လါဒံၣ်စ့ဘၢၣ် ၅ သီ, ၂၀၂၅ နံၣ်, ခ့ၣ်အဲးစံၣ်
ကရ့ၣ်ကီၢ်စဲၣ်အပူၤ အပူၤကွံၥ်လါနိၣ်ဝ့ဘၢၣ်တလါအတီၢ်ပူၤ ခီဖျိသုးမီၤစိရိၤအတၢ်မၤကမၣ်ပှၤဂ့ၢ်ဝီခွဲးယၥ်အဃိ ကမျၢၢ်သံ ၁၆ ဂၤအကျါ ပၣ်ဃုၥ်ဝဲဖိသၣ်တဂၤအဂ့ၢ်န့ၣ် ကရ့ၣ်နံၣ်ဂ့ၢ်ဝီခွဲးယၥ်ကရူၢ်(KnHRG)ထုးထီၣ်ပၥ်ဖျါဝဲဖဲမဟါလါဒံၣ်စ့ဘၢၣ် ၄ သီအနံၤအံၤန့ၣ်လီၤ.
သုးမီၤစိရိၤအံၤခီဖျိသူဝဲကဘီယူၤ,ကျိဖးဒိၣ်ဒီးဟီၣ်လၥ်မ့ၣ်ပိၢ်,ကျိတဖၣ်အဃိ ဘၣ်သံဝဲဖိသၣ် ၁ ဂၤ, ပိၥ်ခွါ ၁၂ ဂၤ, ပိၥ်မုၣ် ၁၃ ဂၤဒီး ဘၣ်ဒိဘၣ်ထံးဝဲပိၥ်ခွါ ၁၂ ဂၤ, ပိၥ်မုၣ် ၆ ဂၤ, ဖိသၣ် ၃ ဂၤ, ပှၤလၢတၢ်ပဲၥ်ဖးနီၤဖးဝဲတဘၣ် ၃၃ ဂၤ ဘၣ်ဒိဘၣ်ထံးဝဲစုၥ်စုၥ်အဂ့ၢ်န့ၣ် စံးဝဲန့ၣ်လီၤ.
လၢန့ၣ်အမဲၥ်ညါလါနိၣ်ဝ့ဘၢၣ်တလါအတီၢ်ပူၤ ပယီၤသုးသူကဘီယူၤလဲၤခးလီၤတၢ်လၢဒူသဝီကမျၢၢ်အိၣ်ဆိးလီၢ်ကျဲအိၣ်ဝဲခဲလၢၥ် ၅ ဘျီ, ခးလီၤကျိဖးဒိၣ် ၅ ဘျီ ဒီး ဖီၣ်ဝဲကမျၢၢ်စ့ၢ်ကီးအိၣ်ဝဲ အဂ့ၢ်န့ၣ် သ့ၣ်ညါဘၣ်န့ၣ်လီၤ.
တကးဒံးဘၣ်ခီဖျိလၢသုးမီၤစိရိၤအတၢ်ဟူးတၢ်ဂဲၤအံၤအဃိ ဟံၣ် ၁၈ ဖျၢၣ်, တၢ်ဘူၣ်တၢ်ဘါတၢ်သူၣ်ထီၣ် ၂ ဖျၢၣ်, ကမျၢၢ်တၢ်သူၣ်ထီၣ် ၅ ဖျၢၣ် ဟးဂီၤဝဲအသိး သိလ့ၣ် ၈ ခိၣ်, ကျီးတၢ်ဖံးအီၣ်မၤအီၣ်လီၢ် ၃ ခါစ့ၢ်ကီးဟးဂီၤဒၣ်အဂ့ၢ်န့ၣ် လံၥ်တၢ်ပၥ်ဖျါအပူၤပၥ်ဖျါဝဲန့ၣ်လီၤ.
ဒ်န့ၣ်အသိးခီဖျိဟီၣ်လၥ်မ့ၣ်ပိၢ်အံၤအဃိ ကမျၢၢ်ပိၥ်ခွါဘၣ်ဒိဝဲတဂၤအသိး ခီဖျိလၢပယီၤသုးခးဝဲဒီးကျိအဃိ ကမျၢၢ်ပိၥ်ခွါသံတဂၤအမဲၥ်ညါ ပယီၤသုးဖီၣ်ဝဲကမျၢၢ်အိၣ်ဝဲ ၁၉ ဂၤအဂ့ၢ်န့ၣ် စံးဝဲန့ၣ်လီၤ.
“လၢတၢ်ဃုထၢအဂီၢ် ပယီၤသုးကျိၤဟဲထီၣ်အဃိ ကမျၢၢ်ထံဖိကီၢ်ဖိတဖၣ်ဘၣ်သုးကဒီးအလီၢ်အကျဲဒီး ဖဲလါယူၤလံဒီးလါအီးကူးအတီၢ်ပူၤ အံၤ ပှၤကမျၢၢ်ဘၣ်သုးလီၢ်သုးကျဲအိၣ်အဂၤ(၂၀၀,၀၀၀)ဃၣ်ဃၣ်ညါအသိး လၢပှၤသ့ၣ်တဖၣ်အံၤအဂီၢ်လိၣ်ဘၣ်ဒံးဝဲဂ့ၢ်ဂီၢ်အူ တၢ်အီၣ် တၢ်အီ,တၢ်ခိၣ်ဒုးသ့ၣ်တဖၣ်”အဂ့ၢ်န့ၣ် KnHRG လံၥ်တၢ်ပၥ်ဖျါအပူၤ ပၥ်ဖျါဝဲန့ၣ်လီၤ.
လၢတၢ်န့ၣ်အဃိ သုးမီၤစိရိၤလၢအမၤသံမၤဝီကမျၢၢ်ထံဖိကီၢ်ဖိအံၤ ထံဂုၤကီၢ်ဂၤကဟံထီၣ်ဖီၣ်ဝဲဂ့ၢ်ဝီဒီးအလီၢ်အိၣ်လၢတၢ်ကဘၣ်မၤ တဲၥ်ကွံၥ်အဂံၢ်လၢအစဲၤလီၤသး အံၤအဂ့ၢ်န့ၣ် KnHRG ဃ့ထီၣ်ဝဲန့ၣ်လီၤ.
တကးဒံးဘၣ်ကဘၣ်ပတုၥ်ကွံၥ်တၢ်ဆါန့ၢ်ကျိချံပှၥ်သၣ်ဆူသုးမီၤစိရိၤအအိၣ်ဒီး ပှၤလၢအဆါန့ၢ်ကဘီယူၤသိဒီးမၤစၢၤဆီၣ်ထွဲသုးကရူၢ် တဖၣ်အံၤကြၢးလၢတၢ်ကဘၣ်ဟံအရ့အဂ့ၢ်န့ၣ် ဃ့ထီၣ်စ့ၢ်ကီးဝဲန့ၣ်လီၤ.
