လါဒံၣ်စ့ဘၢၣ် ၅ သီ, ၂၀၂၅ နံၣ်, ခ့ၣ်အဲးစံၣ်
ပကိကီၢ်ခီဒိၣ် တီအူကီၢ်ရ့ၣ် အိၣ်တွ့(အုတ်တွင်း)ဝ့ၢ်မုၢ်နုၥ် ဘူၣ်တလ့(ဘုတလင်း)သဝီ ကမျၢၢ်ပှၤလီၢ်အိၣ်ကမှံဖိတဖၣ် ခဲအံၤလိၣ်ဘၣ်ဝဲဂ့ၢ်ဂီၢ်အူတၢ်ကူတၢ်သိး ဒီး တၢ်အီၣ်တၢ်အီတၢ်ဆီၣ်ထွဲမၤစၢၤအဂ့ၢ်န့ၣ် သ့ၣ်ညါဘၣ်လၢပှၤမၤစၢၤတၢ်ဖိအအိၣ်န့ၣ်လီၤ.
ဖဲအပူၤကွံၥ်လါနိၣ်ဝ့ဘၢၣ် ၂၇ သီ ဟါခီအဆၢကတီၢ် ပယီၤသုးဒီးတၢ်ပၢၢ်ဆၢသုးကရူၢ်အဘၢၣ်စၢၤတၢ်ဒုးကဲထီၣ်ဝံၤလီၢ်ခံ ခီဖျိပယီၤသုးကဘီယူၤလဲၤခးလီၤတၢ်အဃိ ဘူၣ်တလ့သဝီ ဃုၥ်ဒီးဒူသဝီလၢအိၣ်ဘူးဖဲန့ၣ်တဖၣ် ကမျၢၢ်အဂၤ(၁၀၀)ဃၣ်ဃၣ် ဘၣ်ဃ့ၢ်ထီၣ်ဝဲ န့ၣ်လီၤ.
တကီၢ်ခါခဲအံၤစ့ၢ်ကီးသဝီနုၥ်လီၤဟးထီၣ်ကျဲလၢတၢ်ဒုးကဲထီၣ်အလီၢ်သ့ၣ်တဖၣ်န့ၣ် ပယီၤသုးကးတံၢ်ကွံၥ်ဝဲတကးဒံးဘၣ်အမဲၥ်ညါ ခီဖျိတၢ်အိၣ်သးတဂ့ၤဒံးဘၣ်အဃိ ဟံၣ်ခိၣ်(၁၈)ဒူၣ် ပှၤနီၣ်ဂံၢ်(၈၀)ဘျဲၣ် ကမျၢၢ်ပှၤလီၢ်အိၣ်ကမှံဖိတဖၣ်အံၤတုၤလၢခဲအံၤက့ၤဟံၣ် တသ့ဒီး လိၣ်ဘၣ်ဝဲတၢ်အီၣ်တၢ်အီအဂ့ၢ်န့ၣ် တၢ်တိစၢၤမၤစၢၤကရူၢ် ပှၤဘၣ်မူဘၣ်ဒါတဂၤ စံးဝဲန့ၣ်လီၤ.
အဝဲစံးဝဲလၢ“အခိၣ်သ့ၣ်န့ၣ်လိၣ်ဘၣ်ဝဲတၢ်ကူတၢ်ကၤ,ပ့ၢ်ပီၤ,ယၣ်လုး,တၢ်အီၣ်တၢ်အီတဖၣ်လီၤ.ပှၤလၢအအိၣ်တ့ၢ်ဒံးတဖၣ်န့ၣ် ဒ်တၢ်သ့ အိၣ်ဒီးပှၤအသိးပလဲၤကိးထုးထီၣ်အဝဲသ့ၣ်.တၢ်လီၢ်တနီၤန့ၣ်(ဖိလဲ)တန့ၢ်ဘၣ်အဃိ မ့ၢ်အဝဲသ့ၣ်အိၣ်ဖဲလဲၣ်န့ၣ်ပတသ့ၣ်ညါ ဘၣ်.” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
တကးဒံးဘၣ်ဖဲလါနိၣ်ဝ့ဘၢၣ် ၂၇ သီတၢ်ဒုးကဲထီၣ်အခါန့ၣ်စ့ၢ်ကီး ခီဖျိပယီၤသုးကဘီယူၤလဲၤခးလီၤတၢ်အဃိ ဘူၣ်တလ့သဝီဃုၥ်ဒီး ဒူသဝီလၢအိၣ်ဘူးဖဲတၢ်ခိၣ်တၢ်ဃၢၤကမျၢၢ်တဖၣ်ဃ့ၢ်ထီၣ်ဝဲသဝီဒီတဖျၢၣ်ဒီး ပှၤသ့ၣ်တဖၣ်အံၤတၢ်ဘူၣ်တၢ်ဘါကရူၢ်ကရၢပှၤဘၣ်မူ ဘၣ်ဒါဒီးပှၤလၢအိၣ်ဘူးဖဲန့ၣ်တဖၣ်အံးထွဲကွၢ်ထွဲဆီၣ်ထွဲမၤစၢၤအဝဲသ့ၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
ခီဖျိတၢ်ဒုးတၢ်ယၤအဃိလီၢ်ကဝီၤကမျၢၢ်လၢအဃ့ၢ်ထီၣ်သ့ၣ်တဖၣ် တနီၤန့ၣ် စိၥ်တၢ်တချုးဃ့ၢ်ထီၣ်ဝဲနီၢ်တဂၤဆ့ကၤတဘ့ၣ်လီၤဒီး ခါဆူညါတၢ်မ့ချံၣ်ဒိၣ်ထီၣ်န့ၣ်ကလိၣ်ဘၣ်ဝဲဆ့ကၤကလၢၤ,ယၣ်လုးဒီးပ့ၢ်ပီၤသ့ၣ်တဖၣ်အဂ့ၢ်န့ၣ် ကရူၢ်ကရၢလၢအမၤစၢၤပှၤဃ့ၢ်မှံဟးဖျိး တဖၣ်စံးဝဲန့ၣ်လီၤ.
ဒ်န့ၣ်အသိးဖဲအပူၤကွံၥ်လါဒံၣ်စ့ဘၢၣ် ၃ သီအနံၤစ့ၢ်ကီး လၢတီအူကီၢ်ရ့ၣ် လၢၢ်ဒိၣ်ကီၢ်ဆၣ် ညီၤပ့ၤသၤသဝီ(ညောင်ပင်သာ)အပူၤ ခီဖျိပယီၤသုးခးလီၤကျိဖးဒိၣ်အဃိ ကမျၢၢ်သံ(၄)ဂၤဒီးဘၣ်ဒိဘၣ်ထံးအါမးကဲထီၣ်ဒံးဝဲအဂ့ၢ်န့ၣ် သ့ၣ်ညါဘၣ်လၢဂံၢ်ခီၣ်ထံးပှၤဟ့ၣ် တၢ်ကစီၣ်ဖိအအိၣ်န့ၣ်လီၤ.
