တၢ်ရဲၣ်တၢ်ကျဲၤအိၣ်လၢကဒုးအိၣ်ထီၣ်ထံဂံၢ်ဘါလီသဟီၣ်ဒီးစဲးဖီကဟၣ်တၢ်မၤလီၢ်အဂ့ၢ် BGF စံး၀ဲ

လါယူၤ ၁၈ သီ, ၂၀၂၅ နံၣ်, ခ့ၣ်အဲးစံၣ်

မၠၣ်၀တံၣ်ဒီးစွ့ၤကိၣ်ကိၤဟီၣ်က၀ီၤပူၤဒ်သိးကဒိးန့ၢ်ဘၣ်လီမ့ၣ်အူအဂီၢ် တၢ်ရဲၣ်တၢ်ကျဲၤအိၣ်လၢတၢ်ကတ့ထီၣ်၀ဲထံဂံၢ်ဘါလီသ ဟီၣ်ဒီး စဲးဖီကဟၣ်တၢ်မၤလီၢ်ဖးဒိၣ်လၢအလဲၢ်အိၣ်(၂၀၀)အ့ကၢၣ်အံၤအဂ့ၢ်န့ၣ် ကညီသုးခိးကီၢ်ဆၢ(BGF) ပှၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် နဲၤမီၤစီၤ စံးဘၣ်တၢ်ကစီၣ်သန့ဖဲ မဟါလါယူၤ ၁၇ သီလၢ(အီၤလါ)ပူၤအံၤတဆီန့ၣ်လီၤ.

ဒ်တၢ်ကရၢကရိတၢ်အိၣ်ဖှိၣ်လၢတၢ်မၤ၀ဲဖဲအပူၤကွံၥ်လါယူၤ ၁၄ သီအနံၤ တၢ်ဆၢတဲၥ်အိၣ်ထီၣ်လၢအပူၤကွံၥ်စဲးဖီကဟၣ် တၢ်မၤလီၢ် လၢတၢ်တိၥ်လီၤ၀ဲလၢ ကဒုးအိၣ်ထီၣ်၀ဲအံၤ တၢ်ကမၤဖျါထီၣ်အမိၢ်လံၤမိၢ်ပှၢ်ဒီး ဒ်န့ၣ်အသိးစွ့ၤကိၣ်ကိၤဒီးမၠၣ်၀တံၣ်ဟီၣ်က၀ီၤပူၤ ဒ်သိး ကမျၢၢ်ထံဖိကီၢ်ဖိကဒိးန့ၢ်ဘၣ်လီမ့ၣ်အူ(၂၄)နၣ်ရံၣ်ပှဲၤပှဲၤအဂီၢ် ကဒုးအိၣ်ထီၣ်၀ဲထံဂံၢ်ဘါလီသဟီၣ်တၢ်တိၤကျဲၤနီၢ်နီၢ်အဂ့ၢ်န့ၣ် သုးခိၣ်ဒိၣ် ဂီၢ်ဂ့ၢ် နဲၤမီၤစီၤ စံး၀ဲန့ၣ်လီၤ.

အ၀ဲစံး၀ဲလၢ“မၠၣ်၀တံၣ်ဒီးစွ့ၤကိၣ်ကိၤဟီၣ်က၀ီၤပူၤဒ်သိးကဒိးန့ၢ်ဘၣ်လီမ့ၣ်အူ(၂၄)နၣ်ရံၣ်ပှဲၤပှဲၤအဂီၢ်န့ၣ် တၢ်ရဲၣ်တၢ်ကျဲၤအိၣ်လၢတၢ်က ဒုးအိၣ်ထီၣ်၀ဲထံဂံၢ်ဘါလီသဟီၣ်လီၤ.လၢခံတခါန့ၣ်တၢ်ရဲၣ်တၢ်ကျဲၤအိၣ်စ့ၢ်ကီးလၢပကဒုးအိၣ်ထီၣ်၀ဲစဲးဖီကဟၣ်တၢ်မၤလီၢ်လၢအလဲၢ်အိၣ်(၂၀၀)အ့ကၢၣ်အံၤစ့ၢ်လီၤ.တၢ်သ့ၣ်တဖၣ်အံၤပကမၤဖျါထီၣ်အမိၢ်လံၤမိၢ်ပှၢ်.တကးဒံးဘၣ်ဒ်သိးပကဒိးန့ၢ်ဘၣ်တၢ်ဖံးတၢ်မၤအခွဲးအယၥ်အဂီၢ်ဒီးဆူမဲၥ်ညါပတၢ်ကရၢကရိဆဲးအိၣ်ဆၢထၢၣ်ကန့ၢ်အဂီၢ်,ပဟီၣ်က၀ီၤပူၤတၢ်လဲၤထီၣ်လဲၤထီကအိၣ်ထီၣ်အဂီၢ်န့ၣ် ပကဘၣ်ပၥ်လီၤဒီး မၤဖျါထီၣ်တၢ်မၤရဲၣ်ကျဲၤသ့ၣ်တဖၣ်အံၤအမိၢ်လံၤမိၢ်ပှၢ်န့ၣ်လီၤ”အဂ့ၢ်န့ၣ် စံးလီၤ၀ဲလၢတၢ်မၤဆှဲလဲတၢ်ကစီၣ်မူးအပူၤန့ၣ်လီၤ.

တကးဒံးဘၣ်လၢတၢ်ကတ့ထီၣ်ဘှီထီၣ်စဲးဖီကဟၣ်တၢ်မၤလီၢ်အဂီၢ်အံၤစ့ၢ်ကီး (BGF) ကဘၣ်တၢၣ်ပီၣ်တဲသကိးတၢ်ဒီး တၢ်ဖံးတၢ်မၤကစၢ်, သုးကီၣ်ကးပှၤဘၣ်မူဘၣ်ဒါဒီး တၢ်မ့ဟ့ၣ်အခွဲးမးကဆဲးမၤ၀ဲအဂ့ၢ်န့ၣ် နဲၤမီၤစီၤ စံးအါထီၣ်၀ဲန့ၣ်လီၤ.

တကီၢ်ခါခဲအံၤဘၣ်ဃး(အီၤလါ)ကၠါဖၠၣ်တၢ်ဖံးတၢ်မၤလၢအရၤလီၤသးဆူဟီၣ်ခိၣ်ဒီတဘ့ၣ်အပူၤအံၤ တၢ်ဒီၣ်တဲၥ်ဃၥ်၀ဲတၢ်ဟ့ၣ်လီမ့ၣ်အူ ဆူမၠၣ်၀တံၣ်(BGF)ဟီၣ်က၀ီၤဒီးဃိၣ်သၢဖျၢၣ်၀့ၢ်ပူၤတကးဒံးဘၣ်အမဲၥ်ညါ တၢ်ဒီၣ်တဲၥ်ဃုၥ်၀ဲတၢ်စိၥ်ဆှၢရ့ၣ်နီၣ်သိ,အ့ထနဲးဒီးပနံၥ်တၢ်ဖိ တၢ်လံၤ လၢ အဂၤသ့ၣ်တဖၣ်အိၣ်၀ဲန့ၣ်လီၤ.

လၢတၢ်န့ၣ်အဃိခီဖျိဟီၣ်က၀ီၤပူၤတၢ်ဖိတၢ်လံၤလီၤတူၥ်အံၤအဖီခိၣ် မုၢ်ကျိၤ၀ဲၤကွၥ်တၢ်ဖံးတၢ်မၤလီၢ်တနီၤဘၣ်ပတုၥ်ကွံၥ်၀ဲအသးဒီး သဂၢၢ်ဘၣ်၀ဲတၢ်ကီတၢ်ခဲအဖီခိၣ် ကၠီၣ်တဲၣ်ပှၤဘၣ်မူဘၣ်ဒါကကွၢ်ဘၣ်တၢ်လၢကမျၢၢ်ထံဖိကီၢ်ဖိအဂီၢ်ဒီး ကအိးထီၣ်ကဒါက့ၤတၢ်လၢ အ၀ဲသ့ၣ်ဒီၣ်တဲၥ်ဃၥ်၀ဲသ့ၣ်တဖၣ်အံၤအဂ့ၢ်န့ၣ် (BGF)ဃုၥ်ဒီးဖီၣ်စုက၀ဲၤကရူၢ်လၢအဘၣ်ထွဲအံၤတဖၣ် ဃ့ထီၣ်၀ဲတၢ်ဆၢကတီၢ် ကအိၣ်လၢ(၃)လါလံဘၣ်ဆၣ်တုၤလၢခဲအံၤတၢ်က့ၤခီၣ်ဆၢကဒါ၀ဲတအိၣ်နီမံၤဒံးဘၣ်န့ၣ်လီၤ.

လၢန့ၣ်အမဲၥ်ညါလၢတရူးအတၢ်ဆီၣ်သနံးအံၤတဆီခီဖျိကီၢ်ကၠီၣ်တဲၣ်ဒီၣ်တဲၥ်ဃၥ်၀ဲတၢ်ဒ်အံၤအဖီခိၣ် ကဲထီၣ်တၢ်ဘၣ်ဘျုးထဲလၢ တရူးအဂီၢ်လီၤအဂ့ၢ်န့ၣ် သုးခိၣ်ဒိၣ်ဂီၢ်ဂ့ၢ် နဲၤမီၤစီၤ စံး၀ဲန့ၣ်လီၤ.

“ကၠီၣ်တဲၣ်မၤတဲၥ်မ့ၣ်အူဘျီမတဂၤဘၣ်ဂီၢ်က့ၤလဲၣ်.အိၣ်ဒၣ်တရူးလီၤဘၣ်မနုၤအဃိလဲၣ်န့ၣ်တၢ်လိမုၢ်(စိၤလၤ)တဖၣ်အံၤအိၣ်ဟဲက့ၤ လၢတရူးအခီၣ်ပနံၣ်သ့ၣ်တဖၣ်လီၤ.”အဂ့ၢ်န့ၣ် စံး၀ဲန့ၣ်လီၤ

တကီၢ်ခါခဲအံၤခီဖျိတၢ်ဒီၣ်တဲၥ်ကွံၥ်လီမ့ၣ်အူအဃိ မၠၣ်၀တံၣ်ဟီၣ်က၀ီၤကမျၢၢ်ထံဖိကီၢ်ဖိတဖၣ်အါဒၣ်တက့ၢ်န့ၣ် လၢအ၀ဲသ့ၣ်တၢ်ဖံး တၢ်မၤအဂီၢ် ပှ့ၤသူက့ၤ၀ဲရ့နီၣ်သိလၢကီၢ်ပယီၤအံၤတဆီ၀ံၤသူက့ၤ၀ဲမ့ၣ်အူစဲးဒီးတၢ်လိမုၢ်(စိၤလၤ)သ့ၣ်တဖၣ်လီၤအဂ့ၢ်န့ၣ် သ့ၣ်ညါဘၣ်န့ၣ်လီၤ.