လါစဲးပထ့ဘၢၣ် ၂၉ သီ, ၂၀၂၅ နံၣ်, ခ့ၣ်အဲးစံၣ်
ဖဲထံလီၢ်ကီၢ်ပူၤတၢ်ဒုးတၢ်ယၤအကတီၢ်လၢဟီၣ်ကဝီၤပူၤတၢ်မုၥ်တၢ်ခုၣ်အဂီၢ် အဆိကတၢၢ်တဘျီ ကညီဖီၣ်စုကဝဲၤကရူၢ်ကရၢ ပၥ်ဖှိၣ်(၃)ဒူၣ်လၢအမ့ၢ် ကညီသုးခိးကီၢ်ဆၢ(BGF),ကညီတၢ်မုၥ်တၢ်ခုၣ်ကီၣ်ကးကရၢ(KNU/KNLA-PC)ဒီးတၢ်ဘၣ်ဘျုးဒံၣ်မိၣ် ခြ့ၣ်စံၣ်ကညီသုးမုၢ်ဒိၣ်(DKBA) မၤဝဲတၢ်တၢၣ်ပီၣ်တဲသကိးတခါလၢဖၣ်အၣ်ကီၢ်ရ့ၣ်(သုးက့ ၇)သ့ၣ်ကတံၥ် (BGF) သုးဟီၣ်ကဝီၤ-၂ တၢ်လီၢ်အံၤ ဖဲမဟါအနံၤန့ၣ်လီၤ.
တၢ်အိၣ်ဖှိၣ်လၢဘၣ်တၢ်မၤဝဲဖဲမဟါလါစဲးပထ့ဘၢၣ် ၂၈ သီအနံၤအံၤ ဘၣ်တၢ်စးထီၣ်မၤဝဲဖဲဂီၤခီ ၉း၀၀ နၣ်ရံၣ်တုၤဃီၤဝဲလၢဟါခီ ၄း၀၀ နၣ်ရံၣ် ဃၣ်ဃၣ်အဂ့ၢ်န့ၣ် ဖီၣ်စုကဝဲၤကရူၢ်ကရၢခိၣ်နၢ်လၢလဲၤထီၣ်တၢ်အိၣ်ဖှိၣ်အံၤတဖၣ်စံးဝဲအသိးသ့ၣ်ညါဘၣ်န့ၣ်လီၤ.
လၢတၢ်အိၣ်ဖှိၣ်ဘျီဝဲအံၤအပူၤန့ၣ် တၢ်တၢၣ်ပီၣ်တဲသကိးဝဲတၢ်ဂ့ၢ်ခိၣ်သ့ၣ်(၃)ထံၣ်လၢအမ့ၢ် တၢ်မုၥ်တၢ်ခုၣ်အဂ့ၢ်အကျိၤ, တၢ်ဃုထၢအဂ့ၢ်အကျိၤအမဲၥ်ညါ (BGF)ကအိၣ်ဆၢထၢၣ်က့ၤဒ်(KNA)တၢ်ဂ့ၢ်သ့ၣ်တဖၣ်အံၤ တၢ်တဲသကိး ဟ့ၣ်ထီၣ်သကိး ဝဲ တၢ်ထံၣ်သ့ၣ်တဖၣ် အဂ့ၢ်န့ၣ် ကရူၢ်ခိၣ်နၢ်ဘၣ်ထွဲတဖၣ်စံးဝဲန့ၣ်လီၤ.
ဘၣ်ဃးတၢ်ဂ့ၢ်အံၤ KNU/KNLA-PC သုးခိၣ်ဒိၣ်စိ စီၤကၠီၤညိၣ်လၢအလဲၤထီၣ်ဝဲတၢ်အိၣ်ဖှိၣ်အံၤစံးဝဲလၢ“ ခဲအံၤလၢပထံကီၢ် ဒီတဘ့ၣ်အပူၤန့ၣ်တၢ်ဒုးတၢ်ယၤဆူၣ်အကတီၢ်အံၤ တၢ်မုၥ်တၢ်ခုၣ် လၢပဂီၢ်တအိၣ်ဘၣ်.ဒ်န့ၣ်အသိးလၢကညီကီၢ်စဲၣ် အပူၤမ့ၢ်ဂ့ၤ, လၢပအိၣ်တၢ်လီၢ်တၢ်ကျဲအပူၤမ့ၢ်ဂ့ၤန့ၣ်ပဘၣ်သဂၢၢ်ဒီးတၢ်ဒုးတၢ်ယၤ လီၤ.အဃိန့ၣ်တၢ်အိၣ်ဖှိၣ်ပူၤန့ၣ်ပတဲသကိးဒ်သိးဟီၣ်ကဝီၤပူၤ တၢ်မုၥ်တၢ်ခုၣ်ကအိၣ်ထီၣ်အဂီၢ်န့ၣ်ပကမၤဒ်လဲၣ်,ပကဃုကျဲဒ်လဲၣ်သ့ၣ်တဖၣ်လီၤ.မ့ဝံၤဘၣ်ဃးလၢတၢ်ဃုထၢန့ၣ်လၢပကရူၢ်(၃)ဒူၣ်အံၤအဟီၣ်ကဝီၤတၢ်အိၣ်သးတဒ်သိးလိၥ်သးဘၣ်.လၢပဟီၣ်ကဝီၤပူၤန့ၣ် အိၣ်လၢတၢ်ဘၣ်ယိၣ်ပူၤအိၣ်တနီၤအဖီခိၣ်လၢ ကမျၢၢ်အဂီၢ် ပကမၤစၢၤအဝဲသ့ၣ်လၢကျဲဒ်လဲၣ်န့ၣ်ပတဲသကိးအီၤ.မ့ဝံၤဘၣ်ဃး BGF ကအိၣ်ဆၢထၢၣ်ဒ်(KNA)အံၤ ကရူၢ်(၃)ဒူၣ်အတၢ်ထံၣ်အိၣ်ဝဲဒ်လဲၣ်, ဒ်သိးကဟ့ၣ်ကူၣ်ဟ့ၣ်ဖးလိၥ်သးအဂီၢ်န့ၣ်ပတၢၣ်ပီၣ်တဲသကိးအီၤလၢ တၢ်အိၣ်ဖှိၣ်အပူၤလီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
တကးဒံးဘၣ်ဘၣ်ဃးတၢ်ဂ့ၢ်(၃)ထံၣ်လၢတၢ်တဲသကိးဝဲလၢတၢ်အိၣ်ဖှိၣ်အပူၤအံၤတဖၣ်တၢ်ဆၢတဲၥ်မနုၤသ့ၣ်တဖၣ်အိၣ်ထီၣ်ဝဲလဲၣ်န့ၣ် သုးခိၣ်ဒိၣ်စိ စီၤကၠီၤညိၣ် စံးအါထီၣ်ဝဲဒ်အံၤန့ၣ်လီၤ.
“ပမ့ဘၣ်တဲကညီဖီၣ်စုကဝဲၤကရူၢ်(၃)ဒူၣ်ထံၣ်လိၥ်သးတဘျီအံၤမ့ၢ်တၢ်အဆိကတၢၢ်လီၤ.အဃိဘၣ်ဃးလၢတၢ်အိၣ်ဖှိၣ်တၢ်ဖံးတၢ်မၤ အကျိၤအကွၥ်,ဘၣ်ဃးတၢ်ကွဲးနီၣ်ကွဲးဃါအိၣ်လၢလၢပှဲၤပှဲၤလီၤ.ဘၣ်ဆၣ်တၢ်ဆၢတဲၥ်လၢကအိၣ်ဖျါထီၣ်ချုးဆၢချုးကတီၢ်လၢတၢ်အိၣ်ဖှိၣ်ဝံၤခီန့ၣ်ပတၢ်ဂံၢ်စၢ်ဘါစၢ်အိၣ်လီၤ.အဃိပမ့တဲတီတီန့ၣ်ပအိၣ်ဒီးတၢ်နၢ်ပၢၢ်လိၥ်သးလၢတၢ်အိၣ်ဖှိၣ်အပူၤဒ်န့ၣ်လီၤ.လၢလံၥ်မဲၥ်ဖျၢၣ်တၢ်ဆၢတဲၥ်လီၤတံၢ်လီၤဆဲးကဖျါထီၣ်အဂီၢ်န့ၣ်ယဆိမိၣ်ကဘၣ်ဟံတၢ်ဆၢကတီၢ်ဒံးတသီခံသီဒံးမီၤနီၤ”အဂ့ၢ်န့ၣ် စံးဝဲန့ၣ် လီၤ.
လၢန့ၣ်အမဲၥ်ညါတကီၢ်ခါထံရူၢ်ကီၢ်သဲးတၢ်ဂ့ၢ်ကီလၢတၢ်ဘၣ်သဂၢၢ်ဝဲခဲအံၤသ့ၣ်တဖၣ် ဖီၣ်စုကဝဲၤကရူၢ်(၃)ဒူၣ်အံၤ ထံၣ်ဝဲလၢ တၢ်ြကၢးဃဲၣ်လီၤဘှါဆှဲအီၤလၢစီၤနီၢ်ခိၣ်အဂ့ၢ်န့ၣ် စီၤကၠီၤညိၣ် စံးဝဲန့ၣ်လီၤ.
လၢတၢ်မုၥ်တၢ်ခုၣ်အဂီၢ် တၢ်ထံၣ်လိၥ်တၢၣ်ပီၣ်တဲသကိးဘျီဝဲအံၤအပူၤန့ၣ် မ့တပၣ်ဃုၥ်ဝဲ(ခ့ၣ်အဲၣ်ယူၣ်) ကရၢမိၢ်ပှၢ်ဘၣ်ဆၣ် ထံၣ်ဘၣ်လၢခ့ၣ်အဲၣ်ယူၣ် ဒူပျၥ်ယၥ်ကီၢ်ရ့ၣ်ခိၣ်လီၢ်လံၤ ပဒိၣ်စီၤစွ့ၤမီ လဲၤထီၣ်ပၣ်ဃုၥ်ပၣ်ဂီၢ်ဝဲအိၣ်ဒီး ဘၣ်ဆၣ်အတၢ်ဟဲထီၣ်တၢၣ်ပီၣ်တဲသကိးတၢ်ဘျီဝဲအံၤတဟဲခီဖျိဝဲလၢခၢၣ်စးနီတဒူၣ်ဘၣ်မ့မ့ၢ်တခီဟဲဒၣ်ဒ်ခိၣ်နၢ်လီၢ်လံၤတဂၤ အသိးလီၤအဂ့ၢ်န့ၣ် ခိၣ်နၢ်လၢလဲၤထီၣ်တၢ်အိၣ်ဖှိၣ်တဖၣ် စံးဝဲန့ၣ်လီၤ.
လၢန့ၣ်အမဲၥ်ညါလၢတၢ်တၢၣ်ပီၣ်တဲသကိးအပူၤအံၤန့ၣ် (BGF/KNA)တကပၤ သုးခိၣ်ဒိၣ်စိ စီၤခၠ့ၣ်သူၤ,သုးခိၣ်ကျၢၢ်ဖိ စီၤတ့ၤဝ့, သုးခိၣ် စီၤမီၤဝ့, သုးခိၣ်စီၤမိၣ်သိၤ ဃုၥ်ဒီးခိၣ်နၢ်ဒိၣ်ထီလၢအဂၤ ဒီးလၢ(KNU/KNLA-PC)တကပၤန့ၣ် ကရၢခိၣ်-၂ ဒီကထၢၣ် နီၢ်ကပီၤထူ, သုးခိၣ်ဒိၣ်စိ စီၤကၠီၤညိၣ်ဃုၥ်ဒီး ခိၣ်နၢ်ဒိၣ်ထီၣ်လၢအဂၤဒီး မ့မ့ၢ်လၢ(DKBA)တကပၤန့ၣ် သုးရိၣ်မဲခိၣ်ကျၢၢ် သုးခိၣ်ကျၢၢ်ဒိၣ်စိ စီၤစတံ , သုးရိၣ်မဲခိၣ်ကျၢၢ်-၂ သုးခိၣ်ကျၢၢ်စိ စီၤစွ့ၤဝၣ်, သုးခိၣ်စီၤစ့ၤဝ့ ဃုၥ်ဒီးခိၣ်နၢ်ဒိၣ်ထီလၢအဂၤ ပၥ်ဖှိၣ်ခဲလၢၥ်အဂၤ(၄၀) ဃၣ်ဃၣ်လဲၤထီၣ်ဝဲတၢ်တၢၣ်ပီၣ်တဲသကိးဘျီဝဲအံၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်န့ၣ်အသိးလၢဟီၣ်ကဝီၤပူၤတၢ်မုၥ်တၢ်ခုၣ်အဂီၢ်ဖဲအပူၤကွံၥ်လါအီကူး ၁၈ သီအနံၤန့ၣ်စ့ၢ်ကီး လၢတီနီၢ်မုၢ်ထီၣ် (DKBA)သုးဝဲၤ လီၢ်ခိၣ်သ့ၣ် ဆိၣ်စံမၠဲၣ် ဟီၣ်ကဝီၤအပူၤန့ၣ် တၢ်ဘၣ်ဘျုုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)ဒီးကညီသုးခိးကီၢ်ဆၢ (BGF/KNA) ဖီၣ်စုကဝဲၤကရူၢ် ၂ ဒူၣ်အံၤမၤဝဲတၢ်ထံၣ်လိၥ်တၢၣ်ပီၣ်တဲသကိးတၢ်အိၣ်ဖှိၣ်တခါဒံးဒီး ဘၣ်ဆၣ်တၢ်အိၣ်ဖှိၣ် ဘျီဝဲ န့ၣ်အခါ (KNU/KNLA-PC)တပၣ်ဃုၥ်ဝဲဘၣ်န့ၣ်လီၤ.
ကညီဖီၣ်စုကဝဲၤကရူၢ်(၃)ဒူၣ်လၢအမၤဝဲတၢ်တၢၣ်ပီၣ်တဲသကိးလၢတၢ်မုၥ်တၢ်ခုၣ်အဂီၢ်အံၤ တၢ်ဃုထၢလၢသုးမီၤစိရိၤကမၤဝဲအံၤ ခီဖျိတၢ်အိၣ်သးအကလုၥ်ကလုၥ်အဃိတမ့ၢ်လၢအကဲထီၣ်လိၣ်ထီၣ်တညီဝဲဘၣ်အဂ့ၢ်န့ၣ်စံးဘၣ်တ့ၢ်ဃၥ် တၢ်ကစီၣ်သန့ တဖၣ် အိၣ်ဝဲဘၣ်ဆၣ် ဖဲအပူၤကွံၥ်တလါအံၤလါစဲးပထ့ဘၢၣ်ထီၣ်အံၤကရူၢ်တဖၣ်အံၤထုးထီၣ်ဝဲလံၥ်တၢ်ပၥ်သးလၢ ကဆီၣ်ထွဲ မၤစၢၤဝဲ သုးမီၤစိရိၤအဃုထၢအံၤဘၣ်ဟဲအိၣ်ထီၣ်ဝဲဒ်အံၤန့ၣ်လီၤ.
ဘၣ်ဆၣ်ဘၣ်ဃးတၢ်ဃုထၢဘျီဝဲအံၤန့ၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢဃုၥ်ဒီးဖီၣ်စုကဝဲၤကရူၢ်ကရၢလၢအထီဒါ သုးမီၤစိရိၤအံၤတဖၣ် တတူၢ်လိၥ်ဝဲဘၣ်အသိး တၢ်ဃုထၢအံၤလၢကဒုးထီထီၣ်ဝဲသုးမီၤစိရိၤအသး သမူအဃိ ကမျၢၢ်ထံဖိကီၢ်ဖိ တဘၣ်နုၥ်လီၤပၣ်ဃုၥ်ပၣ်ဂီၢ်လၢတၢ်ဃုထၢဘျီဝဲအံၤအပူၤဘၣ်အဂ့ၢ်န့ၣ် ထုးထီၣ်ပၥ်ဖျါဟ့ၣ်ပလီၢ်ဝဲအိၣ်န့ၣ်လီၤ.
