လါယူၤလံ ၂၃ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဖၣ်အၣ်ကီၢ်ရ့ၣ်(သုးက့ ၇)လူၢ်ပျဲၢ်ကီၢ်ဆၣ် မၠဲၣ်ကၠံငူၣ်ဟီၣ်ကဝီၤလီၤဆီအပူၤ လၢထံကီၢ် တၢ်မုၥ်တၢ်ခုၣ်အဂီၢ်တၢ်ကမၤဖှိၣ်ဝဲ“တၢ်မုၥ်တၢ်ခုၣ်တၢ်ဘါထုကဖၣ်”တၢ်ရဲၣ်တၢ်ကျဲၤတခါလၢအပၣ်ဃုၥ်ဝဲသီခါအပါ(၁၀၀၀)အဂ့ၢ်န့ၣ် (BGF)ပှၤဘၣ်မူဘၣ်ဒါ စံးဝဲအသိးသ့ၣ်ညါဘၣ်န့ၣ်လီၤ.
ကီၢ်ပယီၤပူၤဒ်သိးကဒိးန့ၢ်ဘၣ်တၢ်မုၥ်တၢ်ခုၣ်လၢအအိၣ်ဒီးတၢ်သဘျ့တၢ်တုၤသိးထဲသိး,တၢ်တီတၢ်တြၢ်အံၤအဂီၢ် လၢကဟဲတလါအံၤ လါယူၤလံ ၂၇ သီအနံၤ ဂီၤခီ ၈း၀၀ နၣ်ရံၣ်အဆၢကတီၢ်န့ၣ် ဘူးဒးသီခါတဖၣ်ကပၥ်ဖှိၣ်မၤဝဲ “တၢ်မုၥ်တၢ်ခုၣ်တၢ်ဘါထုကဖၣ်” တၢ်ရဲၣ်တၢ်ကျဲၤတခါလၢမၠဲၣ်ကၠံငူၣ်ဟီၣ်ကဝီၤလီၤဆီ (အေးလင်းသာယာကွင်း) အ့လ့မၠၣ်စှ့ၤ ဒမၣ်ယိၣ် အံၤအဂ့ၢ်န့ၣ် မဲစမ့ၣ်သီခါဖၠၣ် ထုးထီၣ်ပၥ်ဖျါဝဲန့ၣ်လီၤ.
“တၢ်မုၥ်တၢ်ခုၣ်တၢ်ဘါထုကဖၣ်”တၢ်ရဲၣ်တၢ်ကျဲၤလၢတၢ်ကမၤအီၤဘျီဝဲအံၤန့ၣ် အတၢ်ပညိၣ်မ့ၢ်ဒ်သိးထံလီၢ်ကီၢ်ပူၤတၢ်မုၥ်တၢ်ခုၣ် ကအိၣ်ထီၣ်က့ၤဝဲအဂီၢ်လီၤဒီး တကတီၢ်ဃီတၢ်ဃ့ဘါထုကဖၣ်ဘျီဝဲအံၤသီခါကပၣ်ဃုၥ်ဝဲခဲလၢၥ်အပါ(၁၀၀၀၀)အဂ့ၢ်န့ၣ် BGF သုးဟီၣ်က၀ီၤ(၂)အခိၣ် သုးခိၣ်ကျၢၢ်ဖိ စီၤတ့ၤဝ့ စံးဝဲန့ၣ်လီၤ.
“တၢ်ပညိၣ်ဒုအလီၤလီၤဆီဆီဒုတအိၣ်ဘၣ်.အိၣ်ဒၣ်လၢဒ်သိးထံလီၢ်ကီၢ်ပူၤတၢ်မုၥ်တၢ်ခုၣ်ကအိၣ်ထီၣ်က့ၤဝဲအဂီၢ်လီၤ.အဃိလၢအဝဲသ့ၣ်အတၢ်ဘူၣ်တၢ်ဘါတကပၤခီန့ၣ်ဒ်သိးပှၤဘူၣ်ထူဘါယွၤအသိးလီၤ.ဒ်သိးဃ့ဘါထုကဖၣ်ဝဲလၢကကဲထီၣ်လၢအမုၥ်အခုၣ်တကပၤဒ်န့ၣ်လီၤ.ယသ့ၣ်ထွဲဒ်န့ၣ်လီၤအဂၤဒုယတသ့ၣ်ညါဘၣ်.အဂၤတခါန့ၣ်ဒ်သိးယသ့ၣ်ညါထွဲန့ၣ်သီခါကပၣ်ဝဲအပါ(၁၀၀၀)မီၤ.”အဂ့ၢ်န့ၣ် စံးဘၣ် ခ့ၣ်အဲးစံၣ်- ကညီတၢ်ကစီၣ်န့ၣ်လီၤ.
လၢန့ၣ်အမဲၥ်ညါဘၣ်ဃးတၢ်ကမၤဝဲ“တၢ်မုၥ်တၢ်ခုၣ်တၢ်ဘါထုကဖၣ်”တၢ်ရဲၣ်တၢ်ကျဲၤအံၤအပူၤကွံၥ်တၢ်ရဲၣ်တၢ်ကျဲၤအိၣ်လၢတၢ်ကမၤအီၤလၢဃိၣ်သၢဖျၢၣ်တကပၤဘၣ်ဆၣ် ခီဖျိတၢ်အိၣ်သးအကလုၥ်ကလုၥ်အဃိ တၢ်ဆၢတဲၥ်အိၣ်ထီၣ်လၢတၢ်ဟဲက့ၤမၤတၢ်ရဲၣ် တၢ်ကျဲၤအံၤ ဖဲမၠဲၣ်ကၠံငူၣ်ဘၣ်ဟဲကဲထီၣ်ဝဲဒ်အံၤလီၤအဂ့ၢ်န့ၣ် သုးခိၣ်ကျၢၢ်ဖိ စီၤတ့ၤဝ့ စံးဝဲအသိးသ့ၣ်ညါဘၣ်န့ၣ်လီၤ.
(၂၀၂၁)သုးဟံန့ၢ်တၢ်စိတၢ်ကမီၤဝံၤလီၢ်ခံ လၢကီၢ်ပယီၤတၢ်လီၢ်အါတီၤဃုၥ်ဒီးခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ အဟီၣ်က၀ီၤပူၤ တၢ်ဒုးတၢ်ယၤကဲထီၣ်ဒီးခီဖျိလၢသုးမီၤစိရိၤအတၢ်ဟူးတၢ်ဂဲၤအံၤအဃိ ကမျၢၢ်ထံဖိကီၢ်ဖိသံဘၣ်ဒိဘၣ်ထံးအမဲၥ်ညါ ဘၣ်ဃ့ၢ်မှံဟးဖျိးဘၣ်ကွၢ်ဆၢၣ်မဲၥ်ဝဲတၢ်ကီတၢ်ခဲအကလုၥ်ကလုၥ်အကျါပၣ်ဃုၥ်ဝဲကညီဖိသ့ၣ်တဖၣ်အါမးန့ၣ်လီၤ.
ဒ်န့ၣ်အသိး“တၢ်မုၥ်တၢ်ခုၣ်တၢ်ဘါထုကဖၣ်”တၢ်ရဲၣ်တၢ်ကျဲၤလၢတၢ်ကမၤဝဲဘျီဝဲအံၤန့ၣ် ဘၣ်တၢ်တီခိၣ်ရိၣ်မဲအီၤလၢသီခါတၢ်ဘူၣ် တၢ်ဘါကရူၢ်ကရၢအဂ့ၢ် သ့ၣ်ညါဘၣ်အသိး မၠဲၣ်ကၠံငူၣ်ဟီၣ်က၀ီၤအပူၤဘၣ်ဃးတၢ်ဃ့ထုကဖၣ်တၢ်ရဲၣ်တၢ်ကျဲၤလၢသီခါနီၣ်ဂံၢ်ပၣ် ဝဲလၢ အကထိဒ်အံၤ ကမ့ၢ်တၢ်အဆိကတၢၢ်တဘျီဖဲသုးဟံန့ၢ်တၢ်စိတၢ်ကမီၤဝံၤလီၢ်ခံအံၤ အဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါစံးဝဲ အသိး သ့ၣ်ညါဘၣ် န့ၣ်လီၤ.
တချုးတၢ်ကမၤဝဲ“တၢ်မုၥ်တၢ်ခုၣ်တၢ်ဘါထုကဖၣ်”တၢ်ရဲၣ်တၢ်ကျဲၤအိၣ်ထီၣ်ဒံးဘၣ် အပူၤကွံၥ်လါယူၤလံ ၂၀ သီအနံၤ သုးခိးကီၢ်ဆၢ(BGF)ဒီးကညီထံရူၢ်ကီၢ်သဲးပၣ်တံၣ်ခိၣ်နၢ်, သီခါဃုၥ်ဒီးလီၢ်ကဝီၤဒူသဝီ ပှၤဘၣ်မူဘၣ်ဒါ တဖၣ်မၤဝဲဟီၣ်ကဝီၤ တၢ်မုၥ်တၢ်ခုၣ်ဒီးတၢ်ဃူတၢ်ဖိးတၢ်ထံၣ်လိၥ်တၢၣ်ပီၣ်တဲသကိးတခါဖဲမၠဲၣ်ကၠံငူၣ်ဟီၣ်ကဝီၤလီၤဆီ အံၤဒံးန့ၣ်လီၤ.
ဒ်န့ၣ်အသိးလၢတၢ်တၢၣ်ပီၣ်တဲသကိးတၢ်ဂ့ၢ်တဖၣ်အကျါစ့ၢ်ကီးဘၣ်ဃးတၢ်ကမၤဝဲ“တၢ်မုၥ်တၢ်ခုၣ်တၢ်ဘါထုကဖၣ်” တၢ်ရဲၣ်တၢ်ကျဲၤအံၤ ဘၣ်တၢ်ထၢနုၥ်တဲသကိးဃုၥ်စ့ၢ်ကီးဝဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
တကးဒံးဘၣ်ဖဲတၢ်အိၣ်ဖှိၣ်တၢၣ်ပီၣ်တဲသကိးဘျီဝဲန့ၣ်အပူၤစ့ၢ်ကီး ဘၣ်ဃး(BGF)ကဆီတလဲက့ၤအသးဆူ (KNA)အံၤအဂီၢ် (BGF)ခိၣ်နၢ်တကပၤဟံန့ၢ်ဝဲကညီထံရူၢ်ကီၢ်သဲးပၣ်တံၣ်ခိၣ်နၢ်,သီခါဃုၥ်ဒီးကမျၢၢ်အတၢ်ပၥ်သူၣ်ပၥ်သးအိၣ်ဝဲဒၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
