လါနိၣ်ဝ့ဘၢၣ် ၆သီ, ၂၀၂၅နံၣ်, ခ့ၣ်အဲးစံၣ်.
ကီၢ်ပယီၤ,ကီၢ်ကၠီၣ်တဲၣ်ကီၢ်ဆၢ တး(ခ်)ကီၢ်ရ့ၣ်, အူးဖၣ်ကီၢ်ဆၣ် တၢ်ပၢ အူးပၠၣ်ကညီဘၣ်ကီဘၣ်ခဲဒဲကဝီၤ,ဖဲအပူၤကွံၥ်လါနိၣ်ဝ့ဘၢၣ်(၃)သီအနံၤန့ၣ် တၢ်မၤကစၢ်စးထီၣ်ဟဲကိးဝဲပှၤမၤတၢ်ဖိလၢဒဲကဝီၤပူၤဒီးဖဲတနံၤအံၤန့ၣ်မၤလီၤတံၢ်က့ၤဝဲဒၣ်စရီအဂ့ၢ် သ့ၣ်ညါဘၣ်လၢ အူးပၠၣ်ဒဲကဝီၤအပှၤဘၣ်မူဘၣ်ဒါအအိၣ်န့ၣ်လီၤ.
တၢ်ဟဲကိးပှၤမၤတၢ်ခဲအံၤန့ၣ် ကဘၣ်လဲၤမၤတၢ်လၢကထံကျိးဒီးသ့ၣ်ခိၣ်လိၣ်ဘၣ် ပှၤမၤတၢ်ဖိ(၃၀၀၀)ဂၤ,ဒီးဖဲတနံၤအံၤ(၆)သီအနံၤအံၤန့ၣ်ပှၤဟဲတီၣ်ထီစရီအိၣ်ထဲ(၃၉)ဂၤလီၤအဂ့ၢ် အူးပၠၣ်ဒဲကဝီၤခိၣ်စၢၤ စီၤနံၤဒိၣ် စံးဘၣ်ဝဲခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤ.
အဝဲစံးဝဲလၢ“တၢ်မၤလၢကထံကျိးဒီးအဝဲသ့ၣ်တလဲၤဘၣ်နီတဘျီဘၣ်အဃိန့ၣ်အဝဲသ့ၣ်တၢ်ဘၣ်ယိၣ်ဘၣ်ဘှီအိၣ်ဧါတသ့ၣ်ညါဘၣ်.ပှၤဃ့ထီၣ်စရီအခီၣ်ထံးန့ၣ်အိၣ်အဂၤ(၄၀)ဘျဲၣ်,ဖဲတနံၤတၢ်မၤလီၤတံၢ်က့ၤစရီဒီးအိၣ်က့ၤထဲ(၃၉)ဂၤန့ၣ်လီၤ.အလီကီဝဲပှၤအဂၤ(၃၀၀၀)ဘၣ်ဆၣ်ခဲခဲအံၤန့ၣ်ပမၤန့ၣ်အဝဲသ့ၣ်ကန့ၢ်ထဲအံၤလီၤ.ပှၤဒဲကဝီၤဖိတနီၤနီၤန့ၣ်လဲၤတၢ်ဖဲတၢ်ကပိၤကပၤဖဲအံၤအတၢ်မၤအိၣ်လီၤ.လဲၤလၢဂီၤဟဲက့ၤလၢဟါအဃိန့ၣ်မၤဝဲဒၣ်တၢ်မၤဝဲအံၤန့ၣ်လီၤ.တနီၤနီၤထံၣ်ဝဲဒၣ်လၢမ့ၢ်လဲၤမၤတၢ်လၢန့ၣ် န့ၣ်ကဘၣ်အိၣ်ယံၤဒီးဟံၣ်ဖိဃီဖိလွံၢ်လါ,ယဲၢ်လါလၢအနံၣ်အဃိန့ၣ်မ့ၢ်ဒ်န့ၣ်ဧါတသ့ၣ်ညါဘၣ်.ပဝဲပဟ့ၣ်ဂံၢ်ဟ့ၣ်ဘါပဒဲကဝီၤဖိလီၤ.ဘၣ်ခိးကွၢ်လၢပှၤကလဲၤတၢ်တၢတဒူၣ်အံၤတၢ်အိၣ်သးမ့ၢ်ဂ့ၤန့ၣ်တၢ်ပိၥ်ထွဲထီၣ်အခံလၢကလဲၤအါထီၣ်န့ၣ်ကအိၣ်လီၤ.”အဂ့ၢ်စံးဝဲဒၣ်န့ၣ်လီၤ.
ခါလၢကဟဲ(၇)သီအနံၤန့ၣ်ပှၤလၢတီၣ်ထီၣ်ပၥ်မံၤစရီသ့ၣ်တဖၣ်ကဘၣ်လဲၤမၤကွၢ်ဝဲတၢ်အိၣ်ဆူၣ်အိၣ်ချ့ဒီး မ့ၢ်ဖျိန့ၣ် သ့ၣ်ခိၣ်ကလဲၤကိးအဝဲသ့ၣ်တဘျီဃီလီၤအဂ့ၢ် တံနံၤဒိၣ်တဲအါထီၣ်ဝဲဒၣ်စ့ၢ်ကီးန့ၣ်လီၤ.
ကထံကျိးတၢ်မၤအံၤကဘၣ်မၤဝဲလၢလွံၢ်လါအတီၢ်ပူၤဒီး ကျီဝဲမ့ၢ်န့ၣ် (၁)တၣ်(Ton) န့ၣ်ကဒိးန့ၢ်ဘၣ်ဝဲလၢစ့ယိၤ(၂၅၀)ဘးဒီး ကထံတၢ်မၤမ့ၢ်ဝံၤမ့ၢ်အဲၣ်ဒိးဆဲးမၤတၢ်မၤဆူညါ,အဲၣ်ဒိးမၤတၢ်မၤလၢအဂၤန့ၣ်မၤဝဲဒၣ်သ့ဒီးကထံကျိးတၢ်မၤလီၢ်အံၤအိၣ်ဝဲဒၣ်လၢ ကီၢ်ကၠီၣ်တဲၣ်(စၤမ်ကဲၣ်ယီၣ်ကီၢ်ရ့ၣ်)တကပၤအဂ့ၢ်သ့ၣ်ညါဘၣ်န့ၣ်လီၤ.
အူးပၠၣ်ဒဲကဝီၤဖိတဂၤစံးဝဲဒၣ်လၢ“ပကတဲဒ်လဲၣ်,အူးပၠၣ်အံၤဖဲ (မဲၣ်ကီးနွဲၣ်),(မဲၣ်ကီးယဲၤ)မိသဝီ န့ၣ်တၢ်မၤအိၣ်,မ့ၢ်တအိၣ်ထီဘိဘၣ် ဘၣ်ဆၣ်သနၥ်က့ တဒိၣ်တဆံးန့ၣ်အိၣ်လီၤ.လၢမဲၣ်ကလီခံတကပၤစ့ၢ်ကီးပှၤလဲၤလီၤဘိးဘုခံအိၣ်ဝဲဒၣ်န့ၣ်လီၤ.အခဲအံၤဝဲသ့ၣ်ဟဲကိးပှၤန့ၣ် ပှၤအိၣ်ခိးအိၣ်ခိး အိၣ်ခိးတကဲလၢၤဘၣ်အဃိန့ၣ် ပှၤလဲၤဘိးက့ၤဘုခ့အိၣ်တနီၤ,ပှၤလဲၤမၤတၢ်မၤလၢအဂၤအိၣ်တနီၤန့ၣ်လီၤ.”အဂ့ၢ်စံးဝဲဒၣ်န့ၣ်လီၤ.
အူးပၠၣ်ဒဲကဝီၤပူၤအံၤန့ၣ် တကီၢ်ခါခဲအံၤ ပှၤဒဲကဝီၤဖိအိၣ်ကဒုသး အိၣ်ဒံးဝဲအဂၤ(၁၀၉၀၀)ဘျဲၣ်အဂ့ၢ်သ့ၣ်ညါဘၣ်လၢဒဲကဝီၤအပှၤဘၣ်မူဘၣ်ဒါအတၢ်မၤနီၣ်စရီပူၤအိၣ်ဝဲဒၣ်အသိးန့ၣ်လီၤ.
တကီၢ်ခါခဲအံၤန့ၣ် ဘၣ်ကီဘၣ်ခဲဒဲကဝီၤဒ်အမ့ၢ် နိၣ်ဖိ,အူးပၠၣ်,မဲၢ်လး,မဲၢ်ရၤမိၢ်,မဲၢ်လးအူး,ထါမ်ဟ့ၣ်,ဘါဒီၣ်ယါ ဒဲကဝီၤသ့ၣ်တဖၣ်အံၤ ကီၢ်ကၠီၣ်တဲၣ်သ့ၣ်ခိၣ်တဖၣ်နုၥ်လီၤကိးဝဲဒၣ်ပှၤမၤတၢ်ဖိလၢဒဲကဝီၤကိးဘ့ၣ်ဒဲးအပူၤဃၣ်ဃၣ်အဂ့ၢ်သ့ၣ်ညါဘၣ်လၢဒဲကဝီၤပှၤဘၣ်မူဘၣ်ဒါအအိၣ်န့ၣ်လီၤ.
