လါမ့ၤ ၁၃ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ်အပူၤ ခီဖျိကဘီယူၤဒီးကျိဖးဒိၣ်အဃိ ကရူၢ်(၃)ဘ့ၣ်ပူၤကမျၢၢ်တဖၣ်အါဒၣ်တက့ၢ်ဘၣ်ဃ့ၢ်ထီၣ်ဟးပလဲၥ်သးလၢတၢ်ဘံၣ်တၢ်ဘၢလီၢ်အဂ့ၢ်န့ၣ် ကီၢ်ရ့ၣ်ခိၣ် ပဒိၣ်စီၤစိမၠ့ၣ် စံး၀ဲန့ၣ်လီၤ.
၀ီၢ်က့ကရူၢ်,ခရၢၢ်ကရူၢ်ဒီးအလူကရူၢ် ကရူၢ်(၃)ဘ့ၣ်အံၤ စးထီၣ်ဖဲလါအ့ဖြ့ၣ်ဘူးကလၢၤတုၤလၢတလါအံၤလါမ့ၤ ၁၂ သီအနံၤန့ၣ် ခီဖျိပယီၤသုးခးလီၤကျိ ဖးဒိၣ်,ကဘီယူၤစ့ၢ်ကီး လဲၤတ့ၢ်လီၤမ့ၣ်ပိၢ်တလီၢ်လီၢ်အဃိ ကမျၢၢ်သံဘၣ်ဒိဘၣ်ထံးအမဲၥ်ညါ ဟံၣ်အူအီၣ် ဟးဂီၤကဲထီၣ်၀ဲ အဂ့ၢ်န့ၣ် သ့ၣ်ညါဘၣ်န့ၣ်လီၤ.
လၢတၢ်န့ၣ်အဃိကရူၢ်(၃)ဘ့ၣ်အံၤအပူၤကမျၢၢ်တဖၣ်ပျံၤတၢ်အိၣ်လၢသ၀ီပူၤတဘူၣ်လၢၤဘၣ်ဃ့ၢ်ထီၣ်လဲၤဟးအိၣ်၀ဲလၢ ၀့ၢ်ပူၤတနီၤဒီးတနီၤန့ၣ်လဲၤစံၣ်အိၣ်၀ဲလၢမံၤခိၣ်ပှၢ်ကျါအဂ့ၢ်န့ၣ် ဒူသထူၣ်ကီၢ်ရ့ၣ်ခိၣ် ပဒိၣ်စီၤစိမၠ့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤ.
“ပှၤဃ့ၢ်ထီၣ်န့ၣ်မ့ၢ်၀ဲဒၣ်အလူကရူၢ်,ခရၢၢ်ကရူၢ်,၀ီၢ်က့ကရူၢ်တဖၣ်လီၤ.မ့မ့ၢ်လၢခရၢၢ်ကရူၢ်ဒီး၀ီၢ်က့ကရူၢ်န့ၣ်အိၣ်ဘူး၀ဲဒီး(သုးက့ ၃) အဆၢ (၅၉၈)သုးကလၢၤအဃိပယီၤသုးခးလီၤကျိဖးဒိၣ်,ကဘီယူၤဟဲတ့ၢ်လီၤမ့ၣ်ပိၢ်မၢ်မၢ်လီၤ.မ့မ့ၢ်လၢကရူၢ်ခံဘ့ၣ်အံၤဒု ပှၤကမျၢၢ်ဃ့ၢ်ခဲလၢၥ်လီၤ.တနီၤလၢအဘူးဒီးခူ၀့ၢ်ညါစံၣ်လီၤလၢခူ၀့ၢ်,တနီၤခီစံၣ်အိၣ်လၢမံၤခိၣ်ပှၢ်လၢ်ကျါ,လၢတီၤလၢဒဲဒ်န့ၣ်လီၤ” အဂ့ၢ်န့ၣ် စံး၀ဲန့ၣ်လီၤ.
တကတီၢ်ဃီကမျၢၢ်လၢအဃ့ၢ်ထီၣ်တဖၣ်အကျါလီၤဆီဒၣ်တၢ်မ့မ့ၢ်လၢ၀ီၢ်က့ကရူၢ်ဒီးခရၢၢ်ကရူၢ်အံၤအိၣ်ဘူး၀ဲဒီး ချၢၣ်လွံၢ်ထူၣ် ကီၢ်ရ့ၣ်(သုးက့ ၃) ခီၣ်ချ့သုးရ့ၣ်(ခမရ-၅၉၈)ပယီၤသုးကလၢၤလၢအပူၤကွံၥ်လါမ့ၤ ၈ သီလၢတၢ်ပၢၢ်ဆၢထီၣ်န့ၢ် ပယီၤသုးက့ၤဆ့ၣ် နီၤကဒါ၀ဲခဲအံၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒူသထူၣ်ကီၢ်ရ့ၣ်လီၤဆီဒၣ်တၢ်ကၠဲးထိၣ်ကီၢ်ဆၣ်အပူၤအံၤ တၢ်ဒုးကဲထီၣ်တအိၣ်၀ဲဘၣ်ဆၣ်စးထီးဖဲလါအ့ဖြ့ၣ်ဘူးကလၢၤ တုၤလၢခဲအံၤန့ၣ် ထံၣ်ဘၣ်လၢပယီၤသုးသူ၀ဲကျိဖးဒိၣ်,ကဘီယူၤဟးတ့ၢ်လီၤတၢ်လၢဒူသ၀ီကမျၢၢ်အိၣ်ဆိးလီၢ်လိၤလိၤဟဲအါထီၣ် ၀ဲဒၣ်ဖျိဖျိဖျါဖျါန့ၣ်လီၤ.
သုးကီၣ်ကးအံၤလၢကဆီၣ်ထွဲမၤစၢၤဟီၣ်ခိၣ်ဟူးပှၤဘၣ်ကီဘၣ်ခဲဖိအဂီၢ်သၢဘျီတဘျီဖဲလါမ့ၤ ၆ သီအနံၤန့ၣ် ဘိးဘၣ်ရၤလီၤကဒီး ၀ဲလၢကပတုၥ်တၢ်ခးတုၤလၢလါလၢၥ်အိၣ်၀ဲဘၣ်ဆၣ် တုၤလၢခဲအံၤခးလီၤကျိဖးဒိၣ်, ခးလီၤတၢ်ဒီးကဘီယူၤ အိၣ်၀ဲတပယူၥ်ဃီလၢ အအိၣ်ဒီးတၢ်ပညိၣ်လိၤလိၤအဂ့ၢ်န့ၣ် ကီၢ်ရ့ၣ်ခိၣ် ပဒိၣ်စီၤစိမၠ့ၣ် စံးအါထီၣ်၀ဲ န့ၣ်လီၤ.
“အ၀ဲသ့ၣ်တဲ၀ဲလၢကပတုၥ်တၢ်ခးနါက့အတဲ၀ဲဒၣ်လီၤတလူၤပိၥ်မၤထွဲ၀ဲဘၣ်.အခဲအံၤအတဲ၀ဲလၢပတုၥ်တၢ်ခးဟးခးလီၤတၢ်လၢသ၀ီပူၤ,ထီၣ်ဒုးတၢ်.လီၤဆီဒၣ်တၢ်ကၠဲးထိၣ်ကီၢ်ဆၣ်ပူၤအံၤခးလီၤကျိဖးဒိၣ်,ဟဲခးလီၤတၢ်ဒီးကဘီယူၤမၢ်မၢ်လီၤ.အ၀ဲသ့ၣ်န့ၣ်အိၣ်ဒၣ်အတဲ၀ဲလီၤတလူၤပိၥ်ထွဲအတၢ်တဲဘၣ်,တၢ်သ့ဟံမူဒါတအိၣ်ဘၣ်.တၢ်တဲသ့ၣ်တဖၣ်န့ၣ်နါက့တၢ်နၥ်န့ၢ်အီၤတအိၣ်ဘၣ်”အဂ့ၢ်န့ၣ် စံး၀ဲန့ၣ်လီၤ.
ဒ်လီၢ်က၀ီၤပှၤဘၣ်မူဘၣ်ဒါစံး၀ဲအသိးန့ၣ် ပယီၤသုးလၢအိၣ်ကၠဲးထိၣ်ဟီၣ်က၀ီၤပူၤတဖၣ်လၢကလဲၤထီၣ်မၤအါထီၣ် စၢၤအသုးဂံၢ်ဘါဆူ(သုးက့ ၃) ခီၣ်ချ့သုးရ့ၣ်(ခမရ-၅၉၈)အသုးကလၢၤအံၤအဂီၢ် တၢ်ကစီၣ်ဟူထီၣ်လၢကဟဲထီၣ်၀ဲဘၣ်ဆၣ် ဟဲထီၣ်၀ဲတအိၣ် ဒံးဘၣ်ဘၣ်ဒီး မ့မ့ၢ်တခီခးလီၤ၀ဲကျိဖးဒိၣ်,ကဘီယူၤစ့ၢ်ကီးလဲၤခးလီၤတၢ်ဖဲ၀ီၢ်က့ဒီးခရၢၢ်ကရူၢ်ခံဘ့ၣ်အံၤအပူၤ တလီၢ်လီၢ်အဃိ ကမျၢၢ်သ့ၣ်တဖၣ်ဘၣ်ဃ့ၢ်ထီၣ်၀ဲဒၣ်ဒ်အံၤလီၤအဂ့ၢ်န့ၣ် စံး၀ဲန့ၣ်လီၤ.
ဒ်န့ၣ်အသိးကျဲလၢပယီၤသုးကဟဲထီၣ်၀ဲအံၤဒီတကျိၤစ့ၢ်ကီး ဟီၣ်က၀ီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) သုးပၥ်ဖှိၣ် အိၣ်ခိးလီၤဃၥ်၀ဲအဃိ မ့ဟဲထီၣ်န့ၣ်ဒုးယၤတၢ်ဖ့ၣ်စၢကဲထီၣ်၀ဲဒၣ်ဒိၣ်ဒိၣ်မုၢ်မုၢ်သ့၀ဲအဂ့ၢ်န့ၣ် တၢ်ပၢၢ်ဆၢသုးကရူၢ်ပှၤဘၣ်မူဘၣ်ဒါ စံး၀ဲန့ၣ်လီၤ.
