လါယူၤလံ ၁၁ သီ, ၂၀၂၅ နံၣ်, ခ့ၣ်အဲးစံၣ်
ကညီဖိသၣ်တဃံးဒီပုၢ်၀ဲၢ်မုၣ်(၂)ဂၤလၢအိၣ်ဖျဲၣ်လီၤအသးနါပှၢ်စဲဘူးလိၥ်သး ဖဲတလၢၤကီၢ်စဲၣ် ဘံလ့ကီၢ်ဆၣ်ကမျၢၢ်တၢ်ဆါ ဟံၣ် အံၤ ကီၢ်စဲၣ်ပဒိၣ်လဲၤဟ့ၣ်လီၤဆီၣ်ထွဲမၤစၢၤ၀ဲစ့ပယီၤအကလီၢ်(၁၀၀)ကၠး အဂ့ၢ်န့ၣ် ကီၢ်ဆၣ်ဆူၣ်ချ့တၢ်ဆါဟံၣ် ထုးထီၣ် ပၥ်ဖျါ၀ဲ လၢအ(facebook)ပူၤဖဲတနံၤအံၤန့ၣ်လီၤ.
ပဲၢ်တ၀ဲၢ်သ၀ီဖိ နီၢ်ခၠီဂ့ၤ လၢအိၣ်ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ်အပူၤအံၤ ဖဲအပူၤကွံၥ်လါယူၤလံ ၉ သီ ၀ၤဆိၤလါပှဲၤ မုၢ်နၤခီ ၉း၄၅ မံးနံးအဆၢကတီၢ်န့ၣ် ဘံလ့တၢ်ဆါဟံၣ် ဒီကထၢၣ်မၠိမ့ဒီးကသံၣ်သရၣ် တဖၣ်ဖွဲးဒုးအိၣ်ဖျဲၣ်ထီၣ် အဖိတဃံး(၂)ဂၤအံၤ လဲၤသးဘျ့ဘျ့ဆှီဆှီအဂ့ၢ်န့ၣ် သ့ၣ်ညါဘၣ်န့ၣ်လီၤ.
ကီၢ်ပယီၤအပူၤ ဖိသၣ်ဒီပုၢ်၀ဲၢ်တဃံးခံဂၤအိၣ်၀ဲအါမးဘၣ်ဆၣ် မ့မ့ၢ်ဖိသၣ်တဃံးလၢအသးနါပှၢ်စဲးဘူးလိၥ်သး(၂)ဂၤ ဒ်အံၤ အိၣ်၀ဲစှၤအဃိ ဖဲတနံၤအံၤ လါယူၤလံ ၁၁ သီအံၤ မိၣ်ကီၢ်စဲၣ်သုးကီၣ်ကးပဒိၣ်ကရူၢ် အခၢၣ်စးကၠဲးထိၣ်ကီၢ်ရ့ၣ် ပၢပြးအခိၣ်ဒီးအပှၤ လဲၤဟ့ၣ်လီၤဆီၣ်ထွဲမၤစၢၤ၀ဲစ့ပယီၤအလီၢ်(၁၀၀)ကၠးလၢအမိၢ်အပၢ်စုပူၤန့ၣ်လီၤ.
ပဲၢ်တ၀ဲၢ်သ၀ီ နီၢ်ခၠီဂ့ၤအံၤ အပူၤကွံၥ်ဒၢတ့ၢ်ဃၥ်အဖိအိၣ်၀ဲ(၄)ဒၢလံဒီး ဖဲအဒၢ(၅)ဒၢတဒၢခဲအံၤန့ၣ် အဖိတဃံးဟဲန့ၢ်၀ဲလၢ အသးနါပှၢ်စဲဘူးလိၥ်သးကဲထီၣ်၀ဲဒ်အံၤန့ၣ်လီၤ. တကီၢ်ခါခဲအံၤလၢဆူၣ်ချ့တၢ်အံးထွဲကွၢ်ထွဲတၢ်လိၣ်ဘၣ်သ့ၣ်တဖၣ်အဂီၢ် ပှၤဒီပုၢ်၀ဲၢ်မုၣ် တဃံးခံဂၤအံၤ တၢ်ဆှၢထီၣ်အီၤဆူ၀့ၢ်တကူၣ်, ဖိသၣ်တၢ်ဆါဟံၣ်ဖးဒိၣ်လံဒီး မိၢ်ဃုၥ်ဒီးဖိသၣ်သ့ၣ် တဖၣ် တၢ်အိၣ်ဆူၣ်အိၣ်ချ့ ဂ့ၤ၀ဲကိးဂၤဒဲးအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဘံလ့ကမျၢၢ်တၢ်ဆါဟံၣ်လၢဆူၣ်ချ့ပှၤမၤတၢ်ဖိအနီၣ်ဂံၢ်အိၣ်၀ဲစှၤအံၤန့ၣ် နီၢ်ခၠီဂ့ၤအဖိမုၣ်တဃံးခံဂၤအံၤအမဲၥ်ညါ ဖဲအပူၤကွံၥ် တ့ၢ်ဖဲ(၁၉၉၂)နံၣ်အခါန့ၣ်စ့ၢ်ကီး ကညီမုၣ် အံၣ်အံၣ်ည့ ဒီး အ့အ့ည့ (၂)ဂၤလၢအဘၣ်တၢ်သ့ၣ်ညါအီၤအါ၀ဲအံၤ တၢ်ဖွဲးအိၣ် ဖျဲၣ် အ၀ဲသ့ၣ်ဖဲတၢ်ဆါအံၤန့ၣ်လီၤ.အဃိဘံလ့ကီၢ်ဆၣ်ပူၤပှၤဖိသၣ်တဃံးလၢအသးနါပှၢ်စဲဘူးဒ်အံၤအိၣ်၀ဲ(၂)တွဲလံအဂ့ၢ်န့ၣ် သ့ၣ်ညါလၢတၢ်ဆါဟံၣ်သရၣ်ပၥ်ဖျါထီၣ်၀ဲအသိးန့ၣ်လီၤ.
