လါယူၤ ၁၈ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူပျၥ်ယၥ်ကီၢ်ရ့ၣ်(သုးက့ ၆)ကီးတရံးကီၢ်ဆၣ် မၠၣ်၀တံၣ်၀့ၢ်ဃၢၤ ဖလူဖးဒိၣ်သ၀ီအပူၤ အပူၤကွံၥ်စှၤသီအခါ တၢ်ဖီၣ်န့ၢ်၀ဲကသံၣ်မူၤဘှီး(၂၄,၉၀၀)ဘျဲၣ်လၢကမျၢၢ်ပိၥ်မုၣ်တဂၤအအိၣ်အဂ့ၢ်န့ၣ် ကီၢ်ရ့ၣ် တၢ်ကစီၣ် ထုးထီၣ်ပၥ်ဖျါ၀ဲဖဲတနံၤအံၤ န့ၣ်လီၤ.
ဖဲအပူၤကွံၥ်လါယူၤ ၁၄ သီ မုၢ်ဃ့ၢ်လီၤ ၂း၂၀ မံးနံးအဆၢကတီၢ်န့ၣ် လၢဖလူဖးဒိၣ် က၀ီၤဒ့(၄)အပူၤ ခီဖျိတၢ်ဒိးန့ၢ်တၢ်ကစီၣ်အဃိ ကီၢ်ရ့ၣ်ဒီးကီၢ်ဆၣ် ကညီဒီကလုၥ်ပၢၤကီၢ်သုး(KNPF)သုးပၥ်ဖှိၣ်ထီၣ်သးနုၥ်လီၤသမံသမိးဒီးဖီၣ်ချုးန့ၢ်၀ဲကသံၣ်မူၤဘှီးလၢ နီၢ်မုၣ်ကါအဟံၣ်ပူၤကဲထီၣ် ဒ်အံၤ န့ၣ်လီၤ.
အဃိလၢတၢ်နုၥ်လီၤသမံသမိးတၢ်ဘျီ၀ဲအံၤန့ၣ် တၢ်ဖီၣ်န့ၢ်၀ဲကသံၣ်မူၤဘှီး(၂၄,၉၂၀)ဖျၢၣ်,ကိးက့(၂)ဖၢ်,လီတဲစိတဖျၢၣ်, (power bank)တဖျၢၣ်ဒီးပသံးထူတဘိအဂ့ၢ်န့ၣ် လံၥ်တၢ်ပၥ်ဖျါအပူၤပၥ်ဖျါ၀ဲန့ၣ်လီၤ.
ကတီၢ်ခါခဲအံၤကမျၢၢ်ပိၥ်မုၣ်လၢတၢ်ဖီၣ်ဃၥ်၀ဲခဲအံၤန့ၣ် တၢ်ကဆဲးဟံထီၣ်ဖီၣ်ထီၣ်အရ့ ဒ်ခ့ၣ်အဲၣ်ယူၣ်တၢ်သိၣ်တၢ်သီတၢ်ဘျၢ အိၣ်၀ဲအသိးအဂ့ၢ်န့ၣ် ခ့ၣ်အဲၣ်ယူၣ် စံး၀ဲန့ၣ်လီၤ.
သုးဟံန့ၢ်တၢ်စိတၢ်ကမီၤ၀ံၤလီၢ်ခံ ခီဖျိလၢကသံၣ်မူၤဘှီးဒီးတၢ်တၤကျိၣ်တၤစ့အကလုၥ်ကလုၥ်အံၤအဃိ ပှၤနီၢ်ဒိၣ်လၢၥ်ဃုၥ် သးစၢ်ဖိဒံဖိသၣ်,ပိၥ်မုၣ်ပိၥ်မၢၤသ့ၣ်တဖၣ်ဟးဂီၤ၀ဲဒၣ်အါမးအသိး တကတီၢ်ဃီခီဖျိထံကီၢ်တၢ်အိၣ်သးတဂၢၢ်တကျၢၤ,မုၢ်ကျိၤ၀ဲၤကွၥ် တၢ်ဖံးအီၣ်မၤအီၣ်တအိၣ်သးတဒ်သိးအပူၤကွံၥ်ဘၣ်အဃိကျိၣ်စ့တၢ်ဟဲနုၥ်လီၤအဂီၢ်အါဒၣ်တက့ၢ်တၢ်ဃုဖံးအီၣ်မၤအီၣ်က့ၤကျဲလၢအတဖိးမံသဲစးတဖၣ်ဟဲအါထီၣ်၀ဲဒ်အံၤလီၤအဂ့ၢ်န့ၣ် စံး၀ဲန့ၣ်လီၤ.
ဒ်န့ၣ်အသိးဖဲအပူၤကွံၥ်လါယူၤ ၁၄ သီအနံၤစ့ၢ်ကီး လၢမၠၣ်၀တံၣ်-မဲၢ်ဆီး နီၣ်ဂံၢ်-၁ တိၤဖီခိၣ်န့ၣ် ကီၢ်ပယီၤသိလ့ၣ်တခိၣ်လၢအိၣ်ဟဲ မၠၣ်၀တံၣ်အံၤ လၢသိလ့ၣ်အပူၤကၠီၣ်တဲၣ်ပှၤဘၣ်မူဘၣ်ဒါသမံသမိးဖီၣ်ချုးန့ၢ်၀ဲ ကသံၣ်မူၤဘှီးအဖျၢၣ်(၇၉၀၀၀)ဘျဲၣ် ကဲထီၣ်ဒံး၀ဲဒၣ် န့ၣ်လီၤ.
ခ့ၣ်အဲၣ်ယူၣ် ဒူပျၥ်ယၥ်ကီၢ်ရ့ၣ်အမဲၥ်ညါ ကီၢ်ရ့ၣ်/သုးက့ လၢအဂ့ၤသ့ၣ်တဖၣ်အပူၤစ့ၢ်ကီး စးထီၣ်လၢသုးဟံန့ၢ်တၢ်စိ တၢ်ကမီၤ ၀ံၤလီၢ်ခံန့ၣ် ဟီၣ်က၀ီၤအပူၤကသံၣ်မူၤဘှီးရၤလီၤသးဟဲအါထီၣ်အါန့ၢ်အပူၤကွံၥ်ဒီးဒ်န့ၣ်အသိး ပှၤစိၥ်ဆါတၢ်ဖိဒီးပှၤလၢ တၢ်ကစၢ် သ့ၣ်တဖၣ်စ့ၢ်ကီးတၢ်ဖီၣ်ချုးန့ၢ်၀ဲအိၣ်တလီၢ်လီၢ်အဂ့ၢ်န့ၣ် ခ့ၣ်အဲၣ်ယူၣ်ဘၣ်ထွဲဘၣ်မူဘၣ်ဒါတဖၣ် စံးဘၣ်တ့ၢ်ဃၥ်ခ့ၣ်အဲးစံၣ်-ကညီတၢ်ကစီၣ်အိၣ်၀ဲန့ၣ်လီၤ.