လါယူၤလံ ၁ သီ, ၂၀၂၅ နံၣ်, ခ့ၣ်အဲးစံၣ်
ကီၢ်ပယီၤပူၤသုးဟံန့ၢ်ထံကီၢ်တၢ်စိတကမီၤလၢ(၄)နံၣ်ဘျဲၣ်အတီၢ်ပူၤ ခီဖျိလၢကျိဖးဒိၣ်ဒီးကဘီယူၤအံၤအဃိ ကမျၢၢ်သံပၥ်ဖှိၣ်အိၣ်၀ဲ (၁၅၀၀)ဘျဲၣ်အဂ့ၢ်န့ၣ် တၢ်ဆီၣ်ထွဲမၤစၢၤထံရူၢ်ကီၢ်သဲးပှၤဃိဖိကရူၢ်- AAPP ထုးထီၣ်ပၥ်ဖျါဖဲတနံၤအံၤလါယူၤလံ ၁ သီန့ၣ် လီၤ.
စးထီၣ်(၂၀၂၁)သုးဟံန့ၢ်တၢ်စိတၢ်ကမီၤတုၤလၢ(၂၀၂၅)လါယူၤ ၃၀ သီ လၢ(၄)နံၣ်ဘျဲၣ်အတီၢ်ပူၤ သုးကီၣ်ကးသူ၀ဲကျိဖးဒိၣ်, ကဘီယူၤပညိၣ်ခးလီၤ၀ဲတၢ်ဆူကမျၢၢ်ထံဖိကီၢ်ဖိအဒူသ၀ီအိၣ်ဆိးလီၢ်ကျဲအဃိ ကမျၢၢ်ထံဖိကီၢ်ဖိသံပၥ်ဖှိၣ်ခဲလၢၥ်အိၣ်၀ဲ (၁၅၀၅)ဂၤ အဂ့ၢ်န့ၣ် လံၥ်တၢ်ပၥ်ဖျါအပူၤ ပၥ်ဖျါ၀ဲန့ၣ်လီၤ.
တကးဒံးဘၣ်ခီဖျိလၢကျိဖးဒိၣ်ဒီးကဘီယူၤအံၤအဃိစ့ၢ်ကီးကမျၢၢ်ဘၣ်ဒိဘၣ်ထံး,ဟံၣ်ဃီတၢ်သူၣ်ထီၣ်,တၢ်ဘူၣ်တၢ်ဘါတၢ်သူၣ်ထီၣ်,ကၠိတၢ်သူၣ်ထီၣ်သ့ၣ်တဖၣ်ဟးဂီၤ၀ဲဒၣ်အါမးအသိး ကမျၢၢ်ကျီးတၢ်ဖံးအီၣ်မၤအီၣ်လီၢ်ကျဲသ့ၣ်တဖၣ်စ့ၢ်ကီးဘၣ်ဒိဘၣ်ထံးဟးဂီၤ ၀ဲအါမးအဂ့ၢ်န့ၣ် AAPP စံး၀ဲန့ၣ်လီၤ.
ဒ်လံၥ်တၢ်ပၥ်ဖျါပူၤပၥ်ဖျါ၀ဲအသိးန့ၣ်(၄)နံၣ်ဘျဲၣ်အတီၢ်ပူၤ စကဲကီၢ်ခီန့ၣ်ကမျၢၢ်သံ(၅၂၀)ဂၤ, ရခၢၣ်(၂၇၂)ဂၤ,ယိၤဒိၣ်(၁၅၉)ဂၤ, မကွ့(၁၃၁)ဂၤ,ပကိကီၢ်ခီ(၈၇)ဂၤ,မါတလ့(၈၅)ဂၤ,ခၠီ(၇၈)ဂၤ,ကခၠ့ၣ်(၆၉)ဂၤ,ကညီကီၢ်စဲၣ်(၅၅)ဂၤ,ကယါကီၢ်စဲၣ်(၂၄)ဂၤ,တနီသရံၣ် (၁၈)ဂၤ,တလၢၤကီၢ်စဲၣ်(၆)ဂၤ,၀့ၢ်တကူၣ်(၁)ဂၤ ပၥ်ဖှိၣ်ခဲလၢၥ်(၁၅၀၅)ဂၤန့ၣ်လီၤ.
တကတီၢ်ဃီလၢပှၤသံ(၁၅၀၅)ဂၤသ့ၣ်တဖၣ်အံၤအကျါ ပိၥ်မုၣ်န့ၣ်(၆၈၂)ဂၤ,ပိၥ်ခွါ(၈၂၃)ဂၤအကျါပၣ်ဃုၥ်၀ဲဖိသၣ်ပိၥ်ခွါ(၁၈)နံၣ် ဆူဖီလၥ် (၃၄၂)ဂၤ အဂ့ၢ်န့ၣ် စံး၀ဲန့ၣ်လီၤ.
မ့ဘၣ်ကွၢ်စးထီၣ်လၢ(၂၀၂၁/၂၂/၂၃/၂၅)အတီၢ်ပူၤန့ၣ် ခီဖျိလၢကဘီယူၤဒီးကျိဖးဒိၣ်အဃိ စကဲကီၢ်ခီန့ၣ် ကမျၢၢ်သံအနီၣ် ဂံၢ် အါကတၢၢ်လီၤဒီး ဘၣ်ဆၣ်မ့မ့ၢ်(၂၀၂၄)နံၣ်အခါန့ၣ် ရခၢၣ်ကီၢ်စဲၣ်ပူၤ ကမျၢၢ်သံ အနီၣ်ဂံၢ်အါကတၢၢ်အဂ့ၢ်န့ၣ် (AAPP)လံၥ် တၢ်ပၥ်ဖျါအပူၤ ပၥ်ဖျါ၀ဲန့ၣ်လီၤ.
ခီဖျိလၢသုးကီၣ်ကးအတၢ်ဟူးတၢ်ဂဲၤသ့ၣ်တဖၣ်အံၤအဖီခိၣ် ကမျၢၢ်ထံဖိကီၢ်ဖိဘၣ်ဃ့ၢ်မှံဟးဖျိးစ့ၢ်ကီး၀ဲအါအါဂီၢ်ဂီၢ်အသိး အ၀ဲသ့ၣ်အံၤခီဖျိဘၣ်ဟးအိၣ်ကဒုသးတၢ်ဆၢကတီၢ်ယံၤထီၣ်အဃိ သဂၢၢ်ဘၣ်၀ဲတၢ်အီၣ်တၢ်အီ,တၢ်အိၣ်တၢ်ဆိးလီၢ်ကျဲဒီး ကသံၣ်ကသီတၢ်ဂ့ၢ်ကီ အဂ့ၢ်န့ၣ် စံး၀ဲန့ၣ်လီၤ.
