လါယူၤလံ ၂၄ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဘျံးဒဝဲၢ်ကီၢ်ရ့ၣ် တနီသရံၣ်ကီၢ်ခီ ယ့ၣ်ဖၠူၣ်(ရေဖြူ)ဟီၣ်ကဝီၤ ဒူသဝီအပူၤ ပယီၤသုးကျိၤနုၥ်လီၤအခါ လီၢ်ကဝီၤကမျၢၢ်တဖၣ်ဃ့ၢ်ထီၣ်ဝဲဒီး ဖဲန့ၣ်ပယီၤသုးအံၤဒွဲၣ်အူအီၣ်မၤဟးဂီၤဟံၣ်,က့ၤစိၥ်ဃုၥ်ဝဲသိလ့ၣ်ယီၢ် အိၣ်အခိၣ်လၢ အကယၤအဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါစံးဝဲန့ၣ်လီၤ.
ဖဲအပူၤကွံၥ်လါယူၤလံထီၣ် ၉ တုၤလၢ ၁၉ သီအခါ ပယီၤသုးကျိၤဟဲထီၣ်နုၥ်လီၤဟူးဂဲၤဝဲဒၣ်လၢဒဝဲၢ် (ဧကနိ)သဝီ ဒီး ယ့ၣ်ဖၠူၣ်(ရေဖြူ)သဝီတကပၤဝံၤ က့ၤစိၥ်ကမျၢၢ်အဆဲးကၢးဒီးမၤဟးဂီၤကမျၢၢ်အဟံၣ်အဃီဘၣ်ဟဲအိၣ်ထီၣ်ဝဲဒ်အံၤလီၤ အဂ့ၢ်န့ၣ် ခ့ၣ်အဲၣ်ယူၣ် ပှၤဘၣ်မူဘၣ်ဒါတဂၤ စံးဝဲဒ်အံၤန့ၣ်လီၤ.
အဝဲစံးဝဲလၢ“ဖဲတလါအံၤလါယူၤလံ ၉ သီတုၤလၢ ၁၉ သီန့ၣ် ပယီၤသုးကျိၤနုၥ်လီၤဟူးဂဲၤလၢ(ဧကနိ)သဝီဒီး ယ့ၣ်ဖၠူၣ် တကပၤ. တၢ်ဒုးဒုကဲထီၣ်တအိၣ်ဘၣ်.ဘၣ်ဆၣ်အဝဲသ့ၣ်န့ၣ်ခးလီၤကျိဖးဒိၣ်လဲးလိးလီၤ. ဖဲအဝဲသ့ၣ်နုၥ်လီၤအခါန့ၣ်သဝီဖိ တဖၣ်န့ၣ် ဃ့ၢ်ထီၣ်. ပှၤဃ့ၢ်ထီၣ်ဘျီအဝဲသ့ၣ်န့ၣ်ဒွဲၣ်အူအီၣ်မၤဟးဂီၤကမျၢၢ်အဟံၣ်ကအိၣ်လၢအဖျၢၣ်(၁၀)ဘျဲၣ်ညါ. မ့ဝံၤက့ၤ စိၥ်ဝဲပှၤသဝီဖိအ(ဆဲးကၢး)ကအိၣ်အခိၣ်လၢအကယၤညါ.မ့မ့ၢ်ယ့ၣ်ဖၠူၣ်သဝီဖိဒုဘၣ်ဒိဆါကတၢၢ်လီၤ”အဂ့ၢ်န့ၣ် စံးဘၣ် ခ့ၣ်အဲး စံၣ်-ကညီတၢ် ကစီၣ်န့ၣ်လီၤ.
တကးဒံးဘၣ်ဖဲ(၉)သီအနံၤစ့ၢ်ကီး ပယီၤသုးတဖၣ်အံၤနုၥ်လီၤဟူးဂဲၤဝဲဖဲဒဝဲၢ်(အထူးစီးပွားရေးဇုန်)ဟီၣ်ကဝီၤပူၤ အခါ ဖီၣ်မၤသံဃုၥ်ဝဲသးစၢ် ကိၤအသၤ,ကိၤလံၤယိၤ)ဒီးကိၤမၠၣ်သူၤ သၢဂၤလၢ အဟူးဂဲၤမၤ တၢ်လၢကူၣ်သ့ဒီးပှၤဃ့ၢ်မှံဟးဖျိး အဂီၢ်တကပၤအံၤအဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါစံးဘၣ်ခ့ၣ်အဲးစံၣ်-ကညီ တၢ်ကစီၣ် အိၣ်အသိး လီၢ်ကဝီၤတၢ်ကစီၣ် တဖၣ် စ့ၢ်ကီးပၥ်ဖျါထီၣ်ဝဲအိၣ်န့ၣ်လီၤ.
ဒီးသးစၢ်(၃)ဂၤအံၤပယီၤသုးဖီၣ်မၤသံအီၤဝံၤလီၢ်ခံ ဖဲလါယူၤလံ ၂၀ သီအနံၤန့ၣ် တၢ်က့ၤထံၣ်က့ၤအစိၣ်လၢ (ဧကနိ)သဝီ (ဆီအုန်း)သိကျိးပူၤအဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါစံးဝဲန့ၣ်လီၤ.
တကီၢ်ခါခဲအံၤ ပယီၤသုးကျိၤလၢနုၥ်လီၤဟူးဂဲၤဖဲန့ၣ်တဖၣ် က့ၤကဒါဆူအသုးကလၢၤအိၣ်တၢ်လီၢ်န့ၣ်လံအဃိ သဝီ(၂)ဖျၢၣ်အံၤ ဃုၥ်ဒီးကမျၢၢ်လၢအိၣ်ဘူးဖဲန့ၣ်လၢအဃ့ၢ်ထီၣ်တဖၣ် တနီၤက့ၤအိၣ်လၢအဒူသဝီပူၤလံဘၣ်ဆၣ် ဘၣ်အိၣ်ဒံးဝဲ လၢတၢ်ပလီၢ်ပဒီ,တၢ်ပျံၤတၢ်ဖုးပူၤ အဂ့ၢ်န့ၣ် ခ့ၣ်အဲၣ်ယူၣ် ပှၤဘၣ်မူဘၣ်ဒါတဂၤဃီဝဲန့ၣ် စံးဝဲအသိးသ့ၣ်ညါဘၣ် န့ၣ်လီၤ.
