လါအီကူး ၂၀ သီ, ၂၀၂၅ နံၣ်, ခ့ၣ်အဲးစံၣ်
အူမူထၣ် ကညီကူၣ်သ့ဆဲးလၤဝဲၤကျိၤ(KECD)ကၠိလၢအိၣ်ကီၢ်ကၠီၣ်တဲၣ်-ကီၢ်ပယီၤကီၢ်ဆၢ ခ့ၣ်အဲၣ်ယူၣ်-ကညီဒီကလုၥ် စၢဖှိၣ် ကရၢ ဖၣ်အၣ်ကီၢ်ရ့ၣ်(သုးက့ ၇)လူၢ်ပျဲၢ် ကီၢ်ဆၣ်အပူၤအံၤ ဖဲမဟါဟါခီအဆၢကတီၢ်န့ၣ်တၢ်လဲၤတ့ၢ်လီၤဝဲဒြိမ့ၣ်ပိၢ်အဃိ ကၠိအံၤ ဟးဂီၤဝဲ အဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါ စံးဝဲအသိး သ့ၣ်ညါဘၣ်န့ၣ်လီၤ.
ဖဲမဟါလါအီကူး ၁၀ သီ ဟါခီ ၅း၀၀ နၣ်ရံၣ်ဃၣ်ဃၣ်အဆၢကတီၢ်န့ၣ် သုးမီၤစိရိၤအပှၤပညိၣ်လဲၤတ့ၢ်လီၤဝဲဒြိမ့ၣ်ပိၢ်(၂)ဖျၢၣ်လၢ မဲၢ်တဝီ-ထံသ့ၣ်ဃံၣ်ဘၢၣ်စၢၤ အူမူထၣ်တီၤထီကၠိအံၤအဃိ တၢ်ဘၣ်ဒိဘၣ်ထံးမ့တအိၣ်ဘၣ်ဘၣ်ဆၣ် ကၠိတၢ်သူၣ်ထီၣ် အခိၣ်လီၤ ပှီၢ်ဟးဂီၤဝဲအဂ့ၢ်န့ၣ် လီၢ်ကဝီၤပှၤဘၣ်မူ ဘၣ်ဒါတဂၤစံးဝဲန့ၣ်လီၤ.
အဝဲစံးဝဲလၢ“တၢ်လဲၤတ့ၢ်လီၤဝဲဒီး(Kamikazi)ဒြိလၢအတူၢ်သံသးန့ၣ်(၂)ဖျၢၣ်.တၢ်ကဲထီၣ်သးန့ၣ်ကဘၣ်ဖဲဟါ ၅း၀၀ နၣ်ရံၣ် အခါန့ၣ်.ပှၤတဲလၢကၠိဒုဟးဂီၤနါက့တၢ်ဘၣ်ဒိဘၣ်ထံးတအိၣ်ဘၣ်.ကၠိတဖျၢၣ်န့ၣ်မ့ၢ်ဝဲတၢ်ပၢၢ်ဆၢ(KECD)ကၠိလီၤ.ကၠိတဖျၢၣ်အံၤပှၤဟဲတ့ၢ်လီၤဒီးဒြိ န့ၣ်ကအိၣ်လၢခံဘျီသၢဘျီလံ.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤန့ၣ်လီၤ.
ဒ်န့ၣ်အသိးအူမူထၣ်ကၠိတၢ်လဲၤတ့ၢ်လီၤဒြိမ့ၣ်ပိၢ်အံၤ မ့အိၣ်ဘူးဝဲဒီးမဲၢ်တဝီပယီၤသုးကလၢၤဘၣ်ဆၣ် တၢ်တယးကွၢ်ဝဲလၢဒြိအံၤ ကအိၣ်ဟဲဝဲလၢကမၤမိၢ်တကပၤအဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါ စံးဝဲန့ၣ်လီၤ.
ခီဖျိတၢ်လဲၤတ့ၢ်လီၤဒြိမ့ၣ်ပိၢ်ကဲထီၣ်ဒ်အံၤအဃိ တကီၢ်ခါခဲအံၤကၠိဖိသ့ၣ်တဖၣ်ထီၣ်ကၠိတဘူၣ်လၢၤဘၣ် ဒီးဘၣ်အိၣ်က့ၤလၢ တၢ်ပျံၤတၢ်ဖုးတၢ်ဘၣ်ယိၣ်ဘၣ်ဘှီပူၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
အူမူထၣ်ကၠိအံၤအိၣ်သူၣ်လီၤအသးတီတီဖဲသူမှဲကျိကပၤလီၤအသိး သဝီအံၤအိၣ်တဘူးတယံၤစ့ၢ်ကီးဒီးကီၤလၤဝါလူၢ်အဂ့ၢ်န့ၣ် သ့ၣ်ညါဘၣ်န့ၣ်လီၤ