လါယူၤ ၆ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဟီၣ်က၀ီၤအပူၤ ဖဲအပူၤကွံၥ်စှၤသီအခါ သုးမီၤစိရိၤ (သုးကီၣ်ကး)အပှၤဟဲက့ၤပၥ်လီၤကဒီးစုက၀ဲၤလၢ(၃)ဂၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤပှၤဘၣ်မူဘၣ်ဒါ အအိၣ်န့ၣ်လီၤ.
ဖဲလါယူၤ ၂ သီအနံၤ သုးကီၣ်ကး(ခမရ-၅၉၈)သုးရ့ၣ်အလၢအိၣ်ခ့ၣ်အဲၣ်ယူၣ် ချၢၣ်လွံၢ်ထူၣ်ကီၢ်ရ့ၣ်(သုးက့ ၃)ဆီထံးကီၢ်ဆၣ် အပူၤအံၤအပှၤတဂၤ ဟဲက့ၤပၥ်လီၤစုက၀ဲၤလၢကၠဲးထိၣ်ကီၢ်ဆၣ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ်(၃)အအိၣ် န့ၣ်လီၤ.
ဒ်(KNLA)ပှၤဘၣ်မူဘၣ်ဒါစံး၀ဲအသိးန့ၣ် ပယီၤသုးဖိလၢအဟဲက့ၤပၥ်လီၤစုက၀ဲၤတဂၤအံၤဟဲက့ၤစိၥ်ဃုၥ်၀ဲ(MA-1)ကျိတခိၣ်, အဆၣ်ဒၢတခါ, အချံ(၅၀)ဘျဲၣ်ဒီး ပှၤခံဂၤအံၤလီၢ်က၀ီၤပှၤဘၣ်မူဘၣ်ဒါဟ့ၣ်လီၤဆီၣ်ထွဲမၤစၢၤအီၤစ့ပယီၤ အကလီၢ်ခံဆံ (၂,၀၀၀,၀၀၀)အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်န့ၣ်အသိးမုၢ်ဆ့ၣ်ထီၣ်ဖဲလါယူၤ ၃ သီအနံၤန့ၣ်စ့ၢ်ကီး လၢဘံလ့ကီၢ်ဆၣ်ပူၤ ပယီၤသုးဖိအသီ(၂)ဂၤလၢအိၣ်နးကၠံသုးကလၢၤအံၤ ဟဲက့ၤပၥ်လီၤ၀ဲ စုက၀ဲၤလၢကညီဒီကလုၥ်ဂၢၤသုးကရၢ(KNDO) သုးရ့ၣ်-၂ အအိၣ် စိၥ်ဃုၥ်၀ဲကျိတဂၤတခိၣ်စုၥ်စုၥ်အဂ့ၢ်န့ၣ် သ့ၣ်ညါဘၣ်လၢ လီၢ်က၀ီၤပှၤဘၣ်မူဘၣ်ဒါအအိၣ်န့ၣ်လီၤ.
ပှၤခံဂၤအံၤမ့ၢ်၀ဲ ဖၠိကွၠဲၤသ့(၃၂)နံၣ်, ၀့ၤလူၣ်ကၠီၤ(၃၃)နံၣ် ဒီးအ၀ဲသ့ၣ်အံၤအသုးထံးမ့ၢ်၀ဲ (ခလရ-၂၈)လၢအိၣ်ဖၣ်အၣ်ကီၢ်ရ့ၣ် (သုးက့ ၇) လူၢ်ပျဲၢ်၀့ၢ် အဂ့ၢ်န့ၣ် သ့ၣ်ညါဘၣ်န့ၣ်လီၤ.
တကးဒံဘၣ်အ၀ဲသ့ၣ်အံၤဘၣ်တၢ်ဖီၣ်န့ၢ်ဆူၣ်အီၤလၢသုးကျါနုၥ်လီၤသုးတနံၣ်မးတအိၣ်ဒံးဘၣ်ဒီး တချုးတၢ်ဖီၣ်အ၀ဲသ့ၣ် ဒံးဘၣ်အပူၤကွံၥ်မ့ၢ်ပှၤသ့ၣ်တဖၣ်လၢ အလဲၤဖံးမၤတၢ်လၢကီၢ်ကၠီၣ်တဲၣ်ပူၤအဂ့ၢ်န့ၣ် (KNDO) သုးရ့ၣ်-၂ သုးဂ့ၢ်၀ီခိၣ် စံးဘၣ် ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤ.
အ၀ဲစံး၀ဲလၢ“အ၀ဲသ့ၣ်ခံဂၤအံၤမ့ၢ်၀ဲပှၤဖီၣ်န့ၢ်ဆူၣ်အီၤ(စစ်မှုထမ်း)မီၤနီၤ.အကဲသုးန့ၢ်(၁၁)တလါတဂၤဒီး(၆)လါတဂၤ.ပသံကွၢ်အီၤန့ၣ်တဲ၀ဲလၢပယီၤသုးဖီၣ်န့ၢ်ဆူၣ်အီၤ.ဖဲအလဲၤမၤတၢ်လၢဘီကီးဟဲက့ၤလီၤဘျီပှၤဖီၣ်အီၤလၢကျဲပူၤဘျီပှၤမၢအကဲသုး.ပှၤခံဂၤအံၤအိၣ်ဟဲက့ၤလၢဘီကီးခံဂၤလၢၤလီၤ.အ၀ဲသ့ၣ်ဟဲလီၤအိၣ်ဖဲနးကၠံသုးကလၢၤပူၤန့ၣ်ကအိၣ်တလါဘျဲၣ်ဒံးလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
တကီၢ်ခါခဲအံၤပယီၤသုးအပှၤလၢအဟဲက့ၤဟ့ၣ်လီၤသးသ့ၣ်တဖၣ်အံၤလီၢ်က၀ီၤပှၤဘၣ်မူဘၣ်ဒါအံးထွဲကွၢ်ထွဲပၥ်အ၀ဲသ့ၣ်လၢတၢ်ဘံၣ်တၢ်ဘၢအလီၢ်အဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါစံး၀ဲန့ၣ်လီၤ.
(သုးက့ ၁)ဟီၣ်က၀ီၤအပူၤ တနံၣ်အံၤ(၂၀၂၅)လါယနူၤအါရံၤတုၤလၢလါယူၤခဲအံၤန့ၣ် ပယီၤသုးအပှၤဟဲက့ၤပၥ်လီၤစုက၀ဲၤ ပၥ်ဖှိၣ်ခဲလၢၥ်အိၣ်၀ဲ(၈)ဂၤလံဒီးဒ်န့ၣ်အသိး ပှၤသ့ၣ်တဖၣ်အံၤအါဒၣ်တက့ၢ်မ့ၢ်၀ဲသုးဖိအသီလၢဘၣ်တၢ်ထၢန့ၢ် ဆူၣ်အီၤလၢသုးကျါ သ့ၣ်တဖၣ်လီၤအဂ့ၢ်န့ သ့ၣ်ညါဘၣ်န့ၣ်လီၤ.
