လါဒံၣ်စ့ဘၢၣ် ၂၉ သီ, ၂၀၂၅ နံၣ်, ခ့ၣ်အဲးစံၣ်
တၢ်ဃုထၢလၢသုးမီၤစိရိၤမၤဝဲအဆိကတၢၢ်တဝီဖဲမဟါလါဒံၣ်စ့ဘၢၣ် ၂၈ သီလၢအတအိၣ်ဒီးကမျၢၢ်အတၢ်အဲၣ် ဒိးဘၣ်အံၤ ပှၤလၢတဟ့ၣ်တၢ်ဖးဘၣ်တဖၣ် သုးမီၤစိရိၤစုတီၤဖီလၥ်အပှၤတဖၣ်တဲပျံၤဝဲလၢကဘၣ်ကဲသုးအဂ့ၢ်န့ၣ် လီၢ်ကဝီၤပှၤဘၣ်မူ ဘၣ်ဒါလၢအိၣ်ဘူးတၢ်ဃုထၢအံၤတဖၣ်စံးဝဲန့ၣ်လီၤ.
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁) ဖၣ်အၣ်ကီၢ်ဆၣ် ဒူသဝီတနီၤအပူၤ ဖဲမဟါသုးမီၤစိရိၤမၤတၢ်ဃုထၢအခါ ခီဖျိလၢ တၢ်မၤပျံၤမၤဖုး,တၢ်တသ့တဘၣ်တၢ်အိၣ်သးအကလုၥ်ကလုၥ်အဃိ ဒူသဝီကမျၢၢ်ဘၣ်လဲၤဟ့ၣ်ဝဲ တၢ်ဖးဒီး ဘၣ်ဆၣ်ပှၤလၢ တလဲၤဟ့ၣ်တၢ်ဖးဘၣ်တဖၣ်တၢ်လဲၤဟ့ၣ်ဝဲတၢ်ဖးနီၣ်ဂံၢ်တုၤလၢဟံၣ်ခီၣ်ထံးအသိး တဲပျံၤစ့ၢ်ကီးဝဲန့ၣ်လီၤ.
ဘၣ်ဃးတၢ်ဂ့ၢ်အံၤ ဟီၣ်ကဝီၤ KNLA ပှၤဘၣ်မူဘၣ်ဒါလၢတအဲၣ်ဒိးပၥ်ဖျါအမံၤတဂၤ စံးဝဲလၢ “ဒ်ကမျၢၢ်ပၥ်ဖျါဝဲအသိးန့ၣ် အဝဲသ့ၣ် အိၣ်ဒၣ်မၢန့ၢ်ဆူၣ်ပှၤကမျၢၢ်တဖၣ်လီၤ.ဒ်သိးမဲၢ်ကရီသဝီန့ၣ် အဟးလူၤဟ့ၣ်ဝဲမဲ(တၢ်ဖး)နီၣ်ဂံၢ်တုၤလၢအဟံၣ်ညါ, တလဲၤဟ့ၣ်ဘၣ် န့ၣ်တသ့ဘၣ်.အထၢနုၥ်ဃၥ်ဝဲပှၤမၣ်ပိၤတ့ၤနီၣ်ဂံၢ်ခဲလၢၥ်လီၤ.ပှၤမ့တလဲၤဟ့ၣ်တၢ်ဖးဘၣ် န့ၣ်တဲဝဲလၢပှၤကဘၣ် လဲၤကဲသုးဒ်န့ၣ် မီၤနီၤ. အဃိန့ၣ်ပှၤပျံၤတၢ်ဒုပှၤလဲၤဟ့ၣ်ဝဲန့ၣ်.မ့ဝံၤပှၤပံၥ်ဃၥ်ကျဲ,ပှၤဟ့ၣ်တၢ်ဖးမ့တဝံၤဘၣ်န့ၣ်တအိးထီၣ်န့ၢ်ပှၤလၢ တၢ်ချၢဘၣ်. ” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲမဟါတၢ်ဃုထၢဝံၤအခါန့ၣ်လီၤ.
ဖၣ်အၣ်ကီၢ်ဆၣ် ဒူသဝီတၢ်လီၢ်လၢသုးမီၤစိရိၤစုတီၤဖီလၥ်(DKBA)ဟူးဂဲၤဝဲန့ၢ်တဖၣ်အပူၤ စးထီၣ်ဖဲ ၂၅ သီအနံၤ လၢတၢ်ဃုထၢ အဂီၢ် လၢတၢ်တပၥ်သူၣ်ပၥ်သးအပူၤ ပယီၤသုးဟဲထီၣ်ဝဲသတူၢ်ကလၥ်ဒီးဆီလီၤဝဲတၢ်ဖးလီၢ်(၇)ခါလၢ နီဖးဒိၣ်ကရူၢ်, မဲၢ်ကရီကရူၢ်, ခဲတီၣ်ကရူၢ် ဒူသဝီပူၤဝံၤဖဲမဟါအနံၤန့ၣ်မၤဝဲတၢ်ဃုထၢဘၣ်ဟဲကဲထီၣ်ဝဲဒ်အံၤအဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါ စံးဝဲန့ၣ်လီၤ.
တကးဒံးဘၣ်ဖဲအဝဲသ့ၣ်ဟဲဆီလီၤတၢ်ဖးလီၢ်အခိၣ်အဃၢၤန့ၣ်ဟီၣ်ကဝီၤ(KNLA)သုးရ့ၣ်-၁ အပှၤဟူးဂဲၤဝဲအိၣ်အဃိ လၢတၢ်ဘံၣ် တၢ်ဘၢအဂီၢ် ကိးမၢဝဲဒူသဝီပှၤဘၣ်မူဘၣ်ဒါလဲၤအိၣ်ခိးမံဝဲတၢ်ဖးလီၢ်အသိး ဖဲတၢ်ဃုထၢတနံၤန့ၣ်(DKBA)တကပၤပံးဃၥ်တြဲၤ တပျဲကမျၢၢ်ဟးထီၣ်ဝဲဘၣ်အဂ့ၢ်န့ၣ် ဂံၢ်ခီၣ်ထံးပှၤဟ့ၣ်တၢ်ကစီၣ်ဖိစံးဝဲအသိး သ့ၣ်ညါဘၣ် န့ၣ်လီၤ.
ဒ်န့ၣ်အသိးသထူၣ်ဝ့ၢ်စ့ၢ်ကီး ဒူသဝီလၢအိၣ်ကျဲမုၢ်ဖးဒိၣ်အဃၢၤတဖၣ် ဖဲအပူၤကွံၥ်ဘူးထီၣ်လၢတၢ်ဃုထၢအခါန့ၣ် သုးမီၤစိရိၤအပှၤ ဟးကရၢကရိဝဲကမျၢၢ်လၢကဟ့ၣ်တၢ်ဖးအိၣ်အသိး ကမျၢၢ်လၢအလဲၤအိၣ်လၢစံၥ်ဒဲတၢ်ဖံးတၢ်မၤကျီးပူၤ တဖၣ် စ့ၢ်ကီးလၢကဟ့ၣ် တၢ်ဖးအဂီၢ် လဲၤဟ့ၣ်ဝဲတၢ်လိမုၢ်(စိၤလၤ),ဘဲးထရံၤတၢ်ဆီၣ်မၤစၢၤအိၣ်ဝဲအဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါလၢအိၣ်ဘူးဖဲန့ၣ် တဂၤ စ့ၢ်ကီး စံးဝဲန့ၣ်လီၤ.
“ပှၤအိၣ်လၢပျီ ပူၤန့ၣ်တဲဝဲလၢသုးမီၤစိရိၤအပှၤဟဲက့ၤဝဲတၢ်လိမုၢ်,ဘဲးထရံၤသ့ၣ်တဖၣ်မီၤ မၢပှၤလဲၤဟ့ၣ်မဲ. ဒ်သိးအဟးလူၤစံယိ (ဟးကရၢကရိ)ဝဲန့ၣ်.ဖဲပ အိၣ်ဒုအမၤတၢ်ဃုထၢတတုၤဘၣ်.အလဲၤဟ့ၣ်ဝဲလၢစံၥ်ပူၤ ဒဲပှၤလဲၤအိၣ်န့ၣ်.တဲဝဲလၢဖဲပှၤဟ့ၣ် တၢ်ဖးတနံၤန့ၣ် လဲၤထၢနုၥ်တၢ်ဖး နီၤ တဲဝဲဒ်န့ၣ်”အဂ့ၢ်န့ၣ် စံးစ့ၢ်ကီးဝဲန့ၣ်လီၤ.
တၢ်ဃုထၢလၢသုးမီၤစိရိၤမၤဝဲလၢတအိၣ်ဒီးထံဖိကီၢ်ဖိကမျၢၢ်အတၢ်အဲၣ်ဒိးဘၣ်အံၤ တချုး ၂၈ သီ သုးမီၤစိရိၤမၤဝဲဒံးဘၣ် စှၤကိၥ်သီန့ၣ် ခ့ၣ်အဲၣ်ယူၣ် ဒူသထူၣ်ကီၢ်ရ့ၣ် ဖၣ်အၣ်ကီၢ်ဆၣ်ဒီးကၠဲးထိၣ်ကီၢ်ဆၣ်,ဘံလ့ကီၢ်ဆၣ်,သထူၣ်ကီၢ်ဆၣ်ဒီး မုၢ်တြီၢ်ကီၢ်ရ့ၣ်(သုးက့ ၅) ဒွဲၣ်လိကီၢ်ဆၣ်,ဘုသိၣ်ကီၢ်ဆၣ် ဒီး ဘျံးဒဝဲၢ်ကီၢ်ရ့ၣ်(သုးက့ ၄)ကစၢၢ်ဒိၣ်ကီၢ်ဆၣ်ပူၤကမျၢၢ်ထံဖိကီၢ်ဖိလၢ အကထိပၥ်ဖှိၣ်ထီၣ်သး မၤဝဲ တၢ်ပၥ်ဖျါထီၣ်တၢ်ဘၣ်သးတၢ်ရဲၣ်တၢ်ကျဲၤလၢဟီၣ်ကဝီၤဘၣ်ထွဲအပူၤဒံးန့ၣ်လီၤ.
ခ့ၣ်အဲၣ်ယူၣ် ကီၢ်ရ့ၣ်/သုးက့ဟီၣ်ကဝီၤအပူၤ ၂၀၂၁ သုးဟံန့ၢ်တၢ်စိတၢ်ကမီၤဝံၤလီၢ်ခံ ခီဖျိသုးမီၤစိရိၤဘၣ်ဟ့ၣ်ဆှူကွံၥ်အသုးက လၢၤ,တၢ်ပၢတၢ်ြပးအါအါဂီၢ်ဂီၢ်အဃိ ဒူသဝီတၢ်လီၢ်တနီၤအပူၤစ့ၢ်ကီးမၤဝဲတၢ်ဃုထၢတကဲ ထီၣ်ဝဲဘၣ်အဂ့ၢ်န့ၣ် သုးမီၤစိရိၤ ဘိးဘၣ် ရၤလီၤဝဲအိၣ်န့ၣ်လီၤ.
ဒ်သုးမီၤစိရိၤထုးထီၣ်ပၥ်ဖျါထီၣ်ဝဲအသိးန့ၣ် ကီၢ်ပယီၤအပူၤတၢ်ကမၤဝဲတၢ်ဃုထၢ ၃ ပတီၢ်ဒီး တၢ်ဃုထၢဖဲမဟါတၢတပတီၢ်န့ၣ် ဘၣ်တၢ်မၤဝဲလၢ ကီၢ်ဆၣ်(၁၀၂)ဘ့ၣ်အပူၤ ဒီး တၢ်ဃုထၢခံပတီၢ်တပတီၢ်,သၢပတီၢ်တပတီၢ်လၢအအိၣ်တ့ၢ်ဒံးအံၤ တၢ်ကဆဲးမၤ ဝဲဖဲလါလၢကဟဲ ၂၀၂၆ နံၣ်ထီၣ်လါယနူၤအါရံၤ ၁၁ သီ ဒီး ၂၅ သီ အနံၤန့ၣ်လီၤ.
