၢကတီၢ်န့ၣ် တၢ်ထီၣ်န့ၢ်၀ဲလံဒီး ပယီၤသုးတကပၤသံ(၁၁)ဂၤအမဲၥ်ညါ တၢ်မၤန့ၢ်ဃုၥ်၀ဲ ကျိချံပှၥ်သၣ်အါအါဂီၢ်ဂီၢ်အဂ့ၢ်န့ၣ် ဂံၢ်ခီၣ်ထံးသုးပှၤဘၣ်မူဘၣ်ဒါစံး၀ဲန့ၣ်လီၤ.
တညၣ်ကၠိပယီၤသုးကလၢၤအံၤစးထီၣ်ဖဲလါမ့ၤ ၇ သီအနံၤန့ၣ် တၢ်လဲၤခးစဲးပြဲး၀ဲဒီး ဖဲမဟါလါမ့ၤ ၁၃ သီ ဟါခီ ၆း၂၀ မံးနံး အဆၢကတီၢ်န့ၣ် ဟီၣ်က၀ီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) သုးပၥ်ဖှိၣ် ထီၣ်မၤန့ၢ်၀ဲဒ်အံၤလီၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
တၢ်ထီၣ်န့ၢ်ပယီၤသုးကလၢၤဘျီ၀ဲအံၤပယီၤသုးသံ(၁၁)ဂၤတကးဒံးဘၣ်အမဲၥ်ညါပယီၤသုးလၢအိၣ်သုးကလၢၤပူၤတဖၣ်အံၤ ခီဖျိအ၀ဲသ့ၣ်တူၢ်၀ဲတပှဲၤလၢၤဘၣ်အဃိ စံၣ်ဖျိးထီၣ်ကွံၥ်လၢသုးကလၢၤအချၢကအိၣ်လၢအဂၤ(၂၀)ဘျဲၣ်ညါအဂ့ၢ်န့ၣ် ဂံၢ်ခီၣ်ထံးပှၤ ဟ့ၣ်တၢ်ကစီၣ်ဖိစံး၀ဲန့ၣ်လီၤ.
တကးဒံးဘၣ်လၢတၢ်ထီၣ်န့ၢ်သုးကလၢၤဘျီ၀ဲအံၤအပူၤတၢ်မၤန့ၢ်၀ဲကျိဖိ,ကျိဖးဒိၣ်,ကျိချံပှၥ်သၣ်စ့ၢ်ကီးအါအါဂီၢ်ဂီၢ်အဂ့ၢ်န့ၣ် (KNLA)ပှၤဘၣ်မူဘၣ်ဒါလၢအပၣ်ဃုၥ်တဂၤစံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
အ၀ဲစံး၀ဲလၢ“ပထီၣ်န့ၢ်သုးကလၢၤတဖျၢၣ်အံၤဖဲမဟါဟါခီ ၆း၂၀ မံးနံးအခါန့ၣ်.ကျိချံပှၥ်သၣ်ဒုပမၤန့ၢ်ဒီဒူၣ်ညါ.(၁၂၀ မမ)အချံန့ၣ် ပမၤန့ၢ်ကအိၣ်လၢ(၇၀)ဘျဲၣ်ညါ. (အ့ၤခ့ၤ)အချံ,(၈၁ မမ)အချံသ့ၣ်တဖၣ်န့ၢ်ဒီဒူၣ်.ကျိမိၢ်ပှၢ်တီတီန့ၣ်ပမၤန့ၢ်ကအိၣ်လၢအခိၣ်(၃၀)လၢ န့ၣ်ညါ,ခဲအံၤပနၥ်လီၤတံၢ်တ၀ံၤဒံးဘၣ်အဃိတဲလီၤတံၢ်တဘၣ်ဒံးဘၣ်”အဂ့ၢ်န့ၣ် စံး၀ဲန့ၣ်လီၤ.
တကတီၢ်ဃီပယီၤသုးကလၢၤလၢဆီလီၤသးလၢကညီဟီၣ်က၀ီၤပူၤတဖၣ်အံၤခီဖျိကဲထီၣ်တၢ်နိးတၢ်ဘျးလၢကမျၢၢ်ထံဖိကီၢ်ဖိ အဂီၢ်အဖီခိၣ် တၢ်ရဲၣ်တၢ်ကျဲၤအိၣ်လၢတၢ်ကဆဲးမၤပျီဆှဲကွံၥ်၀ဲအဂ့ၢ်န့ၣ် (KNLA)ပှၤဘၣ်မူဘၣ်ဒါတဂၤဃီ၀ဲန့ၣ် စံးအါထီၣ်၀ဲ န့ၣ်လီၤ.
“လၢပကီၢ်စဲၣ်ပူၤ,ပသုးက့ပူၤ,ပဟီၣ်က၀ီၤပူၤဒုဒုၣ်ဒါလၢအအိၣ်တဖၣ်န့ၣ်တသ့ဖဲအသ့ပကဆှဲမၤပျီက့ၤတုၤလၢအလၢၥ်လီၤ. ပတအဲၣ်ဒိးပၥ်လၢပဟီၣ်က၀ီၤပူၤလၢၤဘၣ်,ဘၣ်မနုၤလဲၣ်န့ၣ်အ၀ဲသ့ၣ်န့ၣ်လၢပဂီၢ်န့ၣ်ကဲထီၣ်တၢ်တံၥ်တၥ်,တၢ်လဲၤတၢ်က့ၤစ့ၢ်ကီး တဘျ့တဆှီဘၣ်အဖီခိၣ်န့ၣ်ပတၢ်ပၥ်သးအိၣ်လၢပကမၤပျီက့ၤတုၤအလၢၤလီၤမီၤနီၤ”အဂ့ၢ်န့ၣ် စံး၀ဲန့ၣ်လီၤ.
ဒ်လီၢ်က၀ီၤပှၤဘၣ်မူဘၣ်ဒါစံး၀ဲအသိးန့ၣ် တၢ်ထီၣ်ပယီၤသုးကလၢၤဘျီ၀ဲအံၤပယီၤသုးသံအမဲညါမ့မ့ၢ်(KNLA)တကပၤန့ၣ် ဘၣ်ဟ့ၣ်လီၤကွံၥ်အသးသမူလၢထံကီၢ်ဒီးပှၤကလုၥ်အဂီၢ်(၁)ဂၤန့ၣ်လီၤ.
တၢ်ထီၣ်န့ၢ်တညၣ်ကၠိပယီၤသုးကလၢၤဖဲမဟါ၀ံၤလီၢ်ခံမုၢ်ဆ့ၣ်ထီၣ်တနံၤအံၤလါမ့ၤ ၁၄ သီ ဂီၤခီ ကဘၣ်ဖဲ(၈)နၣ်ရံၣ် ဘျဲၣ်အဆၢ ကတီၢ်န့ၣ် ပယီၤသုးကဘီယူၤဟဲတ့ၢ်လီၤ၀ဲမ့ၣ်ပိၢ်လၢသုးကလၢၤအခိၣ်အဃၢၤကအိၣ်လၢ(၅)ဘျီဃၣ်ဃၣ်ညါ အဂ့ၢ်န့ၣ် လီၢ်က၀ီၤ ပှၤဘၣ်မူဘၣ်စံး၀ဲအသိးကၠီၣ်တဲၣ်တၢ်ကစီၣ်စ့ၢ်ကီးပၥ်ဖျါထီၣ်၀ဲအိၣ်န့ၣ်လီၤ.
ပယီၤသုးကလၢၤလၢတၢ်ထီၣ်န့ၢ်၀ဲခဲအံၤန့ၣ်ဟဲအိၣ်ဆီလီၤသးလၢဟီၣ်က၀ီၤ၀ဲန့ၣ်အပူၤန့ၢ်ဖးယံၤလံဒီး သုးကလၢၤအပူၤန့ၣ် အပှၤနီၣ်ဂံၢ်ကအိၣ်၀ဲအဂၤ(၄၀)ဘျဲၣ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤပှၤဘၣ်မူဘၣ်အအိၣ်န့ၣ်လီၤ.
ဒ်န့ၣ်အသိးဖဲအပူၤကွံၥ်လါမ့ၤ ၉ သီအနံၤန့ၣ်စ့ၢ်ကီး လ့ပနၢ်ဒ့ၣ်(ကိး)တခိးဘံၣ်ခံ (ခမရ-၂၄)ပယီၤသုးကလၢၤလၢအိၣ်(သုးက့ ၇) ဟီၣ်က၀ီၤ ကီၢ်ကၠီၣ်တဲၣ်-ကီၢ်ပယီၤကီၢ်ဆၢ မဲၢ်လးသူမှဲကျိ၀ၢ်ခီအံၤ ဟီၣ်က၀ီၤ(KNLA)သုးပၥ်ဖှိၣ်ထီၣ်န့ၢ်ဒံး၀ဲန့ၣ်လီၤ.
မဲၢ်လး၀ၢ်ခီ လ့ပနၢ်ဒ့ၣ်ပယီၤသုးကလၢၢၤဒီး မဲၢ်တီ၀ၢ်ခီ တညၣ်ကၠိပယီၤသုးကလၢၤလၢတၢ်ထီၣ်န့ၢ်၀ဲခဲအံၤ ခံဖျၢၣ်လၢၤန့ၣ်အိၣ်ဆီ လီၤသးလၢ(သုးက့ ၇)ဟီၣ်က၀ီၤ ကညီဖီၣ်စုက၀ဲၤကရၢလၢအမ့ၢ် ကညီတၢ်မုၥ်တၢ်ခုၣ်ကီၣ်ကးကရူၢ်(KNU/KNLA-PC) အဟီၣ်က၀ီၤပူၤ အဂ့ၢ်န့ၣ် သ့ၣ်ညါဘၣ်န့ၣ်လီၤ.