လါဒံၣ်စ့ဘၢၣ် ၂၅ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ဟီၣ်ကဝီၤ ကၠဲးထိၣ်ကီၢ်အပူၤ ဖဲမဟါဂီၤခီအဆၢကတီၢ်န့ၣ် ပယီၤသုးအကျိဖးဒိၣ်အဃိ အံလူၢ်ကရူၢ်ပူၤ ကမျၢၢ်လၢအလဲၤဒွး(ဗေဒင်)အံၤ သံ ၃ ဂၤ ဒီးဘၣ်ဒိဘၣ်ထံး ၂ ဂၤအဂ့ၢ်န့ၣ် သ့ၣ်ညါဘၣ်လၢကမျၢၢ်လၢအိၣ်ဘူး ဖဲန့ၣ် တဖၣ် အအိၣ်န့ၣ်လီၤ.
ဖဲမဟါလါဒံၣ်စ့ဘၢၣ် ၂၄ သီ ၁၀း၀၀ ဘျဲၣ်အဆၢကတီၢ် လၢအံလူၢ်ကရူၢ်အပူၤ ပယီၤသုး(ခမရ-၃)ခးစိဃီၤဝဲကျိဖးဒိၣ် ၂ ဖျၢၣ်လီၤ တဲၥ်ပိၢ်ဖးထီၣ်လၢ အံလူၢ်သဝီဖးဒိၣ်(ခတ္တာ)သီခါဖၠၣ်ကရၢၢ်ပူၤအဃိ သဝီဖိပိၥ်မုၣ်(၃)ဂၤသံဝဲတဘျီဃီဖဲတၢ်ကဲထီၣ် သးန့ၣ်ဒီး ပိၥ်မုၣ်(၁)ဂၤ,ပိၥ်ခွါ(၁)ဂၤ ဘၣ်ဒိဘၣ်ထံးဘၣ်ဟဲကဲထီၣ်သးဒ်အံၤလီၤအဂ့ၢ်န့ၣ် သဝီဖိတဂၤစံးဝဲန့ၣ်လီၤ.
“အိၣ်ခးစိတၢ်လၢ(ခမရ-၃)သုးကလၢၤန့ၣ်.အလီၤတဲၥ်ဖဲအံလူၢ်ဖးဒိၣ်သဝီ ခၣ်တၣ်သီခါဖၠၣ်အဃိ ပှၤပိၥ်မုၣ်သံတဘျီဃီဖဲန့ၣ် ၃ ဂၤ, အဘၣ်ဒိခီန့ၣ် ၂ ဂၤ. ပှၤသံ ၃ ဂၤန့ၣ်အိၣ်လၢသၤတတါသဝီဒီးဘၣ်ဘွ့ကိသဝီတကပၤ. အဝဲသ့ၣ်ဟဲလၢသီခါဖၠၣ်န့ၣ်ဒွးဝဲလၢကဟဲ ဒွး(ဗေဒင်)လၢသီခါအိၣ်မီၤနီၤ. မ့မ့ၢ်လၢအဘၣ်ဒိခံဂၤန့ၣ်ဘၣ်ဝဲအယီၢ်ဒ့,အစုကၢ် နးနးတချုးစ့ၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
သၤတတါ(သံတံတား)သဝီဖိဒီးဘၣ်ဘွ့ကိသဝီဖိပိၥ်မုၣ်လၢအသံ ၃ ဂၤန့ၣ်မ့ၢ်ဝဲနီၢ်ခဲၤသွဲၤဝ့(၃၀)နံၣ်, နီၢ်မံၣ်ထွ့(၂၃)နံၣ် ဒီး နီၢ်ခၠီနီ(၄၉)နံၣ် အဂ့ၢ်န့ၣ် သဝီဖိစံးဝဲအသိးသ့ၣ်ညါဘၣ်န့ၣ်လီၤ.
ဒ်န့ၣ်အသိးသဝီဖိလၢအဘၣ်ဒိဘၣ်ထံး ၂ ဂၤအံၤစ့ၢ်ကီးခီဖျိအဘၣ်ဒိနးနးကျံၤကျံၤအဃိ တၢ်ဆှၢအဝဲသ့ၣ်ဆူတၢ်ဆါဟံၣ်ဒီး လၢန့ၣ်အမဲၥ်ညါပယီၤသုးခးလီၤကျိဖးဒိၣ်ဘျီဝဲအံၤ သီခါဖၠၣ်တၢ်သူၣ်ထီၣ်ဟးဂီၤစ့ၢ်ကီးအိၣ်ဝဲအဂ့ၢ်န့ၣ် သဝီဖိစံးဝဲအသိး သ့ၣ်ညါဘၣ်န့ၣ်လီၤ..
အံလူၢ်ကရူၢ် လၢပယီၤသုးခးလီၤကျိဖးဒိၣ်ဘျီဝဲအံၤတၢ်ဒုးကဲထီၣ်တအိၣ်နီမံၤအသိး အပူၤကွံၥ်လါဒံၣ်စ့ဘၢၣ် ၁၂ သီ အခါစ့ၢ်ကီး ခီဖျိလၢပယီၤသုးခးလီၤကျိဖးဒိၣ်အံၤအဃိ ဖုဝါသံၣ်(ဖိဝါသ့ၤ)သဝီဖိသံ ၂ ဂၤ ဒီးတၢ်ဘၣ်ဒိ ဘၣ်ထံးတၢ်ဟးဂူၥ် ဟးဂီၤကဲထီၣ်တ့ၢ် ဒံးဝဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
