လါယူၤလံ ၃၀ သီ, ၂၀၂၅ နံၣ်, ခ့ၣ်အဲးစံၣ်
ကီၢ်ကၠီၣ်တဲၣ်-ကီၢ်ပယီၤကီၢ်ဆၢ မၠၣ်ဝတံၣ်ဝ့ၢ်ပူၤကမျၢၢ်လၢအသဂၢၢ်ဘၣ်ထံဒိၣ်ဃိၣ်ယွၤတဖၣ်အဂီၢ် ကညီသုးခိးကီၢ်ဆၢ(BGF) သုးဟီၣ်က၀ီၤ(၂)အခိၣ် သုးခိၣ်ကျၢၢ်ဖိ စီၤတ့ၤဝ့ အဟံၣ်ဖိဃီဖိမၤဘူၣ်လီၤဝဲစ့အကလီၢ်(၁၀၀)ကၠးအဂ့ၢ်န့ၣ် သ့ၣ်ညါဘၣ်န့ၣ်လီၤ.
ကီၢ်ကၠီၣ်တဲၣ်ဒီးကီၢ်ပယီၤထံဆၢကီၢ်ဆၢတၢ်လီၢ်သကုၤဆးဒး စှၤသီအတီၢ်ပူၤအံၤခီဖျိတၢ်က့ၤစူၤကဒါထံဒိၣ်ထီၣ်ထံနုၥ်လီၤဝဲ လၢခူဝ့ၢ်, ကဝီၤဒ့,ဒူသဝီသ့ၣ်တဖၣ်အပူၤအဃိ ကမျၢၢ်လၢအိၣ်တၢ်လီၢ်လီၤဖုၣ်သ့ၣ်တဖၣ် ဘၣ်သုးလီၢ်သုးကျဲဟဲအိၣ်ထီၣ်ကဒီး ဝဲအါအါဂီၢ်ဂီၢ်န့ၣ်လီၤ.
ဖဲန့ၣ်အကျါမၠၣ်ဝတံၣ်ဝ့ၢ်လၢအိၣ်ဘူးဝဲဒီးသူမှဲကျိအံၤခီဖျိထံဒိၣ်ထီၣ်အဃိ ကမျၢၢ်အါမးဘၣ်သုးလီၢ်သုးကျဲထံၣ်ဘၣ်တၢ်ကီတၢ်ခဲ အဖီခိၣ် လၢအဝဲသ့ၣ်အဂီၢ်ဘၣ်မၤဘူၣ်လီၤဝဲစ့ဒ်အံၤလီၤ အဂ့ၢ်န့ၣ် (BGF)သုးခိၣ်ကျၢၢ်ဖိ စီၤတ့ၤဝ့ စံးဘၣ်ခ့ၣ်အဲးစံၣ်-ကညီတၢ် ကစီၣ် ဒ်အံၤန့ၣ်လီၤ.
“လၢအဂၤဒုတအိၣ်ဘၣ်ခီဖျိထံဒိၣ်နိဒိၣ်,ဘၣ်လၢပှၤလီၤဘၣ်တၢ်ကီတၢ်ခဲအခါဃိပမၤစၢၤအီၤဒ်န့ၣ်လီၤ.တနီၤနီၤအဟံၣ်အဃီ လီၤဘၢ,အိၣ်ဝဲတသ့လၢၤဘၣ်ဘၣ်လဲၤအိၣ်က့ၤလၢသီခါဖၠၣ်အိၣ်မီၤနီၤ.လၢအပူၤကွံၥ်နါက့ပမၤစၢၤမၢ်မၢ်လီၤ.ပမၤစၢၤလၢပတတဲဘၣ်တၢ်ကစီၣ်ဘၣ်န့ၣ်အိၣ်ဒီဒူၣ်ညါ”အဂ့ၢ်န့ၣ် စံးဝဲန့ၣ်လီၤ.
ဒ်န့ၣ်အသိးတကီၢ်ခါခဲအံၤခီဖျိတၢ်စူၤတပယူၥ်ဃီဃိၣ်လိၥ်ကျိစ့ၢ်ကီးဒိၣ်ထီၣ်ကမျၢၢ်လၢအိၣ်ဖၣ်အၣ်ဝ့ၢ်တကပၤစ့ၢ်ကီး ဘၣ်သုး လီၢ်သုးကျဲအိၣ်ဝဲဒၣ်အါမးန့ၣ်လီၤ.အဃိကမျၢၢ်လၢအိၣ်ဖၣ်အၣ်ဝ့ၢ်ပူၤတဖၣ်အဂီၢ်လၢကဟဲစှၤသီအတီၢ်ပူၤအံၤ တၢ်ရဲၣ်တၢ်ကျဲၤ အိၣ်လၢကမၤဘူၣ်လီၤစ့အကလီၢ်(၃၀၀)ကၠးအိၣ်ဝဲအဂ့ၢ်န့ၣ် သုးခိၣ်ကျၢၢ်ဖိ စီၤတ့ၤဝ့ စံးအါထီၣ်ဝဲန့ၣ်လီၤ.
အဝဲစံးဝဲလၢ“ခဲအံၤဒ်သိးဖၣ်အၣ်န့ၣ်စ့ၢ်ကီးထံဒိၣ်ထီၣ်လံ.ပဆိမိၣ်တသီခံသီအံၤန့ၣ်ပကဆှၢလီၤတၢ်မၤစၢၤ.လၢကမၤစၢၤအဂီၢ်ယတဲလိၥ်သးဒီးပှၤဘၣ်မူဘၣ်ဒါလၢတၢ်ဖီလၥ်န့ၣ်ဝံၤလံ.မ့မ့ၢ်ဖၣ်အၣ်တကပၤခီန့ၣ်ယဆိမိၣ် တဝီအံၤယကမၤစၢၤစ့ပယီၤ အကလီၢ် (၃၀၀) ”အဂ့ၢ်န့ၣ် စံးဝဲန့ၣ်လီၤ.
လၢမၠၣ်ဝတံၣ်ကမျၢၢ်အဂီၢ် စ့အကလီၢ်(၁၀၀)ကၠးအမဲၥ်ညါ သုးခိၣ်ကျၢၢ်ဖိ စီၤတ့ၤဝ့ အဟံၣ်ဖိဃီဖိဟ့ၣ်လီၤမၤစၢၤ ပၣ်ဃုၥ်ဝဲ ဂံၢ်ခီၣ်ထံး တၢ်အီၣ်တၢ်အီလၢအမ့ၢ်ဟုသး,မးမါဘိၣ်,သိအီၣ်,ညၣ်ဒၢ,ဆီဒံၣ်ဃုၥ်ဒီးဖိတၢ်လံၤလၢအဂၤသ့ၣ်တဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
သုးခိၣ်ကျၢၢ်ဖိ စီၤတ့ၤဝ့ အံၤ အဟီၣ်ကဝီၤပူၤအမဲၥ်ညါလၢထံဆၢကီၢ်ဆၢတၢ်ကူၣ်ဘၣ်ကူၣ်သ့တၢ်ဖံးတၢ်မၤပူၤအဂီၢ် မ့ၢ်ပှၤတဂၤလၢ ဆီၣ်ထွဲမၤဘူၣ်လီၤဝဲ စ့အိၣ်ဝဲတလီၢ်လီၢ်န့ၣ်လီၤ.ဒ်န့ၣ်အသိး ဖဲအပူၤကွံၥ်(၂၀၂၄)လါယူၤလံအခါန့ၣ်စ့ၢ်ကီး လၢဖၣ်အၣ်ကီၢ်ရ့ၣ် တန့ခၠါကီၢ်ဆၣ် သ့ၣ်ကတံၥ်သဝီအပူၤ လၢလီၢ်ကဝီၤဖိဒံဖိသၣ်ကၠိဖိတဖၣ်အဂီၢ် သူၣ်ထီၣ်ဒုးအိၣ်ထီၣ်ဒံးဝဲဆၣ်တီနီၢ်တီၤထီကၠိအံၤ ဒံးန့ၣ်လီၤ.
