လါမ့ၤ ၁၄ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁) ကၠဲးထိၣ်ကီၢ်ဆၣ်အပူၤ သုးမီၤစိရိၤကဘီယူၤလဲၤတ့ၢ်လီၤ ကဒီး မ့ၣ်ပိၢ်တပယူၥ်ဃီလၢလီၢ်က၀ီၤဒူသ၀ီတဖၣ်အပူၤအဂ့ၢ်န့ၣ် သ့ၣ်ညါဘၣ်လၢပှၤဘၣ်မူဘၣ်ဒါအအိၣ်န့ၣ်လီၤ.
ဖဲတနံၤအံၤလါမ့ၤ ၁၄ သီ မုၢ်ထူၣ် ၁၂း၀၀ နၣ်ရံၣ်အဆၢကတီၢ်န့ၣ် တၢ်ဒုးကဲထီၣ်တအိၣ်ပယီၤသုးကဘီယူၤလဲၤတ့ၢ်လီၤကဒီးမ့ၣ်ပိၢ် (၂)ဖျၢၣ်လီၤတဲၥ်ပိၢ်ဖးထီၣ်၀ဲလၢ ချၢၣ်လွံၢ်ထူၣ်ကီၢ်ရ့ၣ်(သုးက့ ၃)ဆီထံးကီၢ်ဆၣ်ပူၤတဖျၢၣ်ဒီး လၢ(သုးက့ ၁)ကၠဲးထိၣ်ကီၢ်ဆၣ်ပူၤ တဖျၢၣ် အဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါစံး၀ဲန့ၣ်လီၤ.
ဘၣ်ဃးတၢ်ဂ့ၢ်အံၤဟီၣ်က၀ီၤ(သုးက့ ၁)သုးက့ခိၣ် သုးခိၣ်ကျၢၢ်ဖိ စီၤစိမၠ့ၣ်ထွ့ စံး၀ဲလၢ“ကွံၥ်လီၤ၀ဲဖဲမုကၢးန့ၣ်လီၤ.လီၤတဲၥ် ဘၣ်လၢ(သုးက့ ၁)ပူၤ တဖျၢၣ်ဒီး လၢ(သုးက့ ၁)ပဟီၣ်က၀ီၤပူၤတဖျၢၣ်.အလီၤတဲၥ်ခဲအံၤတဘျီအံၤလီၤတဲၥ်ပိၢ်ဖးထီၣ်လၢ ကစၢၢ်ကျါကစၢၢ်ကပၤလီၤတၢ်ဘၣ်ဒိဘၣ်ထံးတအိၣ်ဘၣ်” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
တကးဒံးဘၣ်လၢန့ၣ်အမဲၥ်ညါဖဲမဟါလါမ့ၤ ၁၃ သီ ဟါခီ ၃း၄၀ မံးနံးအဆၢကတီၢ်န့ၣ် တၢ်ဒုးကဲထီၣ်တအိၣ်ပယီၤသုး(Jet fighter) ကဘီယူၤ လဲၤတ့ၢ်လီၤ၀ဲ မ့ၣ်ပိၢ်(၂)ဖျၢၣ်လီၤတဲၥ်ပိၢ်ဖးထီၣ်၀ဲ ကၠီၣ်ဖၠၤကရူၢ် ခမီၣ်ခွ့ၤသ၀ီဒီး နၣ်စ့ၤသ၀ီကပၤန့ၣ်လီၤ. တၢ်ကဲထီၣ်သး၀ံၤတကတီၢ်ဃီဖဲဟါခီ ၄း၀၀ ဘျဲၣ်အဆၢကတီၢ် ပယီၤသုးကဘီယူၤလဲၤတ့ၢ်လီၤကဒီးမ့ၣ်ပိၢ်(၁) ဖျၢၣ် လီၤတဲၥ်ပိၢ်ဖး ထီၣ်၀ဲလၢနၣ်စ့ၤသ၀ီဃၢၤကဲထီၣ်ဒံး၀ဲအဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါစံး၀ဲန့ၣ်လီၤ.
ဒ်လီၢ်က၀ီၤပှၤဘၣ်မူဘၣ်ဒါစံး၀ဲအသိးန့ၣ် တၢ်လီၢ်လၢကျိဖးဒိၣ်လီၤတဲၥ်ပိၢ်ဖးထီၣ်အံၤတဖၣ်အိၣ်၀ဲဒၣ်လၢ(သုးက့ ၁)ဒီး (သုးက့ ၃) အဆၢတခီတ၀ၢ်၀ၢ်လၢအဘူးလိၥ်သးဒီး(ခမရ-၅၉၈)ပယီၤသုးကလၢၤတၢ်လီၢ်လၢတၢ်ပၢၢ်ဆၢသုးပၥ်ဖှိၣ်ထီၣ်မၤန့ၢ်၀ဲဖဲလါမ့ၤ(၈)သီ အနံၤအံၤန့ၣ်လီၤ.ဘၣ်ဆၣ်ဖဲလါမ့ၤ ၁၁ သီအနံၤန့ၣ် ပယီၤသုးကျိၤဟဲထီၣ်နီၣ်ဂံၢ်အါအါဂီၢ်ဂီၢ်က့ၤဆ့ၣ်နီၤ အိၣ်ကဒါ ၀ဲလံအဂ့ၢ်န့ၣ် သ့ၣ်ညါဘၣ်န့ၣ်လီၤ.
ကၠဲးထိၣ်ကီၢ်ဆၣ်ပူၤ စးထီၣ်ဖဲလါအ့ဖြ့ၣ် ၂၃ သီ တုၤ၀ဲဒၣ်လၢတနံၤအံၤလါမ့ၤ ၁၄ သီအံၤ ပယီၤသုးကလၢၤလၢအိၣ်ဟီၣ်က၀ီၤပူၤ တဖၣ် ခးလီၤကျိဖးဒိၣ်အမဲၥ်ညါ ကဘီယူၤစ့ၢ်ကီးလဲၤတ့ၢ်လီၤ၀ဲမ့ၣ်ပိၢ်တလီၢ်လီၢ်တုၤလၢခဲအံၤတစုန့ၣ်လီၤ.
ဒ်န့ၣ်အသိးခီဖျိလၢကဘီယူၤဒီးကျိဖးဒိၣ်အံၤအဃိ ၀ီၢ်က့ကရူၢ်ဒီးခရၢၢ်ကရူၢ်ပူၤ ကမျၢၢ်သံဘၣ်ဒိဘၣ်ထံး, ဟံၣ်အစှၤန့ၢ်အဖျၢၣ်(၁၀) အူအီၣ်လီၤပှီၢ်ဟးဂီၤ၀ဲဒၣ်ဒီးလၢန့ၣ်အမဲၥ်ညါ သ၀ီဖိခဲလၢၥ်ဃၣ်ဃၣ်ဃ့ၢ်ထီၣ်ဟးစံၣ်၀ဲလၢတၢ်ဘံၣ် တၢ်ဘၢအလီၢ်တုၤလၢဲအံၤ အဂ့ၢ်န့ၣ် သ့ၣ်ညါဘၣ်န့ၣ်လီၤ.
