လါယူၤ ၂၆သီ, ၂၀၂၅ နံၣ်, ခ့ၣ်အဲးစံၣ်.
ဖဲသုးကီၣ်ကးမၤဝဲ (၂၀၂၅)နံၣ် တၢ်မုၥ်တၢ်ခုၣ်တၢ်ကူၣ်လိၥ်အိၣ်သကိးလၢ န့ၣ်ပၠံၣ်ဒီၣ် အဆၢကတီၢ် သုးကီၣ်ကးအခိၣ်မ့အီၣ်လဲၣ်ကတိၤလီၤဝဲလၢ ကလုၥ်ဒူၣ်ဖီၣ်စုကဝဲၤကရူၢ်ကရၢမ့ၢ်ဂ့ၤ,တၢ်ဒီသဒၢကမျၢၢ်သုး PDF မ့ၢ်ဂ့ၤဃုၥ်ဒီးကရူၢ်ကရၢလၢအဂၤသ့ၣ်တဖၣ် ကပၥ်တ့ၢ်ကွံၥ်တၢ်ဖီၣ်စုကဝဲၤအကျဲဒီး ကဘှါရှဲဘၣ်ထံရူၢ်ကီၢ်သဲးတၢ်ဂ့ၢ်ကီလၢ ထံရူၢ်ကီၢ်သဲးပၣ်တံၣ်ဒီး တၢ်ဃုထၢအကျဲအဂ့ၢ် ကွဲမုၥ်ဝဲဒၣ်န့ၣ်လီၤ.
လၢတၢ်ရဲၣ်တၢ်ကျဲၤဘျီဝဲအံၤန့ၣ် ကလုၥ်ဒူၣ်ဖီၣ်စုကဝဲၤကရူၢ်လၢပတုၥ်တၢ်ခးတဖၣ်, ထံရူၢ်ကီၢ်သဲးပၣ်တံၣ်လၢအတူၢ်လိၥ်သုးကီၣ်ကးတဖၣ်,ဂံၢ်ခီၣ်ထံးတၢ်ကရၢ်ကရိတဖၣ်,တရူးခၢၣ်စးလီၤဆီ ဃုၥ်ဒီးထံဂုၤကီၢ်ဂၤမီၢ်သီမီၢ်လါခဲလၢၥ်ပှၤကညီ(၂၀၀)ဘျဲၣ်ပၣ်ဃုၥ်ပၣ်ဂီၢ်ဝဲဒီးတၢ်ကူလိၥ်အိၣ်သကိးဝဲအံၤအခိၣ်တီမ့ၢ်ဝဲ“တၢ်မုၥ်တၢ်ခုၣ်, ပၥ်ဖှိၣ်တၢ်ဃုထၢဒီးဖဲၣ်ဒရၢၣ်ဒီးလဲၤသကိးဆူ တၢ်မုၥ်တၢ်ခုၣ်ထံကီၢ်“ဒီးတၢ်ကူၣ်လိၥ်အိၣ်သကိးဝဲအံၤန့ၣ် ဘၣ်တၢ်မၤအီၤ စးထီၣ်လၢ လါယူၤ(၂၅)အနံၤတုၤလါယူၤ(၂၆)အနံၤအဂ့ၢ် သ့ၣ်ညါဘၣ်န့ၣ်လီၤ.
ဖဲတၢ်ကူၣ်လိၥ်အိၣ်သကိးအဆၢကတီၢ် သုးကီၣ်ကးအခိၣ် မ့အီၣ်လဲၣ် စံးဝဲဒၣ်လၢ“ကလုၥ်ဒူၣ်ဖီၣ်စုကဝဲၤဒီးပှၤပူထီၣ်လီထီၣ်တၢ်တဖၣ် ကတၢၤကွံၥ်တၢ်စုကဝဲၤဒီး ကဘှါရှဲ ထံရူၢ်ကီၢ်သဲးတၢ်ဂ့ၢ်ကီအံၤလၢ ထံရူၢ်ကီၢ်သဲးပၣ်တံၣ်တၢ်ဃုထၢကျဲတဆီန့ၣ် ကွဲမုၥ်ဝဲအဘျီဘျီလံအဂ့ၢ်,ဒီးလၢကတဲသကိးတၢ်မုၥ်တၢ်ခုၣ်အဂီၢ် အိးထီၣ်ကျဲဒီးတူၢ်လိၥ်ဝဲထီဘိအဂ့ၢ် စံးဝဲဒၣ်န့ၣ်လီၤ.
လၢတၢ်ကူၣ်လိၥ်အိၣ်သကိးဘျီဝဲအံၤန့ၣ် ကတဲသကိးဝဲ တၢ်မုၥ်တၢ်ခုၣ်အမဲၥ်ညါ ဘၣ်ဃးတၢ်ဃုထၢမ့ၢ်ဂ့ၤ,ဒီးတၢ်ဃုထၢဝံၤအလီၢ်ခံ ထံရူၢ်ကီၢ်သဲးအသနၢၣ်သ့ၣ်တဖၣ်စ့ၢ်ကီးတၢ်ကတဲသကိးဝဲဒၣ်အဂ့ၢ် သ့ၣ်ညါဘၣ်ဒ် သုးကီၣ်ကးပၢတၢ်ကစီၣ်သန့တနီၤပၥ်ဖျါဝဲဒၣ်အသိးန့ၣ်လီၤ.
တၢ်ဃုထၢအံၤ သုးကီၣ်ကးရဲၣ်ကျဲၤလၢကမၤဝဲ စးထီၣ်ဖဲ ၂၀၂၅ လါဒံၣ်စဲဘၢၣ် တုၤ ၂၀၂၆ လါယနူၤအါရံၤအတီၢ်ပူၤဒီးကနီၤဖးလီၤဝဲ တကူၥ်ဘၣ်တကူၥ်ဝံၤကမၤဝဲလၢ ကီၢ်စဲၣ် ၂၆၇ ဘ့ၣ်အပူၤအဂ့ၢ် တၢ်ဃုထၢခီၣ်မံးရှၢၣ်တပၤစံးဝဲဒၣ်န့ၣ်လီၤ.
ဒ်တၢ်ကွၢ်ဟုၣ်ကွၢ်စုၣ်ကီၢ်ပယီၤတၢ်မုၥ်တၢ်ခုၣ်-MPM အတၢ်ပၥ်ဖျါအိၣ်ဝဲအသိးန့ၣ် ၂၀၂၅နံၣ်အတီၢ်ပူၤ ထံကီၢ်ဒီတဘ့ၣ် ကီၢ်စဲၣ် ၉၇ဘ့ၣ်န့ၣ်ဘၣ်တၢ်ဒိၣ်စိအီၤလၢတၢ်ပၢၢ်ဆၢကရူၢ်ကရၢသ့ၣ်တဖၣ်န့ၣ်လီၤ. ဒီး ကီၢ်စဲၣ်တစှၤန့ၣ် ၂၃၃ဘ့ၣ် န့ၣ် အိၣ်ဝဲလၢခံခီခံကပၤတၢ်ဒုးတၢ်ယၤအသကွီၢ်ပူၤအဂ့ၢ်သ့ၣ်ညါဘၣ်ဒ် ISP-Myanmar အတၢ်မၤနီၣ်အိၣ်ဝဲဒၣ်အသိးန့ၣ်လီၤ.
တကီၢ်ခါခဲအံၤန့ၣ် လၢကညီဒီကလုၥ်စၢဖှိၣ်ကရၢ-ခ့ၣ်အဲၣ်ယူၣ်တၢ်ပၢဟီၣ်ကဝီၤပူၤစ့ၢ်ကီး တပျဲဝဲတၢ်မၤတၢ်ဃုထၢဘၣ်အဂ့ၢ်ထုးထီၣ်ပၥ်ဖျါတ့ၢ်ဝဲအိၣ်အသိး တၢ်ပၢၢ်ဆၢကရူၢ်ကရၢလၢအဂၤဒီးထံရူၢ်ကီၢ်သဲးကရူၢ်ကရၢအါတက့ၢ်တတူၢ်လိၥ်ဝဲဒၣ်သုးကီၣ်ကးအတၢ်တဲသကိးတၢ်မုၥ်တၢ်ခုဘၣ်အဂ့ၢ်ထုးထီၣ်ပၥ်ဖျါဝဲအိၣ်န့ၣ်လီၤ.ဒီးလၢသုးကီၣ်ကးမၤဝဲတၢ်ကူၣ်လိၥ်အိၣ်သကိးဘျီဝဲအံၤသနၥ်က့ကရူၢ်ကရၢသ့ၣ်တဖၣ်န့ၣ်တပၣ်ဃုၥ်ပၣ်ဂီၢ်ဘၣ်အဂ့ၢ်ပသ့ၣ်ညါဘၣ်ဝဲဒၣ်န့ၣ်လီၤ.
