လါဒံၣ်စ့ဘၢၣ် ၁၆ သီ, ၂၀၂၅ နံၣ်, ခ့ၣ်အဲးစံၣ်
ကညီတၢ်မုၥ်တၢ်ခုၣ်ကီၣ်ကးကရၢ(KNU/KNLA-PC)ကညီဖီၣ်စုကဝဲၤကရူၢ်တဖုလၢအမံၤဟးထီၣ်လၢအတၢ်ပၣ်ဃုၥ်ပၣ်ဂီၢ် အိၣ်ဝဲဒီး(ကၠါဖၠၣ်)တၢ်လံၣ်အီၣ်လီအီၣ်တၢ်ဖံးတၢ်မၤအပူၤအံၤ ကရူၢ်ကရၢဖိလၢအမၤဘၣ်ထွဲသးဒီးတၢ်ဖံးတၢ်မၤအံၤတဖၣ် ကဟံဝဲဂ့ၢ်ဝီအဂ့ၢ်န့ၣ် ကရူၢ်အံၤပှၤဘၣ်မူဘၣ်ဒါ စံးဝဲ န့ၣ်လီၤ.
စးထီၣ်ဖဲတၢ်ကစီၣ်ဟးထီၣ်လၢ(PC)ပၣ်ဃုၥ်ပၣ်ဂီၢ်စိၥ်ဆှၢဝဲတရူး(ကၠါဖၠၣ်)အိၣ်ထီၣ်ဝံၤလီၢ်ခံ ဖဲတလၢကွံၥ်အသီ ၂၀ ဘျဲၣ်ဃၣ်ဃၣ် အခါန့ၣ် တၢ်မၤဝဲတၢ်အိၣ်ဖှိၣ်တခါဒီးလၢတၢ်အိၣ်ဖှိၣ်အပူၤ ဒ်သိးခါဆူမဲၥ်ညါတၢ်ပၣ်ဃုၥ်ပၣ်ဂီၢ်သုတအိၣ်လၢၤတဂ့ၤအဂီၢ် သုးရ့ၣ်, သုးထံးကရူၢ်ကရၢဖိလၢအမၤဘၣ်ထွဲသးလၢတၢ်ဖံးတၢ်မၤပူၤအံၤတဖၣ်ကဟံဝဲဂ့ၢ်ဝီတုၤလီၤတီၤလီၤအဂ့ၢ်န့ၣ် PC ပှၤကတိၤတၢ်ပၢ သုးခိၣ်ဒိၣ်စိ စီၤကၠီၤညိၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲမဟါအနံၤန့ၣ်လီၤ.
“မ့ဘၣ်တဲန့ၣ်စးထီၣ်လၢကီးတရံး, နွါခၠၤကိတကပၤ တၢ်ပၢၢ်ဆၢဖိဖီၣ်ပှၤဆှၢတရူးအခါတၢ်တဘျီန့ၣ်(PC)အပှၤပၣ်န့ၣ်အမ့ၢ်လီၤ. ဘၣ်ဆၣ်ပှၤလၢအဆှၢတၢ်သ့ၣ်တဖၣ်န့ၣ်ခဲအံၤပဟံန့ၢ်ဂ့ၢ်ဝီတကးဒံးဘၣ်အပူၤကွံၥ်ကအိၣ်ဖဲအသီ(၂၀)ဘျဲၣ်ဒံးလီၤပှၤသုးဖိမ့ၢ်ဂ့ၤ, သုးရ့ၣ်သုးထံးခဲလၢၥ်ခဲစ့ ပကိးဖှိၣ်ခိၣ်နၢ်ဒီးဘၣ်ဃးလၢ(ကၠါဖၠၣ်)တၢ်ဖံးတၢ်မၤတဖၣ်အံၤအဖီခိၣ်န့ၣ်ပှၤလၢအဘၣ်ထွဲတဖၣ်ခဲအံၤခီဖျိ လၢကီၢ်ဆၢန့ၣ်ပှၤဟံန့ၢ်ဂ့ၢ်အဃိ (PC)အပှၤမၤဘၣ်ထွဲသးသုတအိၣ်လၢၤတဂ့ၤအဂီၢ်န့ၣ်ပရၤလီၤလံၥ်ပကိးအိၣ်ဖှိၣ်ပတဲနၢ်ပၢၢ်ဒီး ပရၤလီၤလံၥ်ဝံၤလံ.အဝဲမ့ဆဲးမၤဒံးန့ၣ်ပကဟံန့ၢ်ဂ့ၢ်ဝီတုၤလီၤတီၤလီၤ.ဒ်သိးနတဲအသိးလီၤတအိၣ်လ့ၤတက့ၤန့ၣ်တမ့ၢ်ဘၣ်.လၢညါပတစးထီၣ်ပၥ်သူၣ်ပၥ်သးဒံးဘၣ်အခါန့ၣ်သုးဖိလၢလၥ်ခီတဖၣ်အတၢ်ဘျးစဲလိၥ်သးအိၣ်တဘျီခံဘျီန့ၣ်ပထံၣ်ဘၣ်စ့ၢ်မီၤနီၤ”အဂ့ၢ်န့ၣ် စံးဝဲန့ၣ်လီၤ.
စးထီၣ်ဖဲမၠၣ်ဝတံၣ်ထံဆၢကီၢ်ဆၢ(ကၠါဖၠၣ်)တၢ်လံၣ်တၢ်လီတၢ်ဖံးတၢ်မၤတၢ်ဂ့ၢ်ဖျါထီၣ် သုးမီၤစိရိၤအပှၤပၥ်မၤသးနုၥ်လီၤမၤဟးဂီၤဝဲ (ကၠါဖၠၣ်)တၢ်ဖံးတၢ်မၤလီၢ်အိၣ်ထီၣ်အဖီခိၣ် ဖဲန့ၣ်ထံဂုၤကီၢ်ဂၤ(ကၠါဖၠၣ်)ပှၤမၤတၢ်ဖိတဖၣ်ဃ့ၢ်ထီၣ်သုးလီၢ်သုးကျဲနုၥ်လီၤအိၣ်ဝဲ လၢမၠၣ်ဝတံၣ်ပူၤ,ဝ့ၢ်ခိၣ်ဝ့ၢ်ဃၢၤအိၣ်ဝဲဒၣ်အါအါဂီၢ်ဂီၢ်န့ၣ်လီၤ.
ဒ်န့ၣ်အသိး(ကၠါဖၠၣ်)ပှၤမၤတၢ်ဖိတဖၣ်အကျါတနီၤန့ၣ်ဃ့ၢ်ထီၣ်က့ၤလီၤဝဲဆူလၥ်ခီဖၣ်အၣ်ဝ့ၢ်,သထူၣ်,ဘံလ့,ကၠဲးထိၣ်ဝ့ၢ်ဃုၥ်ဒီး ကလုၥ်ဒူၣ်ကီၢ်စဲၣ်ဟီၣ်ကဝီၤလၢအဂၤသ့ၣ်တဖၣ်အပူၤအိၣ်ဝဲဒီး လၢတၢ်စိၥ်ဆှၢခီဝဲ(ကၠါဖၠၣ်)ပှၤမၤတၢ်ဖိတဖၣ်အံၤကျါန့ၣ် ပၣ်ဃုၥ်ဝဲ(PC),(BGF),(DKBA) ခံဖုလၢၥ် လၢအမၤသကိးတၢ်ဒီးသုးမီၤစိရိၤအံၤအဂ့ၢ်န့ၣ် တၢ်ကစီၣ်ဟးထီၣ်ဝဲဖျိဖျိဖျါဖျါ န့ၣ်လီၤ.
လၢတၢ်န့ၣ်အဃိဖဲတလါအံၤလါဒံၣ်စ့ဘၢၣ် ၆ သီအနံၤန့ၣ် လၢဒူသထူၣ်ကီၢ်ရ့ၣ်(သုးက့ ၁) ဖၣ်အၣ်ကီၢ်ဆၣ် KNLA သုးရ့-၁ ဟီၣ်ကဝီၤပူၤ တရူး(ကၠါဖၠၣ်) ၆ ဂၤဒီး (PC)အပှၤနီသိလ့ၣ်ဖိ ၅ ဂၤ လၢအိၣ်ဟဲ က့ၤလီၤလၢ(သုးက့ ၆)ဒီး(သုးက့ ၇) အံၤတဖၣ် တၢ်ဖီၣ်ချုးန့ၢ်အဝဲသ့ၣ်ဒီးတုၤလၢခဲအံၤတၢ်ပၢၤဃၥ်ဒံးဝဲဒၣ်န့ၣ်လီၤ.
တကးဒံးဘၣ်လၢအတကပၤ(ကၠါဖၠၣ်)ပှၤမၤတၢ်ဖိလၢအအိၣ်တ့ၢ်ဒံးဖဲထံဆၢကီၢ်ဆၢတဖၣ်နုၥ်လီၤအိၣ်ဆိးဝဲလၢ(BGF),(DKBA), (PC)ဖီၣ်ကဝဲၤကရူၢ်ကရၢတၢ်ပၢဟီၣ်ကဝီၤတနီၤအပူၤ အမဲၥ်ညါခဲအံၤတၢ်တ့ထီၣ်ဘှီထီၣ်ဝဲတၢ်သူၣ်ထီၣ်သ့ၣ်တဖၣ်အါမးအဂ့ၢ်န့ၣ် တၢ်ကစီၣ်ပၥ်ဖျါ ဝဲအိၣ်အသိးလီၢ်ကဝီၤဖီၣ်စုကဝဲၤကရူၢ်ဘၣ်ထွဲပှၤဘၣ်မူဘၣ်ဒါဒီးကမျၢၢ်လၢအထံၣ်တၢ်ဒီးအမဲၥ်သ့ၣ်တဖၣ် စံးဝဲအိၣ်န့ၣ်လီၤ.
ဘၣ်ဆၣ်(PC)အပှၤလၢအမၤဘၣ်ထွဲသးဒီး(ကၠါဖၠၣ်)တၢ်ဖံးတၢ်မၤတဖၣ်တၢ်နဲၣ်လီၤအိၣ်လၢတၢ်ကဟံဂ့ၢ်ဝီဘၣ်ဆၣ် တကီၢ်ခါအံၤ လၢ မဲၢ်လးထံဝၢ်ခီ,မၠၣ်ဝတံၣ်ဆၢလၥ်ကၠီၤခိၣ်ဟီၣ်ကဝီၤဃုၥ်ဒီးဟီၣ်ကဝီၤတၢ်ပၢလၢအဂၤတဖၣ်အပူၤန့ၣ် တၢ်တ့တီၣ်ဘှီထီၣ်ဝဲ တၢ်သူၣ်ထီၣ်လၢ(ကၠါဖၠၣ်)တၢ်ဖံးတၢ်မၤဂီၢ်အိၣ်ဝဲအဂ့ၢ်န့ၣ် လီၢ်ကဝီၤပှၤဘၣ်မူ ဘၣ်ဒါဘၣ်ထွဲဒီးကမျၢၢ်စံးဝဲအသိး သ့ၣ်ညါဘၣ် န့ၣ်လီၤ.
လၢတၢ်စံးဝဲအိၣ်အဖီခိၣ်အံၤန့ၣ် PC သုးခိၣ် စီၤကၠီၤညိၣ် စံးဝဲဒ်လဲၣ် “ပစံးလၢပဟီၣ်ကဝီၤန့ၣ် ဖီၣ်စုကဝဲၤခဲလၢၥ် အိၣ်ကျဲၣ်ကျီ လိၥ်သးလီၤ.တမံၤဂ့ၤတမၠိဂ့ၤဘၣ်ဃးလၢမဲၢ်လးတၢ်လီၢ်မ့ၢ်ဂ့ၤ,ကၠီၤခိၣ်တၢ်လီၢ်မ့ၢ်ဂ့ၤန့ၣ်တၢ်ကစီၣ်ဟးထီၣ်လၢတၢ်ဟဲသူၣ်လီၤ(ကၠါဖၠၣ်)တၢ်လီၢ်တၢ်ကျဲဒ်သိးသုနၢ်ဟူအသိးလီၤ.တၢ်လီၢ်တၢ်ကျဲအံၤနမ့တဲလၢအိၣ်ဘူးဒီး(PC)ဒုနတဲလၢ(PC)တၢ်လီၢ်တသ့စ့ၢ်ကီးဘၣ်.ဘၣ်မနုၤအဃိလဲၣ်ပတၢ်လီၢ်တၢ်ကျဲအံၤတၢ်ပၥ်ဖးနီၤဖးလီၤဝဲလီၤတံၢ်လီၤဆဲးတအိၣ်ဒံးဘၣ်.ဘၣ်ဃး(ကၠါဖၠၣ်)ဒုကအိၣ်သ့ၣ်သ့လီၤ.ဘၣ်ဆၣ်ကပတဲလၢ(PC)ဟီၣ်ကဝီၤ(PC)မူဒါဒုပတဲလီၤတံၢ်တသ့ဘၣ်မီၤနီၤ”အဂ့ၢ်န့ၣ် စံးဝဲန့ၣ်လီၤ.
(ကၠါဖၠၣ်)တၢ်ဖံးတၢ်မၤတၢ်ပၣ်ဃုၥ်ပၥ်ဂီၢ် အမဲၥ်ညါ လီၤဆီဒၣ်တၢ်(PC),(BGF),ဘူးဒးကညီသုးမုၢ်ဒိၣ်(DKBA)ကရူၢ်သ့ၣ်တဖၣ်အံၤ အပူၤကွံၥ်လၢကီးတရံး-ကြုၢ်တုတၢ်ဒုးတၢ်ယၤအပူၤစ့ၢ်ကီး မ့ၢ်ကရူၢ်ကရၢလၢအမံၤဟူသၣ်ဖျါလၢအပၥ်ဖှိၣ်မၤသကိးတၢ်ဒီးသုးမီၤစိရိၤ စိၥ်ဆှၢဝဲပယီၤသုးဒီး ကျိချံပှၥ်သၣ်တဖၣ်အိၣ်ဝဲန့ၣ်လီၤ.
