လါအီကူး ၁၈ သီ, ၂၀၂၅ နံၣ်, ခ့ၣ်အဲးစံၣ်
ကညီသုးခိးကီၢ်ဆၢ(BGF/KNA)ဖီၣ်စုကဝဲၤတၢ်ကရၢကရိအံၤ အပူၤကွံၥ်သုးရ့ၣ်မ့အိၣ်(၁၃)ရ့ၣ်ဘၣ်ဆၣ် လၢ(၅)နံၣ်ဘျဲၣ်အတီၢ်ပူၤ မၤအါထီၣ်ဝဲသုးရ့ၣ်အဘ့ၣ်(၅၀)ဘျဲၣ်အဂ့ၢ်န့ၣ် သုးဟီၣ်ကဝီၤ(၂)အခိၣ် သုးခိၣ်ကျၢၢ်ဖိ စီၤတ့ၤဝ့ စံးဝဲအသိးသ့ၣ်ညါဘၣ် န့ၣ်လီၤ.
စးထီၣ်ဖဲ ၂၀၁၀ လၢ(DKBA)တဆီ အိၣ်ဆၢထၢၣ်က့ၤဒ်(BGF)အသိးအခါန့ၣ် သုးရ့ၣ်အိၣ်ဒၣ်ထဲ(၁၃)ရ့ၣ် လီၤဒီး ဘၣ်ဆၣ်လၢတၢ် အိၣ်သး အကလုၥ်ကလုၥ်အဖီခိၣ် စးထီၣ်ဖဲ၂၀၂၀ နံၣ် တုၤလၢခဲအံၤလၢ(၅)နံၣ်ဘျဲၣ်အတီၢ်ပူၤန့ၣ် တၢ်မၤအါထီၣ်ဝဲ သုးရ့ၣ်အိၣ် ခ(၅၁) ဘ့ၣ်ညါအဃိခဲအံၤ သုးရ့ၣ်ပၥ်ဖှိၣ်ခဲလၢၥ်အိၣ်ဝဲ(၆၄)ရ့ၣ်ဒီးသုးဂံၢ်ဘါအိၣ်အဂၤ(၂၀၀၀၀)ဘျဲၣ်ဒ်အံၤလီၤ အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဘၣ်ဃးသုးရ့ၣ်ဒီးသုးနီၣ်ဂံၢ်ဟဲအါထီၣ်အဖီခိၣ်အံၤန့ၣ် (BGF)သုးဟီၣ်ကဝီၤ-၂ အခိၣ် သုးခိၣ်ကျၢၢ်ဖိ စီၤတ့ၤဝ့ စံးဝဲလၢ “ဖဲပှၤစး ထီၣ်ဒုးအိၣ်ထီၣ်(BGF)ဖဲ ၂၀၁၀ အခါန့ၣ် (BGF)သုးရ့ၣ်န့ၣ်အိၣ် ၁၃ ရ့ၣ်. လၢခံပကဆီတလဲက့ၤသးဆူ(KNA)ဘျီန့ၣ် ပမၤအါ ထီၣ်ပသုး ဂံၢ်ဘါအဃိ ခဲအံၤပသုးရ့ၣ်န့ၣ်အိၣ်ခဲလၢၥ်(၆၄)ဘ့ၣ်မီၤနီၤ. မ့မ့ၢ်လၢသုးနီၣ်ဂံၢ်တုၤလၢတနံၣ်အံၤန့ၣ်အိၣ်ဝဲ (၂၀၀၀၀)ဘျဲၣ် လံ. တၢ်အံၤတမ့ၢ်လၢတနံၣ်ဘျဲၣ်အတီၢ်ပူၤဘၣ်,ကန့ၢ်လၢ(၅)နံၣ်ဘျဲၣ်လံ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤ.
ဒ်န့ၣ်အသိးလၢ(BGF)အတၢ်အိၣ်ဆၢထၢၣ်လၢအနံၣ်(၁၀)ဘျဲၣ်အတီၢ်ပူၤအံၤ ကီၢ်ပယီၤပဒိၣ်အတၢ်ပၥ်ပနီၣ်အဝဲသ့ၣ်လၢ တၢ်ကရၢ ကရိလီၢ်ခၢၣ်သး(ဘျီၣ်ဒိၣ်)ပူၤလၢအဖိးသဲစးတအိၣ်ဘၣ်အဖီခိၣ် လၢကဖံးကမၤတၢ်အဂီၢ်တဒိးန့ၢ်ဘၣ်ဝဲတၢ်ခွဲးတၢ်ယၤလၢ လၢပှဲၤ ပှဲၤဘၣ် အဂ့ၢ်န့ၣ် သုးခိၣ်ကျၢၢ်ဖိ စီၤတ့ၤဝ့ စံးဘၣ်တ့ၢ်ဃၥ်ခ့ၣ်အဲးစံၣ် -ကညီတၢ်ကစီၣ်ဖဲအပူၤကွံၥ်နွံအခါဒ်အံၤန့ၣ်လီၤ.
“ပဝဲ(BGF)အံၤတမ့ၢ်လၢကီၢ်ပယီၤပဒိၣ်တပၥ်ပနီၣ်ပှၤလၢလီၢ်ခၢၣ်သး(ဘျီၣ်ဒိၣ်)အပူၤဘၣ်.ခီဖျိလၢထံကီၢ်တၢ်အိၣ်သးအဃိ ဒ်သိးဖီၣ်စုကဝဲၤတဖုအံၤသုတကဲထီၣ်တၢ်ဆှုၣ်တၢ်မဲ,တၢ်သုတထီဒါကဒါအဝဲသ့ၣ်အဂီၢ်တဂ့ၤန့ၣ်ဖူဘျ့ထီၣ်နခိၣ်ဒီးသိဒ်န့ၣ်လီၤ. တမ့ၢ်လၢအအဲၣ်နၤအသးအိၣ်နၤဘၣ်.လဲၤသးဒ်သိးလၢသူအီၣ်ဝဲမ့သ့န့ၣ်ကသူအီၣ်ဝဲလီၤ.အဝဲသ့ၣ်မ့လိၣ်ဘၣ်နၤန့ၣ် တဲနၤလၢ အဂ့ၤလီၤ.မ့တလိၣ်ဘၣ်နၤလၢၤဘၣ်န့ၣ်အအိးထီၣ်အလံၥ်တၢ်သိၣ်တၢ်သီဖးလဲၢ်တဘ့ၣ်န့ၣ်တဲဝဲလၢတၢ်လၢသုးန့ၣ်မၤမုၢ်ကျိၤဝဲၤကွၥ်တန့ၢ်ဘၣ်.မ့အိးထီၣ်အလံၥ်ဘျီတၢ်သိၣ်တၢ်သီအိၣ်ဒီဒူၣ်လီၤ”အဂ့ၢ်န့ၣ် စံးဝဲန့ၣ်လီၤ.
လၢတၢ်သ့ၣ်တဖၣ်အံၤအဖီခိၣ် စးထီၣ်ဖဲအပူၤကွံၥ်(၂၀၂၄)အခါန့ၣ် ဒ်သိးကအိၣ်ဆၢထၢၣ်လၢအကစၢ်ဒၣ်ဝဲတၢ်ပၢတၢ်ြပးအံၤအဂီၢ်ဒီး ဒီသဒၢလီၤက့ၤသးကန့ၢ်အဂီၢ် (BGF)တကပၤမၤအါထီၣ်ဝဲအသုးဂံၢ်ဘါ,တဟံတအီၣ်လၢၤလါလဲလၢသုးမီၤစိရိၤ အအိၣ်လၢၤဘၣ် အမဲၥ်ညါဂုၥ်ကျဲးစၢး အိၣ်ဆၢထၢၣ်က့ၤဝဲဒ်ကညီဒီကလုၥ်သုးမုၢ်ဒိၣ်-KNA အသိး ဘၣ်ဟဲအိၣ်ထီၣ်ဝဲဒ်အံၤအဂ့ၢ်န့ၣ် သ့ၣ်ညါဘၣ် န့ၣ်လီၤ.
ဘၣ်ဃးကညီသုးခိးကီၢ်ဆၢ(BGF/KNA)မၤအါထီၣ်အသုးဂံၢ်ဘါအဖီခိၣ်အံၤန့ၣ် ကညီသးစၢ် စီၤအဲလဘၢၣ်ခၠိၤ လၢအဟူးဂဲၤ လၢထံရူၢ်ကီၢ်သဲးတဂၤ ပဲၥ်ထံနီၤဖးဟ့ၣ်ထီၣ်အတၢ်ထံၣ်ဒ်အံၤန့ၣ်လီၤ.
“အဝဲသ့ၣ်န့ၣ်မ့ၢ်ဝဲဖီၣ်စုကဝဲၤကရူၢ်ကရၢအဃိကဘၣ်ဒီသဒၢလီၤအသးလီၤ.ဘၣ်မနုၤအဃိလဲၣ်တၢ်ပၢၢ်ဆၢကရူၢ်ဒုးလိၥ်သးဒီးသုးမီၤစိရိၤအဆၢကတီၢ်အံၤ အမ့တအိၣ်ကတီၤသးဘၣ်န့ၣ်ခဲကၢးတၢ်မ့ဟဲမၤတံၥ်တၥ်အဝဲန့ၣ်ကကဲထီၣ်တၢ်ဂ့ၢ်ကီလၢအဂီၢ်မီၤနီၤ. အဃိဒ်သိးတၢ်ကီတၢ်ခဲသုတဟဲဘၣ်အီၤတဂ့ၤအဂီၢ်န့ၣ်အဝဲစ့ၢ်ကီးဘၣ်သူၣ်ထီၣ်အတၢ်အိၣ်မူလီၤ.အဝဲသ့ၣ်န့ၣ်ကအိၣ်ဒီးအတၢ်သိၣ်တၢ်သီတၢ်ဘျၢလီၤ.တၢ်လၢ(BGF)န့ၣ်အပူၤကွံၥ်လၢညါဒီးခဲအံၤန့ၣ်အတၢ်အိၣ်ဆၢထၢၣ်တဒ်သိးလိၥ်အသးလၢၤဘၣ်.ခဲအံၤပကွၢ်လီၤဂၥ်လၢပှၤကူၣ်ဘၣ်ကူၣ်သ့ဟ့ၣ်ကူၣ်ဟ့ၣ်ဖးအဝဲသ့ၣ်ကအိၣ်မီၤ.အခီပညီပှၤမ့တပၥ်ပနီၣ်နၤဘၣ်ဆၣ်နကစၢ်ပၥ်ပနီၣ်လီၤနသးကသ့အဂီၢ်န့ၣ်နကဘၣ်ဂုၥ်ကျဲးစၢးအဆိကတၢၢ်လီၤ.အဃိ(BGF)န့ၣ်အိၣ်ဒီးတၢ်သိၣ်တၢ်သီတၢ်မၤရဲၣ်ကျဲၤလၢခါဆူညါကဘၣ်အိၣ်ဆၢထၢၣ်ဒ်လဲၣ်မီၤနီၤ”အဂ့ၢ်န့ၣ် စံးဝဲန့ၣ်လီၤ.
တကတီၢ်ဃီလၢ(BGF/KNA)အသုးဂံၢ်ဘါအါထီၣ်အံၤ ကဲထီၣ်တၢ်ဘၣ်ယိၣ်ဘၣ်ဘှီလၢကမျၢၢ်ထံဖိကီၢ်ဖိအဂီၢ်မ့ၢ်သ့ဝဲဒီး ဘၣ်ဆၣ် လၢ(BGF)ဒီး(KNLA)အဘၢၣ်စၢၤတၢ်ခးလိၥ်ကဒါသးတမ့ၢ်လၢအကဲထီၣ်ညီဝဲဘၣ်အဂ့ၢ်န့ၣ် စီၤအဲဘၢၣ်ခၠိၤ ပဲၥ်ထံနီၤဖးစံးအါထီၣ် ဝဲန့ၣ်လီၤ.
“(BGF)မၤအါထီၣ်သုးဒ်အံၤမ့မ့ၢ်ကမျၢၢ်ဒုတၢ်ဘၣ်ယိၣ်အိၣ်.အခီပညီဘၣ်ယိၣ်ဝဲလၢတၢ်ခးလိၥ်သးကကဲထီၣ်လၢကညီဖိကဒဲကဒဲ အဘၢၣ်စၢၤဒ်န့ၣ်သ့လီၤ.ဘၣ်ဆၣ်ယဆိကမိၣ်ဒုအဝဲသ့ၣ်ကက့ၤခးကဒါကညီကဒဲကဒဲဒုဟဲကဲထီၣ်တညီဘၣ်.မ့ဝံၤတၢ်လၢသုးန့ၣ်နမၤအါထီၣ်အနီၣ်ဂံၢ်မ့အါထဲၣ်လဲၣ်ဘၣ်ဆၣ်အကံၢ်အစီမ့တအိၣ်န့ၣ်အခီပညီတအိၣ်ဘၣ်.ပမ့က့ၤကွၢ်လၢပ(KNLA)န့ၣ်ပနီၣ်ဂံၢ်အိၣ်ဘၣ်ဆၣ်တၢ်ဂံၢ်စၢ်ဘါစၢ်ဒီးပှၤအိၣ်ဒီဒူၣ်လီၤ.ဘၣ်ဆၣ်ပတဒ်သိးဒီး(BGF)ဘၣ်မီၤနီၤ.ဝဲဒၣ်န့ၣ်ပဂဲၤဆၢထၢၣ်လၢပကပၢၢ်ဆၢတၢ်.အဝဲသ့ၣ်ခီန့ၣ်ဂဲၤဆၢထၢၣ်တဒ်သိးပှၤဘၣ်,အဝဲသ့ၣ်န့ၣ်ဘၣ်အိၣ်မူဒၣ်သ့သ့ဘၣ်ဘၣ်လၢတၢ်ခံခါအဘၢၣ်စၢၤအဃိဒ်သိးအိၣ်မူဝဲကသ့အဂီၢ်ဘၣ်မၤအါထီၣ်ဝဲအသုးဂံၢ်ဘါဒ်အံၤလီၤ”အဂ့ၢ်န့ၣ် စံးဝဲန့ၣ်လီၤ.
(BGF)ကရူၢ်အံၤလီၤဆီဒၣ်တၢ်သုးဟံန့ၢ်တၢ်စိတၢ်ကမီၤကဲထီၣ်ဝံၤလီၢ်ခံ တၢ်ကစီၣ်ဟးထီၣ်လၢအတၢ်ပၥ်ဖှိၣ် မၤသကိးတၢ်ဒီး သုးမီၤစိရိၤအိၣ်ဒီး ဒ်န့ၣ်အသိး တၢ်ခးလိၥ်သးကဲထီၣ်စ့ၢ်ကီးဝဲလၢ(BGF)ဒီး(KNLA)အိၣ်ဝဲ တလီၢ်လီၢ်န့ၣ်လီၤ. လၢတၢ်န့ၣ်အဃိ ဒ်သိး တၢ်သ့ၣ်တဖၣ်အံၤခါဆူညါသုတအိၣ်ထီၣ်လၢၤတဂ့ၤအဂီၢ်န့ၣ် လီၢ်ခံအံၤခံခီခံကပၤတၢ်ဖီခိၣ်ခိၣ်နၢ်တဲသကိးမၤဃူမၤဖိး တၢ်အိၣ်ဝဲ အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်န့ၣ်အသိးစးထီၣ်ဖဲ(BGF)ကအိၣ်ဆၢထၢၣ်က့ၤဒ်(KNA)လီၢ်ခံန့ၣ်စှၤနံၣ်အတီၢ်ပူၤအံၤ လီၤဆီဒၣ်တၢ်လၢလူၢ်ပျဲၢ်ကီၢ်ဆၣ်အပူၤ (BGF)ထၢသုးသီအိၣ်ထီၣ်ဝဲဖျိဖျိဖျါဖျါဒီး တကးဒံးဘၣ်ဖဲအပူၤကွံၥ်လါအီကူး ၁၅ သီအနံၤန့ၣ် လၢသုးဟီၣ်ကဝီၤ-၂ အပူၤ (BGF) မၤဝဲ ၁၉ ဝီတဝီ ဂံၢ်ခီၣ်ထံးသုးတၢ်မၤလိ ဒီး ဖဲန့ၣ်သုးသီစံၣ်လီၤဝဲတၢ်မၤလိ(၅၂၀)ဂၤဒံးန့ၣ်လီၤ.
