လါနိၣ်ဝ့ဘၢၣ် ၆ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူပျၥ်ယၥ်ကီၢ်ရ့ၣ်(သုးက့ ၆)ကီးတရံးကီၢ်ဆၣ် ဒီး ဖၣ်အၣ်ကီၢ်ရ့ၣ်(သုးက့ ၇)တန့ခၠါကီၢ်ဆၣ် ဒူသဝီအပူၤ ကမျၢၢ်ပှၤလီၢ် အိၣ်ကဒုဖိလၢအက့ၤဆူဟံၣ်တဖၣ်ယီၢ်ဘၣ်ဟီၣ်လၥ်မ့ၣ်ပိၢ်ဟဲအါထီၣ်ဝဲအဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါစံးဝဲ အသိး သ့ၣ်ညါဘၣ် န့ၣ်လီၤ.
ကီးတရံးကီၢ်ဆၣ် ယီၢ်ကိၥ်ကရူၢ်ဒီး တန့ခၠါကီၢ်ဆၣ်ထံဖိစီကရူၢ်အပူၤ ဖဲအပူၤကွံၥ်လါအီး ကထိဘၢၣ်ဒီး တလါအံၤလါအိၣ်ဝ့ဘၢၣ် ထီၣ် အံၤန့ၣ် ခီဖျိဟီၣ်ကဝီၤတၢ်ဒုးတၢ်ယၤတၢ်အိၣ်သးအံၤအဃိလီၢ်ကဝီၤကမျၢၢ်လၢအဃ့ၢ်ထီၣ်တဖၣ် ဖဲအဝဲသ့ၣ်က့ၤကွၢ်အဟံၣ်အဃီ အခါယီၢ်ဘၣ်ဝဲဟီၣ်လၥ်မ့ၣ်ပိၢ်တစှၤန့ၢ် (၅)ဂၤအဂ့ၢ်န့ၣ် ဆူၣ်ချ့ပှၤမၤတၢ်ဖိတဖၣ် စံးဝဲန့ၣ်လီၤ.
ပယီၤသုးအံၤလၢကထီၣ်ဒိၣ်စိက့ၤဝဲတီနီၢ်ကျဲလီၢ်လံၤအံၤအဂီၢ် ဖဲအပူၤကွံၥ်လါအီးကထိဘၢၣ်အခါန့ၣ် ပယီၤသုးကျိၤဟဲထီၣ်ဝဲ လၢမၠၣ်ပတဲၤ,ထံဖိစီကျဲ ဒီး ယီၣ်ကိၥ်,ကၠီၤစှၤကိ,အီၣ်ဘိၤတဲကျဲအံၤဝံၤဒိးလီၤဃၥ်ဝဲဟီၣ်လၥ်မ့ၣ်ပိၢ်အဃိ သဝီဖိတဖၣ်ဘၣ်ယီၢ်ဘၣ်ဝဲ မ့ၣ်ပိၢ်ဟဲကဲထီၣ်ဝဲဒ်အံၤလီၤအဂ့ၢ်န့ၣ် ဆူၣ်ချ့ပှၤမၤတၢ်ဖိတဂၤ စံးဝဲဒ်အံၤန့ၣ်လီၤ.
“လၢခၠီဖၠါ,မၠၣ်ပတဲၤ,ကီၣ်ဖၤရၣ်,နီၤမံၣ်,ထံဖိစီသဝီတကပၤန့ၣ် ပှၤသဝီဖိယီၢ်ဘၣ်မ့ၣ်ပိၢ်ကအိၣ်လၢ(၃)ဂၤ,(၄)ဂၤညါ. လၢကဟဲကူစါယါ ဘျါအသးဒီးပ(ခ့ၣ်အဲၣ်ယူၣ်)ဆူချ့ဝဲၤကျိၤလီၢ်အံၤဒုတထံၣ်ဟဲတုၤအိၣ်ဘၣ်.လၢယီၢ်ကိၥ်,မံၣ်ဖးလဲၢ်အံၤ ဖဲလါအီးကထိဘၢၣ် ၁၅ သီ အနံၤန့ၣ် လဲၤစ့(လှိုင်စိမ်း)သဝီဖိတဂၤ ဖဲအက့ၤကွၢ်အဟံၣ်လၢအသဝီအခါန့ၣ်အယီၢ်ဘၣ်မ့ၣ်ပိၢ်ဖဲအဟံၣ်ကရၢၢ်ပူၤအဃိ အခီၣ်တူၥ်ကွံၥ် တကပၤ. အမံၤလၢစီၤဖါသီဒံၣ် အသးနံၣ်အိၣ်(၃၃)နံၣ်. ဖဲတလါအံၤန့ၣ်ပှၤယီၢ်ဘၣ်မ့ၣ်ပိၢ်အိၣ်လၢ(၅)ဂၤလံ.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
တကးဒံးဘၣ်လၢန့ၣ်အမဲၥ်ညါ ခီဖျိလၢပယီၤသုးအံၤသူဝဲဒြိ,ကျိဖးဒိၣ်တကးဒံးဘၣ်ဟဲခးလီၤတၢ်ဒီးကဘီယူၤအံၤအဃိ လီၢ်ကဝီၤကမျၢၢ် ဘၣ်ဒိဘၣ်ထံးဆဲးအိၣ်ဝဲအဂ့ၢ်န့ၣ် (KNLA)သုးပၥ်ဖှိၣ်အပှၤတဂၤ စံးစ့ၢ်ကီးဝဲဒ်အံၤန့ၣ်လီၤ.
အဝဲစံးဝဲလၢ“ဖဲလါနိၣ်ဝ့ဘၢၣ် ၁ သီအခါန့ၣ် ကဘီယူၤဟဲခးလီၤတၢ်လီၤတဲၥ်လၢ နီၤကဲ(နောင်ကိုင်း)သဝီပူၤ ဆူၣ်ချ့ကသံၣ်ဒၢးကပၤန့ၣ်. မ့ၣ်ပိၢ်အက့အခီဘၣ်ပှၤသဝီဖိအိၣ်.မ့မ့ၢ်ကသံၣ်ဒၢးဒုဘၣ်ဒိဘၣ်ထံးဟးဂူၥ်ဟးဂီၤအိၣ်တစဲး.မ့မ့ၢ်လၢထံဖိစီသဝီတကပၤန့ၣ်ဒု ပှၤဟံၣ်ပှၤဃီ,ကၠိ,သီခါဖၠၣ်,တၢ်ဘါယွၤသရိၥ်တဖၣ်ဒုဟးဂီၤလၢၥ်လံ.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ကီးတရံးဟီၣ်ကဝီၤအပူၤ ဘူးဒးကညီသုးမုၢ်ဒိၣ်(DKBA),သုးခိးကီၢ်ဆၢ(BGF)ဒီးပယီၤသုးပၥ်ဖှိၣ်ထီၣ်သးသုးဂံၢ်ဘါအဂၤ (၁၀၀၀)ဃၣ်ဃၣ် နီၤဖးလီၤသုးကျိၤ(၃)ဘိဟူးဂဲၤဝဲဒၣ်န့ၣ်လီၤ. ဒ်န့ၣ်အသိးလၢနါကီၣ်တ့(နန်းကော့တေး)တၢ်သွၣ်ခိၣ်ဒီး ထံဖိစီ, မံၣ်ဖးလဲၢ်,ယီၣ်ကိၥ်, မၠၣ်ပတဲၤ,နီၤထပၤ(နောင်ထပ္ပံ)သဝီကတဲဖးဒ့တကပၤန့ၣ် ခီဖျိတၢ်ဒိးလီၤဃၥ်စ့ၢ်ကီးမ့ၣ်ပိၢ်အိၣ်အဃိ ဆူၣ်ချ့ပှၤမၤတၢ်ဖိဒီးတၢ်ပၢၢ်ဆၢ ကရူၢ် ကရၢတဖၣ်ဟ့ၣ်ပလီၢ်ဝဲကမျၢၢ်လၢကလ့ၢ်ထီၣ်လ့ၢ်လိၤလၢတၢ်ပလီၢ်ပဒီအပူၤအိၣ်ဝဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
